અપરાધ

ચીખલીની નાકોડા જવેલર્સમાં લૂટનો મુખ્ય આરોપી 8 વર્ષે પકડાયો

Published

1 year ago

February 9, 2024

Chikhli

નવસારી LCB પોલીસે આરોપીને રાજસ્થાનની બેગુ જેલમાંથી ટ્રાન્સફર વોરંટથી કબ્જો લીધો

નવસારી : નવસારીના ચીખલીના બજારમાં આવેલી નાકોડા જવેલર્સમાં 8 વર્ષ અગાઉ મધ્યપ્રદેશની જાંબુવા ગેંગે બંદૂકની અણીએ 35.70 લાખ રૂપિયાના દાગીનાની લૂટ ચલાવી ફરાર થયા હતા. જેમાં 8 વર્ષથી ફરાર અને 10 હજારના ઇનામી આરોપીને નવસારી LCB પોલીસ રાજસ્થાનની બેગુ જેલમાંથી ટ્રાન્સફર વોરંટથી નવસારી લઇ આવી હતી. આરોપીએ નવસારી, સુરત, રાજસ્થાન અને મધ્યપ્રદેશના ગુનાઓનો પણ ભેદ ખુલવા પામ્યો છે.

8 વર્ષ અગાઉ તમંચાની અણીએ 10 લૂટારૂઓએ 35.70 લાખના દાગીનાની ચલાવી હતી લૂટ

8 વર્ષ અગાઉ નવસારીના ચીખલી ગામના બજારમાં આવેલી નાકોડા જવેલર્સમાં સાંજના સમયે અચાનક કેટલાક લૂટારૂઓ પાવડાના હાથા, કુહાડી, પથ્થર, કોયતા અને દેશી તમંચા સાથે ઘુસ્યા હતા અને જવેલર્સ કમલેશ શાહ, તેના કર્મચારીને માર મારીને દુકાન બહાર કાઢીને દુકાનામાં મુકેલા 35.70 લાખ રૂપિયાના 80 ટકા સોના ચાંદીના દાગીનાની લૂટ ચલાવી ફરાર થયા હતા. ભાગતી વખતે જવેલર્સ બહાર ફ્રૂટની લારીવાળાને પણ માર માર્યો હતો અને હવામાં ગોળીબાર પણ કર્યો હતો. લૂટની ઘટનામાં બજારમાં ઉપસ્થિત લોકોએ હિંમત કરીને એક અરોપી રાજુ વસુનીયાને પકડી પાડ્યો હતો, જયારે બાકીના 9 ભાગવામાં સફળ રહ્યા હતા. જોકે સમગ્ર ઘટનાની જાણ થતા નવસારી જિલ્લા પોલીસનો કાફલો ચીખલી પહોંચ્યો હતો અને ઉચ્ચ અધિકારીઓ સહિત જિલ્લાની પોલીસ તપાસમાં જોતરાઈ હતી. જેમાં નવસારીના ગણદેવી તાલુકાના ખાપરવાડા ગામે અજાણ્યા લોકોની હિલચાલની જાણ થતા જ નવસારી અને વલસાડ બંને જિલ્લાની પોલીસે કોમ્બિંગ કરીને બીજા 8 લૂટારૂને પકડી પાડ્યા હતા. જોકે એક આરોપી શેતાનસીંગ ખેમા બારીયા ભાગવામાં સફળ રહ્યો હતો. સાથે જ લૂટનો મુદ્દામાલ રિકવર કરવામાં પોલીસ નિષ્ફળ રહી હતી.

આરોપી શેતાનસીંગ પડાવાથી ત્રણ રાજ્યોના ગુનાઓનો ભેદ ઉકેલાયો

8 વર્ષોથી ભાગતા ફરતા આરોપીને શોધવા નવસારી LCB પોલીસની ટીમ કામે લાગી હતી, જેમાં શેતાનસીંગ રાજસ્થાનની બેગુ જેલમાં સજા ચિત્તોડગઢ જિલ્લામાં કરેલા ગુનાની સજા કાપી રહ્યો હોવાની માહિતી મળતા જ, પોલીસે રાજસ્થાન જઈ, લૂટના આરોપી શેતાનસીંગ બારીયાનો ટ્રાન્સફર વોરંટથી કબ્જો લઇ નવસારી લઇ આવી હતી. આરોપીને લૂટના ગુનામાં તપાસ અર્થે ચીખલી પોલીસને સોપવામાં આવ્યો છે, જેની પ્રાથમિક પૂછપરછમાં નવસારીના ચીખલીની લૂટ સહિત સુરત શહેર, સુરત ગ્રામ્ય, વડોદરા ગ્રામ્ય, રાજસ્થાનના ચિત્તોડગઢના બે અને મધ્યપ્રદેશના કલ્યાણપુરાનો એક મળી કુલ 7 ગુનાઓનો ભેદ ખુલ્યો છે. પોલીસે આરોપીને કોર્ટ સમક્ષ રજૂ કરી રિમાન્ડની તજવીજ હાથ ધરી છે.

Post Views: 200

Up Next

30 હજારના વિદેશી દારૂ સાથે સુરતની મહિલા પકડાઈ

Don't Miss

ખેતરોમાંથી જનરેટર તેમજ ખેતીના સાધનોની ચોરી કરતી ટોળકી ઝડપાઇ

Click to comment

અપરાધ

6.23 લાખના વિદેશી દારૂ સાથે ટેમ્પો ચાલકની ધરપકડ

Published

1 month ago

June 14, 2025

Navsari

નવસારી ગ્રામ્ય પોલીસે બોરીયાચ ટોલનાકા પાસેથી પકડ્યો દારૂનો જથ્થો

નવસારી : નેશનલ હાઈવે નં. 48 પર નવસારીના બોરીયાચ ટોલનાકા પાસેથી નવસારી ગ્રામ્ય પોલીસે બાતમીને આધારે 6.23 લાખ રૂપિયાનો વિદેશી દારૂ ભરેલ ટેમ્પો સાથે ચાલકની ધરપકડ કરી હતી. જયારે એકને વોન્ટેડ જાહેર કરીને તપાસને વેગ આપ્યો છે.

પોલીસે ઘટના સ્થળેથી 16.28 લાખનો મુદ્દામાલ કર્યો કબ્જે

મળતી માહિતી અનુસાર, નવસારી જિલ્લામાંથી રોજના લાખોના વિદેશી દારૂની હેરાફેરી થાય છે. ત્યારે નવસારી ગ્રામ્ય પોલીસના HC નજુ જીલુ અને HC અજય રમેશને ખાનગી રાહે બાતમી મળી હતી કે, એક કથ્થાઈ રંગના ટેમ્પોમાં વિદેશી દારૂનો જથ્થો દમણથી વાપી, વલસાડથી નેશનલ હાઈવે પર નવસારી થઇને આગળ સુરત તરફ જનાર છે. જેને આધારે ગ્રામ્ય પોલીસની ટીમે નેશનલ હાઈવે નં. 48 પર નવસારીના બોરીયાચ ટોલનાકા પાસે ફિલ્ડીંગ ગોઠવી હતી. દરમિયાન બાતમીવાળો ટેમ્પો આવતા પોલીસે તેને અટકાવી તપાસ કરતા, ટેમ્પોમાં આગળના ભાગે દોરા ધાગાનાં બોબીનનાં બોક્ષની પાછળ વિદેશી દારૂનો જથ્થો ભર્યો હતો. જેમાં 6,23,760 રૂપિયાની વ્હીસ્કી બીયરની કુલ 2136 બાટલીઓ મળી આવી હતી. જેથી પોલીસે ટેમ્પો ચાલક અને મહારાષ્ટ્રના નાશિક જિલ્લાના નિફાડ તાલુકાના પીમપ્લસ રામાયે ગામના આનંદનગરમાં રહેતા 31 વર્ષીય કાનીફનાથ પુરીની ધરપકડ કરી હતી. જેની પૂછપરછમાં વિદેશી દારૂનો જથ્થો અશ્વિન નામના વ્યક્તિએ ભરાવી આપ્યો હતો, જેથી પોલીસે અશ્વિનને વોન્ટેડ જાહેર કર્યો હતો. જયારે ઘટના સ્થળેથી વિદેશી દારૂ સાથે 10 લાખ રૂપિયાનો ટેમ્પો અને 5 હજાર રૂપિયાના મોબાઈલ ફોન સાથે કુલ 16.28 લાખ રૂપિયાનો મુદ્દામાલ કબ્જે કરી, નવસારી ગ્રામ્ય પોલીસ મથકમાં પ્રોહીબીશન એક્ટ હેઠળ ગુનો નોંધી તપાસને વેગ આપ્યો છે.

Post Views: 61

અપરાધ

ઇટાળવા નહેર પાસેથી 3 જુગારીઓ પકડાયા, 6 ભાગવામાં સફળ

Published

1 month ago

June 14, 2025

Navsari

નવસારી ગ્રામ્ય પોલીસે 2.૩૩ લાખનો મુદ્દામાલ કર્યો કબ્જે

નવસારી : નવસારી શહેરના ઇટાળવા સ્થિત નહેર નજીકની ખુલ્લી જગ્યામાં તીનપત્તીનો જુગાર રમતા 3 શકુનિઓને નવસારી ગ્રામ્ય પોલીસે પકડી પાડ્યા હતા. જયારે પોલીસને જોઈ 6 જુગારીઓ ભાગવામાં સફળ રહ્યા હતા.

જુગારીઓ બેખોફ જુગાર રમી રહ્યા હતા અને પોલીસ ત્રાટકી

મળતી માહિતી અનુસાર, નવસારીના ઇટાળવા વિસ્તારમાં આવેલ લેક પાલ્મ વિલાની સામે નહેર નજીકમાં આવેલ ખુલ્લી જગ્યામાં કેટલાક લોકો રૂપિયા ઉપર હારજીતનો તીનપત્તીનો જુગાર રમી રહ્યા હતા. જેની બાતમી મળતા જ નવસારી ગ્રામ્ય પોલીસે ઘટના સ્થળે છાપો માર્યો હતો. પોલીસને જોઈ નહેર જુગારિયાઓમાં નાસભાગ મચી જવા પામી હતી. જોકે પોલીસે તરત તરાપ મારીને કાલીયાવાડીના તલાવડી ફળિયાના જતીન પટેલ, નવસારીના ભેંસતખાડા માછીવાડના મહેશ દંતાણી અને તીઘરા નવી વસાહતમાં રહેતા યોગેશ કુંકણાને દબોચી લીધા હતા. જયારે ઘટના સ્થળેથી નવસારીના કસ્બાપાર ગામના વિવેક ઉર્ફે વાણીયો નિર્વાણ, નવસારીના કબીલપોરના જામપીર મોહલ્લાના અમિત જોગી, નવસારીના તિઘરા નવી વસાહતના ભાવિન પટેલ, નવસારીના ઝવેરી સડકના સલીમ મંગેરા, નવસારીના ભેંસતખાડા માછીવાડના હિમાંશુ ઢીમ્મર અને દશેરા ટેકરીના અલ્પેશ ઉર્ફે અપ્પુ ભાગવામાં સફળ રહ્યા હતા, જે 6 જુગારીઓને પોલીસે વોન્ટેડ જાહેર કર્યા હતા. જયારે ઘટના સ્થળેથી દાંવમાં મુકેલા તેમજ આરોપીઓની અંગ ઝડતીમાંથી 10,500 રૂપિયા રોકડા, 13 હજાર રૂપિયાના ત્રણ મોબાઈલ ફોન, 2.10 લાખ રૂપિયાની 4 બાઇક મળીને કુલ 2.૩૩ લાખ રૂપિયાનો મુદ્દામાલ કબ્જે કરી, નવસારી ગ્રામ્ય પોલીસ મથકે જુગાર ધારા હેઠળ ગુનો નોંધી તપાસને વેગ આપ્યો છે.

Post Views: 162

અપરાધ

4.07 લાખનો વિદેશી દારૂ ભરેલ પીકઅપ ટેમ્પો સાથે એક પકડાયો

Published

1 month ago

June 12, 2025

Navsari

પોલીસે સેલવાસના રમેશ અને દારૂ મંગાવનારને વોન્ટેડ જાહેર કર્યા

નવસારી : નેશનલ હાઈવે નં. 48 પર નવસારીના બોરીયાચ ટોલનાકા પાસેથી નવસારી LCB પોલીસે બાતમીને આધારે 4.07 લાખના વિદેશી દારૂ ભરેલા પીકઅપ ટેમ્પો સાથે ચાલકની ધરપકડ કરી હતી. જયારે દારૂ ભરાવનાર સેલવાસના રમેશ અને દારૂ મંગાવનાર અજાણ્યાને વોન્ટેડ જાહેર કર્યા હતા.

LCB પોલીસે ઘટના સ્થળેથી 9.16 લાખનો મુદ્દામાલ કર્યો કબ્જે

મળતી માહિતી અનુસાર, નવસારી લોકલ ક્રાઈમ બ્રાંચની ટીમ નેશનલ હાઈવે નં. 48 પર પેટ્રોલિંગમાં હતી. દરમિયાન LCB ના HC નયન હનુભા અને HC દિગ્વિજયસિંહ રવજીભાઇની સંયુક્ત બાતમી હતી કે, એક પીકઅપ ટેમ્પોમાં વિદેશી દારૂનો જથ્થો સુરત તરફ જઈ રહ્યો છે. જેથી પોલીસે હાઈવે પર નવસારીના બોરીયાચ ટોલનાકા પાસે વોચ ગોઠવી હતી. ત્યારે જ બાતમીવાળો ટેમ્પો આવતા પોલીસે તેને અટકાવી, તપાસ કરતા ટેમ્પોમાં 35 પૂઠાનાં બોક્ષમાંથી 4,06,800 રૂપિયાની વ્હીસ્કી અને બીયરની 972 બોટલો મળી આવી હતી. જેથી પોલીસે ટેમ્પો ચાલક અને સેલવાસના આમલી ગામે રહેતા અને મુળ ઉત્તરપ્રદેશના રાજારામ બનવારી હરીજનની ધરપકડ કરી હતી. જયારે તેની પૂછપરછમાં દારૂનો જથ્થો સેલવાસના રમેશે ભરાવી આપ્યો હતો, જયારે તેને અજાણ્યાને પહોચાડવાનો હતો. જેથી પોલીસે બંનેને વોન્ટેડ જાહેર કરી, નવસારી ગ્રામ્ય પોલીસ મથકે પ્રોહીબીશન એક્ટ હેઠળ ગુનો નોંધી આગળની તપાસ આરંભી છે. ઉલ્લેખનિય છે કે, પોલીસે ઘટના સ્થળેથી વિદેશી દારૂ, ટેમ્પો અને મોબાઈલ ફોન મળી કુલ 9.16 લાખ રૂપિયાનો મુદ્દામાલ ક્બ્જે કર્યો હતો.

Post Views: 27