LCB પોલીસે મજૂર બનીને આરોપી પપ્પુ વસુનિયાને દબોચ્યો
નવસારી : નવસારી લોકલ ક્રાઈમ બ્રાન્ચ (LCB) એ કાયદાના સકંજામાંથી ભાગતા ફરતા ગુનેગારો સામે લાલ આંખ કરી, વર્ષ 2013 ના એક ચકચારી અપહરણ અને સગીરા પર દુષ્કર્મ (POCSO Act) ના ગંભીર ગુનામાં છેલ્લા ૧૩ વર્ષથી નાસતા ફરતા આરોપી પપ્પુ વસુનિયાને ફિલ્મી ઢબે મધ્યપ્રદેશ ખાતેથી ઝડપી પાડવામાં મોટી સફળતા મેળવી છે. કોર્ટના વોરંટના આધારે પોલીસે આરોપીને ફરી જેલના સળિયા પાછળ ધકેલી દીધો છે.
13 વર્ષ જૂનો ગંભીર ગુનો : સગીરાનું અપહરણ અને સામૂહિક દુષ્કર્મ

વર્ષ 2013 માં નવસારી તાલુકાના એક ગ્રામ્ય વિસ્તારમાં મજૂરી અર્થે આવેલા મૂળ મધ્યપ્રદેશના પપ્પુ વસુનિયાએ પોતાના મિત્ર સાથે મળીને એક ઘૃણાસ્પદ ગુનાને અંજામ આપ્યો હતો. આ બંને નરાધમો એ એક 15 વર્ષની સગીરાને લાલચ આપી ભગાડી ગયા હતા અને તેની સાથે દુષ્કર્મ આચર્યું હતું. આ ઘટના અંગે સગીરાના પરિવારે નવસારી ગ્રામ્ય પોલીસ સ્ટેશનમાં ફરિયાદ નોંધાવતા પોલીસે ત્વરિત કાર્યવાહી કરી પપ્પુ વસુનિયા અને તેના સાથીદારની ધરપકડ કરી જેલ હવાલે કર્યા હતા.
જામીનનો દુરુપયોગ: વચગાળાના જામીન મળતા જ આરોપી થયો હતો ફરાર

જેલના સળિયા પાછળ સજા કાપી રહેલો મુખ્ય આરોપી પપ્પુ વસુનિયા કાયદાની આંખમાં ધૂળ નાખવામાં સફળ રહ્યો હતો. તે જેલમાંથી વચગાળાના જામીન (Interim Bail) પર મુક્ત થયો હતો. જામીનની મુદત પૂરી થયા બાદ તેણે નિયમ મુજબ જેલમાં હાજર થવાનું હતું, પરંતુ તે જેલમાં પરત ફરવાને બદલે ફરાર થઈ ગયો હતો. આરોપી લાંબા સમય સુધી હાજર ન થતાં આખરે કોર્ટે તેની સામે ધરપકડનું વોરંટ (Arrest Warrant) જાહેર કર્યું હતું.
નવસારી LCB નું સિક્રેટ ઓપરેશન : પોલીસે મજૂરનો વેશ ધારણ કરી આરોપીને દબોચ્યો
નાસતા ફરતા આરોપીઓને પકડવા માટે નવસારી LCB પોલીસની ટીમ સતત વોચમાં હતી. આ દરમિયાન પોલીસને ટેકનિકલ સર્વેલન્સ અને ખાનગી બાતમીદારો પાસેથી ચોક્કસ માહિતી મળી હતી કે આરોપી પપ્પુ વસુનિયા મધ્યપ્રદેશમાં પોતાના વતનમાં છુપાયેલો છે. આરોપીને શંકા ન જાય તે માટે LCB ના જવાનોએ સ્થાનિક મજૂર જેવો વેશ ધારણ કર્યો હતો. પ્લાનિંગ મુજબ પોલીસે મધ્યપ્રદેશમાં તેના ઘરે જઈ તરાપ મારી હતી અને 13 વર્ષથી નાસતા ફરતા પપ્પુને આબાદ ઝડપી લીધો હતો.
કાયદાકીય કાર્યવાહી : આરોપીને કોર્ટમાં રજૂ કરી ફરી મોકલાયો જેલ હવાલે
નવસારી LCB પોલીસે આરોપી પપ્પુ વસુનિયાની વિધિવત અટકાયત કરી તેને નવસારી લાવવામાં આવ્યો હતો. કાયદાકીય પ્રક્રિયાના ભાગરૂપે આરોપીને સંબંધિત કોર્ટ સમક્ષ રજૂ કરવામાં આવ્યો હતો, જ્યાંથી તેને ફરીથી જેલના સળિયા પાછળ ધકેલી દેવાનો આદેશ થયો છે. LCB ની આ સરાહનીય કામગીરીથી ગુનેગારોમાં ફફડાટ વ્યાપી ગયો છે અને પીડિત પરિવારને ન્યાય મળ્યો છે.