શાંતાદેવી રોડ પર શાંતિનાથ એપાર્ટમેન્ટનો સ્લેબ પડતા બે કારનો કચ્ચરઘાણ  

નવસારી : નવસારી શહેરમાં વહેલી સવારથી વરસતો વરસાદ હવે આસમાની આફત બનીને વરસી રહ્યો છે. મુશળાધાર વરસાદને પગલે શહેરમાં વરસાદી પાણી ભરાતા, ઝુમુર ગેસ એજન્સીના ગોડાઉનમાંથી સેંકડો LPG સીલીન્ડર દીવાલ તોડી ખાડીના પાણીમાં વહી ગયા હતા. જયારે શાંતાદેવી રોડ પર શાંતિનાથ એપાર્ટમેન્ટનો સ્લેબ પડતા નીચે પાર્ક કરેલી બે કારનો કચ્ચરઘાણ વળી જતા લોકોને લાખોનું નુકશાન વેઠવાનો વારો આવ્યો છે. બીજી તરફ સેન્ટ્રલ બેંક નજીક એક કાર પણ પાણીના વહેણમાં વહી જતો વીડિયો વાયરલ થયો હતો.

પાણીમાં વહી રહેલા LPG સીલીન્ડરનો વીડિયો થયો વાયરલ

નવસારીમાં હવામાન વિભાગની આગાહી સાચી ઠરી છે અને હવે નવસારીમાં આફતનો વરસાદ વરસી રહ્યો છે. જેમાં જળબંબાકાર બનેલા નવસારી શહેરમાં વરસાદી પાણી ભરાતા લોકોને હાલાકી વેઠવાનો વારો આવ્યો છે. જેમાં શહેરના જુનાથાણા સમીપ આવેલ ઝુમુર ગેસ એજન્સીના ગોડાઉનમાં પાણી ભરાતા, LPG ગેસના સીલીન્ડરો પાણીમાં તરવા લાગ્યા હતા. બાદમાં તણાઈને પાછળની કંપાઉંડ વોલ પાસે ભેગા થયા હતા અને અચાનક ગોડાઉનના કંપાઉંડ વોલ તોડી બહાર નીકળ્યા અને એક પછી એક બે દીવાલ તોડી પાછળ આવેલ ખાડી મારફતે પૂરના નદી તરફ વહી ગયા હતા. જેનો વીડિયો નજીકના જ એપાર્ટમેન્ટના લોકોએ ઉતાર્યો હતો. આ વીડિયો સોશ્યલ મીડિયામાં વાયરલ થતા, જિલ્લા કલેકટરે જિલ્લા પુરવઠા અધિકારીને LPG સીલીન્ડર વહી જવા મુદ્દે તપાસ સોંપી છે.

શાંતિનાથ એપાર્ટમેન્ટ સામે દેરાસરની દિવાલ તુટતા કારનો કચ્ચરઘાણ વળ્યો

ભારે વરસાદને પગલે શહેરના જર્જરતી મકાનોનો જર્જર ભાગ પણ પડી જાય છે, શહેરમાં ગત દિવસોમાં જર્જર મકાનો ધરાશાયી થયા હોવાના સમાચારો સામે આવ્યા હતા. જેમાં આજે પડેલા મુશળાધાર વરસાદમાં શાંતાદેવી રોડ પર આવેલા શાંતિનાથ એપાર્ટમેન્ટનો સ્લેબ તૂટીને નીચે પડ્યો હતો. પરંતુ સ્લેબ નીચે પાર્ક કરેલી બે કાર ઉપર પડતા કારનો કચ્ચરઘાણ વળી ગયો હતો. ઘટનાની જાણ કાર માલિકોને થતા તેમના હોશ ઉડી ગયા હતા. કારણે તેમની કારનો ખુરદો બોલી ગયો હતો અને કારમાં ટોટલ લોસ જેવી સ્થિતિ સર્જાઈ છે.

શહેરના સેન્ટ્રલ બેંક નજીક કાર વરસાદી પુરમાં તણાંઈ, વીડિયો થયો વાયરલ

નવસારીમાં મેઘ તાંડવને કારણે હવે તારાજીના દ્રશ્યો સામે આવી રહ્યા છે. શહેરમાં કેળથી પણ વધુ પાણીનો ભરાવો રસ્તાઓ ઉપર થતા વાહન વ્યવહાર અવરોધાયો હતો. ખાસ કરીને રસ્તા પર પાર્ક કરેલા ટૂ વ્હીલર અને ફોર વ્હીલર પાણીમાં ડૂબ્યા હતા. જેમાં સેન્ટ્રલ બેંક નજીક એક કાર પાણીમાં તણાવા લાગી હતી, જે તણાઈને થોડે દૂર પહોંચી, ત્યાં વીજ થાંભલાને કારણે અટકી પડી હતી. જેનો વીડિયો પણ સ્થાનિક લોકોએ બનાવીને વાયરલ કર્યો હતો. ઉલ્લેખનિય છે કે, ભારે વરસાદની આ સ્થિતિમાં શહેરમાં અનેક ટૂ વ્હીલર પાણીમાં ડૂબતા બંધ પડ્યા હતા અને લોકોએ તેને ખેંચીને અથવા ધક્કો મારીને પોતાના ગંતવ્ય ઉપર લઇ જતા જણાયા હતા.