નવસારી LCB પોલીસે ટ્રક ચાલકની ધરપકડ કરી, બેને વોન્ટેડ જાહેર કર્યા

નવસારી : નેશનલ હાઈવે નં. 48 પર બોરીયાચ ટોલનાકા પાસેથી નવસારી LCB પોલીસે બાતમીને આધારે કોટન ગાભાની આડમાં સંતાડીને લઇ જવાતો 61.92 લાખ રૂપિયાનો વિદેશી દારૂ ભરેલ ટ્રક સાથે ચાલકની ધરપકડ કરી હતી. પોલીસે વિદેશી દારૂ ભરાવનાર સહિત બેને વોન્ટેડ જાહેર કર્યા હતા.

વિદેશી દારૂનો જથ્થો ગોવાથી ભારાવાયો હતો, જેને વડોદરા તરફ લઇ જવાતો હતો

મળતી માહિતી અનુસાર, નવસારી LCB પોલીસને ખાનગી બાતમીદારો પાસેથી બાતમી મળી હતી કે, ગોવાથી એક ટ્રકમાં કોટનના ગાભાની આડમાં વિદેશી દારૂનો જથ્થો સંતાડીને લઇ જવાઈ રહ્યો છે, જે હાલમાં નેશનલ હાઈવે નં. 48 પરથી પસાર થઇ રહ્યો છે. જેને આધારે LCB પોલીસની ટીમે હાઇવે પર નવસારીના બોરીયાચ ટોલનાકા પાસે ફિલ્ડીંગ ગોઠવી હતી. દરમિયાન બાતમીવાળો ટ્રક આવતા પોલીસે તેને અટકાવી તપાસ કરતા ગાભાના 50 પાર્સલ સંતાડેલ 61.92 લાખ રૂપિયાની વ્હીસ્કીની 41,280 બાટલીઓ મળી આવી હતી. જેથી પોલીસે ટ્રક ચાલક અને રાજસ્થાનના બાડમેર જિલ્લાના માણકી ગામના 32 વર્ષીય ભગીરથરામ જાગુની ધરપકડ કરી, તેની કડકાઈથી પૂછપરછ કરતા દારૂનો જથ્થો રાજસ્થાનના જાલોર જિલ્લાના સાંચોરના શ્રવણ બિશ્નોઈએ ભરાવી આપ્યો હતો. જયારે અન્ય એક અજાણ્યો પણ તેની સાથે સામેલ હતો. જેથી પોલીસે શ્રવણ સાથે બેને વોન્ટેડ જાહેર કરી, ઘટના સ્થળેથી વિદેશી દારૂ, 20 લાખનો ટ્રક અને 5 હજાર રૂપિયાનો મોબાઈલ ફોન મળી કુલ 81.98 લાખનો મુદ્દામાલ કબ્જે કર્યો હતો. સમગ્ર મુદ્દે નવસારી ગ્રામ્ય પોલીસ મથકે પ્રોહિબીશન એક્ટ હેઠળ ગુનો નોંધી તપાસને વેગ આપ્યો છે.  

ભારતનાં 15 થી વધુ રાજ્યોમાં 35 સાયબર છેતરપીંડીના ગુનાનો છે આરોપી

નવસારી : સાયબર જાળ ફેલાયા બાદ સોશ્યલ મીડિયા થકી લાખો લોકોને યેનકેન પ્રકારે ફસાવી સાયબર ઠગો કરોડો રૂપિયા ખંખેરી લે છે. ત્યારે તગડા કમીશનની લાલચે જરૂરીયાતમંદોના બેંક એકાઉન્ટ ભાડે લઇ 15 થી વધુ રાજ્યોમાં 35 સાયબર ગુનાઓને અંજામ આપી 2 કરોડ રૂપિયાની છેતરપીડીમાં વોન્ટેડ ભેજાબાજની બીલીમોરા પોલીસે ધરપકડ કરી હતી.

બીલીમોરાનાં 3 અને ગણદેવીનો 1 મળી કુલ 35 ગુનાઓનો ભેદ ઉકેલાયો

મળતી માહિતી અનુસાર, ભારતમાં છેલ્લા થોડા વર્ષોમાં સાયબર છેતરપીંડીની ઘટનાઓ વધી રહી છે. જેમાં ભેજાબાજો લોકોને હાઉસ એરેસ્ટ કરી અથવા શેર માર્કેટમાં રોકાણ કરાવવાની લાલચ સહિત અનેક તિકડમ લગાવી તેમના બેંક એકાઉન્ટમાંથી લાખો અથવા કરોડો રૂપિયા કઢાવી લેતા હોય છે. પરંતુ આ સાયબર ઠગી કરવા માટે ગુનેગારોએ ભારતના નાના મોટા દરેક શહેરોમાં જરૂરીયાતમંદોના બેંક એકાઉન્ટ મેળવવા જાળ પાથરી છે. ગુનેગારોની જાળમાં ફસાયેલા બેંક એકાઉન્ટ ધારકોના એકાઉન્ટનો ઉપયોગ કરી, સાયબર ઠગબાજો છેતરપીંડી કરી કરોડો રૂપિયા ગજવે ઘાલી જાય છે. સાયબર ઠગોને પકડવા માટે ભારત સરકારે ઓપરેશન મ્યુલ હન્ટ છેડ્યુ છે, જેમાં આવા ભાડે આપેલા એકાઉન્ટને શોધીને સાયબર ગુના સાથે સંકળાયેલા બદમાશોને પકડવામાં આવી રહ્યા છે. બીલીમોરા પોલીસે પણ બીલીમોરા પોલીસ મથકે નોંધાયેલા 3 અને ગણદેવી પોલીસ મથકે નોંધાયેલા એક સાયબર છેતરપીંડીનાં ગુનામાં વોન્ટેડ આરોપી સુરજીતસીંગ હરદેવસીંગ લબાનાની ધરપકડ કરી, સાયબરની દુનિયામાં આચરેલા 2 કરોડની છેતરપીંડીના ગુનાઓનો ભેદ ઉકેલી કાઢ્યો છે.

બીલીમોરાનો ઠગ મધ્યપ્રદેશ અને બિહારના તેના આકાઓને આપતો હતો બેંક એકાઉન્ટ

પોલીસ પકડમાં આવેલ સુરજીતસિંગ સાયબર ઠગોના હાથની કઠપુતળી હોવાનું સામે આવ્યું છે. સુરજીતસિંગ મધ્યપ્રદેશ અને બિહારમાં બેઠેલા તેના આકાઓના ઇશારે કમીશન ઉપર બેંક એકાઉન્ટ ભાડે લેતો હતો. જયારે તેને પણ બેંક એકાઉન્ટ ભાડે અપાવવા બદલ તગડું કમીશન મળતું હતું. સુરજીતસિંગ પકડાતા જ બીલીમોરા શહેરના ત્રણ અને ગણદેવીનો એક ગુના સાથે ગુજરાત, મહારાષ્ટ્ર, રાજસ્થાન, મધ્યપ્રદેશ, બિહાર, પંજાબ, ઉત્તરાખંડ, ઉત્તરપ્રદેશ, જમ્મુ કશ્મીર, તાલંગાણા, આંધ્રપ્રદેશ, કર્ણાટક, તામીલનાડુ, કેરળ અને દિલ્હી જેવા 15 થી વધુ રાજ્યોમાં 35 સાયબર ગુનાઓમાં તેની સંડોવણી હોવાનું ખુલ્યું છે. આ ગુનાઓમાં સુરજીતસિંગે અદાજે 2 કરોડની સાયબર ઠગીને અંજામ અપાવ્યો હતો. જેમાં ભાડેના એકાઉન્ટમાં રૂપિયા મેળવ્યા બાદ, તેમાંથી પોતાનું કમીશન કાઢી લઇ બાકીની રકમ તેના આકાઓ સુધી પહોંચાડતો હવાનું પોલીસની પ્રાથમિક તપાસમાં સામે આવ્યું છે.

પોલીસની નાકાબંધી જોઈ, ચાલક ટેમ્પો છોડીને ભાગવામાં રહ્યો સફળ

નવસારી : નવસારીના આંતરિક માર્ગો પરથી રોજના લાખોના વિદેશી દારૂની હેરાફેરી થાય છે, જેને રોકવા નવસારી LCB પોલીસની ટીમ સતત કાર્યરત રહે છે, જેમાં આજે પોલીસને મળેલ બાતમીને આધારે ચીખલીના સાદડવેલ ચાર રસ્તાથી થોડે દૂરથી 4.01 લાખનો વિદેશી દારૂ પકડી પાડ્યો હતો. જયારે ટેમ્પો ચાલક ટેમ્પો છોડી ભાગવામાં સફળ રહ્યો હતો.

પોલીસે ઘટના સ્થળેથી 7.01 લાખનો મુદ્દામાલ કબ્જે કર્યો

મળતી માહિતી અનુસાર, નવસારી લોકલ ક્રાઈમ બ્રાંચની ટીમ વિદેશી દારૂની હેરાફેરી રોકવા માટે પ્રયત્નશીલ હતી, ત્યારે HC બ્રિજેશ સતીશચંદ્ર અને PC તાહીરઅલી શાહબુદ્દીનને સંયુક્ત રીતે બાતમી મળી હતી કે, સેલવાસથી વિદેશી દારૂનો જથ્થો ભરેલ એક સફેદ રંગનો પીકઅપ ટેમ્પો નાનાપોંઢાથી ધરમપુર થઇ નવસારીના વડપાડા, રૂમલાથી રાનકુવા થઇને આગળ જવાનો છે. જેને આધારે LCB પોલીસની ટીમે ચીખલીના પાણીખડકથી રાનકુવા માર્ગ પર સાદડવેલ ગામના ચાર રસ્તા પાસે દારૂ ભરેલ ટેમ્પોને પકડવા નાકાબંધી કરી હતી. દરમિયાન બાતમીવાળો ટેમ્પો આવતા જ પોલીસે તેને રોકવાનો પ્રયાસ કર્યો હતો. પરંતુ ટેમ્પો ચાલકે ટેમ્પો સ્પીડમાં ભગાડી દીધો હતો અને પકડાઈ જવાની બીકે ૩૦૦ મીટર આગળ જઈ ઉભો રાખી, ચાલક ટેમ્પો છોડીને આંબાવાડી વિસ્તારમાં ભાગી છૂટ્યો હતો. ઘટના સ્થળે પહોંચેલી પોલીસે ટેમ્પોમાંથી 4.01 લાખ રૂપિયાની વ્હીસ્કી, વોડકા અને બીયરની કુલ 1248 બાટલીઓ મળતા તેને કબ્જે કરી, ટેમ્પો સાથે કુલ 7.01 લાખનો મુદ્દામાલ કબ્જે કરી, ચાલકને વોન્ટેડ જાહેર કર્યો હતો. જયારે ચીખલી પોલીસ મથકે પ્રોહિબીશન એક્ટ હેઠળ ગુનો નોંધાવી તપાસને વેગ આપ્યો છે.