એંધલ હાઈવે પરથી 2.13 લાખના વિદેશી દારૂ ભરેલ ટેમ્પો સાથે ચાલકની ધરપકડ

વિદેશી દારૂ મંગાવનાર સુરતના બુટલેગરને વોન્ટેડ જાહેર કર્યો

નવસારી : નેશનલ હાઇવે નંબર 48 પર એંધલ ગામ નજીકથી ગણદેવી પોલીસે બાતમીને આધારે 2.13 લાખનો વિદેશી દારૂ ભરેલ ટેમ્પો સાથે ચાલકની ધરપકડ કરી હતી. પોલીસે વિદેશી દારૂ મંગાવનાર સુરતના બુટલેગરને વોન્ટેડ જાહેર કર્યો છે.

પોલીસે ઘટના સ્થળેથી કુલ 4.68 લાખનો મુદ્દામાલ કબ્જે કર્યો

મળતી માહિતી અનુસાર, નવસારી જિલ્લા પોલીસ દ્વારા વિદેશી દારૂની બદીને નાથવા જિલ્લાભરમાં વિદેશી દારૂ અને જુગારની ડ્રાઇવ રાખવામાં આવી હતી. જે દરમિયાન ગણદેવી પોલીસને બાતમી મળી હતી કે, વલસાડ તરફથી એક બંધબોડીના ટેમ્પોમાં વિદેશી દારૂનો જથ્થો સુરત તરફ જઈ રહ્યો છે. જેને આધારે ગણદેવી પોલીસની ટીમે નેશનલ હાઇવે નં. 48 પર એંધલ ગામ નજીક ફિલ્ડિંગ ગોઠવી હતી. દરમિયાન બાતમી વાળો ટેમ્પો આવતા પોલીસે તેને અટકાવી તપાસ કરતા તેમાંથી 2.13 લાખ રૂપિયાની વિસ્કી અને બિયરની કુલ 1516 બોટલો મળી આવી હતી. જેથી પોલીસે ટેમ્પો ચાલક, મૂળ ઉત્તર પ્રદેશના અને હાલ સુરતના કડોદરા સ્થિત કૃષ્ણનગરમાં ભાડેથી રહેતા 38 વર્ષીય માણેકચંદ સીંગની ધરપકડ કરી હતી. પોલીસે ઘટના સ્થળેથી વિદેશી દારૂ સાથે 2.50 લાખનો ટેમ્પો અને 5000 નો મોબાઇલ ફોન મળી કુલ 4.68 લાખ રૂપિયાનો મુદ્દામાલ કબ્જે કર્યો હતો. જ્યારે ટેમ્પો ચાલકની પૂછપરછમાં વિદેશી દારૂનો જથ્થો સુરતના કડોદરાના બુટલેગર સોહેલ પઠાણે મંગાવ્યો હોવાનું જણાવતા, પોલીસે તેને વોન્ટેડ જાહેર કર્યો છે. સાથે જ ગણદેવી પોલીસ મથકે પ્રોહિબિશન એક્ટ હેઠળ ગુનો નોધી આગળની તપાસ હાથ ધરી છે.