15 વર્ષોમાં 4 રાજ્યોમાં 58 ચોરીઓને આપ્યો અંજામ, નવસારીમાં જ બે વાર પકડાયો

નવસારી : બાળપણમાં જુગારનાં રવાડે ચઢીને અને યુવાનીમાં પ્રેમમાં નાસીપાસ થતા ચોરીમાં રીઢા બનેલા ચોરને નવસારી LCB પોલીસે બાતમીને આધારે નેશનલ હાઈવે નં 48 પર નવસારીના ગ્રીડ ઓવરબ્રીજ પાસેથી દબોચી લીધો હતો. એક સ્ક્રૂ ડ્રાઈવરની મદદથી જ ચપટી વગાડતા દરવાજાનો આગળો તોડીને ઘરમાં પ્રવેશમાં માહિર ચોરે 15 વર્ષોમાં મહારાષ્ટ્ર, રાજસ્થાન, હરિયાણા અને ગુજરાતમાંથી 58 ચોરીઓને અંજામ આપ્યો છે. જયારે નવસારી પોલીસે જ તેને એક વર્ષમાં બીજીવાર લાખોના મુદ્દામાલ સાથે પકડી પાડ્યો છે.

નવસારીના વિશાલનગરમાં આહીર દંપતીને ત્યાં કરી હતી લાખોની ચોરી

નવસારીના વોર્ડ નં. 13 માં ઇટાળવા વિસ્તારની વિશાલનગર સોસાયટીમાં ભાડેથી રહેતા જ્યોત્સના આહીર અને તેમના પતિ અમ્રત આહીર બંને નોકરી કરે છે, જેમના બંધ ઘરને ગત 8 ફેબ્રુઆરીના રોજ બપોરના સમયે કોઈ ચોરે નિશાન બનાવી 1 લાખ રૂપિયા રોકડા અને સોના ચાંદીના દાગીનાની ચોરી કરી ફરાર થઇ ગયો હતો. ઘટનાની જાણ થતા જ નવસારી ગ્રામ્ય પોલીસે તપાસ આરંભી હતી, જેમાં નવસારી LCB ની ટીમ પણ તપાસમાં જોતરાઈ હતી. જેમાં પોલીસે શહેરમાં લાગેલા સીસીટીવી કેમેરા તેમજ બાતમીદારોના નેટવર્કને એક્ટીવ કરી અરોઈનું પગેરૂ શોધવા મથામણ આરંભી હતી. જેમાં ગત રોજ નવસારી LCB પોલીસને સફળતા મળી અને નેશનલ હાઈવે નં. 48 પર ગ્રીડ ઓવરબ્રિજ નજીકથી બાઇક ઉપર નવસારી આવી રહેલા 30 વર્ષીય જીમી ઉર્ફે દીપક બીપીન શર્માને દબોચી લીધો હતો. સાથે જ પોલીસે જીમી પાસેથી બાઇક તેમજ ચોરીનો મુદ્દામાલ મળી કુલ 7.34 લાખ રૂપિયાનો મુદ્દામાલ કબ્જે કરી આરોપીના રિમાન્ડ મેળવવાની તજવીજ હાથ ધરી છે.

હરિયાણામાં રહેતા પિતરાઈ ભાઈની સાથે ચોરી કરતા શીખ્યો

પોલીસ પકડમાં આવેલ ચોરીનો આરોપી જીમી શર્મા બાળપણમાં જુગારના રવાડે ચઢ્યો હતો. જુગારમાં રૂપિયા હારી જતા, હરિયાણામાં રહેતા પિતરાઈ ભાઈની સાથે ચોરી કરતા શીખ્યો હતો. શરૂઆતમાં જીમી પત્થર મારીને દરવાજાનો આગળો તોડી નાંખતો હતો અને ઘરમાં પ્રવેશી ચોરી કરતો હતો. બાદમાં દારૂ તેમજ અન્ય નશાની આદત સાથે ઐયાશી કરવા જીમી ચોરીને અંજામ આપતો, દરમિયાન રાજસ્થાનની છોકરી સાથે તેને પ્રેમ થયો હતો, પણ પ્રેમમાં નિષ્ફળતા મળતા જીમી રીઢો ગુનેગાર બની ગયો હતો. વર્ષ 2009 થી ચોરી કરતા મુળ મહારાષ્ટ્રના નંદુરબારના જીમી ઉર્ફે દીપકના પિતા બીપીન શર્મા 6 મહિના અગાઉ નવસારીના વિજલપોર ખાતે રેડીમેડ કપડાની દુકાન ચલાવતા હતા, ત્યારે પણ નવસારી LCB પોલીસે જીમી શર્માને 7.12 લાખના ચોરીના મુદ્દામાલ સાથે પકડી પાડ્યો હતો. પોલીસ પકડમાં આવ્યા બાદ જીમી જેલમાં હતો, પણ થોડા સમય અગાઉ જામીન પર છુટતા ફરી ચોરીઓ કરવા માંડ્યો હતો. જેમાં નવસારીની 2, ભરૂચની 3 અને તાપી જિલ્લાની 1 મળીને કુલ 6 ચોરીનો ભેદ ઉકલાયો છે. જયારે છેલ્લા 15 વર્ષોમાં જીમીએ મહારાષ્ટ્રમાં 25, હરિયાણામાં 20, રાજસ્થાનમાં 4 અને ગુજરાતમાં 9 મળીને કુલ 58 ચોરીઓને અંજામ આપ્યો છે.

સ્ક્રૂ ડ્રાઈવરથી દરવાજો ખોલી, 20 થી 25 મિનીટમાં ચોરી કરી, થતો હતો રફૂચક્કર

આરોપી જીમી એકલે હાથે જ ચોરી કરવામાં માહિર છે, બાઇક ઉપર સોસાયટી અને મોહલ્લાઓમાં રેકી કર્યા બાદ દિવસમાં જ અને ખાસ કરીને બપોરના સમયે ચોરી કરવા પહોંચી જતો હતો. સાથે રાખેલા સ્ક્રૂ ડ્રાઈવરથી દરવાજો એકી ઝાટકે તોડીને ઘરમાં પ્રવેશ કરીને 20 થી 25 મિનીટમાં જ ચોરી કરી, ફરાર થઇ જતો હતો. જીમી ચોરી કરવા પણ નશો કરીને જ જતો અને ચોરીના રૂપિયાથી મુંબઈ, ગોવા જેવા શહેરોમાં જઈ ઐયાશીમાં રૂપિયા ઉડાવતો હતો અને રૂપિયા પુરા થતા ફરી ચોરી કરવા નીકળી પડતો હતો. ત્યારે પોલીસે આરોપીના રિમાન્ડ મેળવવાની તજવીજ હાથ ધરી છે, સાથે જ કડકમાં કડક સજા થાય એવા પ્રયાસો પણ હાથ ધર્યા છે.