Connect with us

અપરાધ

રજાની મજા માણતાં દાંડીના દરિયામાં ડૂબેલા ચારેય રાજસ્થાનીઓના મૃતદેહ મળ્યા

Published

on

માતા-પુત્રના દાંડી નજીકથી, જયારે ભાઈ-બહેનના મૃતદેહ બોરસી માછીવાડ નજીકથી મળ્યા

નવસારી : વેકેશન પડતા જ પરિવારો રજાની મજા માણવા પ્રવાસન સ્થળો પર નીકળી પડે છે, નવસારીના ઐતિહાસિક દાંડીના દરિયા કિનારે પણ મોટી સંખ્યામાં સહેલાણીઓ આવતા હોય છે. ત્યારે ગત રોજ મુળ રાજસ્થાનનો પરિવાર દાંડી ફરવા ગયો હતો, જેમાંથી દરિયાના પાણીમાં રજાની મજા માણી રહેલા 4 સભ્યો ડૂબીને તણાઇ ગયા હતા. જેમાં માતા પુત્રના મૃતદેહ આજે વહેલી સવારે દાંડી નજીકથી મળ્યા હતા. જયારે ભાઈ અને બહેનના મૃતદેહ દાંડીથી દૂર પૂર્ણા નદીની ખાડીમાં બોરસી માછીવાડ નજીકથી મળ્યા હતા. ચારેય મૃતકો મળતા પરિવાર અને સંબંધીઓમાં શોકની કાલીમા છવાઈ હતી.

ગોપાલ વર્માનો માળો વિખેરાયો, ફરવા આવેલી ભાણેજ પણ ખોઇ

મુળ રાજસ્થાનના ભીલવાડા જિલ્લાના લાછુડા ગામના વતની ગોપાલ વર્મા વર્ષ 2005 માં રોજગારની શોધમાં નવસારી આવ્યા હતા અને નવસારી તાલુકાના અષ્ટગામ નજીકના નવા તળાવ ગામે વસ્યા હતા. ગોપાલ વર્મા અષ્ટગામથી સદલાવ જવાના માર્ગ પર કરીયાણાની નાની દુકાન સાથે ડ્રાઈવીંગ કરી પોતાના પરિવારનું ગુજરાન ચલાવતો હતો. જેના બે પુત્રોમાંથી 17 વર્ષીય યુવરાજસિંહ રાજસ્થાન રહીને ભણી રહ્યો હતો, જયારે નાનો પુત્ર દેશરાજસિંહ તેની સાથે જ રહેતો હતો. પરીક્ષાનું રીઝલ્ટ આવ્યા બાદ અને શાળામાં વેકશન પડતા યુવરાજસિંહ તેની માસીની દીકરી દુર્ગાકંવર રાવણા રાજપૂત, તેની ભાભી રેખાકંવર સાથે નવસારી આવ્યો હતો. વેકેશન હોવાથી વર્મા પરિવારે ગત રોજ નવસારીના ઐતિહાસિક દાંડીના દરિયા કિનારે ફરવા જવાનો પ્લાન બનાવ્યો હતો. જેમાં ગોપાલનો મિત્ર કિશન ગુર્જર, તેની દીકરી મમતા અને પુત્ર શિવમ અને કિશનનો ભાણેજ પરેશ સાથે જોડાયા હતા. તમામ બપોરે 12 વાગ્યા આસપાસ નીકળ્યા હતા અને દાંડી પહોંચતા યુવરાજ, દેશરાજ સહિતના લોકો દોઢ કિલોમીટર દૂર દરિયામાં જવા નીચે ઉતર્યા હતા, જેમાં શિવમ અને પરેશ કિનારે જ બેઠા હતા. દરમિયાન બપોરના આકરા તાપમાં રાહત મેળવવા વર્મા પરિવારના લોકો દરિયામાં નાહવા પડ્યા હતા. દરમિયાન અંદાજે 1 થી દોઢ વાગ્યા આસપાસ ભરતી શરૂ થતા વર્મા પરિવારના યુવરાજ, દેશરાજ, તેની માતા સુશીલા અને ભાણેજ દુર્ગા દરિયાના પાણીમાં તણાવા લાગ્યા હતા. જેથી અન્ય સભ્યોએ તેમને બચાવવા માટે બૂમાબૂમ કરી હતી, જેને સાંભળી હોમગાર્ડ જવાનો દોડ્યા પણ ઝડપથી વધેલા પાણીમાં ચારેય લોકો તણાઇને ગુમ થયા હતા.

દરિયામાં ડૂબેલા ચારેયને શોધવા ફાયર બ્રિગેડ, મરીન કમાન્ડો અને SDRF ને કામે લગાડાઈ

ઘટનાની જાણ થતા તંત્રના ઉચ્ચ અધિકારીઓ સહિત નવસારી વિજલપોર પાલિકાના ફાયર બ્રિગેડના જવાનો ઘટના સ્થળે પહોંચ્યા હતા અને દરિયામાં ગુમ થયેલા રાજસ્થાની પરિવારના ચારેય લોકોને શોધવાનો પ્રયાસ કર્યો હતો. સ્પીડ બોટ લઇને દરિયામાં ગયા બાદ પણ ફાયરના જવાનોને ચારેયમાંથી એક પણ મળી ન આવતા તેઓ કિનારે પરત ફર્યા હતા. દાંડી પહોંચેલા કલેકટરે ડીઝાસ્ટર વિભાગને જાણ કરી, મરીન કમાન્ડો અને SDRF ના જવાનોની ટીમ બોલાવી સર્ચ ઓપરેશનને વેગ આપ્યો હતો. જેમાં 15 કલાકની મહેનત બાદ દાંડી નજીકના ફાર્મ હાઉસ પાસેથી યુવરાજ અને બાબા સ્વામી આશ્રમના પાછળથી સુશીલા વર્માનો મૃતદેહ મળ્યો હતો. જેની સાથે જ શોધખોળ કરનારી એક ટૂકડીને બોરસી માછીવાડ ગામ પાસેની પૂર્ણા નદીની ખાડીમાં મૃતદેહો દેખાયા હોવાની માહિતી મળતા, એક ટૂકડી દાંડીથી સ્પીડ બોટ મારફતે ખાડીઅ પહોંચી હતી અને ત્યાંથી દેશરાજ વર્મા અને દુર્ગા રાવણા રાજપૂતનાં મૃતદેહને શોધીને નવસારી સિવિલ હોસ્પિટલ મોકલ્યા હતા. દાંડીમાં જીવ ગુમાવનારા ચારેયના મૃતદેહોનું પોસ્ટમોર્ટમ કરાવી, તેમને મોડી સાંજે પરિવારજનોને સોંપવામાં આવ્યા હતા.

દરિયામાં જીવ ગુમાવનાર ચારેય મૃતદેહ રાજસ્થાન લઇ જવાની કરાઈ તૈયારી

પોતાના સ્વજનોના ગુમાવવાના દુઃખ સાથે ગોપાલ વર્માના સંબંધીઓએ તમામની અંતિમ ક્રિયા રાજસ્થાન તેમના વતનમાં કરવાનો નિર્ણય કર્યો હતો. જેથી માતા બે પુત્રો અને ભાણેજના મૃતદેહોને રાજસ્થાન લઇ જવા લાકડાની ચાર પેટી બનાવડાવી હતી અને તેને રાજસ્થાન લઇ જવા માટેની તમામ વ્યવસ્થા ગોઠવી દીધી હતી. બપોર બાદ જયારે ચારેયના મૃતદેહો મળ્યા, બાદ તેમને લાકડાની પેટીમાં મુકીને પ્રથમ ગોપાલ વર્માના નવસારીના નવા તળાવ ખાતેના ઘરે લઇ જવામાં આવ્યા હતા. ગામમાં મૃતદેહો પહોંચતા જ ગ્રામજનો તેમજ મોટી સંખ્યામાં રાજસ્થાનીઓ ભેગા થયા હતા અને ચારેય મૃતકોને અંતિમ વિદાય આપી હતી.

તંત્ર દ્વારા આજે પણ સહેલાણીઓ માટે દરિયા કિનારે પ્રતિબંધ લગાવાયો

ઐતીસસિક દાંડીના દરિયા કિનારે રવિવાર અને વેકેશનની રજાને કારણે ગત રોજ અંદાજે 5 હજાર લોકોની ભીડ જામી હતી. જેમાં દરિયા વિષેની માહિતી ન હોવાને કારણે દોઢ કિલોમીટર અંદર જઈ મજા માણી રહેલા પરિવારોમાંથી 7 લોકો દરિયાના પાણીમાં તણાવા લાગ્યા હતા, જેમાંથી 3 ને બચાવી લેવાયા હતા, જયારે 4 ડૂબી ગયા હતા. ઘટનાને જોતા ગત રોજ સાંજે જ તંત્ર દ્વારા દરિયા કિનારો ખાલી કરાવી દેવામાં આવ્યો હતો. જયારે આજે પણ સહેલાણીઓ માટે દાંડીના દરિયા કિનારે પ્રવેશ બંધ રાખવામાં આવ્યો હતો.

અપરાધ

ખારેલ બ્રિજ પાસેથી 3.40 લાખના દારૂ ભરેલ ટેમ્પો સાથે ચાલક પકડાયો

Published

on

By

ગણદેવી પોલીસે કુલ 5.95 લાખથી વધુનો મુદ્દામાલ જપ્ત કર્યો

નવસારી : દક્ષિણ ગુજરાતમાં દારૂની ગેરકાયદે હેરાફેરી પર અંકુશ મેળવવા માટે પોલીસ દ્વારા સતત વોચ અને મોનિટરિંગ રાખવામાં આવતું હોય છે. આ ઝુંબેશના ભાગરૂપે ગણદેવી પોલીસ સ્ટેશનની ટીમે ચોક્કસ બાતમીના આધારે ખારેલ ઓવરબ્રિજ નીચેથી 3.40 લાખથી વધુની કિંમતના વિદેશી દારૂના જથ્થા સાથે એક ટેમ્પો ચાલકની ધરપકડ કરી હતી. પોલીસે વાહન તથા અન્ય સામગ્રી મળી કુલ 5.95 લાખનો મુદ્દામાલ કબ્જે કરી કાયદેસરની કામગીરી હાથ ધરી છે.

તાડપત્રી નીચે છુપાવેલો દારૂનો જથ્થો પોલીસે શોધી કાઢ્યો

મળતી માહિતી અનુસાર, ગણદેવી પોલીસના PI એન. આઈ. રાઠોડ અને PSI એન.એ. પટેલની માર્ગદર્શિકા હેઠળ ખારેલ આઉટ પોસ્ટના કર્મચારીઓ પેટ્રોલીંગમાં હતા. તે દરમિયાન PSI એન.એ. પટેલ તથા ASI નિલેશભાઈને મળેલી સચોટ બાતમી આધારે ખારેલ ઓવરબ્રિજ પાસે વોચ ગોઠવવામાં આવી હતી. સેલવાસ અને વાપી તરફથી સુરત જઈ રહેલા ટેમ્પોને રોકીને તપાસ કરતા, બ્લ્યુ કલરની તાડપત્રી હેઠળ છુપાવેલ 3.40 લાખ રૂપિયાની વ્હિસ્કી તથા બિયરની કૂલ 1152 બાટલીઓ મળી આવી હતી.

ઉમરગામના ચાલકની ધરપકડ, વડોદરાના બે આરોપી વોન્ટેડ

પોલીસે ઘટના સ્થળેથી ટેમ્પો ચાલક અને વલસાડ જિલ્લાના ઉંમરગામ ખાતે રહેતા મૂળ મધ્યપ્રદેશના 27 વર્ષીય નરેન્દ્રસીંગ પરસ્તેની સ્થળ પરથી ધરપકડ કરી હતી. પૂછપરછ દરમિયાન દારૂનો આ જથ્થો ભરી આપનાર વડોદરાના સોનુસીંગ અને મંગાવનાર ‘કાકા’ નામના શખ્સનું નામ ખુલતા પોલીસે આ બંને વોન્ટેડ આરોપીઓ સામે પણ પ્રોહિબિશન એક્ટ મુજબ ગુનો નોંધી વધુ તપાસ હાથ ધરી છે.

Continue Reading

અપરાધ

નવસારીમાં ખનન માફિયાઓ પર ભૂસ્તર વિભાગની સર્જિકલ સ્ટ્રાઈક : અંબિકા નદીમાં ડ્રોનથી ગેરકાયદે રેતી ચોરી પકડી

Published

on

By

જિલ્લામાં પ્રથમવાર આધુનિક ટેકનોલોજીથી મેગા ઓપરેશન : 2.25 કરોડનો મુદ્દામાલ જપ્ત

નવસારી : નવસારી જિલ્લામાં કુદરતી સંપત્તિની લૂંટ ચલાવતા ખનન માફિયાઓ સામે ખાણ ખનીજ વિભાગે અત્યાર સુધીની સૌથી મોટી અને અભૂતપૂર્વ કાર્યવાહી કરી હતી. જિલ્લા કલેક્ટરના સીધા માર્ગદર્શન હેઠળ ભૂસ્તર વિભાગે નવસારીમાં પ્રથમ વખત ડ્રોન કેમેરા ટેકનોલોજીનો ઉપયોગ કરી અંબિકા નદીના પેટાળમાં ચાલતા કાળા કારોબારનો પર્દાફાશ કર્યો છે. ગણદેવી તાલુકાના બીલીમોરા સ્મશાન નજીકથી બાજની મદદથી ગેરકાયદે થતા રેતી ખનનને પકડી 2.25 કરોડનો મુદ્દામાલ જપ્ત કર્યો હતો. ખાણ ખનીજ વિભાગની સર્જિકલ સ્ટ્રાઇકથી ખનન માફિયાઓમાં ભારે ફફડાટ વ્યાપી ગયો છે.

બીલીમોરા સ્મશાન ભૂમિ પાછળથી ચાલતા કાળા કારોબાર પર ડ્રોનનું ‘હવાઈ સર્વેલન્સ’

નવસારી ભૂસ્તરશાસ્ત્રી પી. આર. ખાંભલાના માર્ગદર્શન હેઠળ ભૂસ્તરવિજ્ઞાન અને ખનિજ વિભાગની ક્ષેત્રીય ટીમ દ્વારા અંબિકા નદીપટ્ટમાં એક ગુપ્ત સર્ચ ઓપરેશન ગોઠવવામાં આવ્યું હતું. રોયલ્ટી ઇન્સ્પેક્ટર દિવ્યાંત શિરોયા, માઇન્સ સુપરવાઇઝર સંદીપ રાઉત અને સ્પેશિયલ ડ્રોન ટીમે ગણદેવી તાલુકાના બીલીમોરા ગામની સ્મશાન ભૂમિ પાછળથી પસાર થતી અંબિકા નદીના દુર્ગમ વિસ્તારમાં દરોડો પાડ્યો હતો. ટીમે આધુનિક ડ્રોન સર્વેલન્સની મદદથી નદીના પેટાળમાંથી યાંત્રિક બાજ (બોટ) વડે ચાલી રહેલા ગેરકાયદેસર રેતી ખનન પદ્ધતિને રંગેહાથ ઝડપી પાડીને માફિયાઓના મનસુબા પર પાણી ફેરવી દીધું હતું.

ગેરકાયદે ખનન કરનારા માફીયાઓ સામે ધોલાઈ મરીન પોલીસ સ્ટેશનમાં નોંધાવી ફરિયાદ

આ હાઇ-ટેક દરોડા દરમિયાન ખાણ ખનીજ વિભાગની ટીમે સ્થળ પરથી ગેરકાયદેસર રેતી ખનનમાં વપરાતા 2 અત્યાધુનિક યાંત્રિક બાજ અને રેતીની હેરાફેરીમાં સંકળાયેલા 11 ટ્રકો મળીને કુલ 2.25 કરોડ રૂપિયાનો મુદ્દામાલ જપ્ત કર્યો હતો. સાથે જ જપ્ત કરાયેલા તમામ વાહનો અને સાધનોને આગળની કાનૂની કાર્યવાહી માટે ધોલાઈ મરીન પોલીસ સ્ટેશનના હવાલે કરી દેવામાં આવ્યા છે. તંત્ર દ્વારા કસૂરદારો સામે ‘ગુજરાત મિનરલ (પ્રિવેન્શન ઓફ ઇલ્લીગલ માઇનિંગ, ટ્રાન્સપોર્ટેશન એન્ડ સ્ટોરેજ) રૂલ્સ 2017’ હેઠળ ગુનો નોંધાવી, ગેરકાયદે ખનન નેટવર્કના મૂળ સુધી પહોંચવાની કવાયત તેજ કરવામાં આવી છે.

Continue Reading

અપરાધ

નેશનલ હાઈવે પર બલવાડા પાસેથી 3.50 લાખનો દારૂ ભરેલ કાર સાથે બેની ધરપકડ

Published

on

By

લકઝરી કારથી પાયલોટીંગ કરનાર મુખ્ય સૂત્રધાર સહિત બે વોન્ટેડ

નવસારી : નવસારી જિલ્લામાંથી રોજના લાખો રૂપિયાનો વિદેશી દારૂ સુરત તેમજ આગળના જિલ્લાઓમાં ખેપિયાઓ દ્વારા પહોંચાડવામાં આવે છે. ત્યારે ચીખલી પોલીસે લક્ઝરીયસ કારમાં દારૂની હેરાફેરીનો પર્દાફાશ કર્યો છે. નેશનલ હાઇવે નં. 48 પર બલવાડા ઓવરબ્રીજ નજીકથી 3.50 લાખનો વિદેશી દારૂ ભરેલ કાર સાથે વલસાડના બે ખેપિયાઓની ધરપકડ કરી હતી. જ્યારે દારૂની કારનું પાયલોટિંગ કરતી લકઝરી કારમાં સવાર મુખ્ય સૂત્રધાર સાથે બેને વોન્ટેડ જાહેર કર્યા છે.

સેલવાસથી દારૂનો જથ્થો ભરી કડોદરા સપ્લાય કરવાનો ખેલ પકડાયો

મળતી માહિતી અનુસાર, ચીખલી પોલીસના PI પી.બી. પટેલીયાના માર્ગદર્શન હેઠળ સર્વેલન્સ ટીમના PSI આર.એન. વાડલે અને કર્મચારીઓ ખાનગી વાહનોમાં હાઈવે પર પેટ્રોલીંગમાં હતા. દરમીયાન સર્વેલન્સ ટીમના ASI અલ્પેશભાઈ અને HC મહેન્દ્રભાઈને મળેલ સંયુક્ત બાતમીના આધારે, નેશનલ હાઈવે નં. 48 પર બલવાડા ઓવરબ્રીજના ઉત્તર છેડે વોચ ગોઠવવામાં આવી હતી. આ દરમીયાન શંકાસ્પદ રીતે પસાર થતી એક સફેદ રંગની કારને પોલીસે આંતરી, તેને અટકાવી હતી. કારમાં તપાસ કરતા તેમાંથી 3,50,640 રૂપિયાની 25 પુંઠાના બોક્સમાંથી વ્હિસ્કી તથા ટીન બિયર મળી કુલ 1020 બાટલીઓ મળી આવી હતી. પોલીસે ઘટના સ્થળેથી 5 લાખની કાર, 2 મોબાઈલ અને દારૂ મળી કુલ 8.61 લાખનો મુદ્દામાલ જપ્ત કરી, કારચાલક અને વલસાડના ઉદવાડા તાલુકાના સરોધી ગામે રહેતા મીતકુમાર ઉર્ફે મીતલો માહ્યાવંશી અને વલસાડના વાપી તાલુકાના બલીઠા ગામે રહેતા અક્ષયકુમાર રાઠોડની સ્થળ પરથી ધરપકડ કરી હતી.

લકઝરી કાર વડે પાયલોટીંગ કરનાર નવસારીનો બુટલેગર ‘આઝાદ લંગડો’ વોન્ટેડ જાહેર

પોલીસની કડક પૂછપરછમાં આરોપીઓએ ખુલાસો કર્યો હતો કે, આ વિદેશી દારૂનો જથ્થો સેલવાસથી ભરીને સુરતના કડોદરા ખાતે સપ્લાય કરવાનો હતો. આ સમગ્ર રેકેટનો મુખ્ય સૂત્રધાર નવસારીના લક્ષ્મી ટોકીઝ પાછળ રહેતો નસીમુદ્દીન ઉર્ફે ‘આઝાદ લંગડો’ છે, જેણે સેલવાસથી દારૂ ભરાવ્યો હતો અને પોતાની લકઝરી કાર વડે આગળ પાયલોટીંગ કરી દારૂનો જથ્થો સુરત તરફ રવાના કરાવ્યો હતો. ચીખલી પોલીસે દારૂનો જથ્થો સપ્લાય કરનાર મુખ્ય આરોપી આઝાદ લંગડો તેમજ કડોદરા ખાતે દારૂ મંગાવનાર અજાણ્યા બુટલેગર સામે પ્રોહિબિશન એક્ટ હેઠળ ગુનો નોંધી બંનેને વોન્ટેડ જાહેર કરી, તપાસને વેગ આપ્યો છે.

Continue Reading
Advertisement

Trending