Connect with us

ધર્મ

અષ્ટગામમાં ધર્મપરિવર્તનની પ્રવૃત્તિને કારણે આદિવાસી સમાજમાં આક્રોશ

Published

on

ગામમાં ખ્રિસ્તીઓના પ્રવેશ પર પ્રતિબંધ, પ્રાર્થના સભા કરવા મંજુરી લેવાનો આદેશ

નવસારી : નવસારી જિલ્લામાં છેલ્લા થોડા મહિનાઓથી આદિવાસીઓનાં ધર્મ પરિવર્તનનો મુદ્દો વિવાદિત બન્યો છે. જેમાં ગરીબ આદિવાસીઓ ભોળવાઈને ખ્રિસ્તી ધર્મ અપનાવતા હોવાના આક્ષેપો થયા છે, સાથે જ આદિવાસી સમાજ અને ધર્માંતરણ કરનારાઓ વચ્ચે વિખવાદ પણ ઉભા થતા રહ્યા છે. ત્યારે નવસારી તાલુકાના અષ્ટગામ ગામે ખ્રિસ્તી ધર્મ પાળનારા બહારના લોકોએ ગામમાં પ્રવેશ ન કરવો અને કરશે તો કાયદાકીય પગલા લેવામાં આવશેના બોર્ડ લગાવી ધર્મ પરિવર્તનનો વિરોધ કરવામાં આવ્યો છે. જેની સામે ખ્રિસ્તી ધર્મમાં જોડાયેલા પરિવારોએ જિલ્લા કલેકટરને આવેદનપત્ર પાઠવી ધાર્મિક સ્વતંત્રતાની વાત સાથે સમસ્યાના સમાધાનની માંગણી કરી છે.

નવસારી જિલ્લાનાં ગામડાઓમાં વસતા આદિવાસી સમાજનાં ઘણા લોકો ખ્રિસ્તી ધર્મ અપનાવતા થયા છે. જેમાં આદિવાસીઓને જ ખ્રિસ્તી ધર્મના પ્રચારક બનાવી દેવામાં આવતા લગભગ દરેક ગામોમાં ખ્રિસ્તી ધર્મ પાળતા આદિવાસીઓની સંખ્યા વધી છે. ધર્મ પરિવર્તન બાદ એક બીજાનાં ગામોમાં જઇ શુક્રવારે અને રવિવારે પ્રાર્થના સભાઓ પણ કરતા મૂળ આદિવાસી સમાજ સાથે સંકળાયેલા લોકોમાં નારાજગી પ્રવર્તી રહી છે. નવસારીના તાલુકાના અષ્ટગામ ગામે પણ પ્રાર્થના સભાઓને કારણે ગામના લોકો વચ્ચે વિવાદ સર્જાયો છે. ગામના સરપંચ ઉમેશ તલાવીયાએ હેક્ષિલોન સાથેની ખાસ વાતચીતમાં કહ્યું કે, ખ્રિસ્તી ધર્મ અંગીકાર કરનારા ધર્મ પરિવર્તન બાદ પરિવારમાં જ વિખવાદ ઉભા કરે છે. મરણ પ્રસંગે કે લગ્ન પ્રસંગમાં પણ નથી આવતા, સાથે જ તેઓ હિંદુ રીતિ રીવાજોને માનતા બંધ થયા છે અને હિંદુ દેવી દેવતાઓના ફોટોને પણ અપમાનિત કરે છે. જેને કારણે ગામના લોકોએ જ પંચાયતમાં ફરિયાદ કરતા એમને પોલીસ અથવા પંચાયતમાંથી મંજુરી લીધા બાદ અને કેટલા લોકો પ્રાર્થનામાં આવશે એની માહિતી આપ્યા બાદ પ્રાર્થના કરવા સમજાવ્યા હતા. જયારે અમારો ખ્રિસ્તી ધર્મ સામે વિરોધ નહિ, પણ તેઓને આદિવાસીઓને મળતા લાભો બંધ કરીને સરકાર તેમની ખ્રિસ્તીઓ તરીકે જ નોંધણી કરે એવી માંગ છે.

ધર્માંતરણ કરનારાઓએ કલેકટરને આવેદન પાઠવી સમસ્યાના સમાધાનની કરી માંગ

જયારે ધર્મ પરિવર્તનના વિવાદ સામે ખ્રિસ્તી ધર્મ અપનાવારાઓમાંના એક એવા જયેશ હળપતિનું કહેવું છે કે ખ્રિસ્તી ધર્મમાં આવવાથી અમારા જીવનમાં પરિવર્તન આવ્યા છે. કુટેવોથી અમે દુર થયા છે, સાથે જ સારી રીતે જીવતા પણ થયા છે. જયારે ભારતના બંધારણે જ એમને ધાર્મિક સ્વતંત્રા આપી છે. અમે ખ્રિસ્તી ધર્મ અનુસાર શુક્રવાર અને રવિવારે પ્રાર્થના સભા કરીએ છે, ત્યાં આવીને અમને યેન કેન પ્રકારે ધમકાવવામાં આવે છે. અમે વિવાદમાં નથી પડવા માંગતા એટલે જ જિલ્લા કલેકટરને આવેદન પત્ર આપીને ન્યાયની માંગ કરી છે. જિલ્લા કલેકટર અમને સહકાર આપીને સમસ્યાનું સમાધાન કરાવે એજ આશા છે.

ઉલ્લેખનીય છે કે, જિલ્લામાં આદિવાસીઓમાં ચાલતા ધર્મ પરિવર્તનના વિવાદને કારણે આદિવાસી સમાજમાં પણ સરકારી તંત્રને મધ્યસ્થી કરી, ખ્રિસ્તી ધર્મ અપનાવનારા આદિવાસીઓનો સર્વે કરાવી એમને આદિવાસી સમાજમાંથી બહાર કાઢી, તેમની ખ્રિસ્તી તરીકે નોંધણી કરે એવી માંગ ઉઠવા પામી છે. સાથે જ વર્ષના પ્રારંભે તંત્રને સમસ્યાના સમાધાન માટેની રજૂઆત કરી હતી, પરંતુ આજ દિન સુધી કોઈ પગલા લેવામાં ન આવતા આદિવાસી સમાજમાં રોષ વ્યાપ્ત છે. ત્યારે જિલ્લા વહીવટી તંત્ર સમગ્ર મુદ્દે શું પગલા લે છે એ જોવું રહ્યું.

તહેવાર

નવસારીમાં વિઘ્નહર્તાની વિદાયમાં દિવ્યાંગ બાળાનો નિશ્ચલ પ્રેમ અને પોલીસની પ્રશંસનીય પહેલ

Published

on

By

ઓવારા પર દિવ્યાંગ બાળા બાપ્પાને ભેટીને રડી પડી; તો વહેલા વિસર્જન માટે પહોંચેલા ગણેશ મંડળોને પોલીસે ‘ગુલાબ’ આપ્યા

નવસારી : દસ દિવસ સુધી મન મૂકીને પૂજા-અર્ચના કર્યા બાદ નવસારી શહેરમાં આજે વિઘ્નહર્તા શ્રીજીને ભારે હૈયે વિદાય આપવામાં આવી રહી છે. ભક્તિ અને ઉલ્લાસ વચ્ચે નવસારીના વિસર્જન ઓવારાઓ પર આજે બે અનોખા અને સ્પર્શી જાય તેવા દ્રશ્યો જોવા મળ્યા હતા. એક તરફ ભક્ત અને ભગવાન વચ્ચેનો લાગણીસભર સંબંધ અને બીજી તરફ પોલીસ તથા નાગરિકો વચ્ચેના સુચારુ સહયોગનું ઉત્તમ ઉદાહરણ.

ખુરશી પર આવેલી દિવ્યાંગ બાળા બાપ્પાને ભેટીને ધ્રુસકે-ધ્રુસકે રડી પડી

નવસારીના વિરાવળ વિસર્જન ઓવારા પર આજે એક અત્યંત ભાવુક ક્ષણ સર્જાઈ હતી. એક પરિવાર પોતાના ઘરના નાના ગણપતિનું વિસર્જન કરવા માટે પોતાની દિવ્યાંગ બાળાને ખુરશી પર બેસાડીને આસ્થાના ઓવારે લાવ્યો હતો. દસ દિવસ સુધી ઘરમાં મહેમાન બનીને રહેલા દાદાને વિદાય આપવાનો સમય આવ્યો, ત્યારે આ દિવ્યાંગ બાળા પોતાની લાગણીઓ રોકી નહોતી શકી. વિસર્જન પૂર્વે બાળા શ્રીજીની પ્રતિમાને ગાઢ ભેટી પડી હતી અને તેની આંખોમાંથી અશ્રુની ધારા વહી નીકળી હતી. બાપ્પાના વિરહમાં બાળાને રડતી જોઈને ત્યાં હાજર અન્ય ભક્તો અને તંત્રના કર્મચારીઓની આંખો પણ ભીની થઈ ગઈ હતી. બાદમાં પરિવારજનોએ તેને વહાલથી સમજાવીને શાંત પાડી હતી અને ભાવભીના અંબર સાથે શ્રીજીની પ્રતિમાને જળમાં વિસર્જિત કરી હતી.

પોલીસની અનોખી પહેલ: સમયસર વિસર્જન કરનારા મંડળોનું પોલીસે ‘ગુલાબ’ આપી કર્યું સન્માન

બીજી તરફ, સમગ્ર વિસર્જન યાત્રા નિર્વિઘ્ને અને સમયસર પૂર્ણ થાય તે માટે નવસારી ટાઉન પોલીસ દ્વારા એક પ્રશંસનીય અને સકારાત્મક અભિગમ અપનાવવામાં આવ્યો હતો. વિસર્જન પ્રક્રિયામાં જોડાયેલા હજારો સુરક્ષા કર્મચારીઓ, સફાઈ કર્મચારીઓ અને અધિકારીઓને મોડી રાત સુધી ઉજાગરા ન કરવા પડે અને વ્યવસ્થા સચવાય તે માટે પોલીસે મંડળોને વહેલું વિસર્જન કરવા અપીલ કરી હતી. જેને માન આપીને જે ગણેશ મંડળો સમયસર વિસર્જન યાત્રામાં જોડાયા અને વહેલા ઓવારા પર પહોંચ્યા, તે તમામ મંડળોનું નવસારી ટાઉન PI કે.ડી. નકુમ અને તેમની ટીમે ગુલાબનું ફૂલ આપીને સન્માન કર્યું હતું. મંડળોએ પણ પોલીસની આ અપીલ અને સન્માનની પદ્ધતિને ઉષ્માભેર આવકારીને કાયદા-વ્યવસ્થા અને સહયોગનું શ્રેષ્ઠ ઉદાહરણ પૂરું પાડ્યું હતું.

Continue Reading

તહેવાર

અશ્રુભીની આંખે બાપ્પાને વિદાય: નવસારીમાં હજારો શ્રીજી પ્રતિમાઓનું ભાવસભર વિસર્જન

Published

on

By

ગુલાલની ડમરીઓ, ડીજેના તાલ અને કડક પોલીસ બંદોબસ્ત વચ્ચે ગણેશ વિસર્જન પર્વ સંપન્ન

નવસારી : દસ-દસ દિવસ સુધી મંડપોમાં રેલાયેલી અનન્ય ભક્તિ, મહાઆરતીના મધુર સૂર અને અવિરત સેવા-પૂજા બાદ આજે નવસારી જિલ્લો એક અત્યંત લાગણીસભર ક્ષણનો સાક્ષી બન્યો હતો. વિઘ્નહર્તા શ્રીજીને આગામી વર્ષે વહેલા આવવાના ભાવભીના નિમંત્રણ સાથે હજારો ભક્તોએ અશ્રુભીની આંખો અને ભારે હૈયે વિદાય આપી હતી. સવારથી જ નવસારીના માર્ગો ગુલાલની ગુલાબી ડમરીઓ અને ‘ગણપતિ બાપ્પા મોરિયા, અગલે બરસ તુ જલ્દી આ’ ના જયઘોષથી ગુંજી ઊઠ્યા હતા. વિરાવળ પૂર્ણા નદીના ઓવારેથી લઈને દાંડીના અનંત દરિયા કિનારા સુધી સમગ્ર વાતાવરણ ગણપતિમય અને ભક્તિરસમાં સરોબોર બની ગયું હતું.

પૂર્ણાના ઓવારેથી દાંડીના દરિયા સુધી અંદાજે 20 હજાર પ્રતિમાઓ વિસર્જિત

ડીજે, ઢોલ-નગારા અને બેન્ડવાજાના તાલ પર ઉડતા ગુલાલ વચ્ચે ભક્તોનો ઉત્સાહ ચરમસીમાએ જોવા મળ્યો હતો, પરંતુ સાથે જ દરેક શ્રદ્ધાળુના હૃદયમાં દાદાના જવા નો અજંપો અને વિરહ સ્પષ્ટપણે છલકાતો હતો. નવસારી શહેરના વિરાવળ સ્થિત પૂર્ણા નદીના ઓવારે, ધારાગિરી, જલાલપોર તેમજ દાંડીના વિશાળ દરિયા કિનારે નાની-મોટી મળીને હજારો ગણેશ પ્રતિમાઓનું પૂર્ણ શ્રદ્ધા અને વિધિવિધાન સાથે જળમાં વિસર્જન કરવામાં આવ્યું હતું. માત્ર શહેર જ નહીં, પરંતુ બીલીમોરા, ગણદેવી સહિત ગ્રામ્ય વિસ્તારોના નદીઓ, તળાવો અને કૂત્રિમ કુંડ પણ બાપ્પાના વિસર્જન સાથે ગણપતિમય બન્યા હતા. ભક્તોએ જળમાં પ્રતિમા પધરાવતી વખતે આરતી ઉતારી, ચરણસ્પર્શ કરી દાદાના આશીર્વાદ લીધા હતા.

ચોકસાઈભર્યું તંત્ર : 1898 જવાનો, ડ્રોન સર્વેલન્સ અને સાયબર મોનિટરિંગથી શોભાયાત્રા રહી સુરક્ષિત

નવસારી શહેર સહિત જિલ્લામાં વિસર્જન યાત્રા શાંતિપૂર્ણ માહોલમાં સંપન્ન થાય તે માટે જિલ્લા પોલીસ તંત્ર દ્વારા અભેદ સુરક્ષા ચક્ર રચવામાં આવ્યું હતું. સમગ્ર વિસર્જન રૂટ પર કોઈ વિઘ્ન ન આવે તે માટે, પોલીસ અધિકારીઓ, પોલીસકર્મીઓ, હોમગાર્ડ, GRD, તાલીમાર્થીઓ મળીને 1998 પોલીસ જવાનોનો કડક બંદોબસ્ત ગોઠવવામાં આવ્યો હતો. વિસર્જન યાત્રામા મંડળોના આગેવાનનો મોબાઈલ ફોન GPS ટ્રેકર સાથે જોડી, ડ્રોન સર્વેલન્સ અને સાયબર મોનિટરિંગ દ્વારા ટેકનિકલ સર્વેલન્સથી ટ્રાફિક અને સાયબર પોલીસ દ્વારા પળેપળની હિલચાલ પર કડક નજર રાખવામાં આવી હતી. તંત્રના ઉત્કૃષ્ટ આયોજન અને નાગરિકોના સહયોગના કારણે સમગ્ર નવસારી જિલ્લામાં શ્રીજીની આ ભવ્ય વિદાય વેળા એકદમ સુરક્ષિત, સૌહાર્દપૂર્ણ અને આનંદદાયક વાતાવરણમાં વિસર્જન યાત્રા સંપન્ન થઈ હતી.

Continue Reading

તહેવાર

‘અગલે બરસ તૂ જલ્દી આ’: નવસારીના લીલાબાના ભક્તોએ વિઘ્નહર્તાને આપી અશ્રુભીની વિદાય

Published

on

By

ગરબાના તાલે ભક્તો ઝૂમી ઉઠ્યા, મહાપ્રસાદ સાથે મહોત્સવની પૂર્ણાહુતિ

નવસારી : નવસારી શહેરમાં સાત દિવસ સુધી શ્રદ્ધા, ભક્તિ અને ઉલ્લાસપૂર્વક ઉજવાયેલા ગણેશોત્સવની આજે ભાવસભર વાતાવરણમાં પૂર્ણાહુતિ થઈ હતી. નવસારીના લીલાબા એપાર્ટમેન્ટમાં ગણેશજીની સાત દિવસ સુધી અવિરત સેવા-પૂજા કર્યા બાદ, આજે ભક્તોએ ભારે હૃદયે અને ભીની આંખે પોતાના પ્રિય દાદાને વિદાય આપી હતી. ‘ગણપતિ બાપ્પા મોરિયા, અગલે બરસ તૂ જલ્દી આ’ના ગગનભેદી નારાઓ સાથે સમગ્ર વાતાવરણ શ્રદ્ધા અને ભક્તિના રંગે રંગાઈ ગયું હતું.

વિદાય પૂર્વે ધાર્મિક વિધિ અને ઉલ્લાસભર્યો માહોલ

નવસારીના ગણદેવી રોડ પર આવેલા વસંત વિહાર સોસાયટી સ્થિત લીલાબા એપાર્ટમેન્ટમાં બિરાજીત શ્રી વિઘ્નહર્તા ગણેશજીની આજે સાતમા દિવસે બપોરે બ્રાહ્મણના શાસ્ત્રોક્ત મંત્રોચ્ચાર સાથે વિધિવત પૂજા-અર્ચના કરવામાં આવી હતી. ભાવિક ભક્તોએ દાદાને ભાવપૂર્વક આરતી કરી થાળ ધરાવ્યો હતો. ત્યાર બાદ ગણેશજીનું ઉત્થાપન કરવામાં આવ્યું ત્યારે ભક્તોના ચહેરા પર દાદાના વિયોગની ક્ષણો સ્પષ્ટ દેખાતી હતી. વિદાયની આ ભાવુક પળો વચ્ચે પણ ભક્તોએ ઉત્સાહ જાળવી રાખી ઢોલ-નગારાના તાલે ગરબાની રમઝટ બોલાવી હતી અને વિઘ્નહર્તાને આવતા વર્ષે વહેલા આવવા ભાવભર્યું નિમંત્રણ પાઠવ્યું હતું.

દાંડીના દરિયાકિનારે અશ્રુભીની વિદાય અને મહાપ્રસાદ

પૂજા-વિધિ અને ગરબાની ઉત્સાહભરી ક્ષણો બાદ, ભગવાની પ્રતિમાને વાજતે-ગાજતે વિસર્જન વાહનમાં વિરાજમાન કરી ઐતિહાસિક દાંડીના દરિયાકિનારે લઈ જવામાં આવી હતી. જ્યાં લીલાબા એપાર્ટમેન્ટના ઉત્સાહી યુવા ભક્તોએ બાપ્પાની પ્રતિમાને દરિયાના ઘુઘવતા મોજાંઓ વચ્ચે લઈ જઈને પૂર્ણ શ્રદ્ધા અને વિધિવત રીતે વિસર્જિત કરી હતી. વિદાયની આ ક્ષણે અનેક ભક્તોની આંખો છલકાઈ ગઈ હતી. વિસર્જનની ધાર્મિક વિધિ સંપન્ન થયા બાદ તમામ ભક્તોએ એકસાથે મહાપ્રસાદનો આનંદ માણી સાત દિવસના આ ભવ્ય ગણેશોત્સવની સાર્થક પૂર્ણાહુતિ કરી હતી.

Continue Reading
Advertisement

Trending