પોલીસે દારૂ ભરાવનાર અને મંગાવનાર દારૂ બંને ખેપિયાને વોન્ટેડ જાહેર કર્યા
નવસારી : નેશનલ હાઇવે નં. 48 ઉપર પેટ્રોલિંગ દરમિયાન નવસારી LCB પોલીસે ખડસુપા ઓવરબ્રિજ પાસેથી 3.27 લાખનો વિદેશી દારૂ ભરેલ પીકઅપ વાન સાથે મહારાષ્ટ્રના બે ખેપીયાઓને ઝડપી પાડ્યા હતા. જ્યારે દારૂ ભરાવનાર અને મંગાવનાર બંનેને વોન્ટેડ જાહેર કર્યા છે.
પોલીસે ઘટના સ્થળેથી 10.37 લાખનો મુદ્દામાલ કબ્જે કર્યો
મળતી માહિતી અનુસાર, નવસારી લોકલ ક્રાઈમ બ્રાન્ચની ટીમ ગત રાતે નેશનલ હાઇવે નં. 48 ઉપર પેટ્રોલિંગમાં હતી. દરમિયાન HC દિગ્વિજય રવજીભાઈ અને HC નયન હનુંભાને સંયુક્ત રીતે બાતમી મળી હતી કે, વલસાડ તરફથી હાઈવેના રસ્તે એક પીકઅપમાં વિદેશી દારૂનો જથ્થો ભરી સુરત તરફ જઈ રહ્યો છે. જેથી LCB પોલીસે નેશનલ હાઈવે ઉપર ખડસુપા ઓવરબ્રિજના ઉત્તર છેડે ફિલ્ડિંગ ગોઠવી હતી. દરમિયાન બાતમીવાળો પીકઅપ આવતા જ પોલીસે તેને અટકાવી તપાસ કરતા પીકઅપમાંથી 3.27 લાખ રૂપિયાની વ્હિસ્કી બિયરની કુલ 960 બોટલ મળી આવી હતી. જેથી પોલીસે પીકઅપ ચાલક અને મહારાષ્ટ્રના પાલઘર જિલ્લાના અંભાન ગામે રહેતા 50 વર્ષીય રમેશ જત્રયા ઉર્ફે ચિંતામણ મુકણે તેમજ પાલઘર જિલ્લાના જ ખમલોલી ગામે રહેતા 27 વર્ષીય ભાવેશ જીવન કામડીની ધરપકડ કરી હતી. બંનેની પૂછપરછમાં વિદેશી દારૂનો જથ્થો પાલઘરના ખમલોલી ગામના વૈભવ નારાયણ પાટીલે ભરાવી આપ્યો હતો, જેને ગુજરાતના વડોદરા શહેરના નહેરૂ ચચા નગર, સયાજી પાર્ક સોસાયટી ખાતેથી કોઈ અજાણ્યો ખેપિયો લઈ જવાનો હતો. જેથી પોલીસે બંનેને વોન્ટેડ જાહેર કર્યા હતા. સાથે જ ઘટના સ્થળેથી વિદેશી દારૂ સાથે 7 લાખ રૂપિયાનો પીકઅપ, 10 હજાર રૂપિયાના બે મોબાઈલ ફોન મળી કુલ 10.37 લાખ રૂપિયાનો મુદ્દામાલ કબ્જે કરી નવસારી ગ્રામ્ય પોલીસ મથકે પ્રોહીબિશન એક્ટ હેઠળ ગુનો નોંધાવી તપાસને વેગ આપ્યો છે.
