Connect with us

દક્ષિણ-ગુજરાત

શિક્ષકોએ આધુનિક ટેકનોલોજી પ્રમાણે વિદ્યાર્થીઓનું ઘડતર કરવુ પડશે. – પરેશ દેસાઇ

Published

on

નવસારી જિલ્લાના શ્રેષ્ઠ શિક્ષકો અને શાળાઓને એવોર્ડથી સન્માનિત કરાયા

નવસારી : 5 મી સપ્ટેમ્બર એટલે શિક્ષકોને સન્માનિત કરવાનો દિવસ. નવસારી જિલ્લામાં પણ વર્ષ દરમિયાન શ્રેષ્ઠ કામગીરી કરનારા શિક્ષકોને આજે જિલ્લા પંચાયત પ્રમુખ પરેશ દેસાઇના હસ્તે પોંખવામાં આવ્યા હતા. સાથે જ બોર્ડ પરીક્ષામાં જિલ્લામાં 100 ટકા પરિણામ મેળવનારી શાળાઓને પણ સન્માનિત કરવામાં આવી હતી.

પ્રતિભાશાળી બાળકોનું પણ કરાયુ વિશેષ સન્માન

નવસારી જિલ્લા શિક્ષણ વિભાગ અને જિલ્લા વહીવટીતંત્રના સંયુકત ઉપક્રમે આજે નવસારી તાલુકાના ખડસુપા ખાતે આવેલ એમ. એન. વિદ્યાલય ખાતે જિલ્લા કક્ષાનો શ્રેષ્ઠ શિક્ષક પારિતોષિક સન્માન સમારોહ જિલ્લા પંચાયત પ્રમુખ પરેશભાઇ દેસાઇના અધ્યક્ષસ્થાને યોજવામાં આવ્યો હતો. જ્યાં નવસારી જિલ્લાના પસંદગી પામેલ શ્રેષ્ઠ શિક્ષકોનું શાલ, પ્રશસ્તિપત્ર તથા રોકડ પુરસ્કાર આપી, જિલ્લા પંચાયત પ્રમુખ પરેશ દેસાઇ તેમજ અન્ય મહાનુભાવોને હાથે સન્માન કરવામાં આવ્યુ હતુ. સાથે જ જિલ્લામાં બોર્ડ પરીક્ષામાં 100 ટકા પરિણામ મેળવનારી શાળાઓ અને પ્રતિભાશાળી બાળકોનું પણ વિશેષ સન્માન કરાયુ હતુ.

શિક્ષક સમુદાય રાષ્ટ્ર ઘડતર, ચારિત્ર્ય નિર્માણ અને જ્ઞાન સમૃધ્ધ ભાવિ પેઢીના નિર્માતા બને તે આવશ્યક છે.

સમારોહમાં જિલ્લા પંચાયત પ્રમુખ પરેશભાઇ દેસાઇએ જણાવ્યુ કે, શિક્ષકો પાસે સમાજને બહુ મોટી અપેક્ષાઓ રહેલી છે. માતા-પિતા તેમના સંતાનને વિદ્યા સંસ્કાર મળે તે માટે શિક્ષક પાસે શ્રધ્ધાથી મૂકે છે કે, જયાં તેનું ચારિત્ર્ય, ક્ષમતા, બુધ્ધિચાતુર્ય બધુ જ શિક્ષક એટલે ગુરૂજન ઘડશે. શિક્ષક લાગણીઓથી ભરપૂર એવા જીવંત વ્યકિતોઓને કંડારીને તેને સુંદર બનાવે છે. ભારતની સંસ્કૃતિ ગુરુ-શિષ્યની રહેલી છે. હવે શિક્ષકોએ આધુનિક ટેકનોલોજી પ્રમાણે વિદ્યાર્થીઓનું ઘડતર કરવું પડશે. શિક્ષક સમુદાય રાષ્ટ્ર ઘડતર, ચારિત્ર્ય નિર્માણ અને જ્ઞાન સમૃધ્ધ ભાવિ પેઢીના નિર્માતા બને તે આવશ્યક છે. આ સાથે જ તેમણે વિદ્યાર્થીઓને શાળામાં અભ્યાસની સાથે સ્વચ્છતા રાખવા અને પાણીનો બગાડ નહીં કરવાની અપીલ પણ કરી હતી.

શિક્ષણની સાથે સાથે જીવન ઘડતર અને વ્યક્તિત્વ વિકાસનું શિક્ષણ આપવું એ દરેક શિક્ષકની નૈતિક જવાબદારી છે.

જિલ્લા કલેકટર ક્ષિપ્રા અગ્રેએ પારિતોષિક મેળવનાર શ્રેષ્ઠ શિક્ષકોને અભિનંદન પાઠવ્યા હતાં. સાથે જ તેમણે પૂર્વ રાષ્ટ્રપતિ ડૉ. સર્વપલ્લી રાધાકૃષ્ણનના 5 સપ્ટેમ્બરને સમગ્ર દેશમાં શિક્ષક દિન તરીકે ઉજવવામાં આવે છે. ડૉ. રાધાકૃષ્ણના નિબંધ-લેખનની શિખામણ આપણા જીવનમાં ઉતારવાની જરૂર છે. તેઓ દ્વારા શિક્ષણની સાથે સાથે વ્યક્તિત્વના વિકાસ માટે જે પ્રયાસો થયા તેનો આપણે અમલ કરી શિક્ષણ આપીશું તો જ શિક્ષક દિનની ઉજવણી સાર્થક ગણાશે. સમાજના નિર્માણમાં શિક્ષિત વ્યક્તિની ભૂમિકા મહત્વની છે. ભારતને વિકસીત દેશની હરોળમાં આવવા માટે માનવ સંશાધનના વિકાસની જરૂર છે. જે માટે શૈક્ષણિક સંસ્થાઓની મહત્વની ભૂમિકા છે. ત્યારે શિક્ષકોએ ખાસ ધ્યાન કેન્દ્રીત કરીને શિક્ષણની સાથે સાથે જીવન ઘડતર અને વ્યક્તિત્વ વિકાસનું શિક્ષણ આપવું એ દરેક શિક્ષકની નૈતિક જવાબદારી છે.

સમારોહમાં મહાનુભાવો સાથે શિક્ષકો પણ રહ્યા ઉપસ્થિત

કાર્યક્રમના પ્રારંભમાં જિલ્લા શિક્ષણ અને તાલીમના આચાર્ય ડો. યોગેશભાઇ પટેલે મહેમાનોને આવકારી પ્રાસંગિક પ્રવચન કર્યુ હતુ. સાથે જ નવસારીના આદિવાસી બાહુલ્ય ધરાવતા વાંસદા તાલુકાની રંગપુર પ્રાથમિક શાળાના શિક્ષક કેતન સોલંકીને શ્રેષ્ઠ શિક્ષક પારિતોષિક પુરસ્કાર મેળવવા બદલ શુભેચ્છાઓ પાઠવી હતી. સમારોહમાં જિલ્લા શિક્ષણાધિકારી જયેશભાઇ ચૌધરી, જિલ્લા પ્રાથમિક શિક્ષણાધિકારી ડો. અરૂણકુમાર અગ્રવાલ સહિત અધિકારીઓ અને શિક્ષકો ઉપસ્થિત રહ્યા હતા.

દક્ષિણ-ગુજરાત

વયોશ્રી કેન્દ્ર : નવસારીના આંગણે આશાનું નવું કિરણ

Published

on

By

ગુજરાતના ચોથા PM-DVK કેન્દ્રથી દિવ્યાંગો અને વરિષ્ઠ નાગરિકો માટે સ્વાવલંબન અને સન્માનજનક જીવનનો માર્ગ થશે મોકળો

નવસારી : નવસારી જિલ્લાના ચીખલી ખાતે સબ-ડિસ્ટ્રિક્ટ હોસ્પિટલ પરિસરમાં પ્રધાનમંત્રી દિવ્યાશા-વયોશ્રી કેન્દ્ર (PM-DVK) નો આજથી શુભારંભ થયો છે. આદિજાતિ વિકાસ મંત્રી નરેશ પટેલના હસ્તે ઉદ્ઘાટન કરાયેલું આ સેવાકેન્દ્ર માત્ર એક સરકારી ઉપક્રમ નથી, પરંતુ ઉંમરના ઉત્તરાધાર્ધમાં પહોંચેલા વડીલો અને શારીરિક પડકારોનો સામનો કરતા દિવ્યાંગજનોના જીવનમાં નવી રોશની લાવતો એક સંવેદનશીલ પ્રયાસ છે. જિલ્લા પ્રશાસન અને કલેક્ટર મનીષ ગુરવાનીની અંગત કાળજીના પરિણામે આકાર પામેલું આ કેન્દ્ર હવેથી જરૂરિયાતમંદ નાગરિકોને કાયમી ધોરણે નિઃશુલ્ક સહાયક સાધનો અને આરોગ્ય વિષયક સેવાઓ સ્થળ પર જ ઉપલબ્ધ કરાવશે.

પ્રશાસનિક સંવેદનશીલતા અને નિષ્ઠાનું ઉત્તમ ઉદાહરણ

એક સરકારી યોજના જ્યારે કેવળ કાગળ પર ન રહેતા માનવીય સ્પર્શ મેળવે છે, ત્યારે તે સમાજના છેવાડાના માનવી સુધી પહોંચે છે. જિલ્લા કલેક્ટર મનીષ ગુરવાનીએ વડીલો અને દિવ્યાંગજનોની દૈનિક તકલીફોને પોતાની સમજીને જે સબળ નેતૃત્વ પૂરું પાડ્યું, તેના લીધે જ આ કેન્દ્ર રેકોર્ડ સમયમાં કાર્યરત થઈ શક્યું છે. ભારત સરકારના સામાજિક ન્યાય અને સશક્તિકરણ મંત્રાલય હેઠળની ‘એલીમ્કો’ કંપનીના સહયોગથી શરૂ થયેલા આ કેન્દ્ર માટે કલેક્ટ મનીષ ગુરવાનીએ સતત ફોલોઅપ લીધું હતું. અમદાવાદ, ભાવનગર અને આણંદ બાદ હવે ચીખલી ખાતે શરૂ થયેલું આ ગુજરાતનું ચોથું કેન્દ્ર દર્શાવે છે કે જ્યારે વહીવટીતંત્રમાં ઈચ્છાશક્તિ હોય, ત્યારે પ્રજાકલ્યાણના કાર્યો ઝડપથી આકાર લે છે.

સ્થળ પર જ તપાસ, સારવાર અને સાધનોનું કાયમી નિદાન

ઘણીવાર દિવ્યાંગો કે વયોવૃદ્ધો માટે સાધનો કે આરોગ્ય સેવાઓ મેળવવા દૂર-દૂર સુધી ધક્કા ખાવા અત્યંત કષ્ટદાયક હોય છે. આ કેન્દ્ર તેમની આ પીડાનો કાયમી અંત લાવશે. હવેથી જરૂરિયાતમંદ નાગરિકોને સહાયક સાધનો માટે લાંબી પ્રક્રિયામાંથી પસાર નહીં થવું પડે. PM-DVK કેન્દ્ર ખાતે જ દિવ્યાંગજનો અને વરિષ્ઠ નાગરિકોની જરૂરિયાતોનું નિષ્ણાતો દ્વારા સ્થળ પર જ મૂલ્યાંકન કરવામાં આવશે. અહીં નિઃશુલ્ક સાધન વિતરણ ઉપરાંત, કૃત્રિમ અંગ તથા ઓર્થોસિસ ફિટમેન્ટ, શ્રવણશક્તિની સુક્ષ્મ તપાસ અને શ્રવણયંત્ર (Hearing Aid) સંબંધિત તમામ સેવાઓ એક જ છત નીચે ઉપલબ્ધ કરાવાશે, જે તેમના સ્વાસ્થ્યની સુરક્ષા સુનિશ્ચિત કરશે.

વહીવટી તંત્ર અને સમાજનો સંયુક્ત સંકલ્પ

આ ઉદ્ઘાટન પ્રસંગ માત્ર એક ઔપચારિક કાર્યક્રમ ન રહેતા, સમાજના વંચિત વર્ગ પ્રત્યેની સામાજિક જવાબદારીનો ઉત્સવ બની રહ્યો હતો. કાર્યક્રમમાં ચીખલી પ્રાંત અધિકારી નિશાંત કુગાશીયા, તાલુકા વિકાસ અધિકારી ભાવનાબેન યાદવ, મામલતદાર હિરેનભાઈ સહિતના અધિકારીઓ, પદાધિકારીઓ અને લાભાર્થીઓ ઉપસ્થિત રહ્યા હતા. ત્યારે વયના કારણે શ્રવણશક્તિ ગુમાવી ચૂકેલા વડીલને સાંભળવાની ક્ષમતા પરત મળવી કે ચાલવામાં અસમર્થ દિવ્યાંગને કૃત્રિમ અંગનો ટેકો મળવો, જેનાથી આ કેન્દ્ર આવનારા દિવસોમાં હજારો ચહેરાઓ પર આત્મવિશ્વાસભર્યું સ્મિત લાવવા માટે સજ્જ બન્યું છે.

 

Continue Reading

નવસારી

નવસારી બનશે દેશની પ્રથમ ‘યુનિફોર્મ’ મહાનગરપાલિકા : શહેરમાં એકસરખી લારીઓ હશે

Published

on

By

કેન્દ્રીય મંત્રી સી.આર. પાટીલના હસ્તે લુન્સીકુઈ ચોપાટીના વેપારીઓને 45 આધુનિક સ્ટીલ બોડી લારીઓનું વિતરણ

નવસારી : નવસારી શહેરના નાના વેપારીઓ અને રોજગાર મેળવતા મધ્યમ વર્ગીય પરિવારોની આર્થિક સ્થિતિને સુદ્રઢ બનાવવા તરફ વધુ એક મહત્વપૂર્ણ પગલું ભરવામાં આવ્યું છે. કેન્દ્રીય જળ શક્તિ મંત્રી અને નવસારીના સાંસદ સી. આર. પાટીલના હસ્તે લુન્સીકુઈ ચોપાટીના વેપારીઓને વધુ 45 નવી આધુનિક સ્ટીલ બોડી લારીઓ અર્પણ કરવામાં આવી છે. અગાઉ પ્રધાનમંત્રી નરેન્દ્ર મોદીના નવસારી પ્રવાસ સમયે અપાયેલી 25 લારીઓ સાથે હવે લુન્સીકુઈ ચોપાટીના કુલ 70 લારી ધારકોને સુસજ્જ અને હાઇજેનિક વ્યવસાયિક સુવિધા પ્રાપ્ત થઈ છે. સમગ્ર શહેરમાં તબક્કાવાર 700 એકસરખી સ્ટીલ બોડી લારીઓ આપવાના આયોજન સાથે નવસારી દેશની પ્રથમ ‘યુનિફોર્મ મહાનગરપાલિકા’ બનવા તરફ આગળ વધી રહ્યું છે.

શહેરમાં 700 યુનિફોર્મ લારીઓનો લક્ષ્યાંક, બેંકના સંકલનથી વધુ 100 લારીઓનું આયોજન

પ્રધાનમંત્રી નરેન્દ્ર મોદીની નવસારી મુલાકાત દરમિયાન શહેરના તમામ લારી ધારકો માટે એકસમાન અને આધુનિક વ્યવસ્થા ઊભી કરવાનો સંકલ્પ લેવામાં આવ્યો હતો. તે અંતર્ગત હાથ ધરાયેલા સર્વે મુજબ શહેરમાં કુલ 700 યુનિફોર્મ સ્ટીલ બોડી લારીઓનું તબક્કાવાર વિતરણ કરવાનો લક્ષ્યાંક નિર્ધારિત કરાયો હતો. આ લારીઓ માત્ર સુંદરતા પૂરતી મર્યાદિત નથી, પરંતુ વેપારીઓની જરૂરિયાત મુજબ જરૂરી સુધારા-વધારા, નીચે સ્ટોરેજ સુવિધા અને સરળતાથી સાફ-સફાઈ થઈ શકે તેવું આધુનિક મોડેલ તૈયાર કરવામાં આવ્યું છે. આગામી સમયમાં મહાપાલિકાના મેયર અને બેંક ઓફ બરોડાના સંકલનથી વધુ 100 નવી લારીઓનું લોકાર્પણ કરવામાં આવશે, જેનાથી શહેરની સુંદરતા વધવાની સાથે સ્વચ્છતા અને હાઈજીનમાં પણ મોટો સુધારો જોવા મળશે.

વ્યાજના વિષચક્રમાંથી મુક્તિ અને સ્વમાનભેર રોજગારી : નાના વેપારીઓની અર્થવ્યવસ્થાને મળશે મજબૂત બુસ્ટ

નાના લારી-ગલ્લા ધારકો પોતાના પરિવારનું ગુજરાન ચલાવવા માટે ઘણીવાર પઠાણી કે ઊંચા વ્યાજના વિષચક્રમાં ફસાઈ જતા હોય છે. આ સમસ્યામાંથી મુક્તિ અપાવવા માટે PM સ્વાનિધિ યોજના હેઠળ લારી ધારકોને 15 હજારથી લઈને 50 હજાર સુધીની ખૂબ સરળ બેંક લોન ઉપલબ્ધ કરાવવામાં આવી રહી છે. આ યોજનાકીય લાભો થકી નાના વેપારીઓ આત્મનિર્ભર બનીને પોતાનો વેપાર વધારી શકશે. કેન્દ્રીય મંત્રી સી. આર. પાટીલના આ સઘન પ્રયાસોથી નવસારીના સ્થાનિક અને મધ્યમ વર્ગીય અર્થતંત્રને એક નવી ઊર્જા અને મજબૂત ઇકોનોમિક બુસ્ટ મળવા જઈ રહ્યું છે, જે અન્ય નગરપાલિકાઓ અને મહાનગરપાલિકાઓ માટે પણ એક મોડેલ પૂરવાર થશે.

Continue Reading

શિક્ષણ

નવસારીમાં માસૂમોની સુરક્ષા સામે ખીલવાડ કરનારા સ્કૂલ વાહનચાલકો પર પોલીસ-RTOનું સંયુક્ત ઓપરેશન

Published

on

By

માર્ગ સલામતી સમિતિની બેઠક બાદ કલેક્ટરના આદેશથી દંડાત્મક કાર્યવાહી; 8 વાહનોને દંડ તો 1 સ્કૂલ વાહન ડિટેઈન કરાયું

નવસારી : નવસારી જિલ્લામાં શાળાએ જતા બાળકોની સલામતી સાથે ચેડાં કરતા અને વાહન વ્યવહારના નિયમોનું અનાદર કરતા સ્કૂલ વાહનચાલકો અને બસ સંચાલકો સામે જિલ્લા પોલીસ અને RTO તંત્રએ લાલ આંખ કરી છે. જિલ્લા કલેક્ટરની સીધી સૂચના બાદ હાથ ધરાયેલા આ સરપ્રાઈઝ ચેકિંગ અભિયાનમાં નિયમભંગ કરનારા આઠ વાહનો પાસેથી કુલ 83 હજારનો દંડ વસૂલવામાં આવ્યો હતો, જ્યારે એક વાહનને ઘટનાસ્થળે જ ડિટેઈન કરી કાયદેસરની કાર્યવાહી હાથ ધરવામાં આવી હતી.

કલેક્ટરની કડક સૂચના અને સંયુક્ત ઓપરેશન

બાળ અધિકાર સંરક્ષણ આયોગના ચુકાદા અને બાળકોની સુરક્ષાને પ્રાથમિકતા આપતા નવસારી જિલ્લા કલેક્ટર મનીષ ગુરવાનીના અધ્યક્ષસ્થાને યોજાયેલી જિલ્લા માર્ગ સલામતી સમિતિની બેઠકમાં સ્કૂલ વાહનોના કડક ચેકિંગ અંગે સ્પષ્ટ આદેશો આપવામાં આવ્યા હતા. જેને પગલે ટ્રાફિક પોલીસ અને પ્રાદેશિક વાહન વ્યવહાર (RTO) તંત્રની સંયુક્ત ટીમોએ જિલ્લાની વિવિધ શાળાઓ બહાર તથા મુખ્ય માર્ગો પર તૈનાત થઈ બાળકોની હેરફેર કરતા વાહનોનું સઘન ચેકિંગ હાથ ધર્યું હતું.

દંડાત્મક કાર્યવાહી અને આગામી દિવસોમાં વધુ કડક વલણ

આ આકસ્મિક તપાસ દરમિયાન ફીટનેસ, ક્ષમતા કરતા વધુ બાળકો બેસાડવા તેમજ જરૂરી કાગળોના અભાવ જેવા નિયમભંગ બદલ કુલ 8 વાહનોને ઈ-ચલણ ફટકારી 83,000 નો દંડ વસૂલાયો હતો અને ગંભીર ક્ષતિ ધરાવતા 1 વાહનને ડિટેઈન કરાયું હતું. પ્રાદેશિક વાહન વ્યવહાર અધિકારીએ સ્પષ્ટ ચેતવણી આપી છે કે, માસૂમ બાળકોની સુરક્ષા સાથે કોઈ પણ પ્રકારનું સમાધાન ચલાવી લેવાશે નહીં અને આગામી દિવસોમાં પણ આ પ્રકારની ચેકિંગ ઝુંબેશ વધુ આક્રમક રીતે ચાલુ રહેશે.

Continue Reading
Advertisement

Trending