નવસારી LCB પોલીસે 2.04 લાખના 3360 કિલો લોખંડના સળિયા કબ્જે કર્યા

નવસારી : નેશનલ હાઈવે નં. 48 પર ગેરકાયદે લોખંડના સળિયા ભરીને જતા ટેમ્પોનો ફિલ્મી સ્ટાઈલમાં નવસારી LCB પોલીસે પીછો કરી, તેને કણબાડ ગામ પાસ અટકાવ્યો હતો. પોલીસે ટેમ્પોમાં વગર બીલના 2.04 લાખ રૂપિયાના 3360 કિલો વજનના લોખંડના સળિયા કબ્જે કરી, ટેમ્પો ચાલક અને ક્લિનરની ધરપકડ કરી હતી.

પોલીસે ઘટના સ્થળેથી 7.24 લાખનો મુદ્દામાલ કબ્જે કર્યો

મળતી માહિતી અનુસાર, નવસારી લોકલ ક્રાઈમ બ્રાન્ચની ટીમ નેશનલ હાઈવે નં. 48 ઉપર પેટ્રોલીંગમાં હતી. દરમિયાન ASI દિગ્વિજયસિંહ જગતસિંહ અને ASI લલિત અશોકભાઈને સંયુક્ત રીતે બાતમી મળી હતી કે, એક ટેમ્પોમાં ગેરકાયદે લોખંડના સળિયા સુરત તરફ જઈ રહ્યા છે. જેને આધારે પોલીસે હાઈવે ઉપર નવસારીના અષ્ટગામના ઓવરબ્રિજના દક્ષિણ છેડે ફિલ્ડિંગ ગોઠવી હતી. દરમિયાન બાતમીવાળો ટેમ્પો આવતા પોલીસે તેને અટકાવવાનો પ્રયાસ કર્યો હતો. પરંતુ ટેમ્પો ચાલકે પોલીસને જોઈ ટેમ્પો પૂર ઝડપે ભગાવી દેતા, પોલીસે ટેમ્પોનો પીછો કર્યો હતો. ફિલ્મી સ્ટાઈલમાં ટેમ્પો પાછળ પડેલી નવસારી LCB પોલીસે આગળ કણબાડ ગામના રાધાકૃષ્ણ મંદિર પાસે સળિયા ભરેલ ટેમ્પોને અટકાવવામાં સફળ રહે હતી. પોલીસે ટેમ્પો ચાલક અને ચીખલીના બલવાડા ગામે રહેતા દિપક ઉર્ફે દિપ અજય પવાર તેમજ ક્લીનર અને વલસાડ જિલ્લાના ડુંગરી સોનવાડા ગામના સુશિલ નવીન પટેલ પાસેથી લોખંડના સળિયાના બીલ કે અન્ય પુરાવા માંગ્યા હતા. પરંતુ તેઓ બીલ કે અન્ય દસ્તાવેજો આપી ન શકતા, ચોરી કે અન્ય રીતે સળિયા મેળવેલા હોવાનું જાણી, પોલીસે દિપક પવાર અને સુશિલ પટેલની ધરપકડ કરી હતી. સાથે જ ઘટના સ્થળેથી 2.04 લાખ રૂપિયાના 3360 કિલો વજનના લોખંડના સળિયા, 5 લાખ રૂપિયાનો ટેમ્પો અને 20 હજાર રૂપિયાના બે મોબાઈલ ફોન મળી કુલ 7.24 લાખ રૂપિયાનો મુદ્દામાલ કબ્જે કર્યો હતો. સમગ્ર મુદ્દે નવસારી ગ્રામ્ય પોલીસ મથકે ફરિયાદ નોંધાવતા ગ્રામ્ય પોલીસે તપાસને વેગ આપ્યો છે.

પોલીસે ચોરીના 4 મોબાઈલ અને બે બાઇક કબ્જે કર્યા

નવસારી : નવસારી શહેરમાં ગત દિવસોમાં થયેલી બાઇક ચોરી તેમજ મોબાઈલ ચોરીના ગુનામાં વિજલપોર પોલીસને સફળતા મળી છે. વિજલપોર પોલીસે બાતમીને આધારે જલાલપોરથી બે લબરમુછીયા ચોરને પકડી પાડી, તેમની પાસેથી ચોરીના 4 મોબાઇલ અને 2 બાઇક કબ્જે કરી હતી.

મજૂરી કરતા યુવાનો ચઢ્યા હતા ચોરીના રવાડે

મળતી માહિતી અનુસાર, નવસારી શહેરમાં છેલ્લા થોડા દિવસોમાં બાઇક ચોરી સાથે જ મોબાઈલ ચોરી થવાની ઘટનાઓ વધી હતી. નવસારી ટાઉન પોલીસના ચોપડે ગુનાઓ પણ નોંધાયા હતા. દરમિયાન વિજલપોર પોલીસને બાતમીદારો પાસેથી માહિતી મળી કે, શહેરમાં થતી મોબાઇલ અને બાઇક ચોરીના ગુના સાથે વિજલપોરના જ શનેશ્વર નગરમાં રહેતા બે યુવાનોની લીંક હોય શકે છે. જેથી પોલીસે શનેશ્વર નગરમાં હનુમાનજી મંદિર પાસે રહેતા 22 વર્ષીય આશિષ ઉર્ફે વિકાસ ઉર્ફે કીંગ રામચંદ્ર સરોજ અને 23 વર્ષીય ગોલુ ચંદ્રભૂષણ પટેલને પકડી પાડ્યા હતા. જેમની કડક પૂછપરછમાં સિસોદ્રા ગામેથી 1 મોબાઇલ ફોન, અડદી ગામેથી 1 મોબાઈલ ફોન અને વિજલપોરના આંબાવાડી વિસ્તારમાંથી બે મોબાઈલ ફોન ચોર્યા હતા. જયારે 1 બાઇક બારડોલી ખાતેથી અને નવસારી શહેરમાંથી બાઇક ચોરી કર્યાની કબુલાત કરતા, પોલીસે તમામ મુદ્દામાલ કબ્જે કરી, આરોપી આશિષ અને ગોલુની ધરપકડ કરી તપાસને વેગ આપ્યો છે.

નવસારી LCB પોલીસે 80 હજારનો મુદ્દામાલ કર્યો કબ્જે

નવસારી : નવસારી શહેરના લંગરવાડમાં રીક્ષા ભાડે ફેરવવા આપતા રીક્ષા માલિકના જ ઘરે જ એક લાખથી વધુની ચોરી કરનાર ચોરને તેના સાથે સાથે નવસારી LCB પોલીસે ઝડપી પાડ્યો છે. પોલીસે બંને ચોરટાઓ પાસેથી 80 હજારથી વધુનો મુદ્દામાલ પણ કબ્જે કર્યો છે.

પોલીસે ટેકનિકલ સર્વેલન્સ અને હ્યુમન ઇન્ટેલિજન્સની મદદથી આરોપીઓનું પગેરૂ શોધ્યું

મળતી માહિતી અનુસાર, નવસારી શહેરના દરગાહ રોડ વિસ્તારમાં આવેલ લંગરવાડમાં રહેતા રીયાઝ શેખ રીક્ષા ભાડે ફેરવવા આપે છે. જેના ઘરેથી ગત દિવસોમાં ચાંદીના દાગીના અને રોકડ મળી 1 લાખથી વધુની ચોરી થઈ હતી. ઘટનામાં રીયાઝે નવસારી ટાઉન પોલીસ મથકે ફરિયાદ નોંધાવતા પોલીસ એક્શનમાં આવી હતી. જેમાં નવસારી LCB પોલીસની ટીમ પણ જોતરાઇ હતી. પોલીસે લંગરવાડ સહિત શહેરના અલગ અલગ વિસ્તારોના CCTV કેમેરાના ફૂટેજ ચકાસ્યા, સાથે જ હ્યુમન ઇન્ટેલિજન્સની મદદથી આરોપીઓનું પગેરૂ શોધવાની મથામણ શરૂ કરી હતી. જેમાં પોલીસને સફળતા મળી અને બાતમીને આધારે નવસારીના વિજલપોરના રામજીપાર્ક ખાતે રહેતા અને રીક્ષા ચાલક તુષાર દંતાણી (19) તેમજ તેના સાથી અને વિજલપોરના લક્ષ્મીનગરમાં રહેતા સુરેશ દંતાણી (21) ને પકડી પાડ્યા હતા. બંનેની કડકાઇથી પૂછપરછ કરતા રીયાઝના ઘરે ચોરીની કબૂલાત કરી હતી. પોલીસે બંને આરોપીઓ પાસેથી 80 હજાર રોકડ સહિત કુલ 80,570 રૂપિયાનો મુદ્દામાલ કબ્જે કર્યો હતો. જ્યારે નવસારી કોર્ટમાં રજૂ કરી બંનેના રિમાન્ડ મેળવવાની તજવીજ હાથ ધરી છે.

બંને આરોપીઓ લુન્સીકુઈ વિસ્તારમાં નાસ્તાની લારી ઉપર પણ કરતા હતા કામ

પોલીસની પકડમાં આવેલા તુષાર દંતાણી રીયાઝ શેખ પાસેથી જ રીક્ષા ભાડે ફેરવવા લાવતો હતો. જેથી રીયાઝની આવક વિશે તેને માહિતી હતી. જેથી તુષારે તેના સાથી સુરેશ દંતાણી સાથે ચોરીનો પ્લાન ઘડીને ચોરી કરી હતી. ઉલ્લેખનિય છે કે, તુષાર અને સુરેશ દંતાણી બંને શહેરના લુન્સીકુઈ સ્થિત સરબતિયા તળાવ પાસે ઉભી રહેતી નાસ્તાની લારી ઉપર પણ કામ કરતા હતા. જેમાં સુરેશ પાઉંભાજી અને તુષાર પાઉં આમલેટની લારી ઉપર કામ કરતા હતા. જ્યારે તુષાર દંતાણી અગાઉ પણ વર્ષ 2020 માં ચોરીના ગુનામાં જેલની હવા ખાઇ ચુક્યો છે.