Connect with us

અપરાધ

નવસારીમાં રખડતા શ્વાનને ક્રુરતાપૂર્વક મારનારા યુવાનની ધરપકડ  

Published

on

સોસાયટીમાં રખડતા શ્વાનને નિર્દયતાથી મારતો, પાડોશી મહિલાએ કરી પોલીસ ફરિયાદ

નવસારી : નવસારી શહેરમાં રખડતા શ્વાનની સંખ્યા દિવસે દિવસે વધી રહી છે. શેરી, ગલી, મોહલ્લા અને સોસાયટીમાં રખડતા શ્વાન ઘણા લોકોને ગમતા નથી, જયારે કેટલાક લોકો શ્વાન પ્રત્યે પ્રેમ રાખે છે. શહેરના પશ્ચિમ વિસ્તારની ક્રિશ્ના પાર્ક સોસાયટીમાં પણ આવી જ ઘટના સામે આવી, જ્યાં એક યુવાને શ્વાનને ક્રુરતાપૂર્વક મારતા પશોશી જીવદયા પ્રેમી મહિલાએ પોલીસ ફરિયાદ કરતા, યુવાને જેલની હવા ખાવાનો વારો આવ્યો હતો.

યુવાને ગલુડીયાને નિર્દયતાથી મારી તેના બે પગમાં ફેકચર કર્યુ, મહિલાએ કરાવી સારવાર

નવસારી શહેરમાં રખડતા શ્વાનને નિર્દયતાથી મારવાનો એક કિસ્સો સામે આવ્યો છે. જેમાં શહેરના પશ્ચિમ વિસ્તારની ક્રિશ્ના પાર્ક સોસાયટીમાં રહેતા જીવદયા પ્રેમી રીટાબેન ઓધવજી સાપરિયા પોતાના ઘર આસપાસ ફરતા રખડતા શ્વાનની કાળજી કરી, તેમના માટે પીવાનું પાણી, દૂધ તેમજ અન્ય ખાવાની સામગ્રી આપતા રહે છે. જેના કારણે તેમની ગલીમાં શ્વાન વધુ આંટાફેરા મારે છે. પરંતુ તેમની પડોશમાં રહેતા લોકોને શ્વાનના આંટાફેરા અને શ્વાન દ્વારા રસ્તામાં કરવામાં આવતી ગંદકી પસંદ નથી. જેથી રીટાબેન અને તેમના પડોશીઓ વચ્ચે શ્વાનના મુદ્દે અનેકવાર ઝઘડા થયા કરે છે. દરમિયાન ગત 1 જાન્યુઆરી, 2026 ના રોજ રીટાબેન એક બીમાર શ્વાનની સારવાર કરાવી, બપોરે ઘરે પરત ફર્યા તો એક નાનું ગલુડિયું લોહીલુહાણ હાલતમાં પડેલું જણાયું. પૂછપરછ કરતા પડોશના રવિ ટંડેલે તેને નિર્દયતાપૂર્વક મારી અધમુવુ કરી મુક્યુ હતુ. જેથી તેઓ રવિને કહેવા જતા તેણે રીટાબેન સાથે ઝઘડો કર્યો અને તમારાથી થાય એ કરી લેજો કહ્યુ હતું. બાદમાં રીટાબેન ઘયાલ શ્વાનને એરૂ સ્થિત કૃષિ યુનીવર્સીટીની વેટરનરી હોસ્પિટલમાં લઇ ગયા, જ્યાં સારવાર દરમિયાન ગલુડીયાના બે પગમાં ફેકચર હોવાનું જણાયુ હતું. જેથી તેને પ્લાસ્ટર કરાવી, રીટાબેન ઘરે લઇ આવ્યા હતા. એજ દિવસે સાંજના સમયે ફરી સોસાયટીમાં શ્વાનનાં રડવાના અવાજ આવતા રીટાબેને જોયું તો રવિ ટંડેલ ક્રૂરતા પૂર્વક અન્ય શ્વાનને મારી રહ્યો હતો. જેથી આટલી ક્રૂરતા પૂર્વક શું કામ મારો છો..? પ્રશ્ન કરતા ફરી રવિએ તેમને ધમકીભર્યા અવાજે “ હું તો કુતરાને મારીશ જ, મારા ઘરે કહેવા માટે આવવું નહીં, તેમજ તારાથી થાય એ કરી લેજે કહી ઉદ્ધતાઈભર્યુ વર્તન કર્યુ હતુ. જેથી કંટાળેલા રીટાબેન નવસારી ટાઉન પોલીસ મથકે પહોંચ્યા હતા અને પડોશી રવિ ટંડેલ વિરૂદ્ધ ફરિયાદ આપતા પોલીસે પશુ ક્રૂરતા નિવારણ અધિનિયમ અને અન્ય ધારાઓ હેઠળ ફરિયાદ નોંધી, આરોપી રવિ ટંડેલની ધરપકડ કરી તેને કાયદાનું ભાન કરાવ્યુ હતુ.

અપરાધ

ખારેલ બ્રિજ પાસેથી 3.40 લાખના દારૂ ભરેલ ટેમ્પો સાથે ચાલક પકડાયો

Published

on

By

ગણદેવી પોલીસે કુલ 5.95 લાખથી વધુનો મુદ્દામાલ જપ્ત કર્યો

નવસારી : દક્ષિણ ગુજરાતમાં દારૂની ગેરકાયદે હેરાફેરી પર અંકુશ મેળવવા માટે પોલીસ દ્વારા સતત વોચ અને મોનિટરિંગ રાખવામાં આવતું હોય છે. આ ઝુંબેશના ભાગરૂપે ગણદેવી પોલીસ સ્ટેશનની ટીમે ચોક્કસ બાતમીના આધારે ખારેલ ઓવરબ્રિજ નીચેથી 3.40 લાખથી વધુની કિંમતના વિદેશી દારૂના જથ્થા સાથે એક ટેમ્પો ચાલકની ધરપકડ કરી હતી. પોલીસે વાહન તથા અન્ય સામગ્રી મળી કુલ 5.95 લાખનો મુદ્દામાલ કબ્જે કરી કાયદેસરની કામગીરી હાથ ધરી છે.

તાડપત્રી નીચે છુપાવેલો દારૂનો જથ્થો પોલીસે શોધી કાઢ્યો

મળતી માહિતી અનુસાર, ગણદેવી પોલીસના PI એન. આઈ. રાઠોડ અને PSI એન.એ. પટેલની માર્ગદર્શિકા હેઠળ ખારેલ આઉટ પોસ્ટના કર્મચારીઓ પેટ્રોલીંગમાં હતા. તે દરમિયાન PSI એન.એ. પટેલ તથા ASI નિલેશભાઈને મળેલી સચોટ બાતમી આધારે ખારેલ ઓવરબ્રિજ પાસે વોચ ગોઠવવામાં આવી હતી. સેલવાસ અને વાપી તરફથી સુરત જઈ રહેલા ટેમ્પોને રોકીને તપાસ કરતા, બ્લ્યુ કલરની તાડપત્રી હેઠળ છુપાવેલ 3.40 લાખ રૂપિયાની વ્હિસ્કી તથા બિયરની કૂલ 1152 બાટલીઓ મળી આવી હતી.

ઉમરગામના ચાલકની ધરપકડ, વડોદરાના બે આરોપી વોન્ટેડ

પોલીસે ઘટના સ્થળેથી ટેમ્પો ચાલક અને વલસાડ જિલ્લાના ઉંમરગામ ખાતે રહેતા મૂળ મધ્યપ્રદેશના 27 વર્ષીય નરેન્દ્રસીંગ પરસ્તેની સ્થળ પરથી ધરપકડ કરી હતી. પૂછપરછ દરમિયાન દારૂનો આ જથ્થો ભરી આપનાર વડોદરાના સોનુસીંગ અને મંગાવનાર ‘કાકા’ નામના શખ્સનું નામ ખુલતા પોલીસે આ બંને વોન્ટેડ આરોપીઓ સામે પણ પ્રોહિબિશન એક્ટ મુજબ ગુનો નોંધી વધુ તપાસ હાથ ધરી છે.

Continue Reading

અપરાધ

નવસારીમાં ખનન માફિયાઓ પર ભૂસ્તર વિભાગની સર્જિકલ સ્ટ્રાઈક : અંબિકા નદીમાં ડ્રોનથી ગેરકાયદે રેતી ચોરી પકડી

Published

on

By

જિલ્લામાં પ્રથમવાર આધુનિક ટેકનોલોજીથી મેગા ઓપરેશન : 2.25 કરોડનો મુદ્દામાલ જપ્ત

નવસારી : નવસારી જિલ્લામાં કુદરતી સંપત્તિની લૂંટ ચલાવતા ખનન માફિયાઓ સામે ખાણ ખનીજ વિભાગે અત્યાર સુધીની સૌથી મોટી અને અભૂતપૂર્વ કાર્યવાહી કરી હતી. જિલ્લા કલેક્ટરના સીધા માર્ગદર્શન હેઠળ ભૂસ્તર વિભાગે નવસારીમાં પ્રથમ વખત ડ્રોન કેમેરા ટેકનોલોજીનો ઉપયોગ કરી અંબિકા નદીના પેટાળમાં ચાલતા કાળા કારોબારનો પર્દાફાશ કર્યો છે. ગણદેવી તાલુકાના બીલીમોરા સ્મશાન નજીકથી બાજની મદદથી ગેરકાયદે થતા રેતી ખનનને પકડી 2.25 કરોડનો મુદ્દામાલ જપ્ત કર્યો હતો. ખાણ ખનીજ વિભાગની સર્જિકલ સ્ટ્રાઇકથી ખનન માફિયાઓમાં ભારે ફફડાટ વ્યાપી ગયો છે.

બીલીમોરા સ્મશાન ભૂમિ પાછળથી ચાલતા કાળા કારોબાર પર ડ્રોનનું ‘હવાઈ સર્વેલન્સ’

નવસારી ભૂસ્તરશાસ્ત્રી પી. આર. ખાંભલાના માર્ગદર્શન હેઠળ ભૂસ્તરવિજ્ઞાન અને ખનિજ વિભાગની ક્ષેત્રીય ટીમ દ્વારા અંબિકા નદીપટ્ટમાં એક ગુપ્ત સર્ચ ઓપરેશન ગોઠવવામાં આવ્યું હતું. રોયલ્ટી ઇન્સ્પેક્ટર દિવ્યાંત શિરોયા, માઇન્સ સુપરવાઇઝર સંદીપ રાઉત અને સ્પેશિયલ ડ્રોન ટીમે ગણદેવી તાલુકાના બીલીમોરા ગામની સ્મશાન ભૂમિ પાછળથી પસાર થતી અંબિકા નદીના દુર્ગમ વિસ્તારમાં દરોડો પાડ્યો હતો. ટીમે આધુનિક ડ્રોન સર્વેલન્સની મદદથી નદીના પેટાળમાંથી યાંત્રિક બાજ (બોટ) વડે ચાલી રહેલા ગેરકાયદેસર રેતી ખનન પદ્ધતિને રંગેહાથ ઝડપી પાડીને માફિયાઓના મનસુબા પર પાણી ફેરવી દીધું હતું.

ગેરકાયદે ખનન કરનારા માફીયાઓ સામે ધોલાઈ મરીન પોલીસ સ્ટેશનમાં નોંધાવી ફરિયાદ

આ હાઇ-ટેક દરોડા દરમિયાન ખાણ ખનીજ વિભાગની ટીમે સ્થળ પરથી ગેરકાયદેસર રેતી ખનનમાં વપરાતા 2 અત્યાધુનિક યાંત્રિક બાજ અને રેતીની હેરાફેરીમાં સંકળાયેલા 11 ટ્રકો મળીને કુલ 2.25 કરોડ રૂપિયાનો મુદ્દામાલ જપ્ત કર્યો હતો. સાથે જ જપ્ત કરાયેલા તમામ વાહનો અને સાધનોને આગળની કાનૂની કાર્યવાહી માટે ધોલાઈ મરીન પોલીસ સ્ટેશનના હવાલે કરી દેવામાં આવ્યા છે. તંત્ર દ્વારા કસૂરદારો સામે ‘ગુજરાત મિનરલ (પ્રિવેન્શન ઓફ ઇલ્લીગલ માઇનિંગ, ટ્રાન્સપોર્ટેશન એન્ડ સ્ટોરેજ) રૂલ્સ 2017’ હેઠળ ગુનો નોંધાવી, ગેરકાયદે ખનન નેટવર્કના મૂળ સુધી પહોંચવાની કવાયત તેજ કરવામાં આવી છે.

Continue Reading

અપરાધ

નેશનલ હાઈવે પર બલવાડા પાસેથી 3.50 લાખનો દારૂ ભરેલ કાર સાથે બેની ધરપકડ

Published

on

By

લકઝરી કારથી પાયલોટીંગ કરનાર મુખ્ય સૂત્રધાર સહિત બે વોન્ટેડ

નવસારી : નવસારી જિલ્લામાંથી રોજના લાખો રૂપિયાનો વિદેશી દારૂ સુરત તેમજ આગળના જિલ્લાઓમાં ખેપિયાઓ દ્વારા પહોંચાડવામાં આવે છે. ત્યારે ચીખલી પોલીસે લક્ઝરીયસ કારમાં દારૂની હેરાફેરીનો પર્દાફાશ કર્યો છે. નેશનલ હાઇવે નં. 48 પર બલવાડા ઓવરબ્રીજ નજીકથી 3.50 લાખનો વિદેશી દારૂ ભરેલ કાર સાથે વલસાડના બે ખેપિયાઓની ધરપકડ કરી હતી. જ્યારે દારૂની કારનું પાયલોટિંગ કરતી લકઝરી કારમાં સવાર મુખ્ય સૂત્રધાર સાથે બેને વોન્ટેડ જાહેર કર્યા છે.

સેલવાસથી દારૂનો જથ્થો ભરી કડોદરા સપ્લાય કરવાનો ખેલ પકડાયો

મળતી માહિતી અનુસાર, ચીખલી પોલીસના PI પી.બી. પટેલીયાના માર્ગદર્શન હેઠળ સર્વેલન્સ ટીમના PSI આર.એન. વાડલે અને કર્મચારીઓ ખાનગી વાહનોમાં હાઈવે પર પેટ્રોલીંગમાં હતા. દરમીયાન સર્વેલન્સ ટીમના ASI અલ્પેશભાઈ અને HC મહેન્દ્રભાઈને મળેલ સંયુક્ત બાતમીના આધારે, નેશનલ હાઈવે નં. 48 પર બલવાડા ઓવરબ્રીજના ઉત્તર છેડે વોચ ગોઠવવામાં આવી હતી. આ દરમીયાન શંકાસ્પદ રીતે પસાર થતી એક સફેદ રંગની કારને પોલીસે આંતરી, તેને અટકાવી હતી. કારમાં તપાસ કરતા તેમાંથી 3,50,640 રૂપિયાની 25 પુંઠાના બોક્સમાંથી વ્હિસ્કી તથા ટીન બિયર મળી કુલ 1020 બાટલીઓ મળી આવી હતી. પોલીસે ઘટના સ્થળેથી 5 લાખની કાર, 2 મોબાઈલ અને દારૂ મળી કુલ 8.61 લાખનો મુદ્દામાલ જપ્ત કરી, કારચાલક અને વલસાડના ઉદવાડા તાલુકાના સરોધી ગામે રહેતા મીતકુમાર ઉર્ફે મીતલો માહ્યાવંશી અને વલસાડના વાપી તાલુકાના બલીઠા ગામે રહેતા અક્ષયકુમાર રાઠોડની સ્થળ પરથી ધરપકડ કરી હતી.

લકઝરી કાર વડે પાયલોટીંગ કરનાર નવસારીનો બુટલેગર ‘આઝાદ લંગડો’ વોન્ટેડ જાહેર

પોલીસની કડક પૂછપરછમાં આરોપીઓએ ખુલાસો કર્યો હતો કે, આ વિદેશી દારૂનો જથ્થો સેલવાસથી ભરીને સુરતના કડોદરા ખાતે સપ્લાય કરવાનો હતો. આ સમગ્ર રેકેટનો મુખ્ય સૂત્રધાર નવસારીના લક્ષ્મી ટોકીઝ પાછળ રહેતો નસીમુદ્દીન ઉર્ફે ‘આઝાદ લંગડો’ છે, જેણે સેલવાસથી દારૂ ભરાવ્યો હતો અને પોતાની લકઝરી કાર વડે આગળ પાયલોટીંગ કરી દારૂનો જથ્થો સુરત તરફ રવાના કરાવ્યો હતો. ચીખલી પોલીસે દારૂનો જથ્થો સપ્લાય કરનાર મુખ્ય આરોપી આઝાદ લંગડો તેમજ કડોદરા ખાતે દારૂ મંગાવનાર અજાણ્યા બુટલેગર સામે પ્રોહિબિશન એક્ટ હેઠળ ગુનો નોંધી બંનેને વોન્ટેડ જાહેર કરી, તપાસને વેગ આપ્યો છે.

Continue Reading
Advertisement

Trending