NH 48 પર બોરીયાચ ટોલનાકેથી 38 હજારનો વિદેશી દારૂ સાથે સુરતનું દંપતી પકડાયુ

સેલવાસથી કારમાં વિદેશી દારૂનો જથ્થો લઇ સુરત પહોંચાડવાનો હતો

નવસારી : નેશનલ હાઈવે નં. 48 પર નવસારીના બોરીયાચ ટોલનાકા પાસેથી 38 હજારનો વિદેશી દારૂ ભરેલ કાર સાથે સુરતના દંપતીને નવસારી LCB પોલીસે બાતમીને આધારે પકડી પડ્યા હતા. જયારે વિદેશી દારૂ ભરાવનાર અને મંગાવનાર મળી કુલ 3 લોકોને વોન્ટેડ જાહેર કર્યા છે.

પોલીસે ઘટના સ્થળેથી કુલ 93,875 રૂપિયાનો મુદ્દામાલ કબ્જે કર્યો

મળતી માહિતી અનુસાર, ગત રોજ નવસારી લોકલ ક્રાઈમ બ્રાંચની ટીમ નેશનલ હાઈવે નં. 48 પર પેટ્રોલિંગમાં હતી. દરમિયાન PC દિગ્વિજય રવજીભાઈને ખાનગી રાહે બાતમી મળી હતી કે, સેલવાસથી એક દંપતી કારમાં વિદેશી દારૂ ભરાવી સુરત તરફ નીકળ્યુ છે. જેને આધારે પોલીસે નેશનલ હાઈવે નં 48 પર નવસારીના બોરીયાચ ટોલનાકા પાસે ફિલ્ડીંગ ગોઠવી હતી. દરમિયાન બાતમીવાળી કાર આવતા પોલીસે તેને અટકાવી તપાસ કરતા કારમાંથી 38 હજાર 875 રૂપિયાની વ્હીસ્કી અને વોડકાની 77 બાટલીઓ મળી હતી. જેથી પોલીસે કાર ચાલક અને સુરતના કાપોદ્રાનાં વરાછા વિસ્તારમાં આદર્શનગર સોસાયટીમાં રહેતા 36 વર્ષીય જય ઉર્ફે જયલો ભાણજી બારૈયા અને તેની પત્ની 30 વર્ષીય મીનાક્ષી બારૈયાની ધરપકડ કરી હતી. બંનેની કડકાઇથી પૂછપરછમાં વિદેશી દારૂનો જથ્થો ભીલાડ-સેલવાસ ગેટથી આગળની એક ગલીમાંથી એક અજાણ્યા વ્યક્તિએ ભરાવી આપ્યો હતો. જેને સુરતના મોટા વરાછાના ભયલુ ઉર્ફે નરેશ દુધાત અને સુરત અડાજણના સંજય અરવિંદ ટેલરે મંગાવ્યો હતો. જેથી પોલીસે અજાણ્યા સાથે નરેશ અને સંજયને વોન્ટેડ જાહેર કર્યા હતા. પોલીસે ઘટના સ્થળેથી વિદેશી દારૂ સાથે 50 હજાર રૂપિયાની કાર અને 5 હજાર રૂપિયાનો મોબાઈલ ફોન મળી કુલ 93,875 રૂપિયાનો મુદ્દામાલ કબ્જે કરી નવસારી ગ્રામ્ય પોલીસ મથકે પ્રોહિબીશન એક્ટ હેઠળ ગુનો નોંધાવી આગળની તપાસ હાથ ધરી છે.