Connect with us

અપરાધ

2 કરોડ રૂપિયાની સાયબર ઠગીમાં સંકળાયેલો વોન્ટેડ ઠગબાજ પકડાયો

Published

on

ભારતનાં 15 થી વધુ રાજ્યોમાં 35 સાયબર છેતરપીંડીના ગુનાનો છે આરોપી

નવસારી : સાયબર જાળ ફેલાયા બાદ સોશ્યલ મીડિયા થકી લાખો લોકોને યેનકેન પ્રકારે ફસાવી સાયબર ઠગો કરોડો રૂપિયા ખંખેરી લે છે. ત્યારે તગડા કમીશનની લાલચે જરૂરીયાતમંદોના બેંક એકાઉન્ટ ભાડે લઇ 15 થી વધુ રાજ્યોમાં 35 સાયબર ગુનાઓને અંજામ આપી 2 કરોડ રૂપિયાની છેતરપીડીમાં વોન્ટેડ ભેજાબાજની બીલીમોરા પોલીસે ધરપકડ કરી હતી.

બીલીમોરાનાં 3 અને ગણદેવીનો 1 મળી કુલ 35 ગુનાઓનો ભેદ ઉકેલાયો

મળતી માહિતી અનુસાર, ભારતમાં છેલ્લા થોડા વર્ષોમાં સાયબર છેતરપીંડીની ઘટનાઓ વધી રહી છે. જેમાં ભેજાબાજો લોકોને હાઉસ એરેસ્ટ કરી અથવા શેર માર્કેટમાં રોકાણ કરાવવાની લાલચ સહિત અનેક તિકડમ લગાવી તેમના બેંક એકાઉન્ટમાંથી લાખો અથવા કરોડો રૂપિયા કઢાવી લેતા હોય છે. પરંતુ આ સાયબર ઠગી કરવા માટે ગુનેગારોએ ભારતના નાના મોટા દરેક શહેરોમાં જરૂરીયાતમંદોના બેંક એકાઉન્ટ મેળવવા જાળ પાથરી છે. ગુનેગારોની જાળમાં ફસાયેલા બેંક એકાઉન્ટ ધારકોના એકાઉન્ટનો ઉપયોગ કરી, સાયબર ઠગબાજો છેતરપીંડી કરી કરોડો રૂપિયા ગજવે ઘાલી જાય છે. સાયબર ઠગોને પકડવા માટે ભારત સરકારે ઓપરેશન મ્યુલ હન્ટ છેડ્યુ છે, જેમાં આવા ભાડે આપેલા એકાઉન્ટને શોધીને સાયબર ગુના સાથે સંકળાયેલા બદમાશોને પકડવામાં આવી રહ્યા છે. બીલીમોરા પોલીસે પણ બીલીમોરા પોલીસ મથકે નોંધાયેલા 3 અને ગણદેવી પોલીસ મથકે નોંધાયેલા એક સાયબર છેતરપીંડીનાં ગુનામાં વોન્ટેડ આરોપી સુરજીતસીંગ હરદેવસીંગ લબાનાની ધરપકડ કરી, સાયબરની દુનિયામાં આચરેલા 2 કરોડની છેતરપીંડીના ગુનાઓનો ભેદ ઉકેલી કાઢ્યો છે.

બીલીમોરાનો ઠગ મધ્યપ્રદેશ અને બિહારના તેના આકાઓને આપતો હતો બેંક એકાઉન્ટ

પોલીસ પકડમાં આવેલ સુરજીતસિંગ સાયબર ઠગોના હાથની કઠપુતળી હોવાનું સામે આવ્યું છે. સુરજીતસિંગ મધ્યપ્રદેશ અને બિહારમાં બેઠેલા તેના આકાઓના ઇશારે કમીશન ઉપર બેંક એકાઉન્ટ ભાડે લેતો હતો. જયારે તેને પણ બેંક એકાઉન્ટ ભાડે અપાવવા બદલ તગડું કમીશન મળતું હતું. સુરજીતસિંગ પકડાતા જ બીલીમોરા શહેરના ત્રણ અને ગણદેવીનો એક ગુના સાથે ગુજરાત, મહારાષ્ટ્ર, રાજસ્થાન, મધ્યપ્રદેશ, બિહાર, પંજાબ, ઉત્તરાખંડ, ઉત્તરપ્રદેશ, જમ્મુ કશ્મીર, તાલંગાણા, આંધ્રપ્રદેશ, કર્ણાટક, તામીલનાડુ, કેરળ અને દિલ્હી જેવા 15 થી વધુ રાજ્યોમાં 35 સાયબર ગુનાઓમાં તેની સંડોવણી હોવાનું ખુલ્યું છે. આ ગુનાઓમાં સુરજીતસિંગે અદાજે 2 કરોડની સાયબર ઠગીને અંજામ અપાવ્યો હતો. જેમાં ભાડેના એકાઉન્ટમાં રૂપિયા મેળવ્યા બાદ, તેમાંથી પોતાનું કમીશન કાઢી લઇ બાકીની રકમ તેના આકાઓ સુધી પહોંચાડતો હવાનું પોલીસની પ્રાથમિક તપાસમાં સામે આવ્યું છે.

અપરાધ

ખારેલ બ્રિજ પાસેથી 3.40 લાખના દારૂ ભરેલ ટેમ્પો સાથે ચાલક પકડાયો

Published

on

By

ગણદેવી પોલીસે કુલ 5.95 લાખથી વધુનો મુદ્દામાલ જપ્ત કર્યો

નવસારી : દક્ષિણ ગુજરાતમાં દારૂની ગેરકાયદે હેરાફેરી પર અંકુશ મેળવવા માટે પોલીસ દ્વારા સતત વોચ અને મોનિટરિંગ રાખવામાં આવતું હોય છે. આ ઝુંબેશના ભાગરૂપે ગણદેવી પોલીસ સ્ટેશનની ટીમે ચોક્કસ બાતમીના આધારે ખારેલ ઓવરબ્રિજ નીચેથી 3.40 લાખથી વધુની કિંમતના વિદેશી દારૂના જથ્થા સાથે એક ટેમ્પો ચાલકની ધરપકડ કરી હતી. પોલીસે વાહન તથા અન્ય સામગ્રી મળી કુલ 5.95 લાખનો મુદ્દામાલ કબ્જે કરી કાયદેસરની કામગીરી હાથ ધરી છે.

તાડપત્રી નીચે છુપાવેલો દારૂનો જથ્થો પોલીસે શોધી કાઢ્યો

મળતી માહિતી અનુસાર, ગણદેવી પોલીસના PI એન. આઈ. રાઠોડ અને PSI એન.એ. પટેલની માર્ગદર્શિકા હેઠળ ખારેલ આઉટ પોસ્ટના કર્મચારીઓ પેટ્રોલીંગમાં હતા. તે દરમિયાન PSI એન.એ. પટેલ તથા ASI નિલેશભાઈને મળેલી સચોટ બાતમી આધારે ખારેલ ઓવરબ્રિજ પાસે વોચ ગોઠવવામાં આવી હતી. સેલવાસ અને વાપી તરફથી સુરત જઈ રહેલા ટેમ્પોને રોકીને તપાસ કરતા, બ્લ્યુ કલરની તાડપત્રી હેઠળ છુપાવેલ 3.40 લાખ રૂપિયાની વ્હિસ્કી તથા બિયરની કૂલ 1152 બાટલીઓ મળી આવી હતી.

ઉમરગામના ચાલકની ધરપકડ, વડોદરાના બે આરોપી વોન્ટેડ

પોલીસે ઘટના સ્થળેથી ટેમ્પો ચાલક અને વલસાડ જિલ્લાના ઉંમરગામ ખાતે રહેતા મૂળ મધ્યપ્રદેશના 27 વર્ષીય નરેન્દ્રસીંગ પરસ્તેની સ્થળ પરથી ધરપકડ કરી હતી. પૂછપરછ દરમિયાન દારૂનો આ જથ્થો ભરી આપનાર વડોદરાના સોનુસીંગ અને મંગાવનાર ‘કાકા’ નામના શખ્સનું નામ ખુલતા પોલીસે આ બંને વોન્ટેડ આરોપીઓ સામે પણ પ્રોહિબિશન એક્ટ મુજબ ગુનો નોંધી વધુ તપાસ હાથ ધરી છે.

Continue Reading

અપરાધ

નવસારીમાં ખનન માફિયાઓ પર ભૂસ્તર વિભાગની સર્જિકલ સ્ટ્રાઈક : અંબિકા નદીમાં ડ્રોનથી ગેરકાયદે રેતી ચોરી પકડી

Published

on

By

જિલ્લામાં પ્રથમવાર આધુનિક ટેકનોલોજીથી મેગા ઓપરેશન : 2.25 કરોડનો મુદ્દામાલ જપ્ત

નવસારી : નવસારી જિલ્લામાં કુદરતી સંપત્તિની લૂંટ ચલાવતા ખનન માફિયાઓ સામે ખાણ ખનીજ વિભાગે અત્યાર સુધીની સૌથી મોટી અને અભૂતપૂર્વ કાર્યવાહી કરી હતી. જિલ્લા કલેક્ટરના સીધા માર્ગદર્શન હેઠળ ભૂસ્તર વિભાગે નવસારીમાં પ્રથમ વખત ડ્રોન કેમેરા ટેકનોલોજીનો ઉપયોગ કરી અંબિકા નદીના પેટાળમાં ચાલતા કાળા કારોબારનો પર્દાફાશ કર્યો છે. ગણદેવી તાલુકાના બીલીમોરા સ્મશાન નજીકથી બાજની મદદથી ગેરકાયદે થતા રેતી ખનનને પકડી 2.25 કરોડનો મુદ્દામાલ જપ્ત કર્યો હતો. ખાણ ખનીજ વિભાગની સર્જિકલ સ્ટ્રાઇકથી ખનન માફિયાઓમાં ભારે ફફડાટ વ્યાપી ગયો છે.

બીલીમોરા સ્મશાન ભૂમિ પાછળથી ચાલતા કાળા કારોબાર પર ડ્રોનનું ‘હવાઈ સર્વેલન્સ’

નવસારી ભૂસ્તરશાસ્ત્રી પી. આર. ખાંભલાના માર્ગદર્શન હેઠળ ભૂસ્તરવિજ્ઞાન અને ખનિજ વિભાગની ક્ષેત્રીય ટીમ દ્વારા અંબિકા નદીપટ્ટમાં એક ગુપ્ત સર્ચ ઓપરેશન ગોઠવવામાં આવ્યું હતું. રોયલ્ટી ઇન્સ્પેક્ટર દિવ્યાંત શિરોયા, માઇન્સ સુપરવાઇઝર સંદીપ રાઉત અને સ્પેશિયલ ડ્રોન ટીમે ગણદેવી તાલુકાના બીલીમોરા ગામની સ્મશાન ભૂમિ પાછળથી પસાર થતી અંબિકા નદીના દુર્ગમ વિસ્તારમાં દરોડો પાડ્યો હતો. ટીમે આધુનિક ડ્રોન સર્વેલન્સની મદદથી નદીના પેટાળમાંથી યાંત્રિક બાજ (બોટ) વડે ચાલી રહેલા ગેરકાયદેસર રેતી ખનન પદ્ધતિને રંગેહાથ ઝડપી પાડીને માફિયાઓના મનસુબા પર પાણી ફેરવી દીધું હતું.

ગેરકાયદે ખનન કરનારા માફીયાઓ સામે ધોલાઈ મરીન પોલીસ સ્ટેશનમાં નોંધાવી ફરિયાદ

આ હાઇ-ટેક દરોડા દરમિયાન ખાણ ખનીજ વિભાગની ટીમે સ્થળ પરથી ગેરકાયદેસર રેતી ખનનમાં વપરાતા 2 અત્યાધુનિક યાંત્રિક બાજ અને રેતીની હેરાફેરીમાં સંકળાયેલા 11 ટ્રકો મળીને કુલ 2.25 કરોડ રૂપિયાનો મુદ્દામાલ જપ્ત કર્યો હતો. સાથે જ જપ્ત કરાયેલા તમામ વાહનો અને સાધનોને આગળની કાનૂની કાર્યવાહી માટે ધોલાઈ મરીન પોલીસ સ્ટેશનના હવાલે કરી દેવામાં આવ્યા છે. તંત્ર દ્વારા કસૂરદારો સામે ‘ગુજરાત મિનરલ (પ્રિવેન્શન ઓફ ઇલ્લીગલ માઇનિંગ, ટ્રાન્સપોર્ટેશન એન્ડ સ્ટોરેજ) રૂલ્સ 2017’ હેઠળ ગુનો નોંધાવી, ગેરકાયદે ખનન નેટવર્કના મૂળ સુધી પહોંચવાની કવાયત તેજ કરવામાં આવી છે.

Continue Reading

અપરાધ

નેશનલ હાઈવે પર બલવાડા પાસેથી 3.50 લાખનો દારૂ ભરેલ કાર સાથે બેની ધરપકડ

Published

on

By

લકઝરી કારથી પાયલોટીંગ કરનાર મુખ્ય સૂત્રધાર સહિત બે વોન્ટેડ

નવસારી : નવસારી જિલ્લામાંથી રોજના લાખો રૂપિયાનો વિદેશી દારૂ સુરત તેમજ આગળના જિલ્લાઓમાં ખેપિયાઓ દ્વારા પહોંચાડવામાં આવે છે. ત્યારે ચીખલી પોલીસે લક્ઝરીયસ કારમાં દારૂની હેરાફેરીનો પર્દાફાશ કર્યો છે. નેશનલ હાઇવે નં. 48 પર બલવાડા ઓવરબ્રીજ નજીકથી 3.50 લાખનો વિદેશી દારૂ ભરેલ કાર સાથે વલસાડના બે ખેપિયાઓની ધરપકડ કરી હતી. જ્યારે દારૂની કારનું પાયલોટિંગ કરતી લકઝરી કારમાં સવાર મુખ્ય સૂત્રધાર સાથે બેને વોન્ટેડ જાહેર કર્યા છે.

સેલવાસથી દારૂનો જથ્થો ભરી કડોદરા સપ્લાય કરવાનો ખેલ પકડાયો

મળતી માહિતી અનુસાર, ચીખલી પોલીસના PI પી.બી. પટેલીયાના માર્ગદર્શન હેઠળ સર્વેલન્સ ટીમના PSI આર.એન. વાડલે અને કર્મચારીઓ ખાનગી વાહનોમાં હાઈવે પર પેટ્રોલીંગમાં હતા. દરમીયાન સર્વેલન્સ ટીમના ASI અલ્પેશભાઈ અને HC મહેન્દ્રભાઈને મળેલ સંયુક્ત બાતમીના આધારે, નેશનલ હાઈવે નં. 48 પર બલવાડા ઓવરબ્રીજના ઉત્તર છેડે વોચ ગોઠવવામાં આવી હતી. આ દરમીયાન શંકાસ્પદ રીતે પસાર થતી એક સફેદ રંગની કારને પોલીસે આંતરી, તેને અટકાવી હતી. કારમાં તપાસ કરતા તેમાંથી 3,50,640 રૂપિયાની 25 પુંઠાના બોક્સમાંથી વ્હિસ્કી તથા ટીન બિયર મળી કુલ 1020 બાટલીઓ મળી આવી હતી. પોલીસે ઘટના સ્થળેથી 5 લાખની કાર, 2 મોબાઈલ અને દારૂ મળી કુલ 8.61 લાખનો મુદ્દામાલ જપ્ત કરી, કારચાલક અને વલસાડના ઉદવાડા તાલુકાના સરોધી ગામે રહેતા મીતકુમાર ઉર્ફે મીતલો માહ્યાવંશી અને વલસાડના વાપી તાલુકાના બલીઠા ગામે રહેતા અક્ષયકુમાર રાઠોડની સ્થળ પરથી ધરપકડ કરી હતી.

લકઝરી કાર વડે પાયલોટીંગ કરનાર નવસારીનો બુટલેગર ‘આઝાદ લંગડો’ વોન્ટેડ જાહેર

પોલીસની કડક પૂછપરછમાં આરોપીઓએ ખુલાસો કર્યો હતો કે, આ વિદેશી દારૂનો જથ્થો સેલવાસથી ભરીને સુરતના કડોદરા ખાતે સપ્લાય કરવાનો હતો. આ સમગ્ર રેકેટનો મુખ્ય સૂત્રધાર નવસારીના લક્ષ્મી ટોકીઝ પાછળ રહેતો નસીમુદ્દીન ઉર્ફે ‘આઝાદ લંગડો’ છે, જેણે સેલવાસથી દારૂ ભરાવ્યો હતો અને પોતાની લકઝરી કાર વડે આગળ પાયલોટીંગ કરી દારૂનો જથ્થો સુરત તરફ રવાના કરાવ્યો હતો. ચીખલી પોલીસે દારૂનો જથ્થો સપ્લાય કરનાર મુખ્ય આરોપી આઝાદ લંગડો તેમજ કડોદરા ખાતે દારૂ મંગાવનાર અજાણ્યા બુટલેગર સામે પ્રોહિબિશન એક્ટ હેઠળ ગુનો નોંધી બંનેને વોન્ટેડ જાહેર કરી, તપાસને વેગ આપ્યો છે.

Continue Reading
Advertisement

Trending