જિલ્લામાં આપદા પ્રબંધનમાં ટેકનોલોજીના ઉપયોગને ધ્યાને લઇને રાષ્ટ્રીય કક્ષના એવોર્ડ મળ્યો
વલસાડ : વલસાડ જિલ્લામાં હવામાનની સમય પર તથા સચોટ માહિતી મળી રહે એ હેતૂથી જિલ્લા કલેક્ટર ધ્વારા ટેકનોલોજીના ઉપયોગ વડે ઇ-મેઘ પ્રોજેક્ટ લોંચ કરવામાં આવ્યો હતો. આ યુનિક પ્રોજેક્ટને ભારત સરકાર ધ્વારા ધ્યાને લઇ વર્ષ 2019 નો ધ ગવર્નન્સ નાવ ડીજીટલ ટ્રાન્સફર્મેશન અવોર્ડથી સન્માનવામાં આવ્યો છે. વલસાડ જિલ્લા કલેક્ટર સી.આર.ખરસાણે ધ યુઝ ઓફ આઇટી ઇન ડીઝાસ્ટર મેનેજમેન્ટ’ કેટેગરી હેઠળ દિલ્હી ખાતે ઉપરોક્ત રાષ્ટ્રીય એવોર્ડ રાજ્યસભાના સાંસદ સુરેશ પ્રભુના હસ્તે સ્વિકાર્યો હતો. આ સમારોહમાં અધિકારી ગ્રૂપના એમ.ડી. કૈલાશનાથ, ઇન્ડિયન ઇન્સ્ટિટયૂટ ઓફ પબ્લિક એડમીનીસ્ટ્રેશનના નિયામક એસ.એન.ત્રિપાઠી, ગવર્નિંગ કાઉન્સીલ સી.આર.આઇ.એસ. તથા રોડ ટ્રાન્સપોર્ટ અને હાઇવે શીપિંગ મંત્રાલયની આઇ.ટી. ટાસ્કફોર્સ સમિતિના સભ્ય વિનિત ગોએન્કા ઉપસ્થિત રહ્યા હતા.
દેશભરમાંથી ૩૦૦ જેટલી અરજીઓ નોમીનેશન કરવામાં આવી હતી. જેમાં વલસાડ જિલ્લાને ધ યુઝ ઓફ આઇટી ઇન ડીઝાસ્ટર મેનેજમેન્ટ કેટગરી હેઠળ ઇ-મેઘ (અર્લી વોર્નિંગ સીસ્ટમ) પ્રોજેકટ થકી નદીનું લેવલ કેટલું છે, તેની અસર વલસાડ શહેર અને નીચાણવાળા વિસ્તારમાં કેટલી થશે, આ તમામ માહિતી કમ્પ્યુટર ઉપર રેકોર્ડ કરી શકાય છે. આ સિસ્ટમ રિઅલ ટાઇમ ડેટા અને ઓટોમેટીક કોલ્સ અને એસએમએસ જનરેટ કરે છે.
વલસાડ જિલ્લા કલેકટર સી.આર.ખરસાણે એવોર્ડ માટે ખુશી વ્યક્ત કરતા જણાવ્યુ કે, વલસાડ જિલ્લાની ભૌગોતિક પરિસ્થિતિ અલગ છે. ખાસ કરીને જિલ્લાની નદી પર ડેમ નથી અને પર્વતીય વિસ્તારો છે. એવી નદી પર તથા નીચાણવાળા વિસ્તારોમાં લોકોને સાવચેત રહેવા ઇ-મેઘ (અર્લી વોર્નિંગ સીસ્ટમ) ઉપયોગી નીવડી શકે છે. વલસાડ જિલ્લાની ઔરંગા નદીમાં આવતા પુર સંદર્ભે અગાઉના વર્ષના ડેટા એકત્ર કરવામાં આવ્યા છે. તાન અને માન નદી જ્યાં ભેગી થાય છે, ત્યાં ભૈરવી ખાતે ઔરંગા નદી પર અલ્ટ્રા સાઉન્ડ કેમેરા સીસ્ટમ ગોઠવવામાં આવી છે. ઉલ્લેખનિય છે કે, ચોમાસાની ઋતુ દરમિયાન નદીમાં વધારે પાણી આવવાના સમયે અર્લી વોર્નિંગ સીસ્ટમનો ઉપયોગ કરી વલસાડ શહેર તથા નીચાણવાળા વિસ્તારોમાં પૂર જેવી પરિસ્થિતિમાં અગમચેતી આપી સાવચેત કરાયા હતા. જેના થકી માનવ મૃત્યુ અને જાનમાલના નુકશાનને બચાવી શકાયા છે.
