Connect with us

અપરાધ

આરોપી મજૂરોએ 41 સોનાના સિક્કા 5.81 લાખ લઇ MP ના સોનીને ત્યાં મુક્યા હતા ગીરવે

Published

on

પોલીસે ગીરવે મુકેલા સિક્કા સાથે વધુ એક આરોપીની કરી ધરપકડ

નવસારી : નવસારીના બીલીમોરાના 100 વર્ષોથી જુના જર્જર મકાનનો કાટમાળ કાઢતી વેળાએ લાકડાનાં મોભમાંથી મળેલા સોનાના સિક્કાની ચોરી પ્રકરણમાં નવસારી LCB પોલીસે ગત રોજ વધુ એક આરોપીને મધ્યપ્રદેશથી પકડી પાડ્યો હતો. સાથે જ તેના દ્વારા મધ્યપ્રદેશના સોની પાસે ગીરવે મુકેલા વધુ 19 લાખના 41 સોનાના સિક્કા પણ પોલીસે કબ્જે કર્યા છે, જેની સાથે જ ચોરાયેલા સોનાના સિક્કાની સંખ્યા 240 પર પહોંચી છે.

બીલીમોરાના ઘરમાંથી મળેલા સોના સિક્કા લઇ આરોપી મજૂરો વલસાડ પહોંચ્યા હતા

નવસારીના બીલીમોરા શેહરમાં આવેલા 100 વર્ષથી જુના પૈતૃક મકાનને UK ના લેસ્ટરમાં સ્થાયી થયેલા હવાબીબી બાલીયાએ ગત જાન્યુઆરી 2023 માં વલસાડના દિવ્યાંગ કોન્ટ્રાકટર સરફરાઝ હાજી પઠાણને મકાન તોડી, તેનો કાટમાળ કાઢવા વેચવા આપ્યુ હતુ. જેનો કાટમાળ કાઢવા મધ્યપ્રદેશના 4 મજૂરો, રમકુ બંશી, રાજુ ઉર્ફે રાજલા, રાજુની પત્ની બંજરી અને રમકુના સગીર પુત્રને રાખવામાં આવ્યા હતા અને કાટમાળ કાઢતા મકાનના મોભમાંથી 100 વર્ષ જુના બ્રિટીશ કાલીન સોનાના સિક્કા મળી આવ્યા હતા. સોનાના સિક્કા જોઈ મજૂરોની દાનત બગડી હતી અને તેને ચોરી કરી, બીલીમોરાથી વલસાડ મજૂરી કામ કરતા રાજુના ભાઈ મુકેશ પાસે ગયા હતા અને ત્યાંથી મધ્યપ્રદેશ ઉપડી ગયા હતા. પોલીસ રિમાન્ડમાં જાણવા મળ્યું કે રાજુનો ભાઈ મુકેશ ગેન્તી ભયડીયા સિક્કા મુદ્દે જાણતો હતો અને તેણે મધ્યપ્રદેશના સોની ગોપાલ ઓમપ્રકાશ ગુપ્તાને ત્યાં 5.81 લાખ રૂપિયામાં ગીરવે મુક્યા હતા. જેથી પોલીસે ફરી મધ્યપ્રદેશ પહોંચી સોની ગોપાલ ગુપ્તા પાસેથી 19,00,760 રૂપિયાના 41 સોનાના સિક્કા કબ્જે લીધા હતા. જેમાં રમકુના સગીર પુત્રએ 11 અને રાજુએ 30 સિક્કા ગીરવે મુકવા આપ્યા હતા. જેની સાથે જ સિક્કા ગીરવે મુકવા ગયેલ રાજુના ભાઈ મુકેશ ભયડીયાની પણ ધરપકડ કરી તપાસને વેગ આપ્યો છે.

સોનાના સિક્કા ગીરવે મુકી, ખોદાવ્યા બે કુવા અને રાજુની પત્નીની કરાવી ડિલીવરી

બીલીમોરામાંથી સોનાના સિક્કા ચોરી કર્યા બાદ મધ્યપ્રદેશ પહોંચેલા ભયડીયા પરિવારે 41 સિક્કા સોની ગોપાલ ગુપ્તાને ત્યાં ગીરવે મુકી 5.81 લાખ રૂપિયા લીધા હતા. જે રૂપિયામાંથી ડુંગર ઉપર ઘર હોવાથી પાણીની સમસ્યા હોય, રાજુ અને રમકુ બંનેના પરિવારે ડુંગર ઉપર પાણીનો બોર કરાવ્યો હતો. જયારે રાજુએ તેની પત્ની ગર્ભવતી હોવાથી તેની વડોદારા ખાતે સારવાર કરાવી હતી, જેમાં બંજરીને સીઝર કરીને બાળક લેવા પડ્યુ હતું, એમાં પણ રૂપિયા ખર્ચ્યા હોવાની માહિતી મળી હતી. જોકે વધુ 41 સિક્કા મળતા, અત્યાર સુધીમાં કુલ 240 સોનાના સિક્કા નવસારી પોલીસે કબ્જે કર્યા છે. પરંતુ સોનાના એન્ટીક સિક્કા હોવાથી અન્ય કોઈને આપ્યા હોય કે કેમ એ શોધવું પોલીસ માટે ચેલેન્જીંગ છે. તેમ છતાં MP ના આરોપિત પોલીસ કર્મીઓની પૂછપરછ કરીને વધુ તેમાંથી વધુ સિક્કા મળે એવો પ્રયાસ પણ પોલીસ કરી રહી છે.

ફરિયાદી હવાબીબીએ ખુશી વ્યક્ત કરી, પણ બાકીના સિક્કા શોધવા પણ થાય પ્રયાસ

સોનાના સિક્કા ચોરી જનારા મજૂરો અને કોન્ટ્રાકટરને પોલીસે પકડીને સિક્કા પણ કબ્જે કર્યા હોવાનું જાણતા જ ફરિયાદી NRI હવાબીબી UK થી નવસારી પહોંચ્યા હતા અને પોલીસને મળીને સિક્કા જોવા સાથે જ નવસારી જિલ્લા પોલીસના અધિકારી કર્મચારીઓનો આભાર માન્યો હતો. સાથે જ ઘરના મોભમાંથી મળેલા સિક્કાની સંખ્યા 700 થી 1900 સુધી હોવાની વાતો હતી, ત્યારે પોલીસે 240 સિક્કા શોધ્યા છે, વધુ સિક્કા શોધવાના પ્રયાસ કરે એવી આશા પણ વ્યક્ત કરી, સિક્કા મેળવવા માટે કાયદાકીય રીતે જે કરવું પડે એ કરવા તૈયારી દર્શાવી હતી.

અગાઉ 199 સિક્કા મળ્યા હતા, વધુ 41 સિક્કા મળતા કુલ 240 સિક્કા મળ્યા

મધ્યપ્રદેશ પહોંચ્યા બાદ રમકુના સોનાના સિક્કા સ્થાનિક પોલીસે જબરદસ્તી ચોર્યાની ફરિયાદ બાદ સમગ્ર પ્રકરણ બહાર આવ્યું હતું. મકાન માલિક હવાબીબીને પણ ત્યારે જ જાણ થઇ અને ત્યારબાદ ગત ઓક્ટોબર 2023 માં હવાબીબીએ નવસારી આવી કોન્ટ્રાકટર તેમજ મજૂરો સામે ફરિયાદ નોંધાવી હતી. જેની તપાસમાં જોતરાયેલી નવસારી LCB પોલીસે બે મહિનાની મહેનત બાદ ચોરાયેલા સોનાના સિક્કા, કે જે વર્ષ 1910 થી 1922 ની સાલના બ્રિટીશ કાલીન 199 સિક્કાઓ સાથે રમકુ, રાજુ, બંજરી અને સગીરને મધ્યપ્રદેશથી ધરપકડ કરી હતી, જયારે કોન્ટ્રાકટર સરફરાઝની પણ ધરપકડ કરી હતી. પોલીસે પાંચેય આરોપીઓના 8 દિવસના રિમાન્ડ મેળવ્યા હતા. રિમાન્ડ દરમિયાન સોનીને ત્યાંથી મળેલા વધુ 41 સિક્કા સાથે કુલ 240 સોનાના સિક્કા થયા છે, જેની કુલ કિંમત 1.11 કરોડથી વધુ થાય છે.

અપરાધ

ખારેલ બ્રિજ પાસેથી 3.40 લાખના દારૂ ભરેલ ટેમ્પો સાથે ચાલક પકડાયો

Published

on

By

ગણદેવી પોલીસે કુલ 5.95 લાખથી વધુનો મુદ્દામાલ જપ્ત કર્યો

નવસારી : દક્ષિણ ગુજરાતમાં દારૂની ગેરકાયદે હેરાફેરી પર અંકુશ મેળવવા માટે પોલીસ દ્વારા સતત વોચ અને મોનિટરિંગ રાખવામાં આવતું હોય છે. આ ઝુંબેશના ભાગરૂપે ગણદેવી પોલીસ સ્ટેશનની ટીમે ચોક્કસ બાતમીના આધારે ખારેલ ઓવરબ્રિજ નીચેથી 3.40 લાખથી વધુની કિંમતના વિદેશી દારૂના જથ્થા સાથે એક ટેમ્પો ચાલકની ધરપકડ કરી હતી. પોલીસે વાહન તથા અન્ય સામગ્રી મળી કુલ 5.95 લાખનો મુદ્દામાલ કબ્જે કરી કાયદેસરની કામગીરી હાથ ધરી છે.

તાડપત્રી નીચે છુપાવેલો દારૂનો જથ્થો પોલીસે શોધી કાઢ્યો

મળતી માહિતી અનુસાર, ગણદેવી પોલીસના PI એન. આઈ. રાઠોડ અને PSI એન.એ. પટેલની માર્ગદર્શિકા હેઠળ ખારેલ આઉટ પોસ્ટના કર્મચારીઓ પેટ્રોલીંગમાં હતા. તે દરમિયાન PSI એન.એ. પટેલ તથા ASI નિલેશભાઈને મળેલી સચોટ બાતમી આધારે ખારેલ ઓવરબ્રિજ પાસે વોચ ગોઠવવામાં આવી હતી. સેલવાસ અને વાપી તરફથી સુરત જઈ રહેલા ટેમ્પોને રોકીને તપાસ કરતા, બ્લ્યુ કલરની તાડપત્રી હેઠળ છુપાવેલ 3.40 લાખ રૂપિયાની વ્હિસ્કી તથા બિયરની કૂલ 1152 બાટલીઓ મળી આવી હતી.

ઉમરગામના ચાલકની ધરપકડ, વડોદરાના બે આરોપી વોન્ટેડ

પોલીસે ઘટના સ્થળેથી ટેમ્પો ચાલક અને વલસાડ જિલ્લાના ઉંમરગામ ખાતે રહેતા મૂળ મધ્યપ્રદેશના 27 વર્ષીય નરેન્દ્રસીંગ પરસ્તેની સ્થળ પરથી ધરપકડ કરી હતી. પૂછપરછ દરમિયાન દારૂનો આ જથ્થો ભરી આપનાર વડોદરાના સોનુસીંગ અને મંગાવનાર ‘કાકા’ નામના શખ્સનું નામ ખુલતા પોલીસે આ બંને વોન્ટેડ આરોપીઓ સામે પણ પ્રોહિબિશન એક્ટ મુજબ ગુનો નોંધી વધુ તપાસ હાથ ધરી છે.

Continue Reading

અપરાધ

નવસારીમાં ખનન માફિયાઓ પર ભૂસ્તર વિભાગની સર્જિકલ સ્ટ્રાઈક : અંબિકા નદીમાં ડ્રોનથી ગેરકાયદે રેતી ચોરી પકડી

Published

on

By

જિલ્લામાં પ્રથમવાર આધુનિક ટેકનોલોજીથી મેગા ઓપરેશન : 2.25 કરોડનો મુદ્દામાલ જપ્ત

નવસારી : નવસારી જિલ્લામાં કુદરતી સંપત્તિની લૂંટ ચલાવતા ખનન માફિયાઓ સામે ખાણ ખનીજ વિભાગે અત્યાર સુધીની સૌથી મોટી અને અભૂતપૂર્વ કાર્યવાહી કરી હતી. જિલ્લા કલેક્ટરના સીધા માર્ગદર્શન હેઠળ ભૂસ્તર વિભાગે નવસારીમાં પ્રથમ વખત ડ્રોન કેમેરા ટેકનોલોજીનો ઉપયોગ કરી અંબિકા નદીના પેટાળમાં ચાલતા કાળા કારોબારનો પર્દાફાશ કર્યો છે. ગણદેવી તાલુકાના બીલીમોરા સ્મશાન નજીકથી બાજની મદદથી ગેરકાયદે થતા રેતી ખનનને પકડી 2.25 કરોડનો મુદ્દામાલ જપ્ત કર્યો હતો. ખાણ ખનીજ વિભાગની સર્જિકલ સ્ટ્રાઇકથી ખનન માફિયાઓમાં ભારે ફફડાટ વ્યાપી ગયો છે.

બીલીમોરા સ્મશાન ભૂમિ પાછળથી ચાલતા કાળા કારોબાર પર ડ્રોનનું ‘હવાઈ સર્વેલન્સ’

નવસારી ભૂસ્તરશાસ્ત્રી પી. આર. ખાંભલાના માર્ગદર્શન હેઠળ ભૂસ્તરવિજ્ઞાન અને ખનિજ વિભાગની ક્ષેત્રીય ટીમ દ્વારા અંબિકા નદીપટ્ટમાં એક ગુપ્ત સર્ચ ઓપરેશન ગોઠવવામાં આવ્યું હતું. રોયલ્ટી ઇન્સ્પેક્ટર દિવ્યાંત શિરોયા, માઇન્સ સુપરવાઇઝર સંદીપ રાઉત અને સ્પેશિયલ ડ્રોન ટીમે ગણદેવી તાલુકાના બીલીમોરા ગામની સ્મશાન ભૂમિ પાછળથી પસાર થતી અંબિકા નદીના દુર્ગમ વિસ્તારમાં દરોડો પાડ્યો હતો. ટીમે આધુનિક ડ્રોન સર્વેલન્સની મદદથી નદીના પેટાળમાંથી યાંત્રિક બાજ (બોટ) વડે ચાલી રહેલા ગેરકાયદેસર રેતી ખનન પદ્ધતિને રંગેહાથ ઝડપી પાડીને માફિયાઓના મનસુબા પર પાણી ફેરવી દીધું હતું.

ગેરકાયદે ખનન કરનારા માફીયાઓ સામે ધોલાઈ મરીન પોલીસ સ્ટેશનમાં નોંધાવી ફરિયાદ

આ હાઇ-ટેક દરોડા દરમિયાન ખાણ ખનીજ વિભાગની ટીમે સ્થળ પરથી ગેરકાયદેસર રેતી ખનનમાં વપરાતા 2 અત્યાધુનિક યાંત્રિક બાજ અને રેતીની હેરાફેરીમાં સંકળાયેલા 11 ટ્રકો મળીને કુલ 2.25 કરોડ રૂપિયાનો મુદ્દામાલ જપ્ત કર્યો હતો. સાથે જ જપ્ત કરાયેલા તમામ વાહનો અને સાધનોને આગળની કાનૂની કાર્યવાહી માટે ધોલાઈ મરીન પોલીસ સ્ટેશનના હવાલે કરી દેવામાં આવ્યા છે. તંત્ર દ્વારા કસૂરદારો સામે ‘ગુજરાત મિનરલ (પ્રિવેન્શન ઓફ ઇલ્લીગલ માઇનિંગ, ટ્રાન્સપોર્ટેશન એન્ડ સ્ટોરેજ) રૂલ્સ 2017’ હેઠળ ગુનો નોંધાવી, ગેરકાયદે ખનન નેટવર્કના મૂળ સુધી પહોંચવાની કવાયત તેજ કરવામાં આવી છે.

Continue Reading

અપરાધ

નેશનલ હાઈવે પર બલવાડા પાસેથી 3.50 લાખનો દારૂ ભરેલ કાર સાથે બેની ધરપકડ

Published

on

By

લકઝરી કારથી પાયલોટીંગ કરનાર મુખ્ય સૂત્રધાર સહિત બે વોન્ટેડ

નવસારી : નવસારી જિલ્લામાંથી રોજના લાખો રૂપિયાનો વિદેશી દારૂ સુરત તેમજ આગળના જિલ્લાઓમાં ખેપિયાઓ દ્વારા પહોંચાડવામાં આવે છે. ત્યારે ચીખલી પોલીસે લક્ઝરીયસ કારમાં દારૂની હેરાફેરીનો પર્દાફાશ કર્યો છે. નેશનલ હાઇવે નં. 48 પર બલવાડા ઓવરબ્રીજ નજીકથી 3.50 લાખનો વિદેશી દારૂ ભરેલ કાર સાથે વલસાડના બે ખેપિયાઓની ધરપકડ કરી હતી. જ્યારે દારૂની કારનું પાયલોટિંગ કરતી લકઝરી કારમાં સવાર મુખ્ય સૂત્રધાર સાથે બેને વોન્ટેડ જાહેર કર્યા છે.

સેલવાસથી દારૂનો જથ્થો ભરી કડોદરા સપ્લાય કરવાનો ખેલ પકડાયો

મળતી માહિતી અનુસાર, ચીખલી પોલીસના PI પી.બી. પટેલીયાના માર્ગદર્શન હેઠળ સર્વેલન્સ ટીમના PSI આર.એન. વાડલે અને કર્મચારીઓ ખાનગી વાહનોમાં હાઈવે પર પેટ્રોલીંગમાં હતા. દરમીયાન સર્વેલન્સ ટીમના ASI અલ્પેશભાઈ અને HC મહેન્દ્રભાઈને મળેલ સંયુક્ત બાતમીના આધારે, નેશનલ હાઈવે નં. 48 પર બલવાડા ઓવરબ્રીજના ઉત્તર છેડે વોચ ગોઠવવામાં આવી હતી. આ દરમીયાન શંકાસ્પદ રીતે પસાર થતી એક સફેદ રંગની કારને પોલીસે આંતરી, તેને અટકાવી હતી. કારમાં તપાસ કરતા તેમાંથી 3,50,640 રૂપિયાની 25 પુંઠાના બોક્સમાંથી વ્હિસ્કી તથા ટીન બિયર મળી કુલ 1020 બાટલીઓ મળી આવી હતી. પોલીસે ઘટના સ્થળેથી 5 લાખની કાર, 2 મોબાઈલ અને દારૂ મળી કુલ 8.61 લાખનો મુદ્દામાલ જપ્ત કરી, કારચાલક અને વલસાડના ઉદવાડા તાલુકાના સરોધી ગામે રહેતા મીતકુમાર ઉર્ફે મીતલો માહ્યાવંશી અને વલસાડના વાપી તાલુકાના બલીઠા ગામે રહેતા અક્ષયકુમાર રાઠોડની સ્થળ પરથી ધરપકડ કરી હતી.

લકઝરી કાર વડે પાયલોટીંગ કરનાર નવસારીનો બુટલેગર ‘આઝાદ લંગડો’ વોન્ટેડ જાહેર

પોલીસની કડક પૂછપરછમાં આરોપીઓએ ખુલાસો કર્યો હતો કે, આ વિદેશી દારૂનો જથ્થો સેલવાસથી ભરીને સુરતના કડોદરા ખાતે સપ્લાય કરવાનો હતો. આ સમગ્ર રેકેટનો મુખ્ય સૂત્રધાર નવસારીના લક્ષ્મી ટોકીઝ પાછળ રહેતો નસીમુદ્દીન ઉર્ફે ‘આઝાદ લંગડો’ છે, જેણે સેલવાસથી દારૂ ભરાવ્યો હતો અને પોતાની લકઝરી કાર વડે આગળ પાયલોટીંગ કરી દારૂનો જથ્થો સુરત તરફ રવાના કરાવ્યો હતો. ચીખલી પોલીસે દારૂનો જથ્થો સપ્લાય કરનાર મુખ્ય આરોપી આઝાદ લંગડો તેમજ કડોદરા ખાતે દારૂ મંગાવનાર અજાણ્યા બુટલેગર સામે પ્રોહિબિશન એક્ટ હેઠળ ગુનો નોંધી બંનેને વોન્ટેડ જાહેર કરી, તપાસને વેગ આપ્યો છે.

Continue Reading
Advertisement

Trending