Connect with us

આંતરરાષ્ટ્રીય

ચીખલીની જય અંબે સ્કૂલની વૈશ્વિક સ્તરે સિદ્ધિ : 7 વિદ્યાર્થીઓએ મેળવ્યા 21 મેડલ

Published

on

શાળાની ત્રણ વિદ્યાર્થીનીઓ અને ચાર વિદ્યાર્થીઓએ વિવિધ દોડમાં 17 ગોલ્ડ અને 4 સિલ્વર મેડલ જીત્યા

નવસારી : નવસારીની જય અંબે ઇન્ટરનેશનલ સ્કૂલના 7 નાના વિદ્યાર્થીઓએ વૈશ્વિક સ્તરે દોડ લગાવી શાળાને ગૌરવ અપાવ્યુ છે. ગત દિવસોમાં દુબઈમાં 9 દેશો વચ્ચે રમાયેલી એથલેટિક્સ ગેમ્સમાં સાતેય વિદ્યાર્થીઓએ વિવિધ દોડમાં ભાગ લઇ, 17 ગોલ્ડ અને 4 સિલ્વર મળી કુલ 21 મેડલો પોતાના નામે કરી ભારત અને શાળાને વિશ્વ ફલક પર નામના અપાવી છે. ત્યારે બાળકોની વૈશ્વિક સિદ્ધિને જય અંબે સ્કૂલ દ્વારા ધારાસભ્ય નરેશ પટેલની ઉપસ્થિતિમાં વિજય સરઘસ કાઢીને ઉજવવામાં આવી હતી.

વિદ્યાર્થીઓને ઉજ્જવળ ભવિષ્ય માટે શાળાના ટ્રસ્ટી મહેશ ગજેરાએ આપી શુભેચ્છા

નવસારીના ચીખલી તાલુકામાં શિક્ષણ ક્ષેત્રે અગ્ર હરોળની જય અંબે ઇન્ટરનેશનલ સ્કૂલના 7 વિદ્યાર્થીઓએ એથલેટિક્સ ગેમ્સમાં પોતાની ક્ષમતાનો વૈશ્વિક સ્તરે પરચો આપ્યો હતો. શાળાના વ્યાયામ શિક્ષક ધર્મેશ પટેલે શાળાના વિદ્યાર્થીઓને વિવિધ રમતો રમાડતા 7 તારલાઓ શોધી કાઢ્યા, જેઓને સખત મહેનત સાથે અલગ અલગ રમતોમાં તૈયાર કર્યા અને આજે નવસારી નહીં, પણ રાજ્ય, રાષ્ટ્રીય અને આંતરરાષ્ટ્રીય સ્તરે શાળાને ગૌરવ અપાવ્યું છે. જેમાં શાળાના દિયા પ્રકાશ પટેલ, હીર દીપેશ પટેલ, આર્ય સંકેત પટેલ, તેજ ઠાકોર પટેલ, પંથ ઠાકોર પટેલ, શ્રેય મિનેશ પટેલ અને જેનીલ મુકેશ પટેલ દિલ્હી ખાતે સંયુક્ત ભારત ખેલ ફાઉન્ડેશન યોજાયેલી એથલેટિક્સ રમતોમાં ઉત્કૃષ્ટ દેખાવ કરી, પ્રથમ સ્થાને રહીને ગોલ્ડ મેડલ જીત્યા હતા. જ્યાંથી તેમની પસંદગી દુબઈ સરકાર દ્વારા યોજાયેલી 8 મી એથલેટિક્સ ગેમ્સમાં થતા તમામ વિદ્યાર્થીઓ શાળાના શિક્ષક ધર્મેશ પટેલ સાથે દુબઈ પહોંચ્યા હતા. દુબઈમાં અંડર 14 માં 5 વિદ્યાર્થીઓએ દોડમાં ભાગ લઈ 10 ગોલ્ડ અને 2 સિલ્વર મેડલ જીત્યા હતા. જ્યારે અંડર 11 અને 8 મળી બે વિદ્યાર્થીઓએ કુલ 4 ગોલ્ડ અને 2 સિલ્વર મેડલ પોતાને નામ કર્યા હતા. વિદ્યાર્થીઓની ઝળહળતી સિદ્ધિ બદલ આજે શાળાએ ચીખલી મામલતદાર કચેરીથી વિજય સરઘસ કાઢ્યું હતું. જેનો પ્રારંભ ગણદેવીના ધારાસભ્ય નરેશ પટેલે વિજેતા બાળકોને મીઠાઈ અને પુષ્પ આપી કરાવ્યો હતો અને તેમને ઉજ્જવળ ભવિષ્ય માટે શુભેચ્છાઓ આપી હતી. સરઘસમાં વિદ્યાર્થીઓ કોઈ મોટા સેલિબ્રિટી હોય એવો અનુભવ કરતા તેમના ચેહરાઓ ખુશીથી છલકાઈ ગયા હતા. જ્યારે વ્યાયામ શિક્ષક ધર્મેશ પટેલની છાતી પણ ફુલાઈ હતી. શાળાના ટ્રસ્ટી મહેશ ગજેરાએ પણ વિદ્યાર્થીઓની વૈશ્વિક ફલક પર સિદ્ધિને બિરદાવી શાળા પર વિશ્વાસ મૂકનારા વાલીઓનો આભાર વ્યક્ત કર્યો હતો. સાથે જ વિદ્યાર્થીઓ આ જ રીતે અભ્યાસ અને ઇતર પ્રવૃત્તિઓમાં સફળતાના શિખરો સર કરતા રહે એવી શુભેચ્છાઓ પાઠવી હતી.

વિદ્યાર્થીઓએ 18 ઇવેન્ટમાં મેળવ્યા 21 મેડલો

દુબઈમાં યોજાયેલી અંડર 14 દોડ સ્પર્ધામાં દિયા પટેલ 3 ગોલ્ડ, હીર પટેલ 3 ગોલ્ડ મેડલ, શ્રેય પટેલ બે ગોલ્ડ એક સિલ્વર મેડલ, જેનિલ પટેલે 2 ગોલ્ડ અને 1 સિલ્વર મેડલ અને તેજ પટેલે 2 ગોલ્ડ અને 1 સિલ્વર મેડલ પોતાને નામે કર્યો હતો. જ્યારે અંડર 11 માં પંથ પટેલે 2 ગોલ્ડ અને 1 સિલ્વર અને અંડર 8 માં આર્યા પટેલે ત્રણ ગોલ્ડ મેડલ જીતીને શાળા, ચીખલી, ગુજરાત અને ભારતને ગૌરવ અપાવ્યું છે.

આંતરરાષ્ટ્રીય

નવસારીના વાંસદા તાલુકામાં વિશ્વ આદિવાસી દિવસની ભવ્ય ઉજવણી

Published

on

By

ધારાસભ્ય અનંત પટેલે સરકારી પ્રોજેક્ટના વિરોધનો સૂર છેડ્યો

નવસારી : વિશ્વ આદિવાસી દિવસના અવસરે વાંસદા તાલુકાના આદિવાસીઓએ કુંકણા સમાજ ભવન ખાતે ભગવાન બિરસા મુંડા તેમજ પ્રકૃતિની પૂજા કરી, કોંગી ધારાસભ્ય અનંત પટેલની આગેવાનીમાં ભવ્ય રેલી કાઢી હતી. આદિવાસી વાજિંત્રો, પહેરવેશ તેમજ ડીજે પર વાગતા પરંપરાગત ગીતો પર નૃત્ય કરતા આદિવાસીઓ હનુમાનબારી સર્કલ પહોંચ્યા હતા. રેલીમાં ધારાસભ્ય ચૈતર વસાવાના સમર્થન સાથે સોશ્યલ મીડિયામાં અનામત દૂર કરવા ચાલી રહેલા કેમ્પેઇન સામે ઉગ્ર વિરોધ જોવા મળ્યો હતો. વાંસદાના ધારાસભ્ય અનંત પટેલે આદિવાસી વિસ્તારોમાં વન્ય અભયારણ્ય, ડેમ, કોરિડોર સહિત કોઈપણ સરકારી પ્રોજેક્ટ આવવા નહીં દેવાની સરકારને ચીમકી આપી દીધી હતી.

Continue Reading

આંતરરાષ્ટ્રીય

ગુજરાત વર્લ્ડ એથ્લેટિક્સ ચેમ્પીયનશીપ – 2031 માટે સજ્જ : વર્લ્ડ એથ્લેટિકસ ડેલિગેશન ગુજરાતમાં

Published

on

મુખ્યમંત્રી ભૂપેન્દ્ર પટેલ અને નાયબ મુખ્યમંત્રી હર્ષ સંઘવી સાથે  ડેલિગેશનના સભ્યોએ કરી બેઠક

ગાંધીનગર : એથ્લેટિક્સની આંતરરાષ્ટ્રીય સંચાલક સંસ્થા વર્લ્ડ એથ્લેટિક્સનાં પાંચ સભ્યોનું ડેલિગેશન પ્રસ્તાવિત વર્લ્ડ એથ્લેટિક્સ ચેમ્પીયનશીપ – 2031 યજમાની માટે ગુજરાતની સજ્જ્તા અને ઇંફ્રાસ્ક્ટ્રક્ચરના નિરિક્ષણ અર્થે ગુજરાતના પ્રવાસે છે. ત્યારે ડેલિગેશનના સભ્યો તેમજ બીડ ઈવેલ્યુએશન પેનલના ચેરમેન એંટી ફિલ્હાકોસ્કીએ મુખ્યમંત્રી ભુપેંદ્ર પટેલ અને નાયબ મુખ્યમંત્રી હર્ષ સંઘવી સાથે બેથક કરી હતી.

વર્લ્ડ એથ્લેટિક્સ ડેલિગેશન બે દિવસના ગુજરાતના પ્રવાસે

આગામી 2028માં વર્લ્ડ એથ્લેટિક્સ અંડર – 20 ચેમ્પીયનશીપ તથા વર્લ્ડ એથ્લેટિક્સ ચેમ્પીયનશીપ 2031 ની સંભવિત યજમાની ગુજરાત કરવાનું છે. ત્યારે વર્લ્ડ એથ્લેટિક્સ ડેલિગેશન આ પ્રસ્તાવિત રમતોત્સવોના સંદર્ભમાં ગુજરાતનું સ્પોર્ટ્સ ઈન્ફ્રાસ્ટ્રક્ચર અને અન્ય આનુષાંગિક સુવિધાઓના અભ્યાસ અને નિરીક્ષણ માટે 22 અને 23 જૂન 2026 બે દિવસિય ગુજરાતના પ્રવાસે છે. જેમા આજે મુખ્યમંત્રી ભૂપેન્દ્ર પટેલ અને નાયબ મુખ્યમંત્રી હર્ષ સંઘવી સાથે ડેલિગેશનના સભ્યોએ ગાંધીનગર ખાતે મુલાકાત કરી, એક મહત્વપૂર્ણ બેઠક યોજી હતી. બેથક બાદ ડેલિગેશને ગુજરાત પ્રવાસનો પ્રારંભ કર્યો હતો.

ગુજરાતને વર્લ્ડ એથ્લેટિક્સ ચેમ્પિયનશીપ 2031 ની યજમાની મળે એ માટે મુખ્યમંત્રી આશાવાદી

મુખ્યમંત્રી ભૂપેન્દ્ર પટેલે ડેલિગેશનના સભ્યો સાથેની વાતચીતમાં વિશ્વાસ વ્યક્ત કર્યો કે, ગુજરાતના સ્પોર્ટ્સ ઈન્ફ્રાસ્ટ્રક્ચરની નિરીક્ષણ – મૂલાકાતથી ડેલિગેશનને ગુજરાતની સજ્જતા અને સ્પોર્ટ્સ કલ્ચરની પ્રત્યક્ષ અનુભૂતિ થશે જ. ગુજરાત સરકાર આ એથ્લેટિક્સ ચેમ્પીયનશીપ-2031 ની યજમાની મેળે તે માટે આશાવાદી છે અને આ રમતોના સફળ આયોજનની તૈયારીઓ વેગવંતી બનાવી છે.  આ મૂલાકાત બેઠકની ચર્ચાઓ દરમિયાન નાયબ મુખ્યમંત્રી હર્ષ સંઘવીએ કહ્યુ કે, ગુજરાત વર્લ્ડ પોલીસ એન્ડ ફાયર ગેઈમ્સ, કોમનવેલ્થ ગેઈમ્સ – 2030 સહિત વર્લ્ડ ક્લાસ સ્પોર્ટ્સના આયોજન માટે સજ્જ છે અને આ હેતુસર વીર સાવરકર સ્પોર્ટ્સ કોમ્પલેક્ષ, સરદાર પટેલ સ્પોર્ટ્સ એન્કલેવ, વિશ્વનું સૌથી મોટું સ્ટેડિયમ નરેન્દ્ર મોદી સ્ટેડિયમ, કરાઈ એકેડમી જેવા સ્થળોએ આવી વિશ્વ સ્તરીય રમતોના આયોજન માટેની સુવિધાઓ ઝડપભેર વિકસી રહી છે.

બેઠકમા અનેક મહાનુભાવો રહ્યા ઉપસ્થિત

આ મૂલાકાત બેઠકમાં મુખ્યમંત્રીના અગ્ર સચિવ સંજીવ કુમાર, સ્પોર્ટ્સ ઓથોરિટી ઓફ ગુજરાતના ડાયરેક્ટર જનરલ, આદીલ સુમારીવાલા, વાઈસ પ્રેસીડન્ટ વર્લ્ડ એથ્લેટિક્સ વગેરે ઉપસ્થિત રહ્યા હતા.

Continue Reading

આંતરરાષ્ટ્રીય

જલાલપોરના દીપલાના દરિયા કાંઠે ત્રીજુ ટેન્કર દરિયામાંથી તણાઈ આવ્યુ

Published

on

By

ઓમાનના દરિયામાં ડૂબેલા ટેન્કર નવસારીના દરિયા કાંઠે આવતા તપાસ શરૂ

નવસારી : નવસારીના દરિયામાં એક પછી એક ત્રણ ટેન્કરો દરિયામાં તણાઈને કાંઠે પહોંચ્યા છે. આજે જલાલપોરના દીપલા ગામના દરિયા કાંઠે ઓઈલ ભરેલ ટેન્કર તણાઈ આવતા મરોલી પોલીસ અને જલાલપોર મામલતદારની ટીમ દ્વારા તપાસ આરંભી હતી.

ફોનિક્સ 15 માલ વાહક જહાજમાંથી 48 ટેન્કર દરિયામાં પડી લાપતા થયા હતા

નવસારીના ઐતિહાસિક દાંડીના દરિયા કિનારે સોમ અને મંગળ બે દિવસોમાં માલવાહક જહાજ પર લદાયેલા હોય એવા બે ટેન્કર તણાઈ આવ્યા હતા. જેમાં સોમવારે તણાઈ આવેલા ટેન્કરની તપાસમાં જોતરાયેલી જલાલપોર પોલીસ, FSL અને GPCB ની તપાસમાં ટેન્કરમાં રંગવિહીન અને બિનજ્વલનશીલ બેઝ ઓઈલ હોવાનું જણાયું હતુ. પ્રથમ વાર ટેન્કર કાંઠે આવ્યાની જાણ થતા જલાલપોર મામલતદાર મૃણાલદાન ઈશરાણી પણ દરિયાકાંઠે પહોંચ્યા હતા. મામલતદારે ટેન્કર વિશેની માહિતી મેળવી સમગ્ર મુદ્દે નવસારી કસ્ટમ વિભાગને જાણ કરી હતી. મંગળવારે પણ આ જ પ્રકારે દાંડીના દરિયા કાંઠે અન્ય ટેન્કર તણાઈ આવ્યું હતુ. જ્યારે આજે બુધવારે ઉભરાટ નજીકના દીપલા ગામના દરિયા કાંઠે ટેન્કર તણાઈ આવતા ગ્રામજનોમાં અચરજ ફેલાઈ હતી. દીપલાના તલાટી જુગલસિંહ દ્વારા મરોલી પોલીસ તેમજ જલાલપોર મામલતદારને જાણ કરવામાં આવી હતી. ટેન્કર તણાઈ આવ્યાની માહિતી મળતા મરોલી પોલીસ FSL અને GPCB ની ટીમ સાથે ઘટના સ્થળે પહોંચી તપાસ આરંભી હતી. જ્યારે મામલતદાર મૃણાલદાન ઈશરાણી તેમજ તાલુકા વિકાસ અધિકારીએ પણ દીપલા દરિયા કાંઠે પહોંચી ટેન્કર વિશે માહિતી મેળવી હતી.

ફોનિક્સ 15 માલ વાહક જહાજ જેબેલ અલી UAE બંદરેથી નીકળી જેદ્દાહ પોર્ટ પર જતું હતું

નવસારીના દરિયા કાંઠે ટેન્કરો તણાઈ આવવાની ઘટના મુદ્દે તપાસમાં જોતરાયેલી જલાલપોર પોલીસની તપાસમાં ગુજરાતના દ્વારકા, પોરબંદર અને કચ્છના દરિયા કાંઠેથી પણ આ જ પ્રકારે દરિયામાં તણાઈને આવેલા ટેન્કરો મળ્યા હોવાની માહિતી મળી હતી. વધુ તપાસ કરતા કાંઠે આવેલ ટેન્કર સિલિન્ડર આકારના અને તેના ઉપર સીલ મારેલ હતુ. જયારે અંગ્રેજીમાં સીરીયલ નંબર પણ લખેલા જણાયા હતા. આ ટેન્કરો જેબેલ અલી UAE બંદરથી ફોનિક્સ 15 માલવાહક જહાજમાં લોડ કરવામાં આવ્યા હતા અને જેદ્દાહ પોર્ટ જઈ રહ્યા હતા. દરમિયાન ગત 21 જૂન, 2025 ના રોજ સલાલાહ ઓમાન બંદર નજીક દરિયામાં 48 ટેન્કર છૂટા પડી ગયા હતા. જેમાંના ત્રણ ટેન્કર નવસારીના દરિયા કાંઠે તણાઈ આવ્યા હતા. આ ત્રણેય ટેન્કરોમાં રંગવિહીન બેઝ ઓઈલ ભરેલું છે, જે એક અનુમાન મુજબ કોસ્મેટિક આઈટમ બનાવવામાં ઉપયોગમાં લેવાતું હોય છે. નવસારીના દરિયાકાંઠે મળેલ ટેન્કરો વિદેશી સંપત્તિ હોવાથી M/S YMS ટેન્ક સર્વિસિસ ઇન્ડિયા પ્રાઇવેટ લિમિટેડ કંપનીને જાણ કરવા સાથે નવસારી કસ્ટમ વિભાગને પણ સમગ્ર મુદ્દે રિપોર્ટ કરવામાં આવ્યો હતો.

 

Continue Reading
Advertisement

Trending