પ્રતિબંધિત વિદેશી ઈ સિગારેટ વેચતો બીલીમોરાનો દુકાનદાર ઝડપાયો

પોલીસે 32 હજારની 16 ઈ સિગારેટ કરી કબ્જે

નવસારી : નવસારીના બીલીમોરા શહેરમાં દેસરા વિસ્તારની એક જનરલ સ્ટોરમાં પ્રતિબંધિત વિદેશી ઈ સિગારેટ વેચતા વેપારીને નવસારી SOG પોલીસે બાતમીને આધારે ઝડપી પાડ્યો હતો. પોલીસે દુકાનમાંથી ૩૨ હજારની વોર્નિંગ વિનાની ઈ સિગારેટ કબ્જે કરી તપાસને વેગ આપ્યો છે.

અય્યાઝને સુરતનો મોઈન પ્રતિબંધિત ઈ સિગારેટ પહોંચાડતો હતો

મળતી માહિતી અનુસાર, નવસારી સ્પેશિયલ ઓપરેશન ગ્રુપની ટીમ બીલીમોરા વિસ્તારમાં પેટ્રોલિંગમાં હતી. એ દરમિયાન પોલીસને બાતમી મળી હતી કે, બીલીમોરાના દેસરા વિસ્તારમાં આવેલ સાકરીવાલા જનરલ સ્ટોરમાં ભારતમાં પ્રતિબંધિત અને વોર્નિંગ વિનાની વિદેશી ઈ સિગારેટ વેચાઈ રહી છે. જેના આધારે SOG ની ટીમે સાકરીવાલા જનરલ સ્ટોરમાં છાપો મારતા, દુકાનમાંથી 32 હજાર રૂપિયાની પ્રતિબંધિત વિદેશી ઈ સિગારેટનો જથ્થો મળી આવ્યો હતો. જેથી પોલીસે આરોપી દુકાનદાર 20 વર્ષીય ફય્યાઝ હિંગોરાની ધરપકડ કરી હતી. આરોપી ફય્યાસની પૂછપરછમાં પ્રતિબંધિત વિદેશી ઈ સિગારેટનો જથ્થો તેને સુરતના મોઈને પહોંચાડ્યો હોવાનું જણાવતા, પોલીસે મોઈનને વોન્ટેડ જાહેર કરી બીલીમોરા પોલીસ મથકમાં ધ પ્રોહિબિશન ઓફ ઈ સિગારેટ એક્ટ હેઠળ ગુનો નોંધાવ્યો હતો. જ્યારે વધુ તપાસ અર્થે આરોપી ફય્યાઝ હિંગોરાને બીલીમોરા પોલીસને સોંપ્યો છે.

યુવાનોમાં સિગારેટનો ક્રેઝ, ચેકીંગ થાય તો અન્ય દુકાનોમાં પણ મળી શકે છે પ્રતિબંધિત ઈ સિગારેટ 

નવસારી જિલ્લાના યુવાનોમાં સિગારેટ પીવાનો ક્રેઝ જોવા મળે છે. જેમાં સિગારેટનું વેચાણ કરતા દુકાનદારો ઘણીવાર પ્રતિબંધિત ઈ સિગારેટ પણ ચોરી છુપી વેચતા હોય છે. ત્યારે જિલ્લાની આવી દુકાનોમાં ચેકિંગ હાથ ધરવામાં આવે તો ઘણી દુકાનોમાંથી સિગારેટ મળી આવે એવી ચર્ચાઓ પણ શહેરમાં વેગવંતી બની છે.