શહેરના વોર્ડ નં. 13 માં સૌથી વધુ 19,442 મતદારો નોંધાયા

નવસારી : નવસારી મહાનગર પાલિકા બન્યા બાદ તેની પ્રથમ ચુંટણી આગામી 26 એપ્રિલના રોજ યોજાશે. ત્યારે નવસારીના 13 વોર્ડમાં કુલ 1.87 લાખ મતદારો નોંધાયા છે, જેઓ નવસારી મહાનગર પાલિકાના પ્રથમ શાસકોને ચુંટશે. જેમાં શહેરના પાવરફુલ ગણાતા વોર્ડ નં. 13 માં સૌથી વધુ 19,442 મતદારો નોંધાયા છે.

શહેરની 83 ઈમારતોમાં 192 મતદાન બુથ ઉપર યોજાશે ચુંટણી

નવસારી મહાનગર પાલિકા 1 જાન્યુઆરી, 2025 ના રોજ જાહેર થતાની સાથે જ મહાપાલિકાનો વહીવટ જિલ્લા કલેક્ટરના હાથમાં આપી દેવામાં આવ્યો હતો. વહીવટદાર સાથે NMC નો કારભાર કમિશ્નરના હાથમાં આપી, રાજ્ય સરકારે શહેરની કાયાપલટ કરવાનો પ્રયાસ કર્યો છે. પરંતુ 13 મહિના બાદ નવસારી મહાનગર પાલિકાની ચુંટણી રાજ્યની અન્ય મહાપાલિકાઓ સાથે યોજાઈ રહી છે. નવસારી મહાનગર પાલિકાની પ્રથમ ચુંટણીને લઈ શહેરીજનો અને રાજકીય પક્ષોમાં પણ ઉત્સાહ જોવા મળી રહ્યો છે. ત્યારે નવસારી મહાનગર પાલિકાની પ્રથમ ચુંટણીમાં શહેરના 95,015 પુરુષ અને 92,848 મહિલા અને 12 અન્ય મતદારો મળીને કુલ 1,87,875 મતદારો પોતાના મતાધિકારનો ઉપયોગ કરી, નવા શાસકોની પસંદગી કરશે. શહેરમાં મતદાન માટે 83 ઈમારતોમાં કુલ 192 મતદાન બુથ બનાવવામાં આવ્યા છે, જ્યારે ઉમેદવારી ફોર્મ ભરવા માટે ત્રણ રિટર્નિંગ ઓફિસરોની નિયુક્તિ કરવામાં આવી છે, જેમાં વોર્ડ નં. 1 થી 4 ના રિટર્નિંગ ઓફિસર નવસારી પ્રાંત અધિકારી, વોર્ડ નં. 5 થી 8 ના રિટર્નિંગ ઓફિસર સ્ટેમ્પ ડ્યુટી કલેક્ટર અને વોર્ડ નં. 9 થી 13 માટે નાયબ જિલ્લા વિકાસ અધિકારીને રિટર્નિંગ ઓફિસર નીમવામાં આવ્યા છે.

શહેરના 13 વોર્ડમાં, વોર્ડ નં. 10 માં સૌથી ઓછા અને વોર્ડ નં. 13 માં સૌથી વધુ મતદારો

નવસારી મહાનગર પાલિકાની ચુંટણીમાં નવા જોડાયેલા ગામડાઓના વિસ્તાર સાથે થયેલા સીમાંકનમાં પણ શહેરના 13 વોર્ડ જ રહ્યા છે. ત્યારે શહેરની 4.21 લાખની વસ્તીમાં 1.87 લાખ મતદારો છે. જેને વોર્ડ અનુસાર જોવામાં આવે તો શહેરના વોર્ડ નં. 10 માં સૌથી ઓછા 9,569 મતદારો છે, જ્યારે વોર્ડ નં. 13 માં સૌથી વધુ 19,442 મતદારો નોંધાયા છે.

શહેરના વોર્ડ નં. 4, 7 અને 13 માં મહિલા મતદારોની સંખ્યા વધુ

નવસારી મહાનગર પાલિકાના 13 વોર્ડના મતદારો ઉપર નજર કરીએ, તો એમાં વોર્ડ નં. 4, 7 અને 13 માં પુરુષ મતદારો કરતા મહિલા મતદારોની સંખ્યા વધુ છે. વોર્ડ નં. 4 માં પુરુષ મતદારો કરતા 113 મહિલા મતદારો, વોર્ડ નં. 7 માં પુરુષ મતદારો કરતા 243 મહિલા મતદારો અને વોર્ડ નં. 13 માં પુરુષ મતદારો કરતા 434 મહિલા મતદારો વધુ છે. જ્યારે વોર્ડ નં. 6 માં 11 અને વોર્ડ નં. 12 માં ફ્કત 4 મહિલા મતદારો વધુ છે. જ્યારે આખા શહેરમાં 12 મતદારો અન્ય છે.

નવસારી મહાનગર પાલિકાના વોર્ડ અનુસાર મતદારોની સંખ્યા

વોર્ડ         પુરુષ            મહિલા            અન્ય         કુલ

1.          7,540            7,051             01         14,592
2.          7,926            7,639             03         15,568
3.           6,674           6,402            02         13,078
4.           6,373           6,486            00         12,859
5.           9,153           9,127            00         18,260
6.           8,335           8,346            00         16,681
7.           6,301            6,544            01         12,846
8.           5,932            5,551            00         11,483
9.           8,832            8,713            01         17,546
10.         5,072            4,493            04          9,569
11.         5,500            4,681            00         10,181
12.         7,883            7,887            00          15,770
13.         9,494            9,928           00          19,442
કુલ.        95,015          92,848         12         1,87,875

ચુંટણી આવતા જ જોડતોડની રાજનીતિ શરૂ

નવસારી : ચુંટણી આવતા જ રાજકીય પક્ષો જોડતોડની રાજનીતિમાં પણ સક્રિય થઈને પોતાની બાજુ મજબૂત કરવાનો પ્રયાસ કરે છે. જેમાં કોંગ્રેસે ચીખલીના હરણ ગામના ભાજપી ઉપસરપંચને 100 કાર્યકરો સાથે કોંગ્રેસમાં જોડવાનો દાવો કર્યો છે, જેની સાથે જ ઉપસરપંચના પત્નીને રાનકુવા બેઠકના ઉમેદવાર બનાવ્યાની ચર્ચાઓ પણ ઉઠી છે.

જિલ્લા કોંગ્રેસ પ્રમુખ શૈલેષ પટેલ અને કોંગી ધારાસભ્ય અનંત પટેલે ભાજપીઓને આવકાર્યા..!!

નવસારી જિલ્લા પંચાયત અને 6 તાલુકા પંચાયતોની ચુંટણીઓ જાહેર થઈ છે અને રાજકીય પક્ષો ગ્રામ્ય વિસ્તારોમાં બેઠકો કરી મતદારોને પોતાની તરફ આકર્ષવાનો પ્રયાસ કરી રહ્યા છે. ત્યારે શુક્રવારે રાતે કોંગ્રેસ દ્વારા ચીખલી તાલુકાના હરણ ગામે વાંસદાના કોંગી ધારાસભ્ય અનંત પટેલ અને જિલ્લા કોંગ્રેસ પ્રમુખ શૈલેષ પટેલની આગેવાનીમાં રાત્રિ સભા યોજી હતી. જેમાં હરણ ગામના ભાજપ સમર્પિત ઉપસરપંચ તેમના 100 સમર્થકો સાથે કોંગ્રેસમાં જોડાયા હતા. ઉપસરપંચ અને તેમના સમર્થકોને જિલ્લા કોંગ્રેસ પ્રમુખ શૈલેષ પટેલ અને ધારાસભ્ય અનંત પટેલે કોંગી ખેસ પહેરાવી આવકાર્યા હતા. ઉપસરપંચે કોંગ્રેસનો હાથ ઝાલતા જ તેમના પત્નીને કોંગ્રેસે રાનકુવા બેઠક પરથી ચુંટણી જંગમાં ઉતારવાની તૈયારી કરી છે. ત્યારે ચીખલી તાલુકામાં સત્તા મેળવવા માટે કોંગ્રેસ મજબૂત થવાનો પ્રયાસ કરી રહી છે, જોકે ચુંટણીમાં મતદારો કોના ઉપર પસંદગી ઉતારશે એ જોવું રહ્યું…

શહેર કોંગ્રેસ પ્રમુખ સામેનો વિરોધ શાંત, વર્તમાન અને પૂર્વ પ્રમુખો એક સાથે, બની શહેર સંકલન સમિતિ

નવસારી : નવસારી શહેર કોંગ્રેસ સમિતિના પ્રમુખ પદે દિપક બારોટની વરણી થતા જ બે પૂર્વ પ્રમુખો સહિત તેમના સમર્થકોએ પ્રદેશ કક્ષાએ ઈમેઈલથી રાજીનામા મોકલ્યા હતા. જેમાં રાજીનામા મુદ્દે મૌન રહેલી કોંગ્રેસે ચુંટણી ટાણે વર્તમાન પ્રમુખ અને વિરોધ કરનારા પૂર્વ પ્રમુખોને સાથે રાખી શહેર કોંગ્રેસ સંકલન સમિતિ બનાવી કોંગ્રેસે વિરોધી વિરોધી ભાઈ – ભાઈનો સંદેશ આપ્યો છે.

પૂર્વ પ્રમુખ નીરવ નાયકે શહેર પ્રમુખની વરણી સામે વિરોધ નોંધાવી, ચલાવ્યું હતું રાજીનામા અભિયાન

નવસારી શહેર કોંગ્રેસમાં લાંબા સમયથી જૂથવાદ ચરમસીમાએ પહોંચ્યો છે. એક નેતાને બીજા નેતા સાથે નથી ફાવતું અને તેના કારણે નવસારીમાં કોંગ્રેસ નામનો જ વિરોધ પક્ષ બનીને રહી ગયો છે. જેના કારણે જ નવસારી વિજલપોર નગર પાલિકામાં કોંગ્રેસને ફાળે ફ્કત એક જ બેઠક આવી હતી. લોક પ્રશ્નો મુદ્દે વિરોધ કરવો કે કલેક્ટર, મહા પાલિકામાં રજૂઆતો કરવામાં પણ કોંગ્રેસ વચ્ચે એકજુથતા જવલ્લે જ જોવા મળે છે. ત્યારે નવસારી મહાનગર પાલિકાની ચુંટણી પૂર્વે શહેર કોંગ્રેસના પ્રમુખ પદનો તાજ ફરી દિપક બારોટના માથે મૂકતા જ કોંગ્રેસના એક જૂથના આગેવાનો અને કાર્યકરોએ ઉગ્ર વિરોધ સાથે શહેર કોંગ્રેસ પ્રમુખ બદલવાની માંગ કરી હતી. સાથે જ શહેર કોંગ્રેસ પ્રમુખ દિપક બારોટના વિરોધમાં પૂર્વ શહેર પ્રમુખ નિરવ નાયક, પૂર્વ પ્રમુખ ધર્મેશ માળી સહિત શહેર કોંગ્રેસના કોંગી કાર્યકરો અને હોદ્દેદારોએ રાજીનામા અભિયાન છેડ્યું હતું. જેમાં એકી સાથે પ્રદેશ, શહેરના પદાધિકારીઓ સાથે કાર્યકરોએ રાજીનામા લખી, તમામે પ્રદેશ કોંગ્રેસ પ્રમુખ અમિત ચાવડાને ઈમેઈલ કર્યા હતા. જેમાં જિલ્લા કોંગ્રેસે કોઈ પ્રતિક્રિયા આપી ન હતી. બાદમાં વિરોધીઓને મનાવી લેવાના પ્રયાસો થયા હતા. જોકે રાજીનામા આપનારાઓ સામે કોઈ કાર્યવાહી થઈ કે નહીં અથવા રાજીનામા સ્વિકારાયા કે નહીં એના વિશે કોઈ માહિતી આપવાથી જિલ્લાના આગેવાનો બચતા રહ્યા હતા. દરમિયાન ચુંટણી જાહેર થતા જ પ્રદેશ કોંગ્રેસ સમિતિના માર્ગદર્શનમાં જાહેર થયેલ નવસારી શહેર કોંગ્રેસ સંકલન સમિતિમાં નવનિયુક્ત પ્રમુખ દિપક બારોટ, કાર્યકારી પ્રમુખ રાજન જોશી સાથે જ પ્રમુખનો વિરોધ કરનારા પૂર્વ પ્રમુખ નિરવ નાયક, પૂર્વ પ્રમુખ ધર્મેશ માળી સાથે પ્રભારી અસલમ સાઇકલવાળા અને સુરતના ધનરાજ રાજપૂતનો સમાવેશ કરવામાં આવ્યો છે. જેથી શહેરમાં વિરોધી વિરોધી ભાઈ – ભાઈ ની ચર્ચા શરૂ થઈ છે. જ્યારે પ્રભારી અસલમ સાઇકલવાળાએ પરિવારની વાત હોવાનું કહીને ઘીના ઠામમાં ઘી ઢોળાયાનો ભાવ વ્યક્ત કર્યો હતો.