Connect with us

રમતગમત

કોઇપણ ક્ષેત્રમાં આગળ વધવા માટે સમયપાલન જરૂરી – રમણલાલ પાટકર

Published

on

વલસાડ જિલ્લા શાળા ક્રીડામંડળના ૪૯મા વાર્ષિક રમતોત્‍સવનું સમાપન

વલસાડ : વલસાડ જિલ્‍લા માધ્‍યમિક અને ઉચ્‍ચતર માધ્‍યમિક શાળા ક્રીડામંડળ દ્વારા બાઇ આવાંબાઇ હાઇસ્‍કૂલ ખાતે આયોજિત ૪૯મા વાર્ષિક રમતોત્‍સવના સમાપન અવસરે વન અને આદિજાતિ વિકાસ વિભાગના રાજ્‍ય કક્ષાના મંત્રી રમણલાલ પાટકરે વિજેતા ટીમોને અભિનંદન પાઠવી તેઓ જીવનમાં હરહંમેશ પ્રગતિ કરે તેવી શુભકામનાઓ પાઠવી હતી.

આ અવસરે મંત્રી પાટકરે જણાવ્‍યું હતુ કે, રમતગમત ક્ષેત્રે પ્રોત્‍સાહન મળે, રમતમાં હોશિયાર વિદ્યાર્થીઓને યોગ્‍ય પ્‍લેટફોર્મ મળે તે માટે રાજ્‍ય સરકાર દ્વારા દર વર્ષે ખેલ મહાકુંભનું આયોજન કરવામાં આવે છે. રમત-ગમતમાં ભાગ લેવાથી વિદ્યાર્થીઓમાં રહેલી સુષુપ્‍ત શકિતઓની ખબર પડે છે. હરિફાઇમાં હારજીત તો થાય છે, પરંતુ હારેલી ટીમોએ નિરાશ ન થતાં તેમાંથી બોધપાઠ લઇ નવેસરથી સારા પ્રયાસો હાથ ધરવા જોઇએ. કોઇપણ ક્ષેત્રમાં આગળ વધવા માટે વિદ્યાર્થીઓને સમયપાલન અને પ્રામાણિક પ્રયાસો હાથ ધરવા જોઈએ. રમતની સાથે શિક્ષણમાં પણ અગ્રેસર બનવું જોઇએ, જેનાથી આગળ જવાનો અવસર પ્રાપ્‍ત થશે. રમતોત્‍સવના આયોજન માટે દાન આપનાર દાતાઓને પણ તેમણે અભિનંદન પાઠવ્‍યા હતા.

જિલ્લા શિક્ષણાધિકારી કે. એફ. વસાવાએ સ્‍વાગત પ્રવચનમાં સૌને આવકારી રમતોત્‍સવની રૂપરેખા આપી રમતનું મહત્ત્વ સમજાવ્‍યું હતું. શિસ્‍ત અનુશાસન રમતમાંથી મળે છે, જેથી દરેક વિદ્યાર્થી શિક્ષણની સાથે રમતની પ્રવૃત્તિઓમાં પણ ભાગ લેવો જોઇએ.

રમતોત્‍સવમાં કબડ્ડી, વોલીબોલ, રસ્‍સાખેંચ, ખો-ખો વગેરે સ્‍પર્ધાઓમાં જિલ્લાની ૭૧ જેટલી માધ્‍યમિક અને ઉચ્‍ચતર માધ્‍યમિક શાળાના ૧૯૦૦ કરતા વધુ રમતવીરોએ ઉત્‍સાહપૂર્વક ભાગ લીધો હતો. વિજેતા ટીમોને મંત્રી અને મહાનુભાવોના હસ્‍તે ટ્રોફી અને ઇનામોનું વિતરણ કરવામાં આવ્‍યા હતા.

આ અવસરે વલસાડ નગરપાલિકા પ્રમુખ પંકજ આહિર, શિક્ષણ નિરીક્ષક રાજેશ્રીબેન ટંડેલ, ક્રીડા મંડળના હોદ્દેદારો, ક્રીડા મંડળના ઉપપ્રમુખ અશ્વિન રાવલ, મંત્રી ધનસુખભાઇ ટંડેલ, સીનિયર કોચ અંકુર જોષી, અગ્રણી મહેશ ભટ્ટ, પી. એસ. દવે, રમતોત્‍સવ આયોજનના દાતાઓ, રમતોત્‍સવમાં ભાગ લેનારી શાળાના આચાર્યો, પી.ટી. શિક્ષકો, રમતવીરો તેમજ નગરજનો હાજર રહ્યા હતા.

રમતગમત

વડોદરામાં ગુજરાત ડેફ વોલીબોલમાં કછોલીના ગાંધીઘરના દિવ્યાંગ ખેલાડીઓનો ગોલ્ડન સ્પાઇક

Published

on

By

15 મી ઓલ ગુજરાત વોલીબોલ ટુર્નામેન્ટ ઓફ ધ ડેફમાં કછોલીની ટીમોએ 2 ગોલ્ડ, 1 સિલ્વર અને 1 બ્રોન્ઝ મેડલ જીત્યા

નવસારી : રમતગમતમાં વિકલાંગતા ક્યારેય સરહદ બની શકતી નથી, તે વાતને ગાંધીઘર કછોલીના મનોબળથી મક્કમ એવા દિવ્યાંગ બાળકોએ ફરી એકવાર સાબિત કરી બતાવી છે. વડોદરાના સમા સ્પોર્ટ્સ કોમ્પલેક્ષ ખાતે યોજાયેલી 15 મી ઓલ ગુજરાત વોલીબોલ ટુર્નામેન્ટ ઓફ ધ ડેફ – 2026 માં ગાંધીઘર કછોલી પરિવારે અભૂતપૂર્વ સફળતા મેળવી છે. ગાંધીઘર કછોલીની કુમાર અને કન્યા બંને ટીમોએ પોતાના કૌશલ્ય, સચોટ ટીમવર્ક અને પ્રભાવશાળી ગેમપ્લાન વડે મેદાન પર અદભુત પ્રદર્શન કરીને ટુર્નામેન્ટના વિવિધ વર્ગોમાં વિજેતા બનવાનો ગૌરવવંતો ઇતિહાસ રચ્યો છે.

મેદાન પર સર્જાયો ઇતિહાસ : કુમાર અને કન્યા બંને કેટેગરીમાં ગાંધીઘર કછોલીનો દબદબો

વડોદરામાં ગત 29 અને 30 સપ્ટેમ્બરના રોજ રમાયેલી આ પ્રતિષ્ઠિત સ્પર્ધામાં રાજ્યભરમાંથી આવેલી ડેફ શાળાઓની ટીમો વચ્ચે કડક સ્પર્ધા જોવા મળી હતી. જેમાં નવસારીની ગાંધીઘર કછોલી સંચાલિત શાળાઓએ પોતાના પ્રદર્શનથી ઉપસ્થિત રમતપ્રેમીઓને મંત્રમુગ્ધ કરી દીધા હતા. સંસ્થા સંચાલિત બ. અને ઈ. નાયક બહેરા-મૂંગા શાળાની અંડર – 18 બોયઝ ટીમે શાનદાર રમત દાખવીને પ્રથમ ક્રમે રહી ચેમ્પિયન બની હતી અને સ્વર્ણ પદક પોતાના નામે કર્યો હતો, જ્યારે આ જ શાળાની અંડર – 16 બોયઝ ટીમે તૃતીય ક્રમ મેળવીને બ્રોન્ઝ મેડલ હાંસલ કરી, સંસ્થાની સ્પોર્ટ્સ બેન્ચ-સ્ટ્રેન્થનો પરિચય આપ્યો હતો. બીજી તરફ, ગ. કી. નાયક બધિર કન્યા વિદ્યાલયની દીકરીઓએ પણ પાછળ ન રહેતા અદ્વિતીય રમતનું પ્રદર્શન કર્યું હતું; જેમાં જુનિયર ગર્લ્સ ટીમે શાનદાર જીત સાથે પ્રથમ ક્રમ મેળવીને ગોલ્ડ મેડલ જીત્યો હતો અને સબ-જુનિયર ગર્લ્સ ટીમે રનર-અપ રહીને દ્વિતીય ક્રમે રહીને સિલ્વર મેડલ પર કબજો જમાવ્યો હતો.

નિષ્ઠા અને માર્ગદર્શનનો વિજય: ગાંધીઘર પરિવારે પાઠવ્યા અભિનંદન

દિવ્યાંગતાને માત આપીને રમતગમતના સર્વોચ્ચ શિખરે પહોંચેલા આ ખેલાડીઓ માટે આ જીત માત્ર એક ટ્રોફી નથી, પરંતુ તેમની વર્ષોની અથાક મહેનત, અજોડ શિસ્ત અને રમત પ્રત્યેના સમર્પણનું પરિણામ છે. બાળકોની આ આઉટસ્ટેન્ડિંગ સિદ્ધિ બદલ ગાંધીઘર કછોલી પરિવાર, શાળા સંચાલકો તેમજ રમતગમત મંડળ દ્વારા તમામ વિજેતા ખેલાડીઓ અને તેમને રાત-દિવસ તાલીમ આપનાર માર્ગદર્શક શિક્ષકોને હૃદયપૂર્વક અભિનંદન પાઠવ્યા હતા. સંસ્થાના ટ્રસ્ટીઓ અને શિક્ષકોએ જણાવ્યું હતું કે, આ બાળકોની મહેનત, નિષ્ઠા અને ખેલદિલી સમાજના દરેક વ્યક્તિ માટે પ્રેરણારૂપ છે અને આ સફળતા આગામી સમયમાં નેશનલ લેવલે પણ રાજ્યનું નામ રોશન કરવાનો માર્ગ મોકળો કરશે.

Continue Reading

આંતરરાષ્ટ્રીય

ગુજરાત વર્લ્ડ એથ્લેટિક્સ ચેમ્પીયનશીપ – 2031 માટે સજ્જ : વર્લ્ડ એથ્લેટિકસ ડેલિગેશન ગુજરાતમાં

Published

on

મુખ્યમંત્રી ભૂપેન્દ્ર પટેલ અને નાયબ મુખ્યમંત્રી હર્ષ સંઘવી સાથે  ડેલિગેશનના સભ્યોએ કરી બેઠક

ગાંધીનગર : એથ્લેટિક્સની આંતરરાષ્ટ્રીય સંચાલક સંસ્થા વર્લ્ડ એથ્લેટિક્સનાં પાંચ સભ્યોનું ડેલિગેશન પ્રસ્તાવિત વર્લ્ડ એથ્લેટિક્સ ચેમ્પીયનશીપ – 2031 યજમાની માટે ગુજરાતની સજ્જ્તા અને ઇંફ્રાસ્ક્ટ્રક્ચરના નિરિક્ષણ અર્થે ગુજરાતના પ્રવાસે છે. ત્યારે ડેલિગેશનના સભ્યો તેમજ બીડ ઈવેલ્યુએશન પેનલના ચેરમેન એંટી ફિલ્હાકોસ્કીએ મુખ્યમંત્રી ભુપેંદ્ર પટેલ અને નાયબ મુખ્યમંત્રી હર્ષ સંઘવી સાથે બેથક કરી હતી.

વર્લ્ડ એથ્લેટિક્સ ડેલિગેશન બે દિવસના ગુજરાતના પ્રવાસે

આગામી 2028માં વર્લ્ડ એથ્લેટિક્સ અંડર – 20 ચેમ્પીયનશીપ તથા વર્લ્ડ એથ્લેટિક્સ ચેમ્પીયનશીપ 2031 ની સંભવિત યજમાની ગુજરાત કરવાનું છે. ત્યારે વર્લ્ડ એથ્લેટિક્સ ડેલિગેશન આ પ્રસ્તાવિત રમતોત્સવોના સંદર્ભમાં ગુજરાતનું સ્પોર્ટ્સ ઈન્ફ્રાસ્ટ્રક્ચર અને અન્ય આનુષાંગિક સુવિધાઓના અભ્યાસ અને નિરીક્ષણ માટે 22 અને 23 જૂન 2026 બે દિવસિય ગુજરાતના પ્રવાસે છે. જેમા આજે મુખ્યમંત્રી ભૂપેન્દ્ર પટેલ અને નાયબ મુખ્યમંત્રી હર્ષ સંઘવી સાથે ડેલિગેશનના સભ્યોએ ગાંધીનગર ખાતે મુલાકાત કરી, એક મહત્વપૂર્ણ બેઠક યોજી હતી. બેથક બાદ ડેલિગેશને ગુજરાત પ્રવાસનો પ્રારંભ કર્યો હતો.

ગુજરાતને વર્લ્ડ એથ્લેટિક્સ ચેમ્પિયનશીપ 2031 ની યજમાની મળે એ માટે મુખ્યમંત્રી આશાવાદી

મુખ્યમંત્રી ભૂપેન્દ્ર પટેલે ડેલિગેશનના સભ્યો સાથેની વાતચીતમાં વિશ્વાસ વ્યક્ત કર્યો કે, ગુજરાતના સ્પોર્ટ્સ ઈન્ફ્રાસ્ટ્રક્ચરની નિરીક્ષણ – મૂલાકાતથી ડેલિગેશનને ગુજરાતની સજ્જતા અને સ્પોર્ટ્સ કલ્ચરની પ્રત્યક્ષ અનુભૂતિ થશે જ. ગુજરાત સરકાર આ એથ્લેટિક્સ ચેમ્પીયનશીપ-2031 ની યજમાની મેળે તે માટે આશાવાદી છે અને આ રમતોના સફળ આયોજનની તૈયારીઓ વેગવંતી બનાવી છે.  આ મૂલાકાત બેઠકની ચર્ચાઓ દરમિયાન નાયબ મુખ્યમંત્રી હર્ષ સંઘવીએ કહ્યુ કે, ગુજરાત વર્લ્ડ પોલીસ એન્ડ ફાયર ગેઈમ્સ, કોમનવેલ્થ ગેઈમ્સ – 2030 સહિત વર્લ્ડ ક્લાસ સ્પોર્ટ્સના આયોજન માટે સજ્જ છે અને આ હેતુસર વીર સાવરકર સ્પોર્ટ્સ કોમ્પલેક્ષ, સરદાર પટેલ સ્પોર્ટ્સ એન્કલેવ, વિશ્વનું સૌથી મોટું સ્ટેડિયમ નરેન્દ્ર મોદી સ્ટેડિયમ, કરાઈ એકેડમી જેવા સ્થળોએ આવી વિશ્વ સ્તરીય રમતોના આયોજન માટેની સુવિધાઓ ઝડપભેર વિકસી રહી છે.

બેઠકમા અનેક મહાનુભાવો રહ્યા ઉપસ્થિત

આ મૂલાકાત બેઠકમાં મુખ્યમંત્રીના અગ્ર સચિવ સંજીવ કુમાર, સ્પોર્ટ્સ ઓથોરિટી ઓફ ગુજરાતના ડાયરેક્ટર જનરલ, આદીલ સુમારીવાલા, વાઈસ પ્રેસીડન્ટ વર્લ્ડ એથ્લેટિક્સ વગેરે ઉપસ્થિત રહ્યા હતા.

Continue Reading

દક્ષિણ-ગુજરાત

નવસારીમાં રાષ્ટ્રીય કબડ્ડી સ્પર્ધા, 100 ટીમ વચ્ચે જામશે જંગ

Published

on

By

શિવઅંશ કબડ્ડી ક્લબ દ્વારા બે દિવસીય રાષ્ટ્રીય કબડ્ડી સ્પર્ધાનું આયોજન

નવસારી : નવસારીના ખેલાડીઓ ક્રિકેટ છોડી રાષ્ટ્રીય રમત કબડ્ડી પ્રત્યે પણ રૂચી લેતા થાય અને સ્થાનિક  ખેલાડીઓને ઘર આંગણે રાષ્ટ્રીય સ્તરનુ મેદાન મળી રહે એવા ઉદ્દેશ્ય સાથે નવસારીના શિવઅંશ કબડ્ડી ક્લબ અને જિલ્લા કબડ્ડી એસોસિએશન દ્વારા શહેરના લુન્સીકુઈ મેદાનમાં બે દિવસીય ડે નાઇટ રાષ્ટ્રીય કબડ્ડી સ્પર્ધાનું આયોજન કરવામાં આવ્યુ છે. જેનો શનિવારે સાંજે નવસારીના ધારાસભ્ય રાકેશ દેસાઈના હસ્તે પ્રારંભ કરવામાં આવ્યો હતો.

નવસારી જિલ્લામાંથી 50 ટીમ, સ્પર્ધામાં વિજેતા ટીમને મળશે 33333 રૂપિયાનો રોકડ પુરસ્કાર

નવસારીના શિવઅંશ કબડ્ડી ક્લબ અને નવસારી જિલ્લા કબડ્ડી એસોસીએશનના સંયુક્ત ઉપક્રમે 14 અને 15 ડીસેમ્બર બે દિવસો દરમિયાન ડે નાઇટ રાષ્ટ્રીય કબડ્ડી સ્પર્ધાનું આયોજન કરવામાં આવ્યુ છે. ક્લબના સંચાલક નરેન્દ્ર કોળી તેમજ તેમની ટીમે કબડ્ડી પ્રત્યે બાળકો અને યુવાનોને રૂચી જાગે એવા પ્રયાસો કર્યા છે. સાથે જ યુવાનો ક્રિકેટની રમતને બદલે રાષ્ટ્રીય રમત કબડ્ડી પ્રત્યે પણ સભાન થાય, વાલીઓ પણ બાળકોને કબડ્ડી રમવા માટે પ્રોત્સાહિત કરે એવી લાગણી વ્યક્ત કરી છે. શહેરના હાર્દ સમા લુન્સીકુઈ મેદાનમાં આયોજિત કબડ્ડી સ્પર્ધાનો શનિવારે સાંજે નવસારીના ધારાસભ્ય રાકેશ દેસાઈ, જિલ્લા ભાજપ પ્રમુખ ભુરાલાલ શાહ, નાયબ પોલીસ અધિક્ષક એસ. કે. રાય તેમજ અન્ય પદાધિકારીઓએ દીપ પ્રજ્વલિત કરી પ્રારંભ કરાવ્યો હતો. સ્પર્ધામાં કબડ્ડી રમવા બે મેદાન બનાવવામાં આવ્યા છે, જેના ઉપર કબડ્ડીના ખડતલ ખેલાડીઓ પોતાની ખેલ પ્રતિભા દર્શાવી વિજેતા બનાવાનો સ્તુત્ય પ્રયાસ કરશે. સ્પર્ધામાં નવસારી જિલ્લાની 50 ટીમ તેમજ ગુજરાતના અન્ય જિલ્લાઓ સાથે જ મહારાષ્ટ્ર, રાજસ્થાન, હરિયાણા, પંજાબ જેવા રાજ્યોમાંથી પણ કબડ્ડી ટીમ ભાગ લઇ રહી છે. એક પછી એક ટીમોને હરાવી વિજેતા બનનાર ટીમને 33333 રૂપિયાનું રોકડ પુરસ્કાર અને કપ, દ્વિતીય વિજેતા ટીમને 15555 રૂપિયાનું રોકડ પુરસ્કાર અને કપ તેમજ તૃતીય વિજેતા ટીમને 7777 રૂપિયાનો રોકડ પુરસ્કાર આપવામાં આવશે. સાથે જ શ્રેષ્ઠ રમત રમનારા ખેલાડીને અલગ અલગ કેટેગરીમાં મેડલ આપીને સન્માનિત કરવામાં આવશે. ઘર આંગણે રમાઇ રહેલી રાષ્ટ્રીય સ્તરની કબડ્ડી સ્પર્ધા જોવા માટે મોટી સંખ્યામાં શહેરીજનો અને યુવાનો ઉમટી પડ્યા હતા.

Continue Reading
Advertisement

Trending