Connect with us

દક્ષિણ-ગુજરાત

ખાડાનગરી બની નવસારી, ખાડાવાળા રસ્તાનો મુદ્દો પાલિકાની સામાન્ય સભામાં ગાજ્યો

Published

on

પાલિકાના પૂર્વ પ્રમુખે જ ખાડાવાળા રસ્તાની યાદી બનાવી, કોન્ટ્રાકટર સામે કાર્યવાહીની કરી રજૂઆત

નવસારી : નવસારી વિજલપોર પાલિકાની આજે મળેલી સામાન્ય સભામાં ખાડાનગરી બનેલી નવસારીના ખાડાવાળા રસ્તાઓ મુદ્દે પાલિકાના પૂર્વ પ્રમુખે જ કોન્ટ્રાકટરની કામગીરી સામે સવાલો ઉભા કર્યા હતા. ખાડાવાળા રસ્તાઓની યાદી બનાવી, કોન્ટ્રાકટરની બેદરકારી સામે આવે, તો તેને બ્લેકલીસ્ટ કરવા સુધીની કાર્યવાહી કરવાની માંગ કરતા, શહેરમાં બનેલા રસ્તાઓની ગુણવત્તા ઉપર સવાલો ઉભા થયા છે. જયારે આજની સામાન્ય સભામાં 10 મિનીટમાં જ શાસકોએ એજન્ડાના 337 કામોને કોઇપણ પ્રકારની ચર્ચા વિના મંજૂરીની મહોર મારી દીધી હતી.

સામાન્ય સભામાં એજન્ડાના અને વધારાના મળી કુલ 337 કામોને બહાલી અપાઇ

નવસારી વિજલપોર પાલિકાના સભા ખંડમાં આજે સંભવત: મહાપાલિકા બનવા પૂર્વેની છેલ્લી સામાન્ય સભા મળી હતી. જેમાં એજન્ડાના 107 કામો ઉપર ચર્ચા થવાની સંભાવના હતી, પરંતુ સભા શરૂ થવા પૂર્વે જ બાંધકામ સમિતિના અંદાજે કરોડો રૂપિયાના 229 કામો વધારાના કામ તરીકે લાવવામાં આવ્યા હતા. સભા શરૂ થવા પૂર્વે રાજકોટ અગ્નિકાંડના મૃતકોને શ્રદ્ધાંજલિ આપવામાં આવી હતી. ત્યારબાદ શરૂ થયેલી સભામાં એક પછી એક સમિતિના ચેરમેનોએ તેમના વિભાગના કામોના આંકડા બોલતા જ તેને સૌએ ટેબલ થપથપાવી મજૂરીની મહોર મારી દીધી હતી. જેથી સભામાં શહેર વિકાસ માટે લાવવામાં આવેલા કરોડોના કામો ઉપર ન તો સમિતિ ચેરમેન કે ન તો પાલિકાના એકપણ નગરસેવકે ચર્ચા કરવાની તસ્દી લીધી હતી.

કર્મચારીઓનું EPF શરૂ કરાવવા ભાજપી નગરસેવકની રજૂઆત

પાલિકાની સામાન્ય સભામાં આંકડાઓ બોલી સભાના એજન્ડાના કામોને મંજૂરી મળ્યા બાદ વોર્ડ નં. 13 ના નગર સેવક અને મોટર ગરેજ સમિતિના ચેરમેન વિજય રાઠોડે પ્રથમ પુરમાં પાલિકાના પદાધિકારી કર્મચારીઓએ કરેલી સારી કામગીરી માટે અભિનંદન પાઠવ્યા હતા. ત્યારબાદ બે દિવસ અગાઉ તેમણે કરેલ ભલામણને જ સૌની સામે મુકી હતી. વિજય રાઠોડે પાલિકાના વિવિધ વિભાગના સ્કીલ અને અનસ્કીલ કર્મચારીઓનું એમ્પ્લોય પ્રોવિડન્ટ ફંડ વહેલી તકે નિયમનોને ધ્યાને રાખી શરૂ કરાવવા રજૂઆત કરી હતી. સાથે જ રાઠોડે શહેરમાં રસ્તાઓ ઉપર પડેલા ખાડાનો મુદ્દો છેડ્યો હતો. ખાડાને કારણે લોકોને હાલાકી વેઠવી પડે છે, ત્યારે પાલિકા વહેલી તકે રસ્તાનું સમારકામ કરાવે એવી માંગ પણ કરી હતી.

ખાડાવાળા રસ્તાઓની યાદી બનાવો, બેદરકારી નીકળે તો કોન્ટ્રાકટરને બ્લેક લીસ્ટ કરો – પૂર્વ પ્રમુખ

નવસારી શહેરમાં ચોમાસાની શરૂઆત થયા બાદ રસ્તાઓ ઉપર ખાડાઓ પડતા નવસારી ખાડાનગરી બની છે. લોકોને ખાડામાંથી પસાર થતા વાહનોમાં નુકશાન અથવા કમરનો દુઃખાવો થવા માંડ્યો છે. શહેરમાં દરવર્ષે કરોડો રૂપિયાના રસ્તા બને છે, પણ ચોમાસુ મધ્યમાં પહોંચે એટલે રસ્તાઓ ઉપર ખાડા પડતા, રસ્તાની ગુણવત્તા ઉપર સવાલો ઉઠે છે. ત્યારે પાલિકાની આજની સામાન્ય સભામાં પાલિકાના પૂર્વ પ્રમુખ અને વોર્ડ નં. 7 ના નગર સેવક જીગીશ શાહે રસ્તાઓ મુદ્દે પોતાની વેદના વ્યક્ત કરી હતી. જીગીશ શાહે શહેરમાં એવો વરસાદ નથી પડ્યો કે ખાડા પડી જાય, જેથી 1 વર્ષ અગાઉ બનેલા રસ્તાઓમાં પણ ખાડા પડ્યા હોય, એવા રસ્તાઓ તેમજ અન્ય ખાડાવાળા રસ્તાઓની યાદી બનાવી, ત્રણ વર્ષના ગેરેંટી પીરીયડમાં હોય તો કોન્ટ્રાકટર પાસે સમારકામ કરાવવા અને ગેરેંટી પીરીયડ પત્યો હોય તો એના માટે ગ્રાન્ટની ફાળવણી કરીને સમારકામ શરૂ કરાવવા માટેની રજૂઆત કરી હતી. પૂર્વ પ્રમુખ જીગીશ શાહની ખાડાવાળા રસ્તાઓ મુદ્દે કરેલી રજૂઆતે રસ્તાઓની ગુણવત્તા અને રસ્તામાં ભ્રષ્ટાચાર થયો હોવાની ચર્ચાઓ જન્માવી હતી. જોકે રસ્તાઓ મુદ્દે યોગ્ય તપાસ થયા બાદ શહેરીજનોને ભરેલા ટેક્સના બદલામાં સારા રસ્તા મળે એવી પાલિકા પરિસરમાં માંગ ઉઠવા પામી હતી.

બેદરકારી દેખાશે તો કોન્ટ્રાકટરને બ્લેક લીસ્ટ કરીશુ – પાલિકા પ્રમુખ

નવસારી વિજલપોર પાલિકાની સામન્ય સભામાં ભાજપના જ બે નગર સેવકોએ શહેરમાં રસ્તાઓ ઉપર પડેલા ખાડાથી શહેરીજનો મુશ્કેલી વેઠી રહ્યા હોવાની ફરિયાદ સાથે રસ્તાના સમારકામ માટેને રજૂઆત કરી હતી. જેમાં પાલિકા પ્રમુખ સોનલ દેસાઇએ શહેરના રસ્તાઓ ઉપર ખાડાઓ પડ્યા હોવાનું સ્વીકાર્યુ હતુ. સાથે જ નગરસેવકોની ટકોર મુદ્દે કોન્ટ્રાકટરોને બોલાવીશું, સાથે જ રસ્તાઓની યાદી બનાવી એમની ચકાસણી કરીશું. જો કોઈ બેદરકારી દેખાશે તો કોન્ટ્રાકટરને બ્લેક લીસ્ટ કરવા તૈયાર હોવાની ખાતરી આપી હતી. હાલ વરસાદ હોવાથી વરસાદ બંધ થતા જ રસ્તાની કામગીરી શરૂ કરવાની હૈયાધરપત પણ આપી છે.

નગરસેવકોએ એક બીજાને અભિનંદન આપતા સામાન્ય સભા અભિનંદન સભા બની

નવસારી વિજલપોર પાલિકાની આજે મળેલી સામાન્ય સભામાં એજન્ડાના કામોને થોડી મિનીટોમાં જ બહાલી આપી દેવામાં આવી હતી. ત્યારબાદ ગત દિવસોમાં પૂર્ણાના પુરની સ્થિતિમાં પાલિકા પ્રમુખ સાથે અન્ય નગરસેવકો પુર અસરગ્રસ્ત વિસ્તારમાં હાજર રહ્યા હવાની વાત કરી, એક એક નગરસેવક અધિકારીને યાદ કરીને નગરસેવકોએ અભિનંદનનો વરસાદ શરૂ કર્યો હતો. પુરની સ્થિતિમાં શહેરીજનો સાથે ઉભા રહેવાની નગરસેવકોની ફરજ હતી, પણ જાણે પોતાનો કિંમતી સમય કાઢીને બોવ મોટો ઉપકાર કર્યો હોય એ પ્રમાણે નગરસેવકોએ અભિનંદન આપીને સામાન્ય સભાને અભિનંદન સભા બનાવી દીધી હતી.

દક્ષિણ-ગુજરાત

વયોશ્રી કેન્દ્ર : નવસારીના આંગણે આશાનું નવું કિરણ

Published

on

By

ગુજરાતના ચોથા PM-DVK કેન્દ્રથી દિવ્યાંગો અને વરિષ્ઠ નાગરિકો માટે સ્વાવલંબન અને સન્માનજનક જીવનનો માર્ગ થશે મોકળો

નવસારી : નવસારી જિલ્લાના ચીખલી ખાતે સબ-ડિસ્ટ્રિક્ટ હોસ્પિટલ પરિસરમાં પ્રધાનમંત્રી દિવ્યાશા-વયોશ્રી કેન્દ્ર (PM-DVK) નો આજથી શુભારંભ થયો છે. આદિજાતિ વિકાસ મંત્રી નરેશ પટેલના હસ્તે ઉદ્ઘાટન કરાયેલું આ સેવાકેન્દ્ર માત્ર એક સરકારી ઉપક્રમ નથી, પરંતુ ઉંમરના ઉત્તરાધાર્ધમાં પહોંચેલા વડીલો અને શારીરિક પડકારોનો સામનો કરતા દિવ્યાંગજનોના જીવનમાં નવી રોશની લાવતો એક સંવેદનશીલ પ્રયાસ છે. જિલ્લા પ્રશાસન અને કલેક્ટર મનીષ ગુરવાનીની અંગત કાળજીના પરિણામે આકાર પામેલું આ કેન્દ્ર હવેથી જરૂરિયાતમંદ નાગરિકોને કાયમી ધોરણે નિઃશુલ્ક સહાયક સાધનો અને આરોગ્ય વિષયક સેવાઓ સ્થળ પર જ ઉપલબ્ધ કરાવશે.

પ્રશાસનિક સંવેદનશીલતા અને નિષ્ઠાનું ઉત્તમ ઉદાહરણ

એક સરકારી યોજના જ્યારે કેવળ કાગળ પર ન રહેતા માનવીય સ્પર્શ મેળવે છે, ત્યારે તે સમાજના છેવાડાના માનવી સુધી પહોંચે છે. જિલ્લા કલેક્ટર મનીષ ગુરવાનીએ વડીલો અને દિવ્યાંગજનોની દૈનિક તકલીફોને પોતાની સમજીને જે સબળ નેતૃત્વ પૂરું પાડ્યું, તેના લીધે જ આ કેન્દ્ર રેકોર્ડ સમયમાં કાર્યરત થઈ શક્યું છે. ભારત સરકારના સામાજિક ન્યાય અને સશક્તિકરણ મંત્રાલય હેઠળની ‘એલીમ્કો’ કંપનીના સહયોગથી શરૂ થયેલા આ કેન્દ્ર માટે કલેક્ટ મનીષ ગુરવાનીએ સતત ફોલોઅપ લીધું હતું. અમદાવાદ, ભાવનગર અને આણંદ બાદ હવે ચીખલી ખાતે શરૂ થયેલું આ ગુજરાતનું ચોથું કેન્દ્ર દર્શાવે છે કે જ્યારે વહીવટીતંત્રમાં ઈચ્છાશક્તિ હોય, ત્યારે પ્રજાકલ્યાણના કાર્યો ઝડપથી આકાર લે છે.

સ્થળ પર જ તપાસ, સારવાર અને સાધનોનું કાયમી નિદાન

ઘણીવાર દિવ્યાંગો કે વયોવૃદ્ધો માટે સાધનો કે આરોગ્ય સેવાઓ મેળવવા દૂર-દૂર સુધી ધક્કા ખાવા અત્યંત કષ્ટદાયક હોય છે. આ કેન્દ્ર તેમની આ પીડાનો કાયમી અંત લાવશે. હવેથી જરૂરિયાતમંદ નાગરિકોને સહાયક સાધનો માટે લાંબી પ્રક્રિયામાંથી પસાર નહીં થવું પડે. PM-DVK કેન્દ્ર ખાતે જ દિવ્યાંગજનો અને વરિષ્ઠ નાગરિકોની જરૂરિયાતોનું નિષ્ણાતો દ્વારા સ્થળ પર જ મૂલ્યાંકન કરવામાં આવશે. અહીં નિઃશુલ્ક સાધન વિતરણ ઉપરાંત, કૃત્રિમ અંગ તથા ઓર્થોસિસ ફિટમેન્ટ, શ્રવણશક્તિની સુક્ષ્મ તપાસ અને શ્રવણયંત્ર (Hearing Aid) સંબંધિત તમામ સેવાઓ એક જ છત નીચે ઉપલબ્ધ કરાવાશે, જે તેમના સ્વાસ્થ્યની સુરક્ષા સુનિશ્ચિત કરશે.

વહીવટી તંત્ર અને સમાજનો સંયુક્ત સંકલ્પ

આ ઉદ્ઘાટન પ્રસંગ માત્ર એક ઔપચારિક કાર્યક્રમ ન રહેતા, સમાજના વંચિત વર્ગ પ્રત્યેની સામાજિક જવાબદારીનો ઉત્સવ બની રહ્યો હતો. કાર્યક્રમમાં ચીખલી પ્રાંત અધિકારી નિશાંત કુગાશીયા, તાલુકા વિકાસ અધિકારી ભાવનાબેન યાદવ, મામલતદાર હિરેનભાઈ સહિતના અધિકારીઓ, પદાધિકારીઓ અને લાભાર્થીઓ ઉપસ્થિત રહ્યા હતા. ત્યારે વયના કારણે શ્રવણશક્તિ ગુમાવી ચૂકેલા વડીલને સાંભળવાની ક્ષમતા પરત મળવી કે ચાલવામાં અસમર્થ દિવ્યાંગને કૃત્રિમ અંગનો ટેકો મળવો, જેનાથી આ કેન્દ્ર આવનારા દિવસોમાં હજારો ચહેરાઓ પર આત્મવિશ્વાસભર્યું સ્મિત લાવવા માટે સજ્જ બન્યું છે.

 

Continue Reading

નવસારી

નવસારી બનશે દેશની પ્રથમ ‘યુનિફોર્મ’ મહાનગરપાલિકા : શહેરમાં એકસરખી લારીઓ હશે

Published

on

By

કેન્દ્રીય મંત્રી સી.આર. પાટીલના હસ્તે લુન્સીકુઈ ચોપાટીના વેપારીઓને 45 આધુનિક સ્ટીલ બોડી લારીઓનું વિતરણ

નવસારી : નવસારી શહેરના નાના વેપારીઓ અને રોજગાર મેળવતા મધ્યમ વર્ગીય પરિવારોની આર્થિક સ્થિતિને સુદ્રઢ બનાવવા તરફ વધુ એક મહત્વપૂર્ણ પગલું ભરવામાં આવ્યું છે. કેન્દ્રીય જળ શક્તિ મંત્રી અને નવસારીના સાંસદ સી. આર. પાટીલના હસ્તે લુન્સીકુઈ ચોપાટીના વેપારીઓને વધુ 45 નવી આધુનિક સ્ટીલ બોડી લારીઓ અર્પણ કરવામાં આવી છે. અગાઉ પ્રધાનમંત્રી નરેન્દ્ર મોદીના નવસારી પ્રવાસ સમયે અપાયેલી 25 લારીઓ સાથે હવે લુન્સીકુઈ ચોપાટીના કુલ 70 લારી ધારકોને સુસજ્જ અને હાઇજેનિક વ્યવસાયિક સુવિધા પ્રાપ્ત થઈ છે. સમગ્ર શહેરમાં તબક્કાવાર 700 એકસરખી સ્ટીલ બોડી લારીઓ આપવાના આયોજન સાથે નવસારી દેશની પ્રથમ ‘યુનિફોર્મ મહાનગરપાલિકા’ બનવા તરફ આગળ વધી રહ્યું છે.

શહેરમાં 700 યુનિફોર્મ લારીઓનો લક્ષ્યાંક, બેંકના સંકલનથી વધુ 100 લારીઓનું આયોજન

પ્રધાનમંત્રી નરેન્દ્ર મોદીની નવસારી મુલાકાત દરમિયાન શહેરના તમામ લારી ધારકો માટે એકસમાન અને આધુનિક વ્યવસ્થા ઊભી કરવાનો સંકલ્પ લેવામાં આવ્યો હતો. તે અંતર્ગત હાથ ધરાયેલા સર્વે મુજબ શહેરમાં કુલ 700 યુનિફોર્મ સ્ટીલ બોડી લારીઓનું તબક્કાવાર વિતરણ કરવાનો લક્ષ્યાંક નિર્ધારિત કરાયો હતો. આ લારીઓ માત્ર સુંદરતા પૂરતી મર્યાદિત નથી, પરંતુ વેપારીઓની જરૂરિયાત મુજબ જરૂરી સુધારા-વધારા, નીચે સ્ટોરેજ સુવિધા અને સરળતાથી સાફ-સફાઈ થઈ શકે તેવું આધુનિક મોડેલ તૈયાર કરવામાં આવ્યું છે. આગામી સમયમાં મહાપાલિકાના મેયર અને બેંક ઓફ બરોડાના સંકલનથી વધુ 100 નવી લારીઓનું લોકાર્પણ કરવામાં આવશે, જેનાથી શહેરની સુંદરતા વધવાની સાથે સ્વચ્છતા અને હાઈજીનમાં પણ મોટો સુધારો જોવા મળશે.

વ્યાજના વિષચક્રમાંથી મુક્તિ અને સ્વમાનભેર રોજગારી : નાના વેપારીઓની અર્થવ્યવસ્થાને મળશે મજબૂત બુસ્ટ

નાના લારી-ગલ્લા ધારકો પોતાના પરિવારનું ગુજરાન ચલાવવા માટે ઘણીવાર પઠાણી કે ઊંચા વ્યાજના વિષચક્રમાં ફસાઈ જતા હોય છે. આ સમસ્યામાંથી મુક્તિ અપાવવા માટે PM સ્વાનિધિ યોજના હેઠળ લારી ધારકોને 15 હજારથી લઈને 50 હજાર સુધીની ખૂબ સરળ બેંક લોન ઉપલબ્ધ કરાવવામાં આવી રહી છે. આ યોજનાકીય લાભો થકી નાના વેપારીઓ આત્મનિર્ભર બનીને પોતાનો વેપાર વધારી શકશે. કેન્દ્રીય મંત્રી સી. આર. પાટીલના આ સઘન પ્રયાસોથી નવસારીના સ્થાનિક અને મધ્યમ વર્ગીય અર્થતંત્રને એક નવી ઊર્જા અને મજબૂત ઇકોનોમિક બુસ્ટ મળવા જઈ રહ્યું છે, જે અન્ય નગરપાલિકાઓ અને મહાનગરપાલિકાઓ માટે પણ એક મોડેલ પૂરવાર થશે.

Continue Reading

શિક્ષણ

નવસારીમાં માસૂમોની સુરક્ષા સામે ખીલવાડ કરનારા સ્કૂલ વાહનચાલકો પર પોલીસ-RTOનું સંયુક્ત ઓપરેશન

Published

on

By

માર્ગ સલામતી સમિતિની બેઠક બાદ કલેક્ટરના આદેશથી દંડાત્મક કાર્યવાહી; 8 વાહનોને દંડ તો 1 સ્કૂલ વાહન ડિટેઈન કરાયું

નવસારી : નવસારી જિલ્લામાં શાળાએ જતા બાળકોની સલામતી સાથે ચેડાં કરતા અને વાહન વ્યવહારના નિયમોનું અનાદર કરતા સ્કૂલ વાહનચાલકો અને બસ સંચાલકો સામે જિલ્લા પોલીસ અને RTO તંત્રએ લાલ આંખ કરી છે. જિલ્લા કલેક્ટરની સીધી સૂચના બાદ હાથ ધરાયેલા આ સરપ્રાઈઝ ચેકિંગ અભિયાનમાં નિયમભંગ કરનારા આઠ વાહનો પાસેથી કુલ 83 હજારનો દંડ વસૂલવામાં આવ્યો હતો, જ્યારે એક વાહનને ઘટનાસ્થળે જ ડિટેઈન કરી કાયદેસરની કાર્યવાહી હાથ ધરવામાં આવી હતી.

કલેક્ટરની કડક સૂચના અને સંયુક્ત ઓપરેશન

બાળ અધિકાર સંરક્ષણ આયોગના ચુકાદા અને બાળકોની સુરક્ષાને પ્રાથમિકતા આપતા નવસારી જિલ્લા કલેક્ટર મનીષ ગુરવાનીના અધ્યક્ષસ્થાને યોજાયેલી જિલ્લા માર્ગ સલામતી સમિતિની બેઠકમાં સ્કૂલ વાહનોના કડક ચેકિંગ અંગે સ્પષ્ટ આદેશો આપવામાં આવ્યા હતા. જેને પગલે ટ્રાફિક પોલીસ અને પ્રાદેશિક વાહન વ્યવહાર (RTO) તંત્રની સંયુક્ત ટીમોએ જિલ્લાની વિવિધ શાળાઓ બહાર તથા મુખ્ય માર્ગો પર તૈનાત થઈ બાળકોની હેરફેર કરતા વાહનોનું સઘન ચેકિંગ હાથ ધર્યું હતું.

દંડાત્મક કાર્યવાહી અને આગામી દિવસોમાં વધુ કડક વલણ

આ આકસ્મિક તપાસ દરમિયાન ફીટનેસ, ક્ષમતા કરતા વધુ બાળકો બેસાડવા તેમજ જરૂરી કાગળોના અભાવ જેવા નિયમભંગ બદલ કુલ 8 વાહનોને ઈ-ચલણ ફટકારી 83,000 નો દંડ વસૂલાયો હતો અને ગંભીર ક્ષતિ ધરાવતા 1 વાહનને ડિટેઈન કરાયું હતું. પ્રાદેશિક વાહન વ્યવહાર અધિકારીએ સ્પષ્ટ ચેતવણી આપી છે કે, માસૂમ બાળકોની સુરક્ષા સાથે કોઈ પણ પ્રકારનું સમાધાન ચલાવી લેવાશે નહીં અને આગામી દિવસોમાં પણ આ પ્રકારની ચેકિંગ ઝુંબેશ વધુ આક્રમક રીતે ચાલુ રહેશે.

Continue Reading
Advertisement

Trending