NH 48 પરથી 17.67 લાખનો વિદેશી દારૂ ભેરેલ ટેમ્પો સાથે રાજસ્થાની પકડાયો

વિદેશી દારૂનો જથ્થો વાપી ખાતે રહેતા મુળ રાજસ્થાનીએ ભરાવી આપ્યો હતો

નવસારી : 31 ડીસેમ્બર નજીક આવતા જ નવસારીમાંથી મોટા પ્રમાણમાં વિદેશી દારૂની હેરાફેરી થવા માંડી છે, જેમાં વર્ષના અંતિમ દિવસની નશીલી પાર્ટી રોકવા માટે જિલ્લા પોલીસ પણ સતર્ક થઇ છે. જેમાં નવસારી LCB પોલીસને ગત રાતે સફળતા મળી અને 17.67 લાખ રૂપિયાના વિદેશી દારૂ ભરેલ ટેમ્પો સાથે એક રાજસ્થાનીને પકડી પાડ્યો હતો. જયારે વિદેશી દારૂ ભરાવનાર વાપીના અને મુળ રાજસ્થાનીને વોન્ટેડ જાહેર કર્યો છે.

બોપ ફિલ્મના રોલની આડમાં લાખોનો વિદેશી દારૂ સુરત લઇ જવાતો હતો

મળતી માહિતી અનુસાર, વર્ષનો અંતિમ દિવસ નજીક છે અને લોકો થર્ટી ફર્સ્ટ ઉજવવાના પ્લાનિંગમાં પડ્યા છે. જેમાં નશીલી પાર્ટી કરનારા મોંઘી વિદેશી દારૂ મેળવવાના પ્રયાસો કરે છે, જ્યારે બુટલેગરો પણ થર્ટી ફર્સ્ટની પાર્ટીમાં અંગ્રેજી બ્રાંડની દારૂ પહોંચાડવાની વ્યવસ્થામાં પડ્યા છે. નવસારી જિલ્લાના હાઈવે અને આંતરિક માર્ગો તથા હવે તો દરિયાઈ માર્ગે પણ વિદેશી દારૂની મોટા પ્રમાણમાં હેરાફેરી થાય છે. પરંતુ બુટલેગરોની ગણતરીને નવસારી જિલ્લા પોલીસ પણ ખોટી પાડવા માટે સતર્ક બની છે. જેમાં ગત રોજ મોડી રાતે નવસારી લોકલ ક્રાઈમના HC યુવરાજસિંહ જુવાનસિંહ અને HC વિપુલ નાનુને સંયુક્ત રીતે બાતમી મળી હતી કે, વલસાડ તરફથી એક ટેમ્પોમાં વિદેશી દારૂનો જથ્થો સુરત તરફ જનાર છે. જેને આધારે પોલીસે નેશનલ હાઈવે નં. 48 પર ફિલ્ડીંગ ગોઠવી હતી. દરમિયાન હાઈવે પર બુલેટ ટ્રેનના બ્રીજની કામગીરી ચાલી રહી છે, તેની નજીક બાતમીવાળા ટેમ્પાને ઘેરીને ટેમ્પો અટકાવ્યો હતો. પોલીસે ટેમ્પોમાં તપાસ કરતા તેમાં આગળના ભાગમાં બોપ ફિલ્મ રોલ્સ ભર્યા હતા. પરતું તેની પાછળ પૂઠાના 378 બોક્ષમાંથી રમ, વોડકા, વ્હીસ્કી અને બીયરની બોટલો અને ટીન મળીને કુલ 17,67,600 રૂપિયાની કુલ 16,452 બોટલો મળી આવી હતી. જેથી પોલીસે ટેમ્પો ચાલક અને રાજસ્થાનના બાડમેર જિલ્લાના ગોરા ગામમાં રહેતા 27 વર્ષીય રાજુરામ રામલાલ બિશ્નોઈની ધરપકડ કરી હતી. રાજુની પૂછપરછમાં વિદેશી દારૂનો જથ્થો વલસાડ જિલ્લાના વાપી ખાતે રહેતા અને મુળ રાજસ્થાની બુટલેગર રમેશ ચૌધરીએ ભરવી આપ્યો હતો. જેને સુરતના પલસાણા હાઈવે પર સ્થિત દ્વારકાધીશ હોટલ પર પહોંચી રમેશ ચૌધરીને ફોન કર્યા બાદ તેના માણસને આપવાનો હતો. જેથી પોલીસે રમેશ અને અજાણ્યાને વોન્ટેડ જાહેર કર્યા છે. સાથે જ પોલીસે ઘટના સ્થળેથી વિદેશી દારૂ સહિત 10 લાખ રૂપિયાનો ટેમ્પો, રોકડ અને મોબાઈલ ફોન મળીને કુલ 27.73 લાખ રૂપિયાનો મુદ્દામાલ કબજે કરી નવસારી ગ્રામ્ય પોલીસ મથકે ફરિયાદ નોંધાવી તપાસને વેગ આપ્યો છે.