સિલવાસાથી દારૂનો જથ્થો ભરી સુરત તરફ જઈ રહી હતી લક્ઝુરિયસ કાર, પોલીસે ત્રણને વોન્ટેડ જાહેર કર્યા

નવસારી : નેશનલ હાઈવે પરથી રોજના લાખો રૂપિયાના વિદેશી દારૂની હેરાફેરી થાય છે, જેને અટકાવવા નવસારી પોલીસ સક્રિય રહે છે. ત્યારે એક લકઝ્યુરિયસ કારમાં વિદેશી દારૂ સુરત તરફ જઈ રહ્યો હોવાની બાતમીને આધારે ચીખલી પોલીસે નેશનલ હાઈવે નં. 48 પર મજીગામ ખાતેથી 2.52 લાખનો વિદેશી દારૂ ભરેલ એક લક્ઝ્યુરિયસ કાર સાથે મુંબઈના યુવાનની ધરપકડ કરી હતી. જ્યારે દારૂ મંગળવાર સહિત ત્રણને વોન્ટેડ જાહેર કર્યા હતા.

પોલીસે ઘટના સ્થળેથી કુલ 7.62 લાખનો મુદ્દામાલ કબ્જે કર્યો

મળતી માહિતી અનુસાર, બૂટલેગરો અને ખેપિયાઓ અનેક તિકડમ લગાવી દારૂની હેરાફેરી કરતા હોય છે, જેમાં હવે મોંઘીદાટ લક્ઝ્યુરિયસ કારમાં યુવાન અથવા સાથે મહિલા રાખીને પણ વિદેશી દારૂની હેરાફેરી કરતા થયા છે, જેથી પોલીસને શંકા ન જાય અને સરળતાથી દારૂ તેના સ્થાને પહોંચાડી શકાય. પરંતુ ગુનેગારો સાથે પોલીસ પણ એટલી જ સતર્ક થઈ છે. જેમાં ચીખલી પોલીસના PSI આર.એન. વાડલે તેમજ PC કાંતુભાઈ બાબુભાઈ અને પિનલકુમાર અર્જુનભાઈને પેટ્રોલિંગ દરમિયાન સંયુક્ત રીતે મળેલી બાતમીને આધારે નેશનલ હાઈવે નં. 48 પર મજીગામના ઓવરબ્રિજના ઉત્તર છેડે ફિલ્ડિંગ ગોઠવી હતી. જેમાં બાતમીવાળી લક્ઝ્યુરિયસ કાર આવતા તેને અટકાવી, તપાસ કરતા કારમાં 26 પૂંઠાના બોક્ષમાંથી 2.52 લાખ રૂપિયાની વ્હિસ્કી અને બિયરની કુલ 1152 બોટલો મળી આવી હતી. જેથી પોલીસે કાર ચાલક અને મૂળ ઉત્તરપ્રદેશના આને હાલ મુંબઈના નાલાસોપારા ઈસ્ટમાં રહેતા 22 વર્ષીય હર્ષિત વિષ્ણુ વર્માની ધરપકડ કરી હતી. આરોપી હર્ષિતની પૂછપરછમાં વિદેશી દારૂનો જથ્થો સુરતના પલસાણાના પ્રખર મિશ્રા ઉર્ફે બોક્સરે મંગાવ્યો હતો. જ્યારે દારૂ ભરેલી કાર સેલવાસના એક અજાણ્યાએ આપી હતી અને સુરતના પલસાણા ખાતે કોઈ અજાણ્યો કાર લેવા આવવાનો હતો. જેથી પોલીસે પ્રખર સહિત ત્રણને વોન્ટેડ જાહેર કર્યા હતા. જ્યારે ઘટના સ્થળેથી વિદેશી દારૂ સાથે 5 લાખ રૂપિયાની કાર અને 10 હજારના મોબાઈલ ફોન સાથે કુલ 7.62 લાખ રૂપિયાનો મુદ્દામાલ કબ્જે કરી, પ્રોહિબિશન એક્ટ હેઠળ ગુનો નોંધી આગળની તપાસ હાથ ધરી છે.