ઘોલાઈ બંદરે 2000 ચો. મી. સરકારી જમીન પર બુલડોઝર ફર્યું

દરિયાઈ સુરક્ષાને ધ્યાને રાખી તંત્રનું મોટું ડિમોલિશન

નવસારી : નવસારી જિલ્લાના ગણદેવી તાલુકાના ધોલાઈ ગામે આવેલા નવસારીના એકમાત્ર દરિયાઈ બંદર, ઘોલાઈ બંદર ખાતે સરકારી જમીન પર ખડકી દેવાયેલા ગેરકાયદે બાંધકામો સામે તંત્રએ લાલ આંખ કરી હતી. દરિયાઈ સુરક્ષાના અત્યંત સંવેદનશીલ મુદ્દાને ધ્યાનમાં રાખીને વહીવટી તંત્ર દ્વારા હાથ ધરવામાં આવેલી કડક કાર્યવાહીમાં આશરે 2000 ચોરસ મીટર જેટલી કિંમતી સરકારી જમીન પરથી 18 થી વધુ અનઅધિકૃત દુકાનો, શેડ અને કેબિનોના દબાણો દૂર કરી જમીન સંપાદિત કરવામાં આવી હતી.

માનવતા દાખવ્યા બાદ વહીવટી તંત્રની આકરી કાર્યવાહી

ઘોલાઈ બંદર ખાતે સરકારી હેડની જમીન પર અનઅધિકૃત રીતે દુકાનો, ગેરેજ, પતરાના શેડ અને કેબિનો ઊભા કરી દેવાયા હોવાની ફરિયાદો મળતા તંત્ર દ્વારા ગત 24 સપ્ટેમ્બરના રોજ દબાણ હટાવવાની કામગીરી શરૂ કરાઈ હતી. જોકે, સ્થાનિક દબાણકારોએ પોતાનો સામાન અન્ય જગ્યાએ ખસેડવા માટે વિનંતી કરતા વહીવટી તંત્રએ માનવતાવાદી અભિગમ દાખવી 27 સપ્ટેમ્બર સુધીની મુદત આપી હતી. મુદત પૂર્ણ થતાં જ જિલ્લા કલેક્ટર મનીષ ગુરવાનીના માર્ગદર્શન હેઠળ ચીખલી પ્રાંત અધિકારી નિશાંત કુગસીયા, ગણદેવી મામલતદાર દીપિકા શેઝ, મહેસુલી ટીમ, GEB અને વલસાડ રૂરલ ડિવિઝનના ઇજનેરોની સંયુક્ત ટીમ દ્વારા સ્થળ પર પહોંચી તમામ ગેરકાયદે બાંધકામો જમીનદોસ્ત કરી દેવાયા હતા.

અસામાજિક તત્વો સામે કડક કાર્યવાહીની સ્પષ્ટ ચેતવણી

કોઈપણ પ્રકારની અનિચ્છનીય ઘટના કે કાયદો-વ્યવસ્થાની સ્થિતિ ન બગાડે તે માટે સ્થાનિક પોલીસ દ્વારા સ્થળ પર ચુસ્ત બંદોબસ્ત ગોઠવવામાં આવ્યો હતો. વહીવટી તંત્રએ આ કાર્યવાહી દ્વારા સ્પષ્ટ સંદેશ આપ્યો છે કે, સરકારી મિલકતો કે પર્યાવરણને નુકસાન પહોંચાડતા ભૂમાફિયાઓ અને અસામાજિક તત્વોની આવી ગેરકાયદે પ્રવૃત્તિઓ ચલાવી લેવાશે નહીં. આગામી દિવસોમાં પણ સમગ્ર જિલ્લામાં સરકારી જમીનો પરથી ગેરકાયદે દબાણો દૂર કરવાની આ કડક ઝુંબેશ નિરંતર ચાલુ રહેશે.