તણાયેલા 370 LPG સીલીન્ડરમાંથી 222 મળ્યા, 148 સીલીન્ડરની હજી શોધ

નવસારી : નવસારી શહેરમાં ગત રોજ પડેલા મુશળાધાર વરસાદમાં વરસાદી પુરની સ્થિતિ સર્જાઈ હતી, જેમાં શહેરના જુનાથાણા નજીક ખત્રીવાડ પાસે આવેલ ગેસ એજન્સીના ગોડાઉનના 370 ખાલી LPG સીલીન્ડર પાણીના વહેણમાં દીવાલ તુટતા તણાઈ ગયા હતા. પાણી ઓસર્યા બાદ એજન્સી દ્વારા ઝાડી ઝાંખરામાંથી 222 ગેસ સીલીન્ડર શોધી કાઢવામાં આવ્યા હતા, જયારે 148 સીલીન્ડર હજી પણ મળ્યા નથી, જેની શોધ કરવામાં આવી રહી છે.

ગેસ સીલીન્ડર ખોવાતા સંચાલકે આપી પોલીસ ફરિયાદ

નવસારીમાં ગત રોજ વરસેલી આકાશી આફતમાં સવારે પોણા દસ વાગ્યા આસપાસ જુનાથાણા નજીક ખત્રીવાડ પાસે આવેલ ઝુમુર ગેસ એજન્સીના ગોડાઉનમાં પણ પાણી ભરાયા હતા. અંદાજે 10 ફૂટ સુધી વરસાદી પાણી ભરાતા ખુલ્લા ગોડાઉનમાંથી ખાલી LPG ગેસ સીલીન્ડર પાણીમાં તરતા થયા હતા અને ધીરે ધીરે ગોડાઉનની બહાર નીકળી પાછળના ભાગે ભેગા થયા હતા. બીજી તરફ ઉપરથી આવતા પાણીનો પ્રવાહ એટલો તેજ હતો, કે ગોડાઉનની કંપાઉંડ વોલ તૂટી ગઈ હતી. ત્યારબાદ બહાર બનેલી બીજી બે દીવાલો પણ તૂટી જતા LPG ગેસ સીલીન્ડર પાણીના વહેણ સાથે પાછળના ઝાડી ઝાંખરાવાળા વિસ્તારમાં થઇ ખાડી અને ત્યાંથી પૂર્ણા નદી તરફ વહેતા થયા હતા. ગોડાઉનમાં 370 ખાલી ગેસ સીલીન્ડર હતા, જે તમામ પાણીના વહેણમાં વહી ગયા હતા. બપોરે જયારે વરસાદી પાણી ઓસર્યા, ત્યારે સંચાલક અને તેમના માણસોએ વહી ગયેલા ગેસ સીલીન્ડર શોધવાના પ્રયાસો કર્યા હતા. જેમાં પાછળના ઝાડી ઝાંખરામાંથી 222 ગેસ સીલીન્ડર મળી આવ્યા હતા. પરંતુ હજી પણ 148 ગેસ સીલીન્ડર મળ્યા નથી, જેની શોધ ચાલુ છે. સાથે જ સંચાલક દ્વારા ગેસના સીલીન્ડર પાણીમાં વહી ગયા હોવા સાથે જ 148 ગુમ હોવાની માહિતી જિલ્લા કલેકટર, જિલ્લા પુરવઠા અધિકારી સંબંધિત અધિકારીઓને જાણ કરી હતી. જયારે નવસારી ટાઉન પોલીસ મથકે પણ સીલીન્ડર ગુમ થયાની ફરિયાદ નોંધાવી હતી.