નવસારી LCB ના રડારમાં ચઢતા જ પકડાયો, પોલીસે 6 બાઇક કબ્જે કરી
નવસારી : રીક્ષા ચલાવતા બાપના માથે ત્રણ દીકરીઓની જવાબદારી ચિંતા બનતા, રિક્ષા ચલાવવા સાથે જ સરળતાથી રૂપિયા કમાવવા બાઈક ચોરીનો રસ્તો અપનાવ્યો હતો. પરંતુ ટેકનિકલ સર્વેલન્સમાં નવસારી LCB ના રડારમાં આવેલા બાઇક ચોરને પોલીસે ઝડપી પાડી ચોરી કરેલી 6 બાઇક કબજે કરી તપાસને વેગ આપ્યો છે.
નવસારી LCB પોલીસે તીઘરા નવી વસાહત ખાતેથી ચોરીની બાઇક સાથે આરીફને પકડ્યો
નવસારી પોલીસ અધિક્ષક કચેરીની સામેથી તેમજ LCB પોલીસ મથકની સામે એસટી ડેપો તથા તેની બાજુમાં આવેલ એપાર્ટમેન્ટની બહાર રોડ ઉપર પાર્ક કરેલી સ્પ્લેન્ડર બાઇકની ચોરી થતાં પોલીસ સતર્ક થઈ હતી. નવસારી LCB પોલીસે શહેરમાં નેત્રમ હેઠળ લાગેલા CCTV કેમેરા તેમજ ટેકનિકલ સર્વેલન્સ અને બાતમીદારોના નેટવર્કને એક્ટિવ કરી ચોરનું પગેરુ શોધવાના પ્રયાસો શરૂ કર્યા હતા. જેમાં LCB ની ટીમને બાતમી મળી હતી કે, નવસારીના ચાર-પુલ વિસ્તારમાં રહેતા અને રીક્ષા ચાલક 54 વર્ષીય ઈમદાદઅલી ઉર્ફે આરીફ સૈયદ પાસે ચોરીની બાઇક છે. જેને લઈને સિસોદ્રા તરફ ગયેલ છે. દરમિયાન નવસારીના તીધરા સ્થિત નવી વસાહત પાસે આરીફ આવવાનો હોવાની માહિતી મળતા જ પોલીસે ફિલ્ડિંગ ગોઠવી આરીફને દબોચી લીધો હતો. જેની કડકાઈથી પૂછપરછ કરતા આરીફ ભાંગી પડ્યો હતો અને ગત ડિસેમ્બરમાં સુરત અને નવસારીમાં ફેબ્રુઆરી મે સુધીમાં કુલ છ splendor બાઇક ચોરી કરી હોવાની કબુલાત કરી હતી. જેથી પોલીસે તેની ધરપકડ કરી, તેના ઘર આસપાસ મુકેલી 4 નવસારીના સત્તાપીર નજીક એક ગેરેજ પાસેથી 2 મળીને કુલ 6 સ્પ્લેન્ડર બાઈક કબજે કરી હતી. જ્યારે વધુ તપાસ અર્થે આરીફને નવસારી ટાઉન પોલીસને સોંપ્યો છે.
પરિવારની જવાબદારી રીક્ષાથી પુરી ન થતા ચોરીના રવાડે ચડ્યો
આરોપી આરીફ સૈયદ રીક્ષા ચલાવી પોતાના પરિવારનું ગુજરાન ચલાવે છે. પેટે ત્રણ દીકરી હોવાથી આરીફને ઘર ખર્ચ કાઢવામાં મુશ્કેલી પડતી હતી. જેથી આરીફને દેવું પણ થયું હતું. જેમતેમ મોટી દીકરીને પરણાવી, પણ થોડા મહિના પહેલાં અકસ્માતમાં જમાઈનું મૃત્યુ થતાં આરીફ ભાંગી પડ્યો હતો. જેથી આર્થિક મુશ્કેલીમાં પડેલો આરીફ બાઈક ચોરીના રવાડે ચડ્યો હતો.
ડુપ્લિકેટ ચાવીઓ સાથે રાખતો, જે બાઇકમાં લાગે એને લઇને થતો હતો ફરાર
આરીફ પોતાની પાસે ડુપ્લીકેટ ચાવીનો ગુછ્છો રાખતો હતો અને જ્યાં વધુ પડતી બાઈક પાર્ક કરેલી હોય એવા સ્થળે પહોંચી, એક પછી એક બાઇકમાં ચાવી લગાવી ટ્રાય કરતો અને જે બાઈકમાં ચાવી લાગી જાય એને ચોરી કરીને ફરાર થઈ જતો હતો. ખાસ કરીને આરીફે બજારમાં સ્પ્લેન્ડર બાઈકની ડિમાન્ડ હોવાથી તેની જ ચોરી કરી હતી. જ્યારે ચોરી કર્યા બાદ બાઈકના એન્જિન અને ચેસીસ નંબર કોઈને વંચાઈ નહીં એ રીતે ઘસી કાઢતો હતો. બાઈક ચોરી કર્યા બાદ થોડો સમય પછી બાઈક છૂટી કરીને તેના સ્પેરપાર્ટ વેચી કાઢતો હતો. પોલીસની પૂછપરછમાં આરીફે સુરતમાં ચૌટા બજાર અને બેગમવાડીમાંથી બે અને નવસારીમાં એસટી ડેપો આસપાસથી 4 બાઇક ચોરી કર્યાની કબુલાત કરી છે. પોલીસ ચોપડે આરીફનો કોઈ ગુનાહિત ઇતિહાસ નથી, પરંતુ દેવા અને ઘર ખર્ચના બોજ તળે દબાયેલો આરીફ ચોરીના રવાડે ચડ્યો હોવાનું ખુલવા પામ્યું છે.
ગણદેવી પોલીસે કુલ 5.95 લાખથી વધુનો મુદ્દામાલ જપ્ત કર્યો
નવસારી : દક્ષિણ ગુજરાતમાં દારૂની ગેરકાયદે હેરાફેરી પર અંકુશ મેળવવા માટે પોલીસ દ્વારા સતત વોચ અને મોનિટરિંગ રાખવામાં આવતું હોય છે. આ ઝુંબેશના ભાગરૂપે ગણદેવી પોલીસ સ્ટેશનની ટીમે ચોક્કસ બાતમીના આધારે ખારેલ ઓવરબ્રિજ નીચેથી 3.40 લાખથી વધુની કિંમતના વિદેશી દારૂના જથ્થા સાથે એક ટેમ્પો ચાલકની ધરપકડ કરી હતી. પોલીસે વાહન તથા અન્ય સામગ્રી મળી કુલ 5.95 લાખનો મુદ્દામાલ કબ્જે કરી કાયદેસરની કામગીરી હાથ ધરી છે.
મળતી માહિતી અનુસાર, ગણદેવી પોલીસના PI એન. આઈ. રાઠોડ અને PSI એન.એ. પટેલની માર્ગદર્શિકા હેઠળ ખારેલ આઉટ પોસ્ટના કર્મચારીઓ પેટ્રોલીંગમાં હતા. તે દરમિયાન PSI એન.એ. પટેલ તથા ASI નિલેશભાઈને મળેલી સચોટ બાતમી આધારે ખારેલ ઓવરબ્રિજ પાસે વોચ ગોઠવવામાં આવી હતી. સેલવાસ અને વાપી તરફથી સુરત જઈ રહેલા ટેમ્પોને રોકીને તપાસ કરતા, બ્લ્યુ કલરની તાડપત્રી હેઠળ છુપાવેલ 3.40 લાખ રૂપિયાની વ્હિસ્કી તથા બિયરની કૂલ 1152 બાટલીઓ મળી આવી હતી.
ઉમરગામના ચાલકની ધરપકડ, વડોદરાના બે આરોપી વોન્ટેડ
પોલીસે ઘટના સ્થળેથી ટેમ્પો ચાલક અને વલસાડ જિલ્લાના ઉંમરગામ ખાતે રહેતા મૂળ મધ્યપ્રદેશના 27 વર્ષીય નરેન્દ્રસીંગ પરસ્તેની સ્થળ પરથી ધરપકડ કરી હતી. પૂછપરછ દરમિયાન દારૂનો આ જથ્થો ભરી આપનાર વડોદરાના સોનુસીંગ અને મંગાવનાર ‘કાકા’ નામના શખ્સનું નામ ખુલતા પોલીસે આ બંને વોન્ટેડ આરોપીઓ સામે પણ પ્રોહિબિશન એક્ટ મુજબ ગુનો નોંધી વધુ તપાસ હાથ ધરી છે.
જિલ્લામાં પ્રથમવાર આધુનિક ટેકનોલોજીથી મેગા ઓપરેશન : 2.25 કરોડનો મુદ્દામાલ જપ્ત
નવસારી : નવસારી જિલ્લામાં કુદરતી સંપત્તિની લૂંટ ચલાવતા ખનન માફિયાઓ સામે ખાણ ખનીજ વિભાગે અત્યાર સુધીની સૌથી મોટી અને અભૂતપૂર્વ કાર્યવાહી કરી હતી. જિલ્લા કલેક્ટરના સીધા માર્ગદર્શન હેઠળ ભૂસ્તર વિભાગે નવસારીમાં પ્રથમ વખત ડ્રોન કેમેરા ટેકનોલોજીનો ઉપયોગ કરી અંબિકા નદીના પેટાળમાં ચાલતા કાળા કારોબારનો પર્દાફાશ કર્યો છે. ગણદેવી તાલુકાના બીલીમોરા સ્મશાન નજીકથી બાજની મદદથી ગેરકાયદે થતા રેતી ખનનને પકડી 2.25 કરોડનો મુદ્દામાલ જપ્ત કર્યો હતો. ખાણ ખનીજ વિભાગની સર્જિકલ સ્ટ્રાઇકથી ખનન માફિયાઓમાં ભારે ફફડાટ વ્યાપી ગયો છે.
આ હાઇ-ટેક દરોડા દરમિયાન ખાણ ખનીજ વિભાગની ટીમે સ્થળ પરથી ગેરકાયદેસર રેતી ખનનમાં વપરાતા 2 અત્યાધુનિક યાંત્રિક બાજ અને રેતીની હેરાફેરીમાં સંકળાયેલા 11 ટ્રકો મળીને કુલ 2.25 કરોડ રૂપિયાનો મુદ્દામાલ જપ્ત કર્યો હતો. સાથે જ જપ્ત કરાયેલા તમામ વાહનો અને સાધનોને આગળની કાનૂની કાર્યવાહી માટે ધોલાઈ મરીન પોલીસ સ્ટેશનના હવાલે કરી દેવામાં આવ્યા છે. તંત્ર દ્વારા કસૂરદારો સામે ‘ગુજરાત મિનરલ (પ્રિવેન્શન ઓફ ઇલ્લીગલ માઇનિંગ, ટ્રાન્સપોર્ટેશન એન્ડ સ્ટોરેજ) રૂલ્સ 2017’ હેઠળ ગુનો નોંધાવી, ગેરકાયદે ખનન નેટવર્કના મૂળ સુધી પહોંચવાની કવાયત તેજ કરવામાં આવી છે.
લકઝરી કારથી પાયલોટીંગ કરનાર મુખ્ય સૂત્રધાર સહિત બે વોન્ટેડ
નવસારી : નવસારી જિલ્લામાંથી રોજના લાખો રૂપિયાનો વિદેશી દારૂ સુરત તેમજ આગળના જિલ્લાઓમાં ખેપિયાઓ દ્વારા પહોંચાડવામાં આવે છે. ત્યારે ચીખલી પોલીસે લક્ઝરીયસ કારમાં દારૂની હેરાફેરીનો પર્દાફાશ કર્યો છે. નેશનલ હાઇવે નં. 48 પર બલવાડા ઓવરબ્રીજ નજીકથી 3.50 લાખનો વિદેશી દારૂ ભરેલ કાર સાથે વલસાડના બે ખેપિયાઓની ધરપકડ કરી હતી. જ્યારે દારૂની કારનું પાયલોટિંગ કરતી લકઝરી કારમાં સવાર મુખ્ય સૂત્રધાર સાથે બેને વોન્ટેડ જાહેર કર્યા છે.
મળતી માહિતી અનુસાર, ચીખલી પોલીસના PI પી.બી. પટેલીયાના માર્ગદર્શન હેઠળ સર્વેલન્સ ટીમના PSI આર.એન. વાડલે અને કર્મચારીઓ ખાનગી વાહનોમાં હાઈવે પર પેટ્રોલીંગમાં હતા. દરમીયાન સર્વેલન્સ ટીમના ASI અલ્પેશભાઈ અને HC મહેન્દ્રભાઈને મળેલ સંયુક્ત બાતમીના આધારે, નેશનલ હાઈવે નં. 48 પર બલવાડા ઓવરબ્રીજના ઉત્તર છેડે વોચ ગોઠવવામાં આવી હતી. આ દરમીયાન શંકાસ્પદ રીતે પસાર થતી એક સફેદ રંગની કારને પોલીસે આંતરી, તેને અટકાવી હતી. કારમાં તપાસ કરતા તેમાંથી 3,50,640 રૂપિયાની 25 પુંઠાના બોક્સમાંથી વ્હિસ્કી તથા ટીન બિયર મળી કુલ 1020 બાટલીઓ મળી આવી હતી. પોલીસે ઘટના સ્થળેથી 5 લાખની કાર, 2 મોબાઈલ અને દારૂ મળી કુલ 8.61 લાખનો મુદ્દામાલ જપ્ત કરી, કારચાલક અને વલસાડના ઉદવાડા તાલુકાના સરોધી ગામે રહેતા મીતકુમાર ઉર્ફે મીતલો માહ્યાવંશી અને વલસાડના વાપી તાલુકાના બલીઠા ગામે રહેતા અક્ષયકુમાર રાઠોડની સ્થળ પરથી ધરપકડ કરી હતી.
પોલીસની કડક પૂછપરછમાં આરોપીઓએ ખુલાસો કર્યો હતો કે, આ વિદેશી દારૂનો જથ્થો સેલવાસથી ભરીને સુરતના કડોદરા ખાતે સપ્લાય કરવાનો હતો. આ સમગ્ર રેકેટનો મુખ્ય સૂત્રધાર નવસારીના લક્ષ્મી ટોકીઝ પાછળ રહેતો નસીમુદ્દીન ઉર્ફે ‘આઝાદ લંગડો’ છે, જેણે સેલવાસથી દારૂ ભરાવ્યો હતો અને પોતાની લકઝરી કાર વડે આગળ પાયલોટીંગ કરી દારૂનો જથ્થો સુરત તરફ રવાના કરાવ્યો હતો. ચીખલી પોલીસે દારૂનો જથ્થો સપ્લાય કરનાર મુખ્ય આરોપી આઝાદ લંગડો તેમજ કડોદરા ખાતે દારૂ મંગાવનાર અજાણ્યા બુટલેગર સામે પ્રોહિબિશન એક્ટ હેઠળ ગુનો નોંધી બંનેને વોન્ટેડ જાહેર કરી, તપાસને વેગ આપ્યો છે.