લકઝરી કારથી પાયલોટીંગ કરનાર મુખ્ય સૂત્રધાર સહિત બે વોન્ટેડ

નવસારી : નવસારી જિલ્લામાંથી રોજના લાખો રૂપિયાનો વિદેશી દારૂ સુરત તેમજ આગળના જિલ્લાઓમાં ખેપિયાઓ દ્વારા પહોંચાડવામાં આવે છે. ત્યારે ચીખલી પોલીસે લક્ઝરીયસ કારમાં દારૂની હેરાફેરીનો પર્દાફાશ કર્યો છે. નેશનલ હાઇવે નં. 48 પર બલવાડા ઓવરબ્રીજ નજીકથી 3.50 લાખનો વિદેશી દારૂ ભરેલ કાર સાથે વલસાડના બે ખેપિયાઓની ધરપકડ કરી હતી. જ્યારે દારૂની કારનું પાયલોટિંગ કરતી લકઝરી કારમાં સવાર મુખ્ય સૂત્રધાર સાથે બેને વોન્ટેડ જાહેર કર્યા છે.

સેલવાસથી દારૂનો જથ્થો ભરી કડોદરા સપ્લાય કરવાનો ખેલ પકડાયો

મળતી માહિતી અનુસાર, ચીખલી પોલીસના PI પી.બી. પટેલીયાના માર્ગદર્શન હેઠળ સર્વેલન્સ ટીમના PSI આર.એન. વાડલે અને કર્મચારીઓ ખાનગી વાહનોમાં હાઈવે પર પેટ્રોલીંગમાં હતા. દરમીયાન સર્વેલન્સ ટીમના ASI અલ્પેશભાઈ અને HC મહેન્દ્રભાઈને મળેલ સંયુક્ત બાતમીના આધારે, નેશનલ હાઈવે નં. 48 પર બલવાડા ઓવરબ્રીજના ઉત્તર છેડે વોચ ગોઠવવામાં આવી હતી. આ દરમીયાન શંકાસ્પદ રીતે પસાર થતી એક સફેદ રંગની કારને પોલીસે આંતરી, તેને અટકાવી હતી. કારમાં તપાસ કરતા તેમાંથી 3,50,640 રૂપિયાની 25 પુંઠાના બોક્સમાંથી વ્હિસ્કી તથા ટીન બિયર મળી કુલ 1020 બાટલીઓ મળી આવી હતી. પોલીસે ઘટના સ્થળેથી 5 લાખની કાર, 2 મોબાઈલ અને દારૂ મળી કુલ 8.61 લાખનો મુદ્દામાલ જપ્ત કરી, કારચાલક અને વલસાડના ઉદવાડા તાલુકાના સરોધી ગામે રહેતા મીતકુમાર ઉર્ફે મીતલો માહ્યાવંશી અને વલસાડના વાપી તાલુકાના બલીઠા ગામે રહેતા અક્ષયકુમાર રાઠોડની સ્થળ પરથી ધરપકડ કરી હતી.

લકઝરી કાર વડે પાયલોટીંગ કરનાર નવસારીનો બુટલેગર ‘આઝાદ લંગડો’ વોન્ટેડ જાહેર

પોલીસની કડક પૂછપરછમાં આરોપીઓએ ખુલાસો કર્યો હતો કે, આ વિદેશી દારૂનો જથ્થો સેલવાસથી ભરીને સુરતના કડોદરા ખાતે સપ્લાય કરવાનો હતો. આ સમગ્ર રેકેટનો મુખ્ય સૂત્રધાર નવસારીના લક્ષ્મી ટોકીઝ પાછળ રહેતો નસીમુદ્દીન ઉર્ફે ‘આઝાદ લંગડો’ છે, જેણે સેલવાસથી દારૂ ભરાવ્યો હતો અને પોતાની લકઝરી કાર વડે આગળ પાયલોટીંગ કરી દારૂનો જથ્થો સુરત તરફ રવાના કરાવ્યો હતો. ચીખલી પોલીસે દારૂનો જથ્થો સપ્લાય કરનાર મુખ્ય આરોપી આઝાદ લંગડો તેમજ કડોદરા ખાતે દારૂ મંગાવનાર અજાણ્યા બુટલેગર સામે પ્રોહિબિશન એક્ટ હેઠળ ગુનો નોંધી બંનેને વોન્ટેડ જાહેર કરી, તપાસને વેગ આપ્યો છે.

પોલીસે 91 હજારથી વધુનો મુદ્દામાલ જપ્ત કરી, 3 ને વોન્ટેડ જાહેર કર્યા

નવસારી : નવસારીના ચીખલી તાલુકાના મલીયાધરા ગામે ખુલ્લા ખેતરમાં રમાતા જુગાર પર ચીખલી પોલીસે દરોડો પાડી જુગાર રમતા 5 જુગારિયાઓને પકડી પાડ્યા હતા. પોલીસે ઘટનાસ્થળેથી 91 હજારથી વધુનો મુદ્દામાલ કબ્જે કરી, નાસી છૂટેલા અન્ય 3 આરોપીઓને વોન્ટેડ જાહેર કર્યા છે.

બાતમીના આધારે સર્વેલન્સ ટીમનો દરોડો : 5 જુગારીયાઓ રંગેહાથ ઝડપાયા

મળતી માહિતી અનુસાર, ચીખલી તાલુકાના મલિયાધરા ગામના ભૂરી ફળિયા સ્થિત એક ખેતરમાં કેટલાક લોકો જાહેરમાં તીનપત્તીનો જુગાર રમતા હોવાની બાતમી ચીખલી પોલીસના HC વિજયભાઈ દેવાયતભાઈને મળી હતી. જેને આધારે ચીખલી પોલીસ સ્ટેશનના PI પી.બી. પટેલીયાના માર્ગદર્શનમાં PSI આર. એન. વાદળે અને ટીમે મલીયાધરા ગામના ભુરી ફળીયા સ્થિત રાજેશ પટેલના ખેતર પાસે ખુલ્લી જગ્યામાં જુગાર રમતા જુગારિયાઓ પર દરોડો પાડતા ઘટના સ્થળે નાસભાગ મચી ગઈ હતી. પરંતુ પોલીસે ઘટના સ્થળેથી ગણદેવીના ઉંડાચ ગામે રહેતા રાજુ પટેલ, બામણબેલ ગામે રહેતા કુશ ચૌહાણ, મલિયાધરા ગામે રહેતા રાજેશ પટેલ અને મયુર પટેલ અને બીલીમોરાના દિલીપસિંગ લબાનાને દબોચવામાં સફળતા મેળવી હતી.

91,290 રૂપિયાનો મુદ્દામાલ જપ્ત, 3 આરોપીઓ વોન્ટેડ જાહેર

પોલીસે પકડાયેલા આરોપીઓ પાસેથી તથા દાવમાં મૂકેલ રોકડ સહિત કુલ 20,790 રૂપિયા રોકડા, 50,500 રૂપિયાના 6 મોબાઈલ ફોન, 20 હજાર રૂપિયાની એક બાઈક અને ગંજીપાના મળી કુલ 91,290 રૂપિયાનો મુદ્દામાલ જપ્ત કર્યો હતો. પોલીસના દરોડા દરમિયાન ચીખલીનો મોબીન મહમંદ શેખ આંતલિયાનો સંજય ઉપેન્દ્રભાઇ પટેલ અને વલસાડના ગોયર ગામનો ભીતેશ ઉર્ફે ભાવો ભીખુભાઇ પટેલ નાસી છૂટવામાં સફળ રહ્યા હતા, જેમને પોલીસે વોન્ટેડ જાહેર કરી, ચીખલી પોલીસે જુગારધારાની કલમ હેઠળ ગુનો નોંધી આગળની વધુ તપાસ PSI આર.એન. વાડલેને સોંપી છે.

બોરીયાચ ટોલનાકા નજીકથી LCB પોલીસે કુલ 9.79 લાખનો મુદ્દામાલ કબ્જે કર્યો

નવસારી : ગુજરાતમાં દારૂબંધી હોવા છતાં બુટલેગરો અને ખેપિયાઓ અવનવા તિકડમ લગાવીને દારૂની હેરાફેરી કરતા ખચકાતા નથી. જોકે, તેમની તમામ ચાલાકીઓ સામે પોલીસ તંત્ર પણ સતર્ક રહીને તેમના મનસૂબા પર પાણી ફેરવી દેવામાં સફળ થાય છે. આવો જ એક ચોંકાવનારો કિસ્સો નવસારીમાં સામે આવ્યો છે, જ્યાં બોલેરો પીકઅપમાં ખાસ આધુનિક ફેબ્રિકેશનથી ચોરખાનું બનાવીને દારૂની છુપી હેરાફેરી કરવામાં આવી રહી હતી, જેને લોકલ ક્રાઇમ બ્રાન્ચે (LCB) નિષ્ફળ બનાવી દીધી હતી.

પિકઅપમાં આધુનિક ચોરખાનું જોઈને પોલીસ પણ ચોંકી ગઈ

મળતી માહિતી મુજબ, નવસારી LCB ની ટીમને મળેલ ચોક્કસ બાતમીના આધારે નેશનલ હાઈવે નં. 48 પર બોરીયાચ ટોલનાકા પહેલા નાકાબંધી ગોઠવી હતી. આ દરમિયાન બાતમીવાળો શંકાસ્પદ પીકઅપ આવતા તેને અટકાવીને ચેક કરતા વાહન પ્રથમ દ્રષ્ટિએ સાવ ખાલી જણાયો હતો. પરંતુ પોલીસે ઝીણવટભરી તપાસ હાથ ધરતાં પીકઅપની અંદર જ આધુનિક ફેબ્રિકેશનથી ખૂબ જ ચાલાકીપૂર્વક બનાવવામાં આવેલું એક ચોરખાનું મળી આવ્યું હતું, જેને જોઈને ખુદ પોલીસ અધિકારીઓ પણ આશ્ચર્યચકિત થઈ ગયા હતા.

પોણા ત્રણ લાખનો દારૂ જપ્ત, સુરતના બુટલેગરને વોન્ટેડ જાહેર કરાયો

આ ગુપ્ત ચોરખાનાની તલાશી લેતાં તેમાંથી 2,74,500 રૂપિયાની વિદેશી દારૂની વ્હીસ્કી અને વોડકાની કુલ 855 બોટલો મળી આવી હતી. જેથી પોલીસે ઘટનાસ્થળેથી વાહનચાલક અને રાજસ્થાનના ઝાલોરના ઇશારામ ઉર્ફે ઇશ્વર કાલારામ ભીલની ધરપકડ કરી હતી. પોલીસે ઘટના સ્થળેથી દારૂ, પીકઅપ ગાડી અને મોબાઇલ ફોન સહિત કુલ 9,79,500 રૂપિયાનો મુદ્દામાલ કબ્જે કર્યો હતો. પોલીસે દારૂનો જથ્થો મંગાવનાર અને ભરી આપનાર મુખ્ય આરોપી અને સુરતના વરાછાના નરેશકુમાર ઉર્ફે રમેશ પુરોહિતને વોન્ટેડ જાહેર કરી, નવસારી રૂરલ પોલીસ સ્ટેશન ખાતે પ્રોહીબિશન એક્ટ હેઠળ ગુનો નોંધી આગળની તપાસ હાથ ધરી છે.