બીલીમોરા સ્ટેશન નજીક ગાદલાની દુકાનમાં ભીષણ આગ : 6 દુકાનો ખાખ

ગણદેવી અને બીલીમોરા ફાયર બ્રિગેડના 5 ફાયર ફાઇટરો થકી કલાકોની જહમત બાદ આગ કાબૂમાં આવી

નવસારી : નવસારી જિલ્લાના બીલીમોરા શહેરના ધમધમતા સ્ટેશન વિસ્તારમાં શનિવારે બપોરના સમયે અચાનક ભીષણ આગ ફાટી નીકળતા ભારે અફરાતફરી મચી ગઈ હતી. ગાદલાની દુકાનમાં લાગેલી આગ જોતજોતામાં વિકરાળ રૂપ લેતા આસપાસની અન્ય દુકાનોને પણ પોતાની ચપેટમાં લીધી હતી. આ ગોઝારી ઘટનામાં દવાની દુકાન સહિત કુલ 6 દુકાનોમાં આગ પ્રસરતા લાખો રૂપિયાનો સામાન બળીને ખાખ થઈ ગયો હતો. બનાવની જાણ થતાં જ બીલીમોરા અને ગણદેવી ફાયર સ્ટેશનના 5 ફાયર ફાઇટરો સાથે ઘટનાસ્થળે પહોંચેલા લાશ્કરોએ રેસ્ક્યૂ ઓપરેશન હાથ ધરીને આગ પર સંપૂર્ણ કાબૂ મેળવ્યો હતો.

વિકરાળ જ્વાળાઓ વચ્ચે ફાયર ફાઈટરોનું રેસ્ક્યૂ ઓપરેશન : રસ્તો ન મળતા એક દુકાન તોડવી પડી

સ્થાનિક સૂત્રો પાસેથી મળતી માહિતી મુજબ, બીલીમોરા સ્ટેશન રોડ પર આવેલી એક ગાદલાની દુકાનમાં શનિવારે બપોરે અચાનક આગ ભભૂકી ઊઠી હતી. દુકાનમાં યાર્ન, કપાસી રૂ અને કાપડનો જથ્થો હોવાથી આગે મિનિટોમાં જ રૌદ્ર સ્વરૂપ ધારણ કરી લીધું હતું. આગ એટલી ઝડપથી પ્રસરી કે બાજુમાં આવેલી મેડિકલ સ્ટોર સહિત આસપાસની અન્ય 5 દુકાનોને પણ પોતાની ઝપેટમાં લઈ લીધી હતી. ઘટનાની ગંભીરતા જોઈ બીલીમોરા અને ગણદેવીથી ફાયર ફાઈટરોનો કાફલો ઘટનાસ્થળે પહોંચ્યો હતો. જોકે, પાછળના ભાગેથી રેસ્ક્યૂ ઓપરેશન હાથ ધરવા માટે પૂરતી જગ્યા કે રસ્તો ન હોવાથી ફાયર વિભાગે ભારે મથામણ બાદ એક દુકાનને તોડીને અંદર પ્રવેશ કરવો પડ્યો હતો. કલાકોની ભારે જહમત બાદ આગ પર કાબૂ મેળવાયો હતો, જેના બાદ JCB મશીન વડે બળેલો કાટમાળ હટાવવાની કામગીરી શરૂ કરવામાં આવી હતી.

સામી દિવાળીએ વેપારીઓ પર આભ તૂટી પડ્યું

દિવાળીના તહેવારને હવે ગણતરીના દિવસો જ બાકી રહ્યા છે, ત્યારે વેપારીઓએ તહેવારોની કમાણી અને ગ્રાહકોની ભીડને ધ્યાનમાં રાખીને દુકાનોમાં મોંઘોદાટ સ્ટોક અને માલસામાન ભરી રાખ્યો હતો. પરંતુ કાળમુખી આગની આ ઘટનાએ વેપારીઓના તમામ ઓરતા અને મહેનત પર પાણી ફેરવી દીધું છે. સામી દિવાળીએ વર્ષભરની રોજીરોટી અને સ્વપ્નાઓ બળીને ભસ્મીભૂત થઈ જતાં પીડિત વેપારીઓ અને તેમના પરિવારજનોમાં ભારે વિષાદ ફેલાયો છે. હજુ ગઈકાલ સુધી જે દુકાનોમાં ગ્રાહકોની ચહલપહલ હતી, ત્યાં આજે માત્ર કાળો કોલસો અને રાખનો ઢગલો નજરે પડે છે. આર્થિક રીતે તૂટી પડેલા આ વેપારીઓ માટે આ દિવાળીનો ઉત્સવ અંધકારમય બની ગયો છે.