Connect with us

અપરાધ

એક્સિસ બેંકને ગ્રાહક ફોરમની લપડાક, OTP કે PIN વિના ઉપડી ગયેલા 99 હજાર, 9 ટકા વ્યાજ સાથે ચુકવવાનો આદેશ

Published

on

એક્સિસ બેંકના બ્રાંચ મેનેજર કે ઓપરેશન હેડ ફોરમ સમક્ષ હાજર જ ન થયા

નવસારી : ડીજીટલ યુગમાં અનેક રીતે ઓનલાઇન છેતરપીંડી થઇ રહી છે. જેમાં હજારો લોકો કોઈને કોઈ રીતે સાયબર છેતરપીંડીનો ભોગ બને છે અને હજારો લાખો રૂપિયા ગુમાવી દે છે. ત્યારે નવસારીના અશોક ભાટીના એક્સિસ બેંકના ક્રેડીટ કાર્ડ થકી વગર OTP કે PIN નાંખ્યા વિના 99,375 રૂપિયા ઉપડી ગયા હતા. જેની જાણ થતા જ અશોક ભાટીએ સમય પર બેંકને જાણ કરવા છતાં રીકવરી કાઢી રૂપિયાની ઉઘરાણી કરનારી એક્સિસ બેંકને નવસારી ગ્રાહક તકરાર નિવારણ ફોરમે લપડાક લગાવી ગ્રાહકના ખાતામાંથી ઉપડી ગયેલા 99,375 રૂપિયા 9 ટકા વ્યાજ સાથે ચુકવવાનો આદેશ કર્યો હતો.

છેતરપીંડીની એક્સિસ બેંકને કરી ફરિયાદ, પણ બેંકે ઉકેલ ન લાવી, કરી હતી ઉઘરાણી

ઈન્ટરનેટનો વપરાશ વધવા સાથે જ સાયબર ફ્રોડ પણ વધ્યા છે. નેટના ભેજાબાજો યેનકેન પ્રકારે લોકોને ડીજીટલી છેતરીને હજારો લાખો રૂપિયા પડાવી લેતા થયા છે. જેમાં લોકોને ભોળવીને OTP કે ટ્રાન્ઝેકશન PIN મેળવીને છેતરપીંડી કરતા હોય છે, પરંતુ હવે તો તમારે OTP કે PIN આપવાની પણ જરૂર નથી પડતી અને તમારા ખાતામાંથી રૂપિયા ઉપાડી જાય છે. આવી જ ઘટના નવસારીના જલાલપોરના તાસ્કંદ નગરમાં રહેતા અશોક ભાટી સાથે બની હતી. અશોક ભાટીએ એક્સિસ બેંકના સેવિંગ એકાઉન્ટ થકી ક્રેડીટ કાર્ડ લીધો હતો. જે ક્રેડીટ કાર્ડમાંથી બે વર્ષ અગાઉ સપ્ટેમ્બર 2021 માં 99,375.13 રૂપિયા કોઈ સાયબર ગઠીયાએ તફડાવી લીધા હતા. જેની જાણ મહિના પછી મળેલા ક્રેડીટ કાર્ડના બીલથી થતા જ અશોક ભાટીએ તાત્કાલિક નવસારીની એક્સિસ બેંકના જવાબદાર અધિકારીઓને કરી હતી. જેમણે બેંકની હેલ્પલાઈન ઉપર ફરિયાદ નોંધાવા કહેતા, અશોક ભાટીએ ફરિયાદ નોંધાવી હતી, જેમાં તપાસ થયા બાદ કેસ બંધ થયો છે અને હવે કોઈ નાણા ભરવાના થતા નથી એવી જાણ કરવામાં આવી હતી. પરંતુ થોડા દિવસોમાં જ એક્સિસ બેંક દ્વારા ઉઘરાણી શરૂ કરતા, અશોક ભાટીએ ફરી નવસારી બ્રાંચ મેનેજર અમિત આનંદ અને ઓપરેશન હેડ ભાવિન પંચોલીને ફરિયાદ કરી હતી, પણ તેમણે જવાબદારી ન સ્વિકારી, તેમની ફરિયાદ બંધ કરી દીધી હતી.

એક્સિસ બેંક તરફથી ફરિયાદ સંબધે એક પણ પુરાવો રજૂ કરવામાં ન આવતા, કોર્ટે આપ્યો ચુકાદો

અશોક ભાટીએ સાયબર ક્ષેત્રના નિષ્ણાત વકીલ ચિરાગ લાડ મારફતે મે 2023 માં એક્સિસ બેંક, નવસારીના બ્રાંચ મેનેજર, ઓપરેશન હેડ અને એક્સિસ બેંક સામે નવસારી ગ્રાહક તકરાર નિવારણ ફોરમમાં અરજી કરી, ક્રેડીટ કાર્ડમાંથી ઉપડી ગયેલા 99,375.13 રૂપિયા 13.5 ટકાના વ્યાજ સાથે બેંક ચુકવી આપે અને વળતર તથા માનિસક ત્રાસ વગેરે મુદ્દે ખર્ચ ચુકવવા દાદ માંગી હતી. જે કેસ નવસારી ગ્રાહક ફોરમમાં ચાલી જતા બેંક કોઈ પુરાવા રજૂ કરી શકી ન હતી, સાથે જ ગત સપ્ટેમ્બર 2023 માં બેંકને ઈ મેલ દ્વારા અને બેંકના અધિકારીઓને નોટીસ મોકલી અંતિમ તક આપવા છતાં તેઓ કે કોઈ વકીલ પણ હાજર થયા ન હતા. જેથી RBI ના નિયમોનુસાર બેંક દ્વારા ગ્રાહકની સેવામાં બેદરકારી દાખવી હોવાનું સાબિત થયું હતું. સાથે જ ગ્રાહક ફોરમે નોંધ્યુ હતુ કે, ક્રેડીટ કાર્ડને હેક કરી, ઓનલાઇન ડેટા બેઇજ મેળવી અને તેના આધારે OTP નાંખી નાણાનું ટ્રાન્ઝેકશન થતું હોવાના અનેક કિસ્સાઓ સામે આવ્યા છે. જેથી ફરિયાદીના કિસ્સમાં ટ્રાન્ઝેક્શન થયુ છે કે કેમ એની માહિતી બેંક પાસે જ હોય, પરંતુ એવી માહિતી સાથે બેંક ફોરમ સમક્ષ હાજર થઇ નથી. જેથી ગ્રાહક અશોક ભાટીને 99,375.13 રૂપિયા 9 ટકા વ્યાજ સાથે ચુકવવા ગ્રાહક ફોરમે આદેશ કર્યો હતો. સાથે જ માનિસક ત્રાસના 10 હજાર રૂપિયા અને ફરિયાદ ખર્ચના 5 હજાર રૂપિયા પણ ચુકવવા બેંકને આદેશ કર્યો હતો.

અપરાધ

ખારેલ બ્રિજ પાસેથી 3.40 લાખના દારૂ ભરેલ ટેમ્પો સાથે ચાલક પકડાયો

Published

on

By

ગણદેવી પોલીસે કુલ 5.95 લાખથી વધુનો મુદ્દામાલ જપ્ત કર્યો

નવસારી : દક્ષિણ ગુજરાતમાં દારૂની ગેરકાયદે હેરાફેરી પર અંકુશ મેળવવા માટે પોલીસ દ્વારા સતત વોચ અને મોનિટરિંગ રાખવામાં આવતું હોય છે. આ ઝુંબેશના ભાગરૂપે ગણદેવી પોલીસ સ્ટેશનની ટીમે ચોક્કસ બાતમીના આધારે ખારેલ ઓવરબ્રિજ નીચેથી 3.40 લાખથી વધુની કિંમતના વિદેશી દારૂના જથ્થા સાથે એક ટેમ્પો ચાલકની ધરપકડ કરી હતી. પોલીસે વાહન તથા અન્ય સામગ્રી મળી કુલ 5.95 લાખનો મુદ્દામાલ કબ્જે કરી કાયદેસરની કામગીરી હાથ ધરી છે.

તાડપત્રી નીચે છુપાવેલો દારૂનો જથ્થો પોલીસે શોધી કાઢ્યો

મળતી માહિતી અનુસાર, ગણદેવી પોલીસના PI એન. આઈ. રાઠોડ અને PSI એન.એ. પટેલની માર્ગદર્શિકા હેઠળ ખારેલ આઉટ પોસ્ટના કર્મચારીઓ પેટ્રોલીંગમાં હતા. તે દરમિયાન PSI એન.એ. પટેલ તથા ASI નિલેશભાઈને મળેલી સચોટ બાતમી આધારે ખારેલ ઓવરબ્રિજ પાસે વોચ ગોઠવવામાં આવી હતી. સેલવાસ અને વાપી તરફથી સુરત જઈ રહેલા ટેમ્પોને રોકીને તપાસ કરતા, બ્લ્યુ કલરની તાડપત્રી હેઠળ છુપાવેલ 3.40 લાખ રૂપિયાની વ્હિસ્કી તથા બિયરની કૂલ 1152 બાટલીઓ મળી આવી હતી.

ઉમરગામના ચાલકની ધરપકડ, વડોદરાના બે આરોપી વોન્ટેડ

પોલીસે ઘટના સ્થળેથી ટેમ્પો ચાલક અને વલસાડ જિલ્લાના ઉંમરગામ ખાતે રહેતા મૂળ મધ્યપ્રદેશના 27 વર્ષીય નરેન્દ્રસીંગ પરસ્તેની સ્થળ પરથી ધરપકડ કરી હતી. પૂછપરછ દરમિયાન દારૂનો આ જથ્થો ભરી આપનાર વડોદરાના સોનુસીંગ અને મંગાવનાર ‘કાકા’ નામના શખ્સનું નામ ખુલતા પોલીસે આ બંને વોન્ટેડ આરોપીઓ સામે પણ પ્રોહિબિશન એક્ટ મુજબ ગુનો નોંધી વધુ તપાસ હાથ ધરી છે.

Continue Reading

અપરાધ

નવસારીમાં ખનન માફિયાઓ પર ભૂસ્તર વિભાગની સર્જિકલ સ્ટ્રાઈક : અંબિકા નદીમાં ડ્રોનથી ગેરકાયદે રેતી ચોરી પકડી

Published

on

By

જિલ્લામાં પ્રથમવાર આધુનિક ટેકનોલોજીથી મેગા ઓપરેશન : 2.25 કરોડનો મુદ્દામાલ જપ્ત

નવસારી : નવસારી જિલ્લામાં કુદરતી સંપત્તિની લૂંટ ચલાવતા ખનન માફિયાઓ સામે ખાણ ખનીજ વિભાગે અત્યાર સુધીની સૌથી મોટી અને અભૂતપૂર્વ કાર્યવાહી કરી હતી. જિલ્લા કલેક્ટરના સીધા માર્ગદર્શન હેઠળ ભૂસ્તર વિભાગે નવસારીમાં પ્રથમ વખત ડ્રોન કેમેરા ટેકનોલોજીનો ઉપયોગ કરી અંબિકા નદીના પેટાળમાં ચાલતા કાળા કારોબારનો પર્દાફાશ કર્યો છે. ગણદેવી તાલુકાના બીલીમોરા સ્મશાન નજીકથી બાજની મદદથી ગેરકાયદે થતા રેતી ખનનને પકડી 2.25 કરોડનો મુદ્દામાલ જપ્ત કર્યો હતો. ખાણ ખનીજ વિભાગની સર્જિકલ સ્ટ્રાઇકથી ખનન માફિયાઓમાં ભારે ફફડાટ વ્યાપી ગયો છે.

બીલીમોરા સ્મશાન ભૂમિ પાછળથી ચાલતા કાળા કારોબાર પર ડ્રોનનું ‘હવાઈ સર્વેલન્સ’

નવસારી ભૂસ્તરશાસ્ત્રી પી. આર. ખાંભલાના માર્ગદર્શન હેઠળ ભૂસ્તરવિજ્ઞાન અને ખનિજ વિભાગની ક્ષેત્રીય ટીમ દ્વારા અંબિકા નદીપટ્ટમાં એક ગુપ્ત સર્ચ ઓપરેશન ગોઠવવામાં આવ્યું હતું. રોયલ્ટી ઇન્સ્પેક્ટર દિવ્યાંત શિરોયા, માઇન્સ સુપરવાઇઝર સંદીપ રાઉત અને સ્પેશિયલ ડ્રોન ટીમે ગણદેવી તાલુકાના બીલીમોરા ગામની સ્મશાન ભૂમિ પાછળથી પસાર થતી અંબિકા નદીના દુર્ગમ વિસ્તારમાં દરોડો પાડ્યો હતો. ટીમે આધુનિક ડ્રોન સર્વેલન્સની મદદથી નદીના પેટાળમાંથી યાંત્રિક બાજ (બોટ) વડે ચાલી રહેલા ગેરકાયદેસર રેતી ખનન પદ્ધતિને રંગેહાથ ઝડપી પાડીને માફિયાઓના મનસુબા પર પાણી ફેરવી દીધું હતું.

ગેરકાયદે ખનન કરનારા માફીયાઓ સામે ધોલાઈ મરીન પોલીસ સ્ટેશનમાં નોંધાવી ફરિયાદ

આ હાઇ-ટેક દરોડા દરમિયાન ખાણ ખનીજ વિભાગની ટીમે સ્થળ પરથી ગેરકાયદેસર રેતી ખનનમાં વપરાતા 2 અત્યાધુનિક યાંત્રિક બાજ અને રેતીની હેરાફેરીમાં સંકળાયેલા 11 ટ્રકો મળીને કુલ 2.25 કરોડ રૂપિયાનો મુદ્દામાલ જપ્ત કર્યો હતો. સાથે જ જપ્ત કરાયેલા તમામ વાહનો અને સાધનોને આગળની કાનૂની કાર્યવાહી માટે ધોલાઈ મરીન પોલીસ સ્ટેશનના હવાલે કરી દેવામાં આવ્યા છે. તંત્ર દ્વારા કસૂરદારો સામે ‘ગુજરાત મિનરલ (પ્રિવેન્શન ઓફ ઇલ્લીગલ માઇનિંગ, ટ્રાન્સપોર્ટેશન એન્ડ સ્ટોરેજ) રૂલ્સ 2017’ હેઠળ ગુનો નોંધાવી, ગેરકાયદે ખનન નેટવર્કના મૂળ સુધી પહોંચવાની કવાયત તેજ કરવામાં આવી છે.

Continue Reading

અપરાધ

નેશનલ હાઈવે પર બલવાડા પાસેથી 3.50 લાખનો દારૂ ભરેલ કાર સાથે બેની ધરપકડ

Published

on

By

લકઝરી કારથી પાયલોટીંગ કરનાર મુખ્ય સૂત્રધાર સહિત બે વોન્ટેડ

નવસારી : નવસારી જિલ્લામાંથી રોજના લાખો રૂપિયાનો વિદેશી દારૂ સુરત તેમજ આગળના જિલ્લાઓમાં ખેપિયાઓ દ્વારા પહોંચાડવામાં આવે છે. ત્યારે ચીખલી પોલીસે લક્ઝરીયસ કારમાં દારૂની હેરાફેરીનો પર્દાફાશ કર્યો છે. નેશનલ હાઇવે નં. 48 પર બલવાડા ઓવરબ્રીજ નજીકથી 3.50 લાખનો વિદેશી દારૂ ભરેલ કાર સાથે વલસાડના બે ખેપિયાઓની ધરપકડ કરી હતી. જ્યારે દારૂની કારનું પાયલોટિંગ કરતી લકઝરી કારમાં સવાર મુખ્ય સૂત્રધાર સાથે બેને વોન્ટેડ જાહેર કર્યા છે.

સેલવાસથી દારૂનો જથ્થો ભરી કડોદરા સપ્લાય કરવાનો ખેલ પકડાયો

મળતી માહિતી અનુસાર, ચીખલી પોલીસના PI પી.બી. પટેલીયાના માર્ગદર્શન હેઠળ સર્વેલન્સ ટીમના PSI આર.એન. વાડલે અને કર્મચારીઓ ખાનગી વાહનોમાં હાઈવે પર પેટ્રોલીંગમાં હતા. દરમીયાન સર્વેલન્સ ટીમના ASI અલ્પેશભાઈ અને HC મહેન્દ્રભાઈને મળેલ સંયુક્ત બાતમીના આધારે, નેશનલ હાઈવે નં. 48 પર બલવાડા ઓવરબ્રીજના ઉત્તર છેડે વોચ ગોઠવવામાં આવી હતી. આ દરમીયાન શંકાસ્પદ રીતે પસાર થતી એક સફેદ રંગની કારને પોલીસે આંતરી, તેને અટકાવી હતી. કારમાં તપાસ કરતા તેમાંથી 3,50,640 રૂપિયાની 25 પુંઠાના બોક્સમાંથી વ્હિસ્કી તથા ટીન બિયર મળી કુલ 1020 બાટલીઓ મળી આવી હતી. પોલીસે ઘટના સ્થળેથી 5 લાખની કાર, 2 મોબાઈલ અને દારૂ મળી કુલ 8.61 લાખનો મુદ્દામાલ જપ્ત કરી, કારચાલક અને વલસાડના ઉદવાડા તાલુકાના સરોધી ગામે રહેતા મીતકુમાર ઉર્ફે મીતલો માહ્યાવંશી અને વલસાડના વાપી તાલુકાના બલીઠા ગામે રહેતા અક્ષયકુમાર રાઠોડની સ્થળ પરથી ધરપકડ કરી હતી.

લકઝરી કાર વડે પાયલોટીંગ કરનાર નવસારીનો બુટલેગર ‘આઝાદ લંગડો’ વોન્ટેડ જાહેર

પોલીસની કડક પૂછપરછમાં આરોપીઓએ ખુલાસો કર્યો હતો કે, આ વિદેશી દારૂનો જથ્થો સેલવાસથી ભરીને સુરતના કડોદરા ખાતે સપ્લાય કરવાનો હતો. આ સમગ્ર રેકેટનો મુખ્ય સૂત્રધાર નવસારીના લક્ષ્મી ટોકીઝ પાછળ રહેતો નસીમુદ્દીન ઉર્ફે ‘આઝાદ લંગડો’ છે, જેણે સેલવાસથી દારૂ ભરાવ્યો હતો અને પોતાની લકઝરી કાર વડે આગળ પાયલોટીંગ કરી દારૂનો જથ્થો સુરત તરફ રવાના કરાવ્યો હતો. ચીખલી પોલીસે દારૂનો જથ્થો સપ્લાય કરનાર મુખ્ય આરોપી આઝાદ લંગડો તેમજ કડોદરા ખાતે દારૂ મંગાવનાર અજાણ્યા બુટલેગર સામે પ્રોહિબિશન એક્ટ હેઠળ ગુનો નોંધી બંનેને વોન્ટેડ જાહેર કરી, તપાસને વેગ આપ્યો છે.

Continue Reading
Advertisement

Trending