નવસારીમાં 4335 ગણેશ પ્રતિમાઓનું આસ્થાના ઓવારેથી થયુ વિસર્જન

નવસારી : ધામધૂમથી ભગવાન શ્રી ગણપતિને લાવ્યા બાદ 10 દિવસો સુધી શ્રીજીની ભક્તિભાવથી પૂજા કર્યા બાદ આજે ભક્તોએ હર્ષોલ્લાસ સાથે ભારે હૈયે બાપ્પાને વિદાય આપી હતી. નવસારીના વિરાવળ સ્થિત આસ્થાના ઓવારા સહિત 5 ઓવારાઓ પરથી 4335 ગણેશ પ્રતિમાઓનું વિસર્જન કરાયું હતું.

પૂર્ણા નદીના ધસમસતા પાણીના પ્રવાહમાં ક્રેનની મદદથી કરાઈ રહ્યુ છે વિસર્જન

ગણેશોત્સવ આવતા જ ભક્તોના મન પ્રફુલ્લિત થઈ જાય છે. દૂંદાળા દેવને ધામધૂમથી પોતાના મંડપ કે ઘરે લાવતા હોય છે. ગણેશ ચતુર્થીએ ભક્તિભાવ સાથે શાસ્ત્રોક્ત વિધિ વિધાન સાથે લંબોદરની સ્થાપના કર્યા બાદ 10 દિવસો સુધી શ્રધ્ધાથી તેમની આરાધનામાં ગાળ્યા હતા. જ્યારે આજે અનંત ચતુર્થીના દિને શ્રીજી ભક્તોએ ભીની આંખે ભગવાનને વિદાય આપી હતી. એકદંતને વિદાય આપવા વિવિધ ગણેશ મંડળોએ ઢોલ, નગારા, તાસા, મંજીરા તેમજ DJ ના તાલે નાચતા નાચતા વિસર્જન યાત્રામાં જોડાયા હતા. બપોરે 12 વાગ્યા બાદ નવસારી શહેરના રાજમાર્ગો ઉપર વિસર્જન યાત્રા શરૂ થઈ હતી, જેમાં મોટી ગણેશ પ્રતિમાઓ બપોર બાદ વિસર્જન યાત્રામાં જોડાઈ હતી. શહેરની મોટા ભાગની ગણેશ પ્રતિમાઓનું વિરાવળ સ્થિત પૂર્ણા નદીના ઓવારાથી વિસર્જિત કરાઈ હતી. પરંતુ નવસારીના ઉપરવાસના જિલ્લાઓમાં પડેલા ભારે વરસાદને કારણે પૂર્ણા નદીની જળ સપાટી વધતા વિસર્જનમાં વિઘ્ન જણાતું હતું. પણ જ્યારે ખુદ વિઘ્નહર્તાનું જ વિસર્જન હોય, ત્યારે આવા વિઘ્નો પાંગળા સાબિત થાય છે. મહાનગર પાલિકા દ્વારા કરાયેલ ક્રેનની વ્યવસ્થા અને વિરાવળના તરવૈયાઓની મહેનતથી રાતે 8:30 વાગ્યા સુધીમાં વિરાવળ સ્થિત આસ્થાના ઓવારેથી 133 મોટી અને 1998 નાની ગણેશ પ્રતિમાઓનું વિસર્જન થયું હતું. જોકે વિસર્જન દરમિયાન કોઈ અનિચ્છનીય ઘટના ઘટે તો, તેને પહોંચી વળવા મહાનગર પાલિકાના ફાયર બ્રિગેડના જવાનો અને નવસારી પોલીસના જવાનો ખડે પગે તૈયાર હતા. જ્યારે નવસારી પોલીસના જવાનોએ વિસર્જન પ્રક્રિયામાં ખડે પગે ટ્રાફિક સંચાલન તેમજ સુરક્ષાની ઉમદા કામગીરી કરી હતી.

નવસારીના 5 ઓવારાઓ ઉપરથી 416 મોટી અને 3919 પ્રતિમાઓનું વિસર્જન

નવસારી મહાનગર પાલિકા વિસ્તારમાં ગણેશ વિસર્જનને લઈને ત્રણ મુખ્ય ઓવારાઓ ઉપર વિસર્જનની વ્યવસ્થા ગોઠવવામાં આવી હતી. જેની સાથે દાંડી અને એરૂ ખાતે પણ વિસર્જનની વ્યવસ્થા ગોઠવાઈ હતી. જેમાં સવારથી રાતે 8:30 વાગ્યા સુધીમાં વિરાવળ ઓવારાથી 133 મોટી અને 1998 નાની, દાંડી ઓવારાથી 52 મોટી અને 296 નાની, જલાલપોર ઓવારાથી 51 મોટી અને 538 નાની, એરૂ ઓવારાથી 37 મોટી અને 256 નાની, જ્યારે ધારાગિરી ઓવારાથી 143 મોટી અને 831 નાની મળી કુલ 4335 પ્રતિમાઓનું વિસર્જન થયું હતું.

વિજલપોરના શિવ રાણા ગ્રુપ દ્વારા મહારાષ્ટ્રીયન સ્ટાઈલમાં ગણેશ વિસર્જન

નવસારી : નવસારીમાં આજે ભક્તોએ હર્ષોલ્લાસ સાથે ભીની આંખે બાપ્પાને વિદાય આપી હતી. જેમાં નવસારી શહેરના વિજલપોર વિસ્તારના શિવ રાણા ગ્રુપ દ્વારા મહારાષ્ટ્રીયન સ્ટાઈલમાં 8000 કિલો ગુલાલ ઉડાવીને શ્રીજીને વિદાય આપતા સમગ્ર વિજલપોર ગુલાલના રંગે રંગાયું હતું.

1985 થી અંબાજી નગરમાં મહારાષ્ટ્રીયન સ્ટાઈલમાં ઉજવાય છે ગણેશોત્સ

નવસારીમાં 10 દિવસો સુધી ભકતોએ ભક્તિભાવ પૂર્વક શ્રી ગણપતિજીની પૂજા અર્ચના કરી હતી. રોજ બાપ્પાની ભાવથી આરતી કરી, તેમને ભાવતા ભોજન પીરસ્યા હતા. પરંતુ આજે અનંત ચૌદશના દીને ગણેશજીએ નીજ ધામ જવાની તૈયારી કરતા જ ભક્તોની આંખો ભીની થઈ ગઈ હતી. જોકે ગણેશ વિસર્જન યાત્રામાં ભક્તોએ બાપ્પાને અનોખી રીતે વિદાય આપવાનું આયોજન કર્યું હતું. જેમાં નવસારી શહેરના વિજલપોરના અંબાજી નગરનું શિવ રાણા ગ્રુપ 1985 થી ગણેશોત્સવ ઉજવતો આવ્યો છે. વર્ષોથી ગ્રુપના સભ્યો મહારાષ્ટ્રીયન સ્ટાઈલમાં બાપ્પાને વિદાય આપે છે. આજે વિસર્જન યાત્રામાં શિવ રાણા ગ્રુપ દ્વારા મહારાષ્ટ્રીયન બેન્ડ સાથે જ મહારાષ્ટ્રથી 8000 કિલો ગુલાલ મંગાવ્યો હતો. બપોરે વિસર્જન યાત્રાની તૈયારી કરતા જ બે JCB મશીનમાં હજારો કિલો ગુલાલ ભરવામાં આવ્યો હતો. જ્યારે ગણપતિ બાપ્પાની યાત્રા નીકળી કે ભક્તોએ ગુલાલ ઉડાવી તેમને હર્ષોલ્લાસ સાથે વિદાય આપી હતી. ગુલાલની છોળો ઊડતા સમગ્ર વાતાવરણ લાલ થયુ હતું. એટલું જ નહીં વિસર્જન યાત્રામાં વિજલપોર ગુલાલના રંગે રંગાયું હતું. જ્યારે મહારાષ્ટ્રીયન બેન્ડના તાલે શ્રીજી ભક્તો ઝૂમતા વિરાવળ ઓવારા તરફ આગળ વધ્યા હતા. પરંતુ 10 દિવસ સુધી બાપ્પાની આગતા સ્વાગતા કર્યા બાદ તેમને વિદાય આપતા શિવ રાણા ગ્રુપના સૌની આંખો ભીંજાઈ હતી.

રોટરી ક્લબ સહિતની NGO એ પૂજાપો એકત્રિત કરી નદી પ્રદૂષણ અટકાવ્યુ

નવસારી : નવસારીમાં આજે ગણેશ વિસર્જન માટે આવેલા ગણેશ ભક્તો પાસેથી નવસારી રોટરી ક્લબ અને અન્ય NGO દ્વારા 10 દિવસના ફૂલહાર, પૂજાપા સહિતની વસ્તુઓ એકત્રિત કરી પૂર્ણા નદીને પ્રદૂષિત થતી અટકાવવાનો પ્રયાસ કર્યો હતો. લગભગ 50 ટનથી વધુ ભેગા થતા ફૂલહારમાંથી મહાનગર પાલિકા આ વર્ષે અગરબત્તી બનાવવાનો પ્રોજેક્ટ હાથ ધરશે.

ગણેશોત્સવમાં અંદાજે ત્રણ ટનથી વધુ પ્લાસ્ટિક થાય છે ભેગુ

નવસારી શહેરમાં 10 દિવસ સુધી ભક્તોએ ભક્તિભાવ સાથે ગણેશોત્સવની ઉજવણી કરી હતી. જેમાં રોજના ભક્તોએ શ્રીજીને વિવિધ ફૂલો તેમજ ફળોના શણગાર કર્યા હતા. બાપ્પાને ભાત ભાતના ભોગ પણ ધરાવ્યા હતા. 10 દિવસ દરમિયાન ભેગા થયેલા ફૂલહાર તેમજ અન્ય પૂજાપો ભક્તોએ ભેગો કરી રાખ્યો હતો, જેને બાપ્પાના વિસર્જન સાથે જ નદીમાં વિસર્જીત કરવાની માન્યતા અનુસાર પોતાની સાથે લાવ્યા હતા. જોકે આ વર્ષે મહાનગર પાલિકાએ દરેક ગણેશ મંડળોમાંથી રોજના ફૂલહાર લેવા માટેની વ્યવસ્થા પણ ગોઠવી હતી. ત્યારે વિસર્જનમાં આવેલ શ્રીજી ભક્તો પાસેથી નવસારી રોટરી ક્લબ, હરિજયોત, રોબીન હૂડ આર્મી સહિતની NGO દ્વારા ફૂલહાર સહિત અન્ય પૂજાપો એકત્રિત કર્યો હતો. જેમાં અંદાજે 50 ટનથી વધુ ફૂલહાર, ત્રણ ટનથી વધુ પ્લાસ્ટિક સાથે મોટી સંખ્યામાં ફળ ભેગા થયા હતા. જેને સ્વયંસેવકો દ્વારા અલગ તારવવામાં આવ્યા હતા. છેલ્લા 9 વર્ષોમાં ફૂલહારમાંથી રોટરી ક્લબ નવસારી કૃષિ યુનિવર્સિટી અને પાલિકાની મદદથી વર્મી કંપોસ્ટ ખાતર બનાવતું હતું અને તેને ખેડૂતોને નિઃશુલ્ક આપવામાં આવતું હતું. પરંતુ આ વર્ષે ભેગા થયેલા ફૂલહારમાંથી નવસારી મહાનગર પાલિકા અગરબત્તી બનાવવાનો પ્રોજેક્ટ હાથ ધરશે. જેથી વેસ્ટમાંથી બેસ્ટ બનાવવા સાથે રોજગારી પણ આપી શકાય. જ્યારે ભેગા થયેલા પ્લાસ્ટિક કચરાને રિસાયકલિંગ યુનિટમાં મોકલવામાં આવશે.