ગણદેવી પોલીસે ખારેલ ઓવર બ્રિજ પાસેથી દારૂ ભરેલ ટેમ્પો પકડી પાડ્યો
નવસારી : નેશનલ હાઈવે નં. 48 પર નવસારીના ગણદેવી નજીકના ખારેલ ઓવર બ્રિજ પાસેથી ગણદેવી પોલીસે બાતમીને આધારે પ્લાસ્ટિકના દાણાની આડમાં સંતાડીને લઈ જવાતા 11.84 લાખના વિદેશી દારૂ સાથે ચાલકની ધરપકડ કરી હતી. પોલીસે દારૂ ભરાવનાર અને મંગાવનાર મળી કુલ ત્રણ લોકોને વોન્ટેડ જાહેર કર્યા હતા.
પોલીસે ઘટના સ્થળેથી કુલ 26.53 લાખનો મુદ્દામાલ કબ્જે કર્યો
મળતી માહિતી અનુસાર, નવસારીની ગણદેવી પોલીસની ટીમ પેટ્રોલીંગમાં હતી, ત્યારે HC રામજી ગયાપ્રસાદ અને PC કિરણ ભગુને સંયુક્ત રીતે બાતમી મળી હતી કે, વલસાડથી નેશનલ હાઈવે નં. 48 પર થઈ વિદેશી દારૂ ભરેલ એક ટેમ્પો સુરત તરફ જઈ રહ્યો છે. જેથી પોલીસે હાઈવે પર ગણદેવીના ખારેલ ઓવર બ્રિજના દક્ષિણ છેડે ફિલ્ડિંગ ગોઠવી હતી. દરમિયાન બાતમી વાળો ટેમ્પો આવતા પોલીસે તેને અટકાવી તપાસ કરતા, તેમાં આગળ પ્લાસ્ટિકના દાણા ભરેલ કોથળા મળતા પોલીસ થોડો સમય માટે વિચારતી થઈ હતી. પરંતુ પ્લાસ્ટિકના દાણાના કોથળાની પાછળ જોતા પૂઠાંના બોક્ષ મળી આવ્યા હતા. જેમાં 11.84 લાખ રૂપિયાની વ્હિસ્કી બીયરની કુલ 6768 બોટલ મળી આવી હતી. જેથી પોલીસે ટેમ્પો ચાલક અને રાજસ્થાનના રાજસમંદ જિલ્લાના માંદડી દેવસ્થાન ખાતે રહેતા 25 વર્ષીય શૈતાનસિંહ નિર્મયસિંહ ચુંડાવતની ધરપકડ કરી હતી. જેની પૂછપરછમાં દારૂ ભરેલ ટેમ્પો દમણના જયદેવ અને તેના માણસે આપ્યો હતો અને નડિયાદમાં ટોલનાકા પાસે અજાણ્યા વ્યક્તિને ટેમ્પો આપી દેવાનો હતો. જેથી પોલીસે જયદેવ, તેનો સાથી અને અજાણ્યાને વોન્ટેડ જાહેર કર્યા હતા. સાથે જ ઘટના સ્થળેથી વિદેશી દારૂ સાથે 4.54 લાખના પ્લાસ્ટિકના દાણા, 10 લાખ રૂપિયાનો ટેમ્પો અને 15 હજાર રૂપિયાનો મોબાઈલ ફોન મળી કુલ 26.53 લાખ રૂપિયાનો મુદ્દામાલ કબ્જે કરી ગણદેવી પોલીસ મથકમાં પ્રોહીબિશન એક્ટ હેઠળ ગુનો નોંધી તપાસને વેગ આપ્યો છે.
