ગણદેવી પોલીસે એંધલ ગામે ફિલ્ડિંગ ગોઠવી વિદેશી દારૂ પકડ્યો
નવસારી : નેશનલ હાઇવે નં. 48 પર ગણદેવીના એંધલ ગામે મેંગોનીસ વિલા પાસે ફિલ્ડિંગ ગોઠવી ગણદેવી પોલીસે 2.52 લાખના વિદેશી દારૂ ભરેલા પીકઅપ સાથે ચાલકની ધરપકડ કરી હતી. જ્યારે દારૂ ભરાવી આપનાર અને મંગાવનાર બંને બુટલેગરોને વોન્ટેડ જાહેર કર્યા છે.
લાખોનો વિદેશી દારૂ એંધલના બુટલેગર લલિત તૈલીએ મંગાવ્યો હતો
મળતી માહિતી અનુસાર, ગણદેવી પોલીસના હેડ કોન્સ્ટેબલ મહેન્દ્રસિંહ નારાયણસિંહ અને કોન્સ્ટેબલ કિરણ ભગુને ખાનગી રાહે બાતમી મળી હતી કે, વલસાડ તરફથી વિદેશી દારૂ ભરેલો એક પીકઅપ નવસારી તરફ આવી રહ્યો છે અને હાલ વલસાડ જિલ્લાનું પારડી ગામ પાસ કરેલ છે. જેને આધારે પોલીસ સબ ઇન્સ્પેક્ટર એ. આર. સૂર્યવંશીએ તેમની ટીમ સાથે NH 48 પર ગણદેવીના એંધલ ગામે મેંગોનીસ વિલા પાસે પહોંચી, ફિલ્ડિંગ ગોઠવી હતી. દરમિયાન બાતમીવાળી પીકઅપ આવતા જ પોલીસે તેને અટકાવી તપાસ કરતા તેમાંથી 32 પૂઠાના બોક્ષમાં 2.52 લાખ રૂપિયાની વ્હિસ્કી અને વોડકાની 852 બોટલો મળી આવી હતી. જેથી પોલીસે પીકઅપ ચાલક અને વલસાડ જિલ્લાના ઝરોલી ગામે રહેતા 25 વર્ષીય ધીરજ આહીરની ધરપકડ કરી હતી. જેની પૂછપરછમાં વિદેશી દારૂનો જથ્થો સેલવાસના નરોલીના બુટલેગર સૂરજે ભરાવી આપ્યો હતો અને નવસારીના એંધલના બુટલેગર લલિત હેમરાજ તૈલીએ મંગાવ્યો હતો. જેથી પોલીસે સૂરજ અને લલિત બંનેને વોન્ટેડ જાહેર કર્યા છે. સાથે જ ઘટના સ્થળેથી વિદેશી દારૂ સાથે 3 લાખ રૂપિયાનો પીકઅપ અને 5 હજાર રૂપિયાનો મોબાઈલ ફોન મળી કુલ્લે 5.57 લાખનો મુદ્દામાલ કબ્જે કરી, ગણદેવી પોલીસ મથકે પ્રોહિબિશન એક્ટ હેઠળ ગુનો નોંધી આગળની તપાસને વેગ આપ્યો છે.
