રાજ્યના નાણાં મંત્રી કનુ દેસાઇની ઉપસ્થિતિમાં ઉદ્યોગ સાહસિકોએ કર્યા MOU

નવસારી : ગુજરાતમાં વાયબ્રન્ટ સમિટ થકી અનેક નવા ઉદ્યોગો સ્થપાયા છે અને લાખો કરોડોના રોકાણ સાથે રોજગારીની અનેક તકો ઉભી થતા ભારતના વિકાસમાં ગુજરાત ગ્રોથ એન્જિન બનીને ઉભર્યુ છે. ત્યારે આજે વાયબ્રન્ટ નવસારી સમિટમાં પણ 146 ઉદ્યોગ સાહસિકોએ 212 કરોડ રૂપિયાના રોકાણની તૈયારી બતાવી છે. જેની સાથે જ નવસારીમાં સ્થાનિક સ્તરે 5 હજારથી વધુ નવી રોજગારીની તકો ઉભી થશે.

નવસારીમાં નવા ઉદ્યોગો થકી હજારો લોકોને રોજગારીની નવીન તકો મળશે

ગુજરાતના આર્થિક વિકાસમાં તત્કાલીન મુખ્યમંત્રી અને હાલના વડાપ્રધાન નરેન્દ્ર મોદી દ્વારા દેશી અને વિદેશી રોકાણ લાવવા માટે વર્ષ 2003 થી વાયબ્રન્ટ ગુજરાત સમિટ યોજવામાં આવી રહ્યું છે. અત્યાર સુધીમાં ગુજરાતમાં વાયબ્રન્ટ ગુજરાત હેઠળ અનેક મોટા ઉદ્યોગો સ્થપાયા છે અને લાખો કરોડોના રોકાણ સાથે ઉદ્યોગ સાહસિકોએ MOU પણ કર્યા છે. રાજ્ય કક્ષાએ થતી વાયબ્રન્ટ સમિટ બાદ નાના ઉદ્યોગ સાહસિકો તેમને પસંદગીના જિલ્લામાં સ્થાનિક જરૂરિયાતોને ધ્યાને રાખી ઉદ્યોગ સ્થાપે તો સ્થાનિક કક્ષાએ રોજગારીની નવીન તક ઉભી થઈ શકે. જેથી આજે નવસારીના તીઘરા જકાતનાકા સ્થિત મતિયા પાટીદાર વાડીમાં વાયબ્રન્ટ નવસારી સમિટ રાજ્યના નાણાં મંત્રી અને નવસારીના પ્રભારી મંત્રી કનુ દેસાઈની ઉપસ્થિતિમાં યોજાઈ હતી. જેમાં નવસારી જિલ્લાના નાના મોટા ઉદ્યમીઓ જોડાયા હતા અને સરકારની ઉદ્યોગો પ્રત્યેની નીતિ, યોજનાઓ, બેંક લોન વિશેની માહિતી, આંત્રપીન્યોર સ્કીમ, જિલ્લા ઉદ્યોગ કેન્દ્ર દ્વારા ચાલતી યોજનાઓ અને એની માહિતી મેળવી હતી. જ્યારે મંત્રી કનુ દેસાઈએ સરકાર દ્વારા ઉધોગોને પ્રોત્સાહન આપવા થતા પ્રયાસો અને વાયબ્રન્ટ ગુજરાત થકી ગુજરાત કેવી રીતે દેશનું ગ્રોથ એન્જિન બન્યું એની વિકાસ ગાથા વર્ણવી હતી.

આરોગ્ય ક્ષેત્રમાં સૌથી વધુ 50 કરોડનું રોકાણ કરવા થયા MOU

વાયબ્રન્ટ નવસારી સમિટમાં આજે નવસારીમાં ઉદ્યોગ સ્થાપવા ઈચ્છુક ઉદ્યોગ સાહસિકો તેમજ આંત્રપ્રીન્યોર યુવાઓ ઉપસ્થિત રહ્યા હતા. સરકારની પહેલ સામે ઉદ્યોગકારોએ પણ ઉત્સાહ દર્શાવ્યો હતો. જેમાં નવસારીના ઉદ્યોગ સાહસિક અને સુયશ ઈથીકલના ચેરમેન રાજુ શાહ દ્વારા ફાર્માસ્યુટીકલ કંપની સ્થાપી લગભગ 250 થી વધુ લોકોને રોજગારીની તક આપવા 50 કરોડના રોકાણનો MOU સાઈન કર્યો હતો. જોકે નવસારીમાં ઉદ્યોગ સ્થાપવા માટે જરૂરી ઇન્ફ્રાસ્ટકચરનો અભાવ હોવાથી થોડી મુશ્કેલી હોવાની ચિંતા કરી, રાજુ શાહે સરકારના સકારાત્મક અભિગમથી ઉદ્યોગ વિકાસ કરશેનો આશાવાદ વ્યક્ત કર્યો હતો. જેની સાથે જ રાજહંસ પ્રા. લિ. ના ડાયરેક્ટર જયેશભાઈ દેસાઈ દ્વારા ઇન્ડસ્ટ્રીયલ પાર્ક ડેવલોપમેન્ટ માટે 48.50 કરોડ, શાહલોન એન્ટરપ્રાઈઝ દ્વારા ઇન્ડસ્ટ્રીયલ પાર્ક ડેવલોપમેન્ટ માટે 43.28 કરોડ અને એન.પી. ઇન્ડસ્ટ્રીયલના નગીનભાઈ પટેલ દ્વારા એસ. એસ. એલ્યુમિનીયમ એન્ડ કોપર વાઈન ડ્રોઈંગ માટે 10 કરોડનું રોકાણ સાથે કુલ 212 કરોડ રૂપિયાના 146 ગુજરાત સરકાર સાથે MOU કરવામાં આવ્યા હતા.