ગુજરાત

નવસારી જિલ્લાના 237 ગામડાઓમાં 3055 આવાસોનું પ્રધાનમંત્રીએ કર્યું ઈ-લોકાર્પણ

Published

3 years ago

February 10, 2024

Navsari

નવસારીમાં પ્રધાનમંત્રી આવાસ યોજના હેઠળ 6 વર્ષોમાં 18 હજારથી વધુ આવાસો ફાળવાયા

નવસારી : લોકસભા ચુંટણીનું વર્ષ છે અને સરકાર દ્વારા ચુંટણી પૂર્વે અવનવા પ્રોજેક્ટના ખાતમુર્હત અને લોકાર્પણના કાર્યક્રમ યોજવામાં આવે છે, ત્યારે આજે સમગ્ર ગુજરાતમાં પ્રધાનમંત્રી આવાસ યોજના અંતર્ગત એકી સાથે 1.31 લાખથી વધુ આવાસોનું પ્રધાનમંત્રી નરેન્દ્ર મોદીના હસ્તે ઈ-લોકાર્પણ અને ખાતમુર્હત કરવામાં આવ્યુ હતું. જેમાં નવસારી જિલ્લામાં પણ જિલ્લાની 4 વિધાનસભામાં 3055 આવાસોનું લોકાર્પણ કરવામાં આવ્યું અને લાભાર્થીઓને ગૃહપ્રવેશ કરાવવામાં આવ્યો હતો.

મુખ્યમંત્રી ભુપેન્દ્ર પટેલ બનાસકાંઠાના ડીસાથી વર્ચ્યુઅલિ જોડાયા

કેન્દ્ર અને ગુજરાત સરકાર દ્વારા ગરીબ અને છેવાડાના માનવીઓ માટે વિવિધ આવાસ યોજના અમલી બનાવી છે. જેમાં પણ પ્રધાનમંત્રી આવાસ યોજના હેઠળ શહેર અને ગામડાઓમાં આવાસ ફાળવવામાં આવે છે. પ્રધાનમંત્રી આવાસ યોજના અંતર્ગત લાભાર્થીઓને આવાસ સાથે શૌચાલય, બાથરૂમ અને મજૂરીની સહાય અલગથી ચુકવવામાં આવતી હોય છે. જેથી આર્થિક સંકડામણમાં પણ માણસ પોતાનાં સપનાનું ઘર બનાવી એમાં હસી ખુશી રહી શકે. ત્યારે ગુજરાતમાં આજે ઐતિહાસિક કાર્યક્રમ યોજવામાં આવ્યો હતો. ગુજરાતની 182 વિધાનસભા બેઠકોના તમામ તાલુકાઓમાં પ્રધાનમંત્રી આવાસ યોજના હેઠળ તૈયાર થયેલા આવાસો તેમજ મંજૂરી મળેલ આવાસોનું ઈ-લોકાર્પણ સાથે ઈ-ખાતમુર્હત પ્રધાનમંત્રી નરેન્દ્ર મોદીની વર્ચ્યુઅલિ ઉપસ્થિતિમાં કરવામાં આવ્યુ હતુ. નવસારી જિલ્લામાં આવતી 4 વિધાનસભા બેઠકો પર પણ પ્રધાનમંત્રી આવાસ યોજના અંતર્ગત 237 ગામડાઓમાં 305 આવાસોનું લોકાર્પણ અને ભૂમિપૂજન કરવામાં આવ્યુ હતુ. આ પ્રસંગે નવસારીના ધારાસભ્ય રાકેશ દેસાઈએ આવાસ લોકાર્પણ અને ખાતમુર્હત કાર્યક્રમને ગુજરાત માટે ઐતિહાસિક ઠરાવ્યો હતો. કારણ એક સાથે 2,993 કરોડ રૂપિયાના ખર્ચે સમગ્ર રાજ્યમાં 1.31 લાખથી વધુ આવાસોનું લોકાર્પણ અને ખાતમુર્હત પ્રધાનમંત્રી નરેન્દ્ર મોદીના હસ્તે ડીજીટલી કરવામાં આવ્યુ હતુ. કાર્યક્રમમાં પ્રધાનમંત્રી નરેન્દ્ર મોદીએ લાભાર્થી સાથે વાત પણ કરી હતી. આ વર્ષના બજેટમાં ગરીબ સ્વાભિમાનથી રહી શકે એ હેતૂથી આવાસ યોજનામાં 87 હજાર કરોડ રૂપિયાનું બજેટ ફાળવવા માટે પ્રધાનમંત્રી મોદીનો આભાર પણ વ્યક્ત કર્યો હતો.

વાંસદા વિધાનસભામાં સૌથી વધુ 1856 આવાસનું લોકાર્પણ, જયારે જયારે 6 વર્ષોમાં 11,843 આવાસ ફાળવાયા

નવસારી જિલ્લાની 4 વિધાનસભા અંતર્ગત 6 તાલુકાઓમાં પ્રધાનમંત્રી આવાસ યોજના હેઠળ કુલ 3055 આવાસોનું આજે ઈ-લોકાર્પણ અને ભૂમિપૂજન થયુ હતુ. જેમાં જલાલપોર વિધાનસભામાં કુલ 350 આવાસ, નવસારી વિધાનસભામાં કુલ 246 આવાસ, ગણદેવી વિધાનસભામાં 603 આવાસ અને સૌથી વધુ વાંસદા વિધાનસભામાં 1856 આવાસોનું ઈ-લોકાર્પણ અને ભૂમિપૂજન કરવામાં આવ્યું હતું. જયારે છેલ્લા 6 વર્ષોમાં પ્રધાનમંત્રી આવાસ યોજના અંતર્ગત નવસારી જિલ્લાની જલાલપોર વિધાનસભામાં 2010 આવાસો, નવસારી વિધાનસભામાં 1400 આવાસ, ગણદેવી વિધાનસભામાં 3582 આવાસો અને સૌથી વધુ 11,843 આવાસો વાંસદા વિધાનસભામાં ફાળવવામાં આવ્યા હતા.

Post Views: 506

Up Next

કોંગ્રેસ ગરીબી હટાવોની વાત કરતી રહી, મોદી સરકારે 24 કરોડ લોકોને ગરીબી રેખાથી ઉપર કાઢ્યા – સી. આર. પાટીલ

Don't Miss

નવસારી જિલ્લાના 7 પોલીસ ઇન્સ્પેક્ટરની આંતરિક બદલીનો ગંજીપો ચીપાયો

Click to comment

આરોગ્ય

કુપોષણ સામે નવસારીનો જંગ : કેન્દ્રીય મંત્રી સી.આર. પાટીલની ઉપસ્થિતિમાં ‘આંગણ ઉત્સવ’ ઉજવાયો

Published

6 days ago

September 26, 2026

Navsari

નવસારીના પોષણ ચેમ્પિયન્સનું બહુમાન અને નાગલીની સુખડીથી બાળ સ્વાસ્થ્ય મજબૂત કરવાનો પ્રયાસ

નવસારી : બાળકનું સ્મિત એ સમાજની સૌથી મોટી મૂડી છે અને એ સ્મિત ત્યારે જ ખીલી શકે જ્યારે એની કાયા પોષણથી સમૃદ્ધ હોય. બાળપણને કુપોષણના અંધકારમાંથી મુક્ત કરીને સ્વાસ્થ્યના ઉજાસ તરફ લઈ જવાનો એક માનવીય અને સંવેદનશીલ પ્રયાસ નવસારીના આંગણે આકાર પામ્યો છે. કબીલપોરના આંગણવાડી કેન્દ્રોમાં જ્યારે પાયાના કક્ષાએ કામ કરતી બહેનોનો સ્વેદ અને ભૂલકાંઓનું ઉત્સાહભર્યું સ્મિત એકસાથે મળ્યા, ત્યારે તે માત્ર એક સરકારી કાર્યક્રમ ન રહેતાં મમતા, કાળજી અને સામાજિક જવાબદારીનો એક જીવંત ઉત્સવ બની ગયો હતો.

બાળપણને મળ્યું પોષણનું કવચ અને પ્રોત્સાહનનું ભાથું

નવસારીમાં આજે ‘આંગણ ઉત્સવ’ દરમિયાન કુપોષણની રેખા વટાવીને પૂર્ણ સ્વાસ્થ્ય તરફ આગળ વધેલા ભૂલકાંઓને ‘પોષણ ચેમ્પિયન’ તરીકે બિરદાવવામાં આવ્યા હતા. કેન્દ્રીય જળ શક્તિ મંત્રી સી. આર. પાટીલ, સ્થાનિક ધારાસભ્ય રાકેશ દેસાઈ અને અન્ય મહાનુભાવોની ઉપસ્થિતિમાં આ બાળકોને ફળ, મીઠાઈ અને વિશેષરૂપે પૌષ્ટિક નાગલીની સુખડીથી ભરેલી ‘પોષણ ટોપલી’ નું વિતરણ કરાયું હતું. આ ઉપરાંત, 3 થી 6 વર્ષના તમામ બાળકો સહિત THR (ટેક હોમ રાશન) યોજના હેઠળ બાલશક્તિ, પૂર્ણાશક્તિ અને માતૃશક્તિના લાભાર્થીઓને પણ પૌષ્ટિક સામગ્રી પહોંચાડવામાં આવી હતી. આ અવસરે લાભાર્થી કિશોરીઓ અને ધાત્રી માતાઓએ પોતાના અનુભવો વાગોળતાં પોષણ સેવાઓથી જીવનમાં આવેલા સકારાત્મક પરિવર્તનની અનુભૂતિ વ્યક્ત કરી હતી.

પાયાના ક્ષેત્રે અદ્રશ્ય સેવા આપતી ‘માતૃશક્તિ’ નું બહુમાન

સમાજને કુપોષણમુક્ત બનાવવા માટે દિવસ-રાત જોયા વગર ગ્રાઉન્ડ લેવલ પર પરિશ્રમ કરતી આંગણવાડી કાર્યકરો, તેડાગરો અને આશા વર્કરો ખરી અર્થમાં આ અભિયાનના વાસ્તવિક નાયકો છે. કબીલપોર 01 ની ટીમ દિપ્તીબેન મકવાણા, ગાયત્રીબેન પટેલ, રક્ષાબેન નાયકા અને કબીલપોર 04 ની ટીમ ચંપાબેન પટેલ, પારૂલબેન પટેલ, રાધાબેન પટેલને તેમની ઉત્કૃષ્ટ કામગીરી બદલ પ્રશસ્તિપત્ર અને શાલ અર્પણ કરીને સન્માન કરવામાં આવ્યું હતું. પાયાના આ કર્મયોગીઓના સમર્પણને બિરદાવીને આંગણ ઉત્સવે માત્ર પોષણનો સંદેશ નથી આપ્યો, પરંતુ માતૃ અને બાળ સ્વાસ્થ્ય પ્રત્યેની સામાજિક કટિબદ્ધતાને વધુ દ્રઢ બનાવી છે.

Post Views: 12

આરોગ્ય

‘નમો કમલમ’ ના લોકાર્પણ પૂર્વે નવસારીમાં સ્વચ્છતા અને સુપોષણનો મહાયજ્ઞ શરૂ

Published

1 month ago

August 30, 2026

Navsari

કેન્દ્રીય મંત્રી સી.આર. પાટીલની ઉપસ્થિતિમાં 389 ગામોમાં માઇક્રો સફાઇ ઝુંબેશનો પ્રારંભ

નવસારી : રાજકીય કે સરકારી કાર્યક્રમો માત્ર ઔપચારિકતા પૂરતા સીમિત ન રહેતા જ્યારે લોકસેવા અને માનવીય સંવેદનાનો પર્યાય બને છે, ત્યારે સમાજમાં એક નવો આશાવાદ જન્મ લે છે. નવસારી જિલ્લામાં વડાપ્રધાન નરેન્દ્ર મોદીના આગામી પ્રવાસ અને નવસારી ભાજપના હાઇટેક કાર્યાલય ‘નમો કમલમ’ ના ઉદ્ઘાટનને વધાવવા માટે તંત્રે કમર કસી છે. પરંતુ આ તૈયારીઓ માત્ર ઈમારતો કે રસ્તાઓ પૂરતી મર્યાદિત નથી રહી, પણ કેન્દ્રીય જળ શક્તિ મંત્રી સી.આર. પાટીલના માર્ગદર્શન હેઠળ સમગ્ર જિલ્લાને સ્વચ્છ, સુપોષિત અને સ્વસ્થ બનાવવાનો એક અભૂતપૂર્વ સેવાયજ્ઞ પ્રારંભાયો છે.

જનભાગીદારીનો અનોખો સંગમ: 389 ગામોમાં યુદ્ધના ધોરણે માઇક્રો સફાઇ ઝુંબેશ

નવસારી જિલ્લાના ઇતિહાસમાં કદાચ પ્રથમ વખત જનભાગીદારીનું આવું વિરાટ સ્વરૂપ જોવા મળી રહ્યું છે. ચીખલી ખાતેથી કેન્દ્રીય મંત્રી સી.આર. પાટીલના હસ્તે જિલ્લાના તમામ 389 ગામોને સ્વચ્છ બનાવવાના મહાઅભિયાનનો પ્રારંભ કરાવવામાં આવ્યો છે. 6 સપ્ટેમ્બર સુધીમાં તમામ ગ્રામ્ય વિસ્તારોમાંથી કચરો હટાવી સંપૂર્ણ સ્વચ્છતા કરવાનો દ્રઢ નિર્ધાર કરાયો છે. આ ઝુંબેશની વિશેષતા એ છે કે, ક્વોરી એસોસિએશન દ્વારા સામાજિક જવાબદારીના ભાગરૂપે 50 થી વધુ JCB અને લોડર મશીનો વિનામૂલ્યે ફાળવવામાં આવ્યા છે. દરેક ગામમાં 1 JCB, ટ્રોલી અને 10 મજૂરોની સઘન ટીમ બનાવી માઇક્રો પ્લાનિંગ સાથે કામગીરી તેજ કરી દેવામાં આવી છે.

માનવીય સંવેદનાની મિસાલ : સેવા અને સુપોષણના ક્ષેત્રે ઐતિહાસિક પહેલ

સ્વચ્છતા અભિયાનની સાથે-સાથે નવસારીમાં માનવીય અભિગમ ધરાવતી કલ્યાણકારી યોજનાઓને પણ છેવાડાના માનવી સુધી પહોંચાડવાનો ઉત્તમ પ્રયાસ થયો છે. નવસારીના બી.આર. ફાર્મ ખાતે આયોજિત વિશેષ કાર્યક્રમમાં કેન્દ્રીય મંત્રી સી.આર. પાટીલ, વલસાડના સાંસદ ધવલ પટેલ, રાજ્યના નાણાં મંત્રી કનુ દેસાઈ અને આદિજાતિ મંત્રી નરેશ પટેલની ખાસ ઉપસ્થિતિ રહી હતી. આ પ્રસંગે જિલ્લાના 3,800 જેટલા કુપોષિત બાળકોને આંગણવાડી કાર્યકરો મારફતે ‘સુપોષિત કીટ’ અને TB ના દર્દીઓને આરોગ્યવર્ધક ‘પોષણ કીટ’ નું વિતરણ કરવામાં આવ્યું હતું. શાસન અને સેવાનો આ સમન્વય દર્શાવે છે કે નવસારી વિનમ્રતાથી વડાપ્રધાનના સ્વાગતની સાથોસાથ એક સ્વસ્થ અને સુદ્રઢ સમાજના નિર્માણ તરફ ડગ માંડી રહ્યું છે.

Post Views: 15

રાજકારણ

ભારતના પ્રથમ AI સજ્જ હાઈટેક નવસારી જિલ્લા ભાજપ કાર્યાલય ‘નમો કમલમ’ નું PM નરેન્દ્ર મોદી કરશે લોકાર્પણ

Published

1 month ago

August 27, 2026

Navsari

40 હજાર સ્ક્વેર ફૂટ જગ્યામાં10 કરોડથી વધુના ખર્ચે નિર્માણ પામ્યુ છે આધુનિક નમો કમલમ

નવસારી : દેશના રાજકીય ઈતિહાસમાં એક સુવર્ણ અધ્યાય ઉમેરાવા જઈ રહ્યો છે. સામાન્ય રીતે કોઈ પણ રાજકીય પક્ષના જિલ્લા કક્ષાના કાર્યાલયનું લોકાર્પણ પ્રાદેશિક નેતાઓના હસ્તે થતું હોય છે, પરંતુ પ્રથમ વખત દેશના વડાપ્રધાન પોતે એક જિલ્લા કાર્યાલયનું લોકાર્પણ કરવા નવસારીના આંગણે આવી રહ્યા છે. આગામી 8 સપ્ટેમ્બરે પ્રધાનમંત્રી નરેન્દ્ર મોદી નવસારીમાંથી પસાર થતા હાઇવે નજીક આકાર પામેલા દેશના પ્રથમ AI સજ્જ અને હાઈટેક કાર્યાલય ‘નમો કમલમ’ નું લોકાર્પણ કરશે, જે નવસારી માટે એક અત્યંત ગૌરવશાળી અને ઐતિહાસિક ક્ષણ બની રહેશે.

હાઈટેક ટેકનોલોજી અને ગ્રીન એનર્જીનો અદ્ભુત સમન્વય

માત્ર પોણા બે વર્ષના વિક્રમી સમયમાં અને અંદાજે 10 કરોડ રૂપિયાથી વધુના ખર્ચે તૈયાર થયેલું આ 40 હજાર સ્ક્વેર ફૂટનું ‘નમો કમલમ’ માત્ર રાજકીય ગતિવિધિઓનું કેન્દ્ર નથી, પરંતુ આધુનિક ભારતનું એક રોલ મોડલ છે. કોર્પોરેટ શૈલીમાં નિર્મિત આ કેમ્પસ હાઇ-સ્પીડ ઇન્ટરનેટ, સોલર પેનલ્સ અને વોટર હાર્વેસ્ટિંગ જેવી પર્યાવરણપૂરક સુવિધાઓથી સુસજ્જ છે. આર્ટિફિશિયલ ઇન્ટેલિજન્સનો કાર્યક્ષમ ઉપયોગ કરીને સંગઠનને વધુ સક્રિય અને સુગ્રથિત બનાવતું આ કાર્યાલય દેશના તમામ રાજકીય કાર્યાલયો માટે આધુનિકતા અને ગ્રીન એનર્જીનું ઉત્કૃષ્ટ ઉદાહરણ પૂરું પાડે છે.

રાજકીય સુસજ્જતા સાથે જનકલ્યાણનો મહાયજ્ઞ

આ ઐતિહાસિક મુલાકાત માત્ર સંગઠનની શક્તિ પ્રદર્શન પૂરતી સીમિત નથી, પરંતુ તેને જનસેવાના મહાયજ્ઞ સાથે જોડવામાં આવી છે. વડાપ્રધાનના આગમનને વધાવવા નવસારી જિલ્લા પ્રશાસન અને ભાજપ સંગઠન દ્વારા જનભાગીદારીથી એક વ્યાપક કલ્યાણકારી ઝુંબેશ ચલાવવામાં આવી રહી છે. TB મુક્ત નવસારી, કુપોષણ નાબૂદી, 350 થી વધુ ગામોમાં સ્વચ્છતા અભિયાન અને સુકન્યા સમૃદ્ધિ યોજના જેવી સરકારી યોજનાઓને ઘર-ઘર સુધી પહોંચાડવામાં આવી રહી છે. એક તરફ હાઇટેક કાર્યાલયની ગૌરવવંતી ભેટ અને બીજી તરફ છેવાડાના માનવી સુધી પહોંચતો સશક્તિકરણનો લાભ – નવસારી આજે દેશ સામે વિકાસ, આધુનિકતા અને સુશાસનનું નવું શિખર સર કરી રહ્યું છે.

Post Views: 30