Connect with us

બિઝનેસ

નવસારીના 2.87 લાખ વીજ ગ્રાહકોને ‘હાઈ-ટેક’ ભેટ : 11.57 કરોડના ખર્ચે બનશે DGVCLની નવી વિભાગીય કચેરીઓ

Published

on

નવસારી શહેર અને ગ્રામ્ય વિભાગીય કચેરીઓનું નાણામંત્રી કનુભાઈ દેસાઈના હસ્તે ખાતમુહૂર્ત

નવસારી : દક્ષિણ ગુજરાત વીજ કંપની લિમિટેડ (DGVCL) દ્વારા નવસારી શહેર અને ગ્રામ્ય વિસ્તારની વિભાગીય કચેરીઓ તેમજ નવસારી ગ્રામ્ય પેટા વિભાગીય કચેરીના 11.57 કરોડ રૂપિયાના ખર્ચે નિર્માણ પામનારા અદ્યતન નવીન ભવનનું રાજ્યના નાણામંત્રી અને નવસારી જિલ્લાના પ્રભારી મંત્રી શ્રી કનુ દેસાઈના હસ્તે ખાતમુહૂર્ત કરવામાં આવ્યું હતું. આદિજાતિ વિકાસ મંત્રી નરેશ પટેલની વિશેષ ઉપસ્થિતિમાં યોજાયેલા આ સમારોહમાં નવસારી શહેર અને ગ્રામ્ય વિસ્તારના કુલ 2.87 લાખથી વધુ વીજ ગ્રાહકોને ઝડપી, પારદર્શક અને આધુનિક સુવિધાઓ પૂરી પાડવાનો સંકલ્પ વ્યક્ત કરાયો હતો.

3085 ચો.મી. માં બનશે અદ્યતન ભવન ; 2.87 લાખ ગ્રાહકોની સુવિધામાં થશે વધારો

દક્ષિણ ગુજરાત વીજ કંપનીની નવસારી શહેર અને ગ્રામ્ય વિભાગીય કચેરીઓ માટે GETCO તરફથી ટૂંકા સમયગાળામાં જમીનની ફાળવણી કરવામાં આવતા હવે 11.57 કરોડના ખર્ચે 3085.48 ચોરસ મીટર બિલ્ટ-અપ એરિયા સાથે (ગ્રાઉન્ડ + ત્રણ ફ્લોર) બે અદ્યતન નવીન ઓફિસ બિલ્ડિંગનું નિર્માણ કરવામાં આવશે. આ નવી કચેરીઓ કાર્યરત થવાથી નવસારી ગ્રામ્ય વિભાગીય કચેરી હેઠળના 188 ગામોના 1,48,320 ગ્રાહકો તેમજ નવસારી શહેર વિભાગીય કચેરી હેઠળના 15 ગામો અને મહાનગરપાલિકા વિસ્તારના 1,39,211 ગ્રાહકો મળી કુલ 2,87,531 વીજ ગ્રાહકોને એક જ છત નીચે ઉત્તમ સેવાઓ મળી રહેશે. સાથોસાથ કચેરીના કર્મચારીઓને પણ આરામદાયક બેઠક વ્યવસ્થા, પેન્ટ્રી અને શુદ્ધ પીવાના પાણી જેવી સુવિધાઓ મળતા તેમની કાર્યદક્ષતામાં નોંધપાત્ર વધારો થશે.

દેશની 70 વીજ કંપનીઓમાં DGVCL અવ્વલ ; સોલાર ઊર્જાથી વીજ કંપનીઓને 155 કરોડનો ફાયદો

ખાતમુહૂર્ત પ્રસંગે નાણામંત્રી કનુ દેસાઈએ DGVCLના અધિકારીઓ અને કર્મચારીઓની પીઠ થાબડતા જણાવ્યું હતું કે, રાજ્યની ચાર વીજ કંપનીઓમાં દક્ષિણ ગુજરાત વીજ કંપનીનો વીજ લોસ સામાન્ય કરતા પણ ઓછો છે અને સમગ્ર ભારતની 70 વીજ કંપનીઓમાં DGVCL અવ્વલ સ્થાન ધરાવે છે, જે સમગ્ર દક્ષિણ ગુજરાત માટે ગૌરવની બાબત છે. તેમણે વધુમાં ઉમેર્યું હતું કે, રાજ્યમાં ‘સૂર્ય ગુજરાત’ અને ‘પીએમ સૂર્ય ઘર મુફ્ત બીજલી’ યોજના હેઠળ સોલાર ઊર્જાનો વપરાશ વધવાથી વીજ કંપનીઓને અંદાજે 155.20 કરોડ રૂપિયાનો સીધો ફાયદો થયો છે, જ્યારે ગ્રાહકોએ પણ પોતાના ઘરની છત પર સોલાર પેનલ લગાવી વધારાની વીજળી વેચીને અંદાજે 1 કરોડ સુધીની આવક મેળવીને આર્થિક સદ્ધરતા હાંસલ કરી છે.

નાણામંત્રીની જીભ લપસી : નવસારીના સાંસદ અને કેન્દ્રીય મંત્રી સી. આર. પાટીલને ‘ધારાસભ્ય’ ગણાવી દીધા

વિકાસના આ મહત્વપૂર્ણ અવસરે પત્રકારોને સંબોધન દરમિયાન રાજ્યના નાણામંત્રી અને નવસારીના પ્રભારી મંત્રી કનુ દેસાઈએ અજાણતામાં મોટો ભાંગરો વાટ્યો હતો. સંબોધનના પ્રવાહમાં મંત્રીએ નવસારીના લોકપ્રિય સાંસદ અને કેન્દ્રીય જળશક્તિ મંત્રી સી. આર. પાટીલનો ઉલ્લેખ ‘નવસારી વિસ્તારના ધારાસભ્ય’ તરીકે કરી દીધો હતો. જિલ્લાના પ્રભારી મંત્રી દ્વારા જ સાંસદ અને કેન્દ્રીય મંત્રીના હોદ્દામાં આ પ્રકારની ચૂક થતા મંચ પર ઉપસ્થિત આગેવાનોમાં ઘડીભર માટે હળવી રમૂજ સાથે ગણગણાટ શરૂ થઈ ગયો હતો. જોકે, વિકાસકાર્યોના ઉત્સાહ વચ્ચે આ પ્રસંગ શહેર-જિલ્લાના રાજકીય વર્તુળોમાં ચર્ચાનો મુખ્ય વિષય બની રહ્યો છે.

દક્ષિણ-ગુજરાત

Blinkit દ્વારા પે આઉટમાં ઘટાડો કરાતા 60 થી વધુ ડિલીવરી કર્મચારીઓની હડતાળ

Published

on

By

સ્થાનિક મેનેજરને રજૂઆતો બાદ પણ ઉકેલ ન આવતા કર્મચારીઓ હડતાળ પર ઉતર્યા

નવસારી : નવસારી શહેરમાં લોકોના ઘરે ઘરે સમાન પહોચાડતી ઈ કોમર્સ કંપની Blinkit દ્વારા નવસારીમાં કામ કરતા ડિલીવરી કર્મચારીઓના પે આઉટમાં કિલોમીટર અનુસાર 3 રૂપિયા કે તેનાથી વધારે ઘટાડો કરી દેતા ડિલીવરી કર્મીઓએ મેનેજરને રજૂઆતો કરી હતી, પરંતુ બે મહિના વીતવા છતાં પણ કંપની દ્વારા કોઈ ઉકેલ ન લાવતા 60 થી વધુ ડિલીવરી કર્મચારીઓએ હડતાળ કરી ન્યાયની માંગ કરી હતી.

હડતાળ સામે Blinkit કંપની પણ અડગ, સુરતથી હંગામી ડિલીવરી કર્મીઓ બોલાવ્યા

ભારતમાં ખુબ ઝડપથી વિકાસ પામી રહેલી કરિયાણાથી લઇ નાનામાં નાની વસ્તુ પણ લોકોના ઘરે પહોંચાડનારી ઈ કોમર્સ કંપની Blinkit દ્વારા નવસારીમાં પણ પોતાની સર્વિસ શરૂ કરવામાં આવી છે. જેમાં છેલ્લા 11 મહિનામાં નવસારીમાં 60 થી વધુ ડિલીવરી કર્મચારીઓ જોડાયા છે. જેમને કંપની દ્વારા કિલોમીટર અનુસાર પ્રતિ ઓર્ડર પે આઉટ આપવામાં આવે છે. જેમાં લાંબા અંતરે પ્રતિ ઓર્ડર 15 રૂપિયા, જયારે નજીકની ડિલીવરીમાં પ્રતિ ઓર્ડર 12 રૂપિયા આપવામાં આવતા હતા. પરંતુ છેલ્લા થોડા મહિનામાં કંપની દ્વારા ડિલીવરી કર્મચારીઓના પે આઉટમાં 3 રૂપિયા કે તેથી વધુનો ઘટાડો કરતા કર્મચારીઓમાં નારાજી વ્યાપી હતી. પે આઉટ ઘટાડતા કર્મચારીઓને મહીને અંદાજે 10 હજાર જેટલાનું નુકશાન થઇ રહ્યું છે, જે મુદ્દે ડિલીવરી કર્મીઓએ સ્થાનિક મેનેજરને રજૂઆત કરી, તેમની વાત કંપનીના ઉચ્ચ અધિકારીઓ સુધી પહોંચાડી હતી. પરંતુ કંપની દ્વારા તેમની વાતને ધ્યાને ન લેતા આજે Blinkit માટે કામ કરતા 60 થી વધુ ડિલીવરી કર્મીઓ હડતાળ પર ઉતરી ગયા હતા. સાથે જ કર્મચારીઓએ તેમનો પે આઉટ અગાઉ મુજબ કરવાની માંગ કરી હતી. બીજી તરફ ડિલીવરી કર્મીઓ હડતાળ પર ઉતર્યાની જાણ થતા જ કંપની દ્વારા સુરતથી ડિલીવરી કર્મચારીઓને પ્રતિ ઓર્ડર 100 રૂપિયા આપીને નવસારી બોલાવ્યા હતા. જેને લઈને સ્થાનિક કર્મચારીઓએ ઉગ્ર વિરોધ નોંધાવ્યો હતો. જોકે આ મુદ્દે કંપની દ્વારા કોઈ સુખદ ઉકેલ લાવવામાં આવ્યો હોવાની માહિતી મળી નથી.

Continue Reading

દક્ષિણ-ગુજરાત

નવસારી મનપાનો નવતર પ્રયોગ : ‘દેવ પ્રસાદી’ ફૂલોની સુવાસ હવે ઘરે ઘરે..!

Published

on

By

રોજના 700 કિલો ફૂલો ભેગા કરી, સફાઈકર્મી મહિલાઓ બનાવશે સુગંધી અગરબત્તી

નવસારી : ધાર્મિક સ્થળો અને લોકો દ્વારા ફેંકી દેવાતા સેંકડો કિલોગ્રામ ફૂલ-હારનો સદ્દઉપયોગ કરીને, નવસારી મહાનગર પાલિકાએ (NMC) એક પ્રશંસનીય ‘ગ્રીન પ્રોજેક્ટ’ શરૂ કર્યો છે. આ પ્રોજેક્ટ હેઠળ, ભગવાનને અર્પણ કરાયેલા ફૂલોમાંથી ઉત્તમ ગુણવત્તાની અગરબત્તીઓ બનાવવામાં આવી રહી છે, જેની સાથે સફાઈ કર્મી મહિલાઓને આર્થિક રીતે સશક્ત કરવાનો પણ ઉમદા પ્રયાસ હાથ ધરાયો છે.

નદી પ્રદૂષણ અટકાવવા અને ધાર્મિક લાગણી જાળવવા પહેલ

નવસારી શહેરમાં ધાર્મિક સ્થળો અને સ્મશાનમાં રોજના સેંકડો કિલો ફૂલ અને હારનો ઉપયોગ થાય છે. આ ફૂલો મોટાભાગે કચરામાં કે નદીમાં પધરાવવામાં આવતા હોવાથી, નદી પ્રદૂષણ એક ગંભીર સમસ્યા બની રહી હતી. આ સમસ્યાના નિવારણ અને ‘દેવ પ્રસાદી’ ની ધાર્મિક લાગણી જાળવવાના ઉદ્દેશ્ય સાથે મહાનગર પાલિકાના સેનેટરી વિભાગે આ પ્રોજેક્ટ શરૂ કર્યો છે. જેમાં નવસારી શહેરના મંદિર, મસ્જિદ, ગુરુદ્વારા અને ચર્ચ મળી 78 ધાર્મિક સ્થળો તેમજ સ્મશાન ભૂમિમાંથી રોજના અંદાજે 700 કિલોગ્રામ ફૂલ-હાર મહાપાલિકાના વિશેષ વાહન દ્વારા એકત્ર કરવામાં આવે છે. જેનેરિંગરોડ સ્થિત ગોડાઉનમાં લાવ્યા બાદ, સફાઈ કર્મી મહિલાઓ દ્વારા તેને છૂટા પાડી, સૂકવીને મશીનમાં ક્રશ કરી પાવડર બનાવવામાં આવે છે. આ ફૂલોના પાવડરને અન્ય સામગ્રી સાથે મિક્સ કરીને પેસ્ટ બનાવવામાં આવે છે, જેમાંથી અગરબત્તીઓ તૈયાર થાય છે.

સફાઈ કર્મી મહિલાઓને ‘આવક’ અને ‘નવી ઓળખ’

આ પ્રોજેક્ટથી સફાઈ કર્મી મહિલાઓના જૂથને રોજગારી મળી છે. અત્યાર સુધીમાં આ મહિલાઓએ 3 હજારથી વધુ અગરબત્તીઓ બનાવી છે. પ્રારંભિક તબક્કે આ અગરબત્તીઓનું વિતરણ મનપાના વિવિધ વિભાગોમાં કરાશે. ત્યારબાદ, દિવાળીના તહેવાર નિમિત્તે સ્ટોલ લગાવીને તેનું વેચાણ કરવામાં આવશે. આ ‘અગરબત્તી પ્રોજેક્ટ’ દ્વારા જે ફૂલો ફેંકી દેવાતા હતા, તેની સુવાસ હવે લોકોના ઘરોમાં ફેલાશે. સાથે જ, સફાઈ કર્મી મહિલાઓને તેમની આવકમાં વધારો આપવા સાથે સમાજમાં એક નવી ઓળખ અને સન્માન પણ મળશે.

Continue Reading

દક્ષિણ-ગુજરાત

નવસારીની ગ્રામીણ કિશોરીઓ માટે ડેકોરેટીવ દિવડા અને મીણબત્તીની તાલીમ યોજાઈ

Published

on

By

તાલીમ થકી યુવાનોને કૌશલ્ય આધારિત લઘુ ઉદ્યોગોને સ્થાપિત કરવા પ્રોત્સાહન આપવાનો પ્રયાસ

નવસારી : અવાનારા સમયમાં શિક્ષણ સાથે કૌશલ્ય હોવું જરૂરી બનશે, ત્યારે નવસારી જિલ્લાની ગ્રામ્ય કિશોરીઓ ગૃહ ઉદ્યોગ થકી પોતાના જીવનસ્તરને સુધારી શકે એવા ઉદ્દેશ્ય સાથે નવસારી કૃષિ વિજ્ઞાન કેન્દ્ર ખાતે ગ્રામીણ કિશોરીઓને દિવાળીમાં ઉપયોગમાં લેવાતા ડેકોરેટિવ દિવડા અને મીણબત્તીની તાલીમ આપવામાં આવી હતી.

જિલ્લાના અલગ અલગ ગામડાઓની 20 કિશોરીઓએ લીધી તાલીમ

ગુજરાત સરકાર દ્વારા ગ્રામીણ વિસ્તારોમાં રોજગારીની તકો ઉભી કરવા અને યુવાનોને આંતરિક કૌશલ્ય થકી આત્મનિર્ભર બનાવવા માટે પ્રયાસ થઈ રહ્યા છે. જેમાં કૌશલ્ય વર્ધન આધારિત લઘુ ઉદ્યોગોને સરકાર પ્રોત્સાહિત કરી રહી છે. ત્યારે નવસારી કૃષિ યુનિવર્સિટી અંતર્ગત કૃષિ વિજ્ઞાન કેન્દ્ર દ્વારા આગામી દિવાળીનાં તહેવારોને ધ્યાને રાખી ગ્રામીણ કિશોરીઓ માટે બે દિવસીય ” ડેકોરેટીવ દિવડા અને મીણબતી ” બનાવટની તાલીમનું આયોજન કરવામાં આવ્યું હતું. જેમાં જિલ્લાના અલગ અલગ ગામડાઓની 20 કિશોરીઓએ ભાગ લઈ દિવડા શણગારવા સાથે જ વિભિન્ન રંગ અને પ્રકારની મીણબત્તી બનાવવાની તાલીમ મેળવી હતી.

તાલીમનો હેતુ કિશોરીઓને પગભર બનાવવાનો – સુમિત સાળુંકે

કૃષિ વિજ્ઞાન કેન્દ્રના વડા ડૉ. સુમિત સાળુંકેએ જણાવ્યુ હતું કે, ગ્રામીણ કિશોરીઓ આ તાલીમ મેળવ્યા બાદ જાતે નાના પાયે ઘરગથ્થુ પ્રવૃતિ કરી આર્થિક રીતે સક્ષમ બનશે. તાલીમમાં ગૃહ વિજ્ઞાનનાં વૈજ્ઞાનિક નિતલ પટેલે બનાવટોનાં બજાર વ્યવસ્થાપન વિશે સમજ આપી હતી. જ્યારે તેમજ મછાડ ગામના ફાલ્ગુનીબેને કિશોરીઓને દિવડા શણગાર અને મીણબત્તી બનાવતા શીખવ્યું હતુ.

Continue Reading
Advertisement

Trending