નવસારી ટાઉન પોલીસે બાતમીને આધારે માર્યો છાપો
નવસારી : નવસારી શહેરના અલીફ નગરની નાળમાં ખુલ્લી જગ્યામાં કુંડાળું કરીને તીનપત્તીનો જુગાર રમતા 7 શકુનિઓને નવસારી ટાઉન પોલીસે બાતમીને આધારે છાપો મારી પકડી પાડ્યા હતા.
પોલીસે 12,500 રૂપિયાનો મુદ્દામાલ કબ્જે કર્યો
મળતી માહિતી અનુસાર, નવસારી ટાઉન પોલીસના HC ઘુઘાભાઈ દિનેશભાઇને ખાનગી રાહે બાતમી મળી હતી કે, શહેરના તીઘરા વિસ્તારમાં આવેલ અલીફ નગરની નાળમાં રહેતા કૈલાશ આહિરેના ઘરની આગળની ખુલ્લી જગ્યામાં કેટલાક લોકો તીનપત્તીનો જુગાર રમી રહ્યા છે, જેને આધારે પોલીસે અલીફ નગરમાં છાપો મારતા ઘટના સ્થળેથી કૈલાશ આહીરે અને તેના પુત્રો શુભમ આહીરે, સાગર આહીરે, ઋષિકેશ આહીરે, પ્રેમ જાદવ અને ઉદય જાદવ તેમજ રાજુ જાદવને રંગે હાથ જુગાર રમતા પકડી પાડ્યા હતા. પોલીસે આરોપીઓની અંગઝડતીમાંથી 10,420 રૂપિયા અને દાંવમાં લગાવેલા 2080 રૂપિયા મળી કુલ 12,500 રૂપિયા રોકડા તેમજ જુગારના સાધનો સાથેનો મુદ્દામાલ કબ્જે કરી નવસારી ટાઉન પોલીસ મથકે જુગાર ધારા હેઠળ ગુનો નોંધી તમામની ધરપકડ કરીને આગળની કાર્યવાહી હાથ ધરી હતી. ઉલ્લેખનિય છે કે, પકડાયેલા તમામ જુગારીયાઓ બેન્ડમાં કામ કરે છે.