MT 5 ટનલ બંને બાજુથી ખોદાણ કરી, 18 મહિનામાં થઇ પૂર્ણ

નવસારી : ભારત સરકારનો મહત્વાકાંક્ષી બુલેટ ટ્રેન પ્રોજેક્ટ ઝડપ સાથે નવા કીર્તિમાન સ્થાપી રહ્યો છે. પ્રોજેક્ટ અંતર્ગત 7 ટનલ બની રહી છે, જેમાં મહારાષ્ટ્રના પાલઘરનાં સફાલે ખાતેની પર્વતીય ટનલ પૂર્ણ થતા રેલ્વે મંત્રી અશ્વિની વૈષ્ણવે બુલેટ ટ્રેન પ્રોજેક્ટની ઝડપી કાર્યપદ્ધતિના વખાણ કરવા સાથે મધ્યમ વર્ગને સસ્તી મુસાફરી પુરી પાડશેની આશા વ્યક્ત કરી છે.

અત્યાધુનિક ડ્રિલ અને બ્લાસ્ટ પદ્ધતિથી તૈયાર થઇ ટનલ

ભારત સરકાર દ્વારા દેશમાં પ્રથમ બુલેટ ટ્રેન ગુજરાતના અમદાવાદથી મહારાષ્ટ્રના મુંબઈ સુધી દોડાવવાનું આયોજન કરી, શરૂ કરેલા બુલેટ ટ્રેન પ્રોજેક્ટની ઝડપ પણ વધી છે. ગુજરાતમાં ટ્રેકનાં કામ સાથે નદીઓ, હાઈવે પરના પુલ સહિત રેલ્વે સ્ટેશનો પણ તૈયાર થવાને આરે છે. જયારે મહારાષ્ટ્રમાં પણ મહત્વના માઈલસ્ટોન મેળવી રહ્યો છે. જેમાં મહારાષ્ટ્રના પાલઘરના સફાલે નજીક પર્વતને કોરીને બુલેટ ટ્રેન માટે ટનલ બનાવવાનું કામ પૂર્ણ થયુ છે. MT – 5 ટનલ બનાવવા પર્વતને બંને બાજુથી ખોદવામાં આવ્યો હતો. ટનલના ખોદાણ માટે અત્યાધુનિક ડ્રિલ અને બ્લાસ્ટ પદ્ધતિનો ઉપયોગ કરવામાં આવ્યો હતો. ખોદાણ દરમિયાન જમીનની સ્થિતિનું વાસ્તવિક નિરીક્ષણ કરવા સાથે વાસ્તવિક સ્થળ સ્થિતિને આધારે શોટ ક્રિટ, રોક બોલ્ટ અને જાળીના ગર્ડર માટેની સપોર્ટ સીસ્ટમ મુકવામાં મદદરૂપ થાય છે. ટનલના નિર્માણ વખતે વેન્ટીલેશન, આગની ઘટનાને નિવારવાના પગલા અને યોગ્ય રીતે બહાર નીકળવા સાથે તમામ સલામતીના માનકોનું કડક પાલન કરવામાં આવ્યું હતું.

508 કિમી લાંબા બુલેટ ટ્રેન પ્રોજેક્ટમાં 27.4 કિમી લંબાઈની ટનલ

અમદાવાદ મુંબઈ હાઈ સ્પીડ રેલ MAHSR પ્રોજેક્ટની કુલ લંબાઈ 508 કિમી છે. જેમાં ટનલની કુલ લંબાઈ 27.4 કિમી છે. જેમાંથી 21 કિમી ભુગર્ભ ટનલ અને 6.4 કિમી સપાટીની ટનલ છે. 8 પર્વતીય ટનલમાંથી મહારાષ્ટ્રની 7 ટનલની લંબાઈ 6.05 કિમી છે અને ગુજરાતની એક ટનલ 350 મીટર લાંબી છે. મહારાષ્ટ્રની 7 ટનલના કાર્યરત કામમાં 820 મીટર લાંબી MT-1 ટનલનું કામ 15 ટકા, 228 મીટર લાંબી MT-2 ટનલનું કામ હાલ શરૂ થયુ છે. 1403 મીટર લાંબી MT-3 ટનલનું કામ 35.5 ટકા, 1260 મીટર લાંબી MT-4 ટનલનું કામ 31 ટકા પૂર્ણ થયુ છે. જયારે MT-5 ટનલ પર્વતીય ટનલોમાં સૌથી લાંબી છે અને 1480 મીટર એટલે દોઢ કિમી ટનલ પૂર્ણ થઇ છે. સાથે જ 454 મીટર લાંબી MT-6 ટનલનું કામ 35 ટકા તેમજ 417 મીટર લાંબી MT-7 ટનલનું કામ 28 ટકા પુરૂ થયુ છે.

ભારતના પરિવહન માળખામાં મોટુ પરિવર્તન સાબિત થશે બુલેટ ટ્રેન

બુલેટ ટ્રેન પ્રોજેક્ટ 508 કિમી લાંબો છે, જેમાં 352 કિમી ગુજરાત અને દાદરા નગર હવેલીમાં અને અને 156 કિમી મહારાષ્ટ્રમાં છે. બુલેટ ટ્રેન પ્રોજેક્ટ સાબરમતી, અમદાવાદ, આણંદ, વડોદરા, ભરૂચ, સુરત, બિલીમોરા, વાપી, બોઈસર, વિરાર, થાણે અને મુંબઈ જેવા મુખ્ય શહેરોને જોડી ભારતના પરિવહન માળખામાં મોટુ પરિવર્તન સાબિત થશે.

બુલેટ ટ્રેન શરૂ થતા અમદાવાદથી મુંબઈ માત્ર 1.58 કલાકમાં પહોંચાડશે

MT – 5 ટનલનાં પૂર્ણતા પર કેન્દ્રીય રેલ્વે મંત્રી અશ્વિની વૈષ્ણવે બુલેટ ગતિએ ચાલી રહેલા પ્રોજેક્ટ કાર્યનાં વખાણ કરતા કહ્યુ કે, બુલેટ ટ્રેન પ્રોજેક્ટ નોંધપાત્ર રોજગાર સર્જી રહ્યો છે અને કામગીરી દરમિયાન વધારાની તકો પણ ઉભી કરશે. બુલેટ ટ્રેન પ્રોજેક્ટ પૂર્ણ થતા મુંબઈ અને અમદાવાદ વચ્ચે મુસાફરી સમય ઘટાડશે, બુલેટ ટ્રેનમાં માત્ર 1.58 કલાકમાં જ મુખ્ય વ્યાપારી કેન્દ્રો પર પહોંચવાને કારણે બે રાજ્યના અર્થતંત્રને જોડવા સાથે આર્થિક પ્રવૃત્તિઓમાં પણ વધારો કરશે. બુલેટ ટ્રેન થકી નવા ઔધોગિક અને IT ઉદ્યોગના વિકાસને મજબૂતી મળશે. જેના થકી લાંબાગાળાના આર્થિક લાભ સાથે આરામદાયક અને સસ્તી મુસાફરી મધ્યમ વર્ગની આકાંક્ષાઓને પૂર્ણ કરશે. આ પ્રોજેક્ટ રોડ પરિવહનની સરખામણીએ 95 ટકા ઓછો કાર્બન ડાયોક્સાઇડ ઉત્સર્જન થશે.

જિલ્લા કલેકટર મારફતે શિક્ષણ મંત્રીને આવેદનપત્ર પાઠવ્યુ

નવસારી : ગુજરાત સરકાર દ્વારા રાજયની તમામ વિશ્વવિદ્યાલયોમાં વિદ્યાર્થીઓને પ્રવેશ આપવા માટે કેન્દ્રીય પ્રવેશ પદ્ધતિ બનાવી, ગુજરાત કોમન એડમીશન સર્વિસ (GCAS) પોર્ટલ બનાવ્યુ છે, પરંતુ આ પોર્ટલ પર અનેક ખામીઓ છે, જેને સરકારની બ્યુરોકેસી દ્વારા સુધારવામાં આળસ કરવામાં આવતી હોવાના આક્ષેપો સાથે નવસારી જિલ્લા ABVP દ્વારા 7 મુદ્દાઓના સુધારાની માંગ સાથે જિલ્લા કલેકટર મારફત રાજ્યના શિક્ષણ મંત્રીને આવેદનપત્ર પાઠવવામાં આવ્યુ છે.

48 કલાકમાં હકારાત્મક કાર્યવાહી ન કરવામાં આવે, તો આંદોલનની ચીમકી

અખિલ ભારતીય વિદ્યાર્થી પરિષદ (ABVP) 75 વર્ષોથી વિદ્યાર્થીઓની સમસ્યાઓ માટે કાર્યરત છે, ત્યારે ગુજરાત સરકાર દ્વારા રાજયની તમામ વિશ્વવિદ્યાલયો અને તેના સંલગ્ન કોલેજોમાં વિદ્યાર્થીઓને પ્રવેશ આપવા માટે કેન્દ્રીય પ્રવેશ પ્રક્રિયા બનાવવામાં આવી છે. જેમાં ડિજીટલ માધ્યમનો ઉપયોગ કરવામાં આવ્યો છે અને સરકારે GUJARAT COMMON ADDMISSION SERVICE (GCAS) પોર્ટલ બનાવવામાં આવ્યું છે. પરંતુ આ પોર્ટલ પર અનેક ખામીઓ છે, જેને કારણે વિદ્યાર્થીઓને ઘણી મુશ્કેલીઓ પડી રહી છે. ત્યારે આ સમસ્યાઓના સમાધાન માટે આજે નવસારી જિલ્લા ABVP ના કાર્યકર્તાઓ દ્વારા નવસારી જિલ્લા કલેકટરના ચીટનીસને આવેદનપત્ર આપી, રાજ્યના શિક્ષણ મંત્રી ઋષિકેશ પટેલને 7 મુદ્દાઓ સુચવી કેન્દ્રીયકૃત પ્રવેશ પ્રક્રિયાના પોર્ટલમાં સુધારા કરવાની માંગ કરી છે. સાથે જ જો 48 કલાકમાં સરકાર દ્વારા પોર્ટલમાં સુધારો ન કરવામાં આવશે, તો ABVP રસ્તા પર ઉતરી, ઉગ્ર આંદોલન કરશેની ચીમકી પણ ઉચ્ચારી છે.

આ 7 મુદ્દાઓ દર્શાવી, પોર્ટલ ઉપર સુધારો કરવાની કરી માંગ

ઘણા વિદ્યાર્થીઓ પ્રવેશથી વંચિત છે, તેમને માટે પ્રવેશ પ્રક્રિયા શરૂ કરવામાં આવે, ગ્રામ્ય વિદ્યાર્થીઓ ટેકનોલોજી અને પ્રક્રિયાની જાણકારીના અભાવને કારણે પ્રવેશથી વંચિત ન રહે, વિદ્યાર્થી પહેલા રાઉન્ડમાં એડમીશન મેળવે છે, એ બીજા રાઉન્ડમાં ભાગ લઇ શકતો નથી અને તે પ્રવેશ પ્રક્રિયામાંથી બહાર નીકળી જાય છે. વિદ્યાર્થીએ પ્રવેશ રદ્દ કરવો હોય કે ફોર્મમાં રહેલ ભુલ સુધારી શકાતી નથી, GCAS દ્વારા લેવાતો ડેટા ક્યાં ક્યાં ઉપયોગમાં લેવામાં આવે છે, એની માહિતી આપવામાં આવે, કોલેજના મેરીટ લીસ્ટ કયા માપદંડથી બને છે, એની કોઈપણ પ્રકારની માહિતી નથી. જેના કારણે પોર્ટલની પાર્દાશીતા ઉપર સવાલો ઉભા થાય છે, પોર્ટલ ઉપર કોઈ દસ્તાવેજની ચકાસણી શક્ય નથી, વિદ્યાર્થી જે જાતી દર્શાવે, એને જ માની લેવામાં આવે છે, જેથી પ્રવેશ આપવામાં ભુલ થઇ શકે છે, LLB લો કોલેજની પ્રવેશ પ્રક્રિયા શરૂ નથી થઇ, જેને તાત્કાલિક શરૂ કરવામાં આવે, કેટલાક સ્નાતક અભ્યાસક્રમોના છેલ્લા સેમેસ્ટરના પુન: ચકાસણી કે પુરક પરીક્ષાના પરિણામ બાકી છે, ત્યારે PG વિદ્યાર્થીઓ માટે અલગ પ્રવેશ પ્રક્રિયાની વ્યવસ્થા કરવામાં આવે અથવા પરિણામ જાહેર કરવામાં આવે, પોર્ટલ પર કઈ કોલેજમાં કેટલી બેઠકો છે, કેટલી બાકી છે, કટઓફ ક્યાં છે, ફી કેટલી છે અને આરક્ષિત બેઠકો કેટલી છે, એની માહિતી ઉપલબ્ધ કરાવવામાં આવે એવી માંગણીઓ કરવામાં આવી છે.

RESCO થકી 2.73 કરોડના ખર્ચે 700 કિલો વોટનો સોલાર રૂફ ટોપ પ્લાન્ટ લગાવાયો

નવસારી : વીજળી બચાવવા મારે હવે કુદરતી ઉર્જાના સ્ત્રોત ઉપર ધ્યાન કેન્દ્રિત કરવામાં આવી રહ્યું છે, જેમાં સૌર ઉર્જા થકી વીજળી ઉત્પાદન અને તેનો ઉપયોગ સામાન્ય થતુ જાય છે. ત્યારે ભારત સરકારના મહત્વાકાંક્ષી બુલેટ ટ્રેન પ્રોજેક્ટ અંતર્ગત અમદાવાદ ખાતે તૈયાર થયેલા સાબરમતી મલ્ટી ટ્રાન્ઝીટ હબ બિલ્ડીંગ (રેલ્વે સ્ટેશન) માં વીજળી મેળવવા 2.73 કરોડ રૂપિયાના ખર્ચે ગુજરાતમાં પ્રથમવાર રીન્યુએબલ એનર્જી સર્વિસ કંપની (RESCO) દ્વારા સોલાર રૂફ ટોપ પ્લાન્ટ લગાવવામાં આવ્યો છે.

સોલાર રૂફ ટોપ પ્લાન્ટ થકી દર વર્ષે 10 લાખ યુનિટ વીજળી ઉત્પન્ન થવાની આશા.!!

ભારત સરકાર દ્વારા દેશમાં પ્રથમ બુલેટ ટ્રેન અમદાવાદથી મુંબઈ સુધી દોડાવવાની તૈયારી છે. જે પ્રોજેક્ટ અનેક બાધાઓ બાદ બુલેટ ગતિએ દોડી રહ્યો છે. જેમાં રેલ્વે ટ્રેક સાથે સાથે રેલ્વે સ્ટેશનો પણ તૈયાર થઇ રહ્યા છે. અમદાવાદ ખાતે બુલેટ ટ્રેન પ્રોજેક્ટ અંતર્ગત પ્રથમ રેલ્વે સ્ટેશન એટલે કે સાબરમતી મલ્ટી મોડલ ટ્રાન્ઝીટ હબ બિલ્ડીંગ પૂર્ણતાને આરે છે. ત્યારે સમગ્ર બિલ્ડીંગની વીજળીની જરૂરીયાતને ધ્યાને રાખવા સાથે જ ગ્રીન એનર્જીને અપનાવી નેશનલ હાઈસ્પીડ રેલ કોર્પોરેશન કંપની દ્વારા ગુજરાતમાં પ્રથમવાર રીન્યુએબલ એનર્જી સર્વિસ કંપની (RESCO) થકી 2.73 કરોડ રૂપિયાના ખર્ચે 700 કિલો વોટની ક્ષમતા ધરાવતો સોલાર રૂફ ટોપ પ્લાન્ટ નાંખવામાં આવ્યો છે. RESCO થકી લગાવવામાં આવેલ સોલાર રૂફ ટોપ પ્લાન્ટને કારણે કંપનીને આવનારા 25 વર્ષો પ્લાન્ટની જાળવણી ખર્ચ કરવાની ચિંતા પણ ટળી છે. સમગ્ર પ્રોજેક્ટને મળનારી વીજળીનો દર પણ આગામી 25 વર્ષો સુધી પ્રતિ યુનિટ 3.9 રૂપિયા નક્કી કરવામાં આવ્યો છે, જે હાલના DISCOM દર પ્રતિ યુનિટ 11 રૂપિયા કરતા ઘણો નીચો છે. સાથે જ સોલાર રૂફ ટોપ થકી દર વર્ષે 10 લાખ યુનિટ વીજળી ઉત્પન્ન થવાની આશા છે.

RESCO મોડલ હેઠળ નેટ મીટરીંગ માટે મંજૂરી મેળવનારી પ્રથમ કંપની

સાબરમતી હબમાં RESCO મોડ હેઠળ સોલાર રૂફ ટોપ પ્લાન્ટ લગાવીને નેશનલ હાઈસ્પીડ રેલ કોર્પોરેશને દૂરદર્શિતા વાપરીને એક પણ રૂપિયો ખર્ચ કર્યા વિના 25 વર્ષો માટે જરૂરી વીજળી તો મેળવી જ છે. પરંતુ RESCO મોડ હેઠળ નેટ મીટરીંગ માટે મંજૂરી મેળવનારી પ્રથમ કંપની પણ બની છે. સાથે જ કંપનીએ ગુજરાત એનર્જી ડેવલપમેન્ટ એજન્સી (GEDA) માં નોંધણી પણ કરાવી છે.

સાબરમતી હબમાં એક જગ્યાએ જ અનેક ટ્રાન્સપોર્ટ સુવિધાઓનું જોડાણ

અમદાવાદ ખાતે બુલેટ ટ્રેન પ્રોજેક્ટ અંતર્ગત તૈયાર થયેલ સાબરમતી મલ્ટી મોડલ ટ્રાન્ઝીટ હબ બિલ્ડીંગમાં એક જગ્યાએ અનેક ટ્રાન્સપોર્ટ સુવિધાઓ મળી રેહશે. સાબરમતી હબમાં બુલેટ ટ્રેનના સ્ટેશન સાથે જ અન્ય ટ્રેન, મેટ્રો, બીઆરટી, રાજ્ય પરિવહનની બસ, ટેક્સી જેવી અનેક ટ્રાન્સપોર્ટ સુવિધાઓનું જોડાણ મળતા મુસાફરોને ઘણી રાહત મળશે. NHSRCL દ્વારા સાબરમતી હબમાં સૌર ઉર્જા થકી વીજળી માટે RESCO મોડના ઉપયોગને પ્રોજેક્ટ અંતર્ગત આવનારા અન્ય રેલ્વે સ્ટેશનો, ઇમારતો, ડેપો અને શેડમાં પણ સૌર ઉર્જાનો ઉપયોગ થશે. જે અન્ય સસ્થાઓને પણ પર્યાવરણને અનુકુળ ટેકનોલોજીનો ઉપયોગ કરવા પ્રેરિત કરશે.

શું છે RESCO મોડલ..?   

વર્તમાન સમયમાં વીજળીથી ચાલતા ઉપકરણો વધવા સાથે જ કંપની, દુકાનો અને ઘરોમાં વીજળીનો ઉપયોગ વધ્યો છે. ત્યારે વીજળી માટે પુન:પ્રાપ્ય ઉર્જા ઉપર ધ્યાન વધ્યું છે, જેમાં પણ સૌર ઉર્જા થકી વીજ ઉત્પાદન કરવા ઓલર રૂફ ટોપ પ્લાન્ટની માંગ પણ વધી છે. સોલાર પ્લાન્ટ થકી ઉત્પન્ન થતી વીજળી, ઘર, કંપની કે દુકાનની વીજળી ફ્રી કરી આપે છે, સાથે જ બચતી વીજળીના વેચાણ થકી રૂપિયા પણ રળી આપે છે. પરંતુ એનો ખર્ચ વધુ હોવાથી ઘણા લોકો સોલાર પ્લાન્ટ લગાવી નથી શકતા. ત્યારે રીન્યુએબલ એનર્જી સર્વિસ કંપની (RESCO) દ્વારા તમારા ઘર, કંપની કે દુકાનની ઈમારત પર કંપનીના ખર્ચે સોલાર પ્લાન્ટ લગાવી આપે છે, સાથે જ એની જાળવણી તેમજ જરૂર પડ્યે સમારકામ પણ કંપની જ કરશે. હવે સોલાર પેનલ થકી ઉત્પન્ન થતી વીજળી કંપની તમને રાહત દરે આપશે અને બાકીની વીજળી ગ્રીડને વેચશે. જેથી વગર રોકાણે અને ઓછા ખર્ચે વીજળી મળતી થશે, જે વીજ કંપની દ્વારા મળતી વીજળીના ખર્ચ કરતા ઓછો હશે.