કપડાનો ધંધો કરતા દેવાદાર થતા યુવાને શોર્ટ કર્ટ શોધ્યો, પણ નવસારી SOG પોલીસે કરી ધરપકડ  

નવસારી : ઓછા સમયમાં વધુ રૂપિયા બનાવવાની યુવાનોની લાલચ તેમને અવળા રસ્તે પહોંચાડી છે. આવું જ કઈ નવસારીના તલાવચોરા ગામે બન્યુ છે. તલાવચોરાના યુવાને રાતો રાત રૂપિયા બનાવી લેવા હતા અને એણે સરળ રસ્તો શોધી કાઢ્યો, ઘરે જ કલર પ્રિન્ટર ઉપર 200 અને 100 રૂપિયાના દરની નકલી ચલણી નોટો બનાવી તેના ઉપયોગની ફિરાકમાં હતો. પરંતુ બજારમાં નકલી ચલણી નોટ વટાવવા જાય એ પૂર્વે જ નવસારી SOG પોલીસે તેને પકડી પાડી જેલના સળીયા ગણતો કરી દીધો છે.

આરોપી તેજસ પાસેથી 200 અને 100 રૂપિયાના દરની 62 ચલણી નોટ કબ્જે કરી

મહેનત વગર રૂપિયા કમાવવા સરળ નહીં, પણ મુશ્કેલ છે. ત્યારે નવસારીના ચીખલી તાલુકાના તલાવચોરા ગામે રહેતા અને કાપડનો વ્યવસાય કરતા તેજસ સુરેશ ચૌહાણ પણ મહેનત વગર રાતોરાત રૂપિયાવાળો થવાના સપના જોતો હતો. જેમાં તેણે ઘરે જ રૂપિયા છાપવાનો શાતીર વિચાર ઉઠતા, ઓછા રોકાણે ભારતીય ચલણી નોટ છાપવાનું શરૂ કર્યુ હતું. તેજસે ભારતીય ચલણની 200 અને 100 રૂપિયાના દરની ચલણી નોટો છાપવા માટે સ્કેનર સાથેનું કલર પ્રિન્ટર લીધુ હતું. જેના ઉપર તેજસે ચલણી નોટને સ્કેન કર્યા બાદ ચલણી નોટના કાગળને મળતો જ કાગળ વાપરી તેની કલર પ્રિન્ટ કાઢી હતી. અસલ ચલણી નોટ જેવી દેખાય એ રીતે જ નોટ કાપતો હતો. તેજસની રાતોરાત લખપતિ બનવાનું સપનું કોઇકે લીક કરી નાખ્યું અને તેની જાણ નવસારી સ્પેશ્યલ ઓપરેશન ગ્રુપ પોલીસને થતા ગત રોજ તલાવચોરા ગામે તેજસના ઘરે છાપો મારી, 200 ના દરની 56 અને 100 ના દરની 6 નોટ મળીને કુલ 62 નોટ મળીને 11,800 રૂપિયાની નકલી ચલણી નોટો સાથે તેજસ પટેલને રંગે હાથ પકડી પાડ્યો હતો. સાથે જ પોલીસે ઘટના સ્થળેથી સ્કેનર સાથેનું કલર પ્રિન્ટર, A/4 સાઈઝના પેપર સહિતનો મુદ્દામાલ કબજે કર્યો હતો. સમગ્ર મુદ્દે ચીખલી પોલીસ મથકે ફરિયાદ નોંધાવતા, PSI એચ. એસ. પટેલે આગળની તપાસ હાથ ધરી છે.

આરોપી તેજસ પટેલ 6 દિવસના પોલીસ રિમાન્ડ પર

પોલીસની પ્રાથમિક તપાસમાં આરોપી તેજસ અગાઉ પ્રોહીબીશનના ગુનામાં પકડાઈ ચુક્યો હતો. જોકે હાલ કપડાનો ધંધો કરતો તેજસ દેવાદાર બનતા તેણે શોર્ટકર્ટ અપનાવી રૂપિયા બનાવી લેવાનો કીમિયો રચ્યો હતો. પરંતુ નકલી ચલણી નોટો છાપીને બહાર વટાવવા જાય એ પૂર્વે જ પોલીસે પકડી પાડ્યો હતો. પોલીસે આરોપી તેજસને ચીખલી કોર્ટ સમક્ષ રજૂ કરી 6 દિવસનાં પોલીસ રિમાન્ડ મેળવી આગળની તપાસ હાથ ધરી છે. જેમાં તેની સાથે અન્ય કોઈ જોડાયેલો છે કે કેમ.? એણે નકલી નોટ છાપીને ક્યાંક વટાવી છે કે કોઈને આપી છે..? એની તપાસને ચીખલી પોલીસ વેગ આપશે.