ST બસમાં નશો કરી બેઠેલા દંપતીને કંડક્ટરે ખખડાવીને રસ્તામાં જ ઉતારી દીધા

બસમાં દારૂડિયા મુસાફરો સામે કંડક્ટરની કાર્યવાહી સમગ્ર પંથકમાં બની ચર્ચાનો વિષય

નવસારી : ગુજરાતમાં દારૂબંધી હોવા છતાં ઘણીવાર સરકારી ST બસમાં દારૂડિયા મુસાફરો ચઢી જતા હોય છે અને ક્યારેક તો બસમાં જ દારૂની હેરાફેરીના કિસ્સા ચર્ચામાં રહ્યા છે. ST બસમાં મુસાફરોની સુવિધા અને સુરક્ષા ડ્રાઈવર કંડકટરની ફરજ બને છે. ત્યારે ત્રણ દિવસ અગાઉ વઘઈથી નવસારી આવતી ST બસમાં કંડક્ટરે બસમાં સવાર દારૂડિયા દંપતીને ખખડાવીને અધવચ્ચે જ ઉતારી મુક્યા હતા. કંડકટરની કાર્યવાહીનો વીડિયો સોશ્યલ મીડિયામાં વાયરલ થતા કંડકટરની કડકાઈ સમગ્ર પંથકમાં ચર્ચાના ચગડોળે ચડી છે.

દારૂડિયાએ આનાકાની કરતા કંડક્ટરે પોલીસમાં સોંપવાની ચીમકી આપતા નીચે ઉતર્યો

મળતી માહિતી અનુસાર, હાલમાં ગુજરાત રાજ્ય માર્ગ પરિવહન નિગમની એક ST બસમાં કંડકટર દ્વારા દારૂના નશામાં બસની છેલ્લી સીટ ઉપર બેઠેલા દંપતીને ખખડાવીને જબરદસ્તીથી બસમાંથી ઉતારી દેવાનો વીડિયો સોશ્યલ મીડિયામાં વાયરલ થઈ રહ્યો છે. આ વીડિયો ત્રણ દિવસ પહેલાં વઘઈથી નવસારી આવી રહેલી ST બસનો હોવાનું સામે આવ્યો છે. જેમાં બસના કંડકટરને બસમાં સવાર એક સામાન્ય લાગતું દંપતી નશાની હાલતમાં હોવાનું માલૂમ પડ્યું હતું. વાંસદા નજીક પહોંચેલી બસમાં દારૂડિયા દંપતીને કારણે બસમાં સવાર અન્ય મુસાફરો પણ અસહજ થઈ રહ્યા હતા. દારૂના નશામાં દંપતીની અણછાજતી વર્તણૂક જોઈને કંડક્ટરનો પિત્તો ગયો હતો. તેમણે કોઈપણ જાતના ખચકાટ વગર તાત્કાલિક કડકાઈ વાપરી દારૂડિયા દંપતીને ખખડાવીને જબરદસ્તીથી વાંસદા આવતા પહેલાં જ બસમાંથી નીચે ઉતારી દીધું હતું. જાહેર બસમાં નશાખોરી ચલાવી લેવામાં નહીં આવે તેવો સ્પષ્ટ સંદેશ આપતા કંડક્ટરના આ સાહસિક અને જવાબદારીપૂર્વકના પગલાંની સમગ્ર નવસારી પંથકમાં ભારે સરાહના થઈ રહી છે.