નવસારીના વાડા ગામે ગેરકાયદે તબેલાનું દબાણ ગ્રામપંચાયતે મક્કમતાથી દૂર કર્યુ

નોટિસ અને કોર્ટના દરવાજા ખખડાવ્યા છતાં ન ઝૂકેલું દબાણ આખરે હટાવાયું: જાહેર રસ્તો ખુલ્લો થતાં ગ્રામજનોને રાહત

નવસારી : જાહેર હિત અને કાયદાના શાસનને સર્વોપરી રાખીને નવસારીની વાડા ગ્રામ પંચાયતે લોક સુખાકારીનું ઉત્તમ ઉદાહરણ પૂરું પાડ્યું છે. ગામતળમાં વર્ષોથી ચાલી આવતા અવરજવરના માર્ગને રોકીને ઉભા કરાયેલા ગેરકાયદેસર દબાણ સામે પંચાયતે દૃઢ નિશ્ચય સાથે કાર્યવાહી કરી તેને દૂર કર્યુ હતુ. વારંવારની નોટિસો અને કાનૂની પ્રક્રિયા છતાં દબાણ ન હટતાં, તાલુકા વિકાસ અધિકારી (TDO) ના આદેશાનુસાર વાડા ગ્રામ પંચાયતે કાયદાકીય મર્યાદામાં રહીને જરાય સંકોચ વિના ગેરકાયદેસર બાંધકામ પર જેસીબી ફેરવી દીધું હતું. આ કાર્યવાહીથી સાબિત થાય છે કે વ્યક્તિગત સ્વાર્થ સામે જાહેર હિતનો વિજય જ સર્વોપરી છે.

બાપદાદાના સમયની વાળાકાછાની જગ્યા બનેલ રસ્તા પર ગેરકાયદે તબેલાની દીવાલ ચણી દેવાઈ હતી

નવસારી તાલુકાના વાડા ગામના ઉગમણા ફળિયામાં આવેલ ઘર નં. 101 ના રહેવાસી ચંપાબેન દીપકભાઈ પટેલે પોતાના ઘરની બાજુમાં તબેલો અને વાહન પાર્કિંગ માટે શેડ બનાવી, વર્ષો જૂના 10 થી 12 ફૂટના ‘વાળાકાછા’ ના જાહેર માર્ગ પર ગેરકાયદે દીવાલ ચણી લીધી હતી. આ રસ્તો ગામના ખેડૂતો, બળદગાડા અને ટ્રેક્ટરની અવરજવર માટે અત્યંત મહત્વનો હતો. સરકારી યોજના હેઠળ ભૂતકાળમાં આ રસ્તો ડામર રોડ પણ બનાવવામાં આવ્યો હતો. પરંતુ દબાણના કારણે રસ્તો એટલો સાંકડો થઈ ગયો હતો કે ઈમરજન્સીના સમયે એમ્બ્યુલન્સ પણ પહોંચી શકે તેમ ન હોવાથી ગ્રામજન રમેશભાઈ પટેલ સહિત અન્ય રહીશોએ પંચાયતમાં રજૂઆત કરી હતી. પંચાયતની નોટિસોને અવગણવામાં આવતા મામલો TDO સમક્ષ પહોંચ્યો હતો, જ્યાં ચંપાબેન જમીનની માલિકીના કોઈ પુરાવા રજૂ કરી શક્યા નહોતા. ત્યારબાદ ચંપાબેને સિવિલ કોર્ટમાં મનાઈ હુકમ (Stay Order) મેળવવા પ્રયાસ કર્યો, પરંતુ કોર્ટે કોઈ સ્ટે આપ્યો ન હતો.

પોલીસ બંદોબસ્ત સાથે જેસીબી ચાલ્યું, ગેરમાર્ગે દોરવાના પ્રયાસો નિષ્ફળ

TDO ના આદેશ મુજબ ગત 31 મી ઓગસ્ટે વાડા ગ્રામ પંચાયતના સરપંચ વિમલભાઈ પટેલ અને તેમની ટીમે કડક પોલીસ બંદોબસ્ત સાથે સ્થળ પર પહોંચી ગેરકાયદે દીવાલ દૂર કરી જાહેર રસ્તો ખુલ્લો કરાવ્યો હતો. પંચાયતે કાયદાની મર્યાદા જાળવીને સંપૂર્ણ સંવેદનશીલતા પણ દાખવી હતી; અંદાજે 45 ફૂટ જેટલો તબેલો અને શેડ સુરક્ષિત રહે તેનું ધ્યાન રાખવામાં આવ્યું હતું તથા જરૂરિયાત મુજબ ટેકા પણ મૂકી આપ્યા હતા. જોકે, દબાણકર્તા દ્વારા આખો તબેલો તોડી પાડવામાં આવ્યો હોવાની ખોટી અફવાઓ ફેલાવી લોકોને ગેરમાર્ગે દોરવાનો અસફળ પ્રયાસ થયો હતો. અંતે, કાયદાકીય પ્રક્રિયા પૂર્ણ કરીને ગ્રામ પંચાયતે નડતરરૂપ દબાણ દૂર કરી ગ્રામજનો માટે સુગમ રસ્તો બનાવી લોકહિતનું શ્રેષ્ઠ કાર્ય કર્યું હતું.