Connect with us

દક્ષિણ-ગુજરાત

બોર્ડ પરીક્ષાનું પરિણામ જાહેર – વિજ્ઞાન પ્રવાહમાં નવસારીની AB સ્કૂલનો દબદબો

Published

on

ધોરણ 12 વિજ્ઞાન પ્રવાહમાં નવસારીનું 85.75 ટકા મતદાન નોંધાયુ

નવસારી : ગુજરાત માધ્યમિક શિક્ષણ બોર્ડ દ્વારા માર્ચમાં લેવાયેલ ધોરણ 12 વિજ્ઞાન પ્રવાહ અને સામાન્ય પ્રવાહની બોર્ડ પરીક્ષાનું આજે પરિણામ ઓનલાઇન જાહેર થયુ છે. નવસારી જિલ્લામાં વિજ્ઞાન પ્રવાહનું પરિણામ 85.75 ટકા ઉંચું આવ્યુ છે. જેમાં ગત વર્ષોની પેટર્ન મુજબ નવસારીની AB સ્કૂલનો દબદબો રહ્યો છે, જિલ્લાના A1 ગ્રેડના 62 વિદ્યાર્થીઓમાંથી 41 વિદ્યાર્થી ફક્ત AB સ્કૂલના જ છે.

નવસારી જિલ્લાના પરીક્ષા અપાનારા 4676 વિદ્યાર્થીઓમાંથી 4010 વિદ્યાર્થીઓ થયા પાસ

વિદ્યાર્થી કાળમાં બોર્ડ પરીક્ષાઓનું ઘણું મહત્વ છે. ખાસ કરીને ધોરણ 10 અને ધોરણ 12 ની બોર્ડ પરીક્ષાઓમાં આવેલ ઉચ્ચત્તમ ગુણ વિદ્યાર્થીનું ભવિષ્ય નક્કી કરે છે. જેમાં પણ ધોરણ 12 ની પરીક્ષા ખુબ જ મહત્વની સાબિત થાય છે. ત્યારે ગત માર્ચ 2024 માં યોજાયેલી ધોરણ 12 વિજ્ઞાન પ્રવાહ અને સામાન્ય પ્રવાહની પરીક્ષાઓનું આજે ગુજરાત માધ્યમિક શિક્ષણ બોર્ડની વેબ સાઈટ ઉપર પરિણામ જાહેર થયુ હતું. બોર્ડ પરીક્ષાનું પરિણામ જાહેર થતા જ નવસારી જિલ્લાની વિજ્ઞાન પ્રવાહની શાળાઓમાં કહીં ખુશી, કહીં ગમ જેવો માહોલ જોવા મળ્યો હતો. નવસારીમાં વિજ્ઞાન પ્રવાહમાં 4682 વિદ્યાર્થીઓ નોંધાયા હતા. જેમાંથી 4676 વિદ્યાર્થીઓએ પરીક્ષા આપી હતી અને એમાંથી 4010 વિદ્યાર્થીઓ પરીક્ષામાં પાસ થયા છે. જેમાંથી A1 ગ્રેડમાં 62 વિદ્યાર્થીઓ ઉત્તીર્ણ થયા છે, જયારે A2 ગ્રેડમાં 364 વિદ્યાર્થીઓએ બાજી મારી છે.

નવસારીની AB સ્કૂલના વિદ્યાર્થીઓનો વિજ્ઞાન પ્રવાહમાં ઉજળો દેખાવ

નવસારી જિલ્લાની ખાનગી શાળાઓમાં અભ્યયાસ અને શિક્ષણને લઇને નવસારીના પરતાપોર સ્થિત આવેલી AB સ્કૂલ બોર્ડ પરીક્ષાના પરિણામોને લઇ પહેલેથી જ આગળ રહી છે. ગત વર્ષોમાં ધોરણ 10 હોય કે ધોરણ 12 બંનેમાં વિદ્યાર્થીઓનો ઉજળો દેખાવ AB સ્કૂલને જિલ્લામાં અવલ્લ નંબરે મુકે છે. ત્યારે આજે જાહેર થયેલા ધોરણ 12 વિજ્ઞાન પ્રવાહનું નવસારી જિલ્લાનું 85.75 ટકા પરિણામ આવ્યુ છે, જેમાંથી AB સ્કૂલનું 94.97 ટકા પરિણામ રહ્યુ છે. શાળાના 894 વિદ્યાર્થીઓએ પરીક્ષા આપી હતી, જેમાંથી 849 વિદ્યાર્થીઓ ઉત્તીર્ણ થયા છે. જેમાંથી શાળાના 41 વિદ્યાર્થીઓ A1 ગ્રેડ સાથે પાસ થયા છે, જયારે 185 વિદ્યાર્થીઓ A2 ગ્રેડ સાથે ઉત્તીર્ણ થતા નવસારી જિલ્લાની વિજ્ઞાન પ્રવાહની શાળાઓમાં AB સ્કૂલનો ઉજળો દેખાવ રહ્યો છે.

સાગર ખેડૂ પરિવારનો ધ્રુવીશ ટંડેલ 96.6 ટકા સાથે શાળામાં પ્રથમ

AB સ્કૂલનો વિદ્યાર્થી ધ્રુવીશ ટંડેલે 500 માર્ક્સમાંથી કુલ 483 માર્ક્સ મેળવી 96.6 ટકા મેળવી શાળામાં પ્રથમ રહી, જિલ્લામાં મોખરે રહ્યો છે. સાગર ખેડૂ પિતાનો દીકરો ધ્રુવીશ જણાવે છે કે, શાળા સાથે માતા-પિતાનો સહયોગ ખુબ રહ્યો. રોજના રિવીઝન કરવુ જરૂરી છે, કારણ જે ભણો છો, એને રીવાઇઝ કરતા રહેશો, તો પાછળ જતા મુશ્કેલી નહીં પડે. સાથે જ વાંચન કરતા લખવાની પ્રેક્ટીસ જરૂરી થઇ જાય છે. શાળામાં 8 કલાક અને ઘરે 5 થી 6 કલાકની સખત મહેનતે આટલા પરિણામ સુધી પહોંચાડ્યો છે. જયારે ભવિષ્યમાં AI એન્જીનીયર બનવાની ઈચ્છા વ્યક્ત કરી હતી.

AB સ્કૂલની ક્રિષા કોરાટ GUJCET પરીક્ષામાં રાજ્યમાં પ્રથમ

નવસારીની AB સ્કૂલ તેના શૈક્ષણિક સાથે જ સ્પર્ધાત્મક પરીક્ષામાં પણ વિદ્યાર્થીઓને અવ્વલ રાખવામાં સફળ રહી છે. બોર્ડ પરીક્ષામાં શાળાના વિદ્યાર્થીઓનો ઉજળો દેખાવ રહ્યો છે. જેની સાથે જ GUJCET પરીક્ષામાં પણ શાળાના 78 વિદ્યાર્થીઓએ 100 થી વધુ માર્ક્સ મેળવ્યા છે. જેમાંથી ક્રિષા કોરાટ 120 માંથી 120 માર્ક્સ મેળવીને રાજ્યમાં પ્રથમ રહી છે. જયારે વિજ્ઞાન પ્રવાહનાં મુખ્ય વિષયોની વાત કરીએ તો ક્રિષાએ બાયોલોજીમાં 100 માંથી 99 માર્ક્સ, ફિઝીક્સમાં 100 માંથી 98 માર્ક્સ અને કેમેસ્ટ્રીમાં 100 માંથી 99 માર્ક્સ મેળવ્યા છે. ક્રિષા પોતાની સફળતાનો શ્રેય તેના માતા-પિતા તેમજ શાળા અને શિક્ષકોને આપે છે. ખાસ કરીને બાયોલોજીમાં NCRT ના પાઠ્યપુસ્તકનું ઘણું મહત્વ હોય છે. ક્રિષાએ પુસ્તકની લાઇન ટૂ લાઇન મોઢે કરવાનો પ્રયાસ કર્યો હતો. ખાસ કરીને શબ્દ ઉપર વધારે ધ્યાન આપ્યુ હતુ. બાયોલોજીમાં ખાસ કરીને કોઇ એક પેરેગ્રાફ કે ટોપિક સમજવાનો પ્રયાસ કરતા હોય છે, પણ ક્રિષાએ મહત્વની લાઇન અલગ તારવી તેનો ચાર્ટ બનાવી યાદ રાખવાનો પ્રયાસ કર્યો હતો. સાથે જ ક્રિષા કૃષિ વૈજ્ઞાનિક બનવા માંગે છે, ઘણા વિદ્યાર્થીઓ બાયોલોજીને કારણે ડોક્ટર કે લેબોરેટરી ટેકનીશ્યન બનવા માંગતા હોય છે, પણ ભારત કૃષિ પ્રધાન દેશ હોવાથી ક્રિષા લોકોને શ્રેષ્ઠ ખોરાક મળી રહે એ માટે કૃષિ ક્ષેત્રમાં પોતાનું યોગદાન આપવા માંગે છે.

દક્ષિણ-ગુજરાત

વયોશ્રી કેન્દ્ર : નવસારીના આંગણે આશાનું નવું કિરણ

Published

on

By

ગુજરાતના ચોથા PM-DVK કેન્દ્રથી દિવ્યાંગો અને વરિષ્ઠ નાગરિકો માટે સ્વાવલંબન અને સન્માનજનક જીવનનો માર્ગ થશે મોકળો

નવસારી : નવસારી જિલ્લાના ચીખલી ખાતે સબ-ડિસ્ટ્રિક્ટ હોસ્પિટલ પરિસરમાં પ્રધાનમંત્રી દિવ્યાશા-વયોશ્રી કેન્દ્ર (PM-DVK) નો આજથી શુભારંભ થયો છે. આદિજાતિ વિકાસ મંત્રી નરેશ પટેલના હસ્તે ઉદ્ઘાટન કરાયેલું આ સેવાકેન્દ્ર માત્ર એક સરકારી ઉપક્રમ નથી, પરંતુ ઉંમરના ઉત્તરાધાર્ધમાં પહોંચેલા વડીલો અને શારીરિક પડકારોનો સામનો કરતા દિવ્યાંગજનોના જીવનમાં નવી રોશની લાવતો એક સંવેદનશીલ પ્રયાસ છે. જિલ્લા પ્રશાસન અને કલેક્ટર મનીષ ગુરવાનીની અંગત કાળજીના પરિણામે આકાર પામેલું આ કેન્દ્ર હવેથી જરૂરિયાતમંદ નાગરિકોને કાયમી ધોરણે નિઃશુલ્ક સહાયક સાધનો અને આરોગ્ય વિષયક સેવાઓ સ્થળ પર જ ઉપલબ્ધ કરાવશે.

પ્રશાસનિક સંવેદનશીલતા અને નિષ્ઠાનું ઉત્તમ ઉદાહરણ

એક સરકારી યોજના જ્યારે કેવળ કાગળ પર ન રહેતા માનવીય સ્પર્શ મેળવે છે, ત્યારે તે સમાજના છેવાડાના માનવી સુધી પહોંચે છે. જિલ્લા કલેક્ટર મનીષ ગુરવાનીએ વડીલો અને દિવ્યાંગજનોની દૈનિક તકલીફોને પોતાની સમજીને જે સબળ નેતૃત્વ પૂરું પાડ્યું, તેના લીધે જ આ કેન્દ્ર રેકોર્ડ સમયમાં કાર્યરત થઈ શક્યું છે. ભારત સરકારના સામાજિક ન્યાય અને સશક્તિકરણ મંત્રાલય હેઠળની ‘એલીમ્કો’ કંપનીના સહયોગથી શરૂ થયેલા આ કેન્દ્ર માટે કલેક્ટ મનીષ ગુરવાનીએ સતત ફોલોઅપ લીધું હતું. અમદાવાદ, ભાવનગર અને આણંદ બાદ હવે ચીખલી ખાતે શરૂ થયેલું આ ગુજરાતનું ચોથું કેન્દ્ર દર્શાવે છે કે જ્યારે વહીવટીતંત્રમાં ઈચ્છાશક્તિ હોય, ત્યારે પ્રજાકલ્યાણના કાર્યો ઝડપથી આકાર લે છે.

સ્થળ પર જ તપાસ, સારવાર અને સાધનોનું કાયમી નિદાન

ઘણીવાર દિવ્યાંગો કે વયોવૃદ્ધો માટે સાધનો કે આરોગ્ય સેવાઓ મેળવવા દૂર-દૂર સુધી ધક્કા ખાવા અત્યંત કષ્ટદાયક હોય છે. આ કેન્દ્ર તેમની આ પીડાનો કાયમી અંત લાવશે. હવેથી જરૂરિયાતમંદ નાગરિકોને સહાયક સાધનો માટે લાંબી પ્રક્રિયામાંથી પસાર નહીં થવું પડે. PM-DVK કેન્દ્ર ખાતે જ દિવ્યાંગજનો અને વરિષ્ઠ નાગરિકોની જરૂરિયાતોનું નિષ્ણાતો દ્વારા સ્થળ પર જ મૂલ્યાંકન કરવામાં આવશે. અહીં નિઃશુલ્ક સાધન વિતરણ ઉપરાંત, કૃત્રિમ અંગ તથા ઓર્થોસિસ ફિટમેન્ટ, શ્રવણશક્તિની સુક્ષ્મ તપાસ અને શ્રવણયંત્ર (Hearing Aid) સંબંધિત તમામ સેવાઓ એક જ છત નીચે ઉપલબ્ધ કરાવાશે, જે તેમના સ્વાસ્થ્યની સુરક્ષા સુનિશ્ચિત કરશે.

વહીવટી તંત્ર અને સમાજનો સંયુક્ત સંકલ્પ

આ ઉદ્ઘાટન પ્રસંગ માત્ર એક ઔપચારિક કાર્યક્રમ ન રહેતા, સમાજના વંચિત વર્ગ પ્રત્યેની સામાજિક જવાબદારીનો ઉત્સવ બની રહ્યો હતો. કાર્યક્રમમાં ચીખલી પ્રાંત અધિકારી નિશાંત કુગાશીયા, તાલુકા વિકાસ અધિકારી ભાવનાબેન યાદવ, મામલતદાર હિરેનભાઈ સહિતના અધિકારીઓ, પદાધિકારીઓ અને લાભાર્થીઓ ઉપસ્થિત રહ્યા હતા. ત્યારે વયના કારણે શ્રવણશક્તિ ગુમાવી ચૂકેલા વડીલને સાંભળવાની ક્ષમતા પરત મળવી કે ચાલવામાં અસમર્થ દિવ્યાંગને કૃત્રિમ અંગનો ટેકો મળવો, જેનાથી આ કેન્દ્ર આવનારા દિવસોમાં હજારો ચહેરાઓ પર આત્મવિશ્વાસભર્યું સ્મિત લાવવા માટે સજ્જ બન્યું છે.

 

Continue Reading

નવસારી

નવસારી બનશે દેશની પ્રથમ ‘યુનિફોર્મ’ મહાનગરપાલિકા : શહેરમાં એકસરખી લારીઓ હશે

Published

on

By

કેન્દ્રીય મંત્રી સી.આર. પાટીલના હસ્તે લુન્સીકુઈ ચોપાટીના વેપારીઓને 45 આધુનિક સ્ટીલ બોડી લારીઓનું વિતરણ

નવસારી : નવસારી શહેરના નાના વેપારીઓ અને રોજગાર મેળવતા મધ્યમ વર્ગીય પરિવારોની આર્થિક સ્થિતિને સુદ્રઢ બનાવવા તરફ વધુ એક મહત્વપૂર્ણ પગલું ભરવામાં આવ્યું છે. કેન્દ્રીય જળ શક્તિ મંત્રી અને નવસારીના સાંસદ સી. આર. પાટીલના હસ્તે લુન્સીકુઈ ચોપાટીના વેપારીઓને વધુ 45 નવી આધુનિક સ્ટીલ બોડી લારીઓ અર્પણ કરવામાં આવી છે. અગાઉ પ્રધાનમંત્રી નરેન્દ્ર મોદીના નવસારી પ્રવાસ સમયે અપાયેલી 25 લારીઓ સાથે હવે લુન્સીકુઈ ચોપાટીના કુલ 70 લારી ધારકોને સુસજ્જ અને હાઇજેનિક વ્યવસાયિક સુવિધા પ્રાપ્ત થઈ છે. સમગ્ર શહેરમાં તબક્કાવાર 700 એકસરખી સ્ટીલ બોડી લારીઓ આપવાના આયોજન સાથે નવસારી દેશની પ્રથમ ‘યુનિફોર્મ મહાનગરપાલિકા’ બનવા તરફ આગળ વધી રહ્યું છે.

શહેરમાં 700 યુનિફોર્મ લારીઓનો લક્ષ્યાંક, બેંકના સંકલનથી વધુ 100 લારીઓનું આયોજન

પ્રધાનમંત્રી નરેન્દ્ર મોદીની નવસારી મુલાકાત દરમિયાન શહેરના તમામ લારી ધારકો માટે એકસમાન અને આધુનિક વ્યવસ્થા ઊભી કરવાનો સંકલ્પ લેવામાં આવ્યો હતો. તે અંતર્ગત હાથ ધરાયેલા સર્વે મુજબ શહેરમાં કુલ 700 યુનિફોર્મ સ્ટીલ બોડી લારીઓનું તબક્કાવાર વિતરણ કરવાનો લક્ષ્યાંક નિર્ધારિત કરાયો હતો. આ લારીઓ માત્ર સુંદરતા પૂરતી મર્યાદિત નથી, પરંતુ વેપારીઓની જરૂરિયાત મુજબ જરૂરી સુધારા-વધારા, નીચે સ્ટોરેજ સુવિધા અને સરળતાથી સાફ-સફાઈ થઈ શકે તેવું આધુનિક મોડેલ તૈયાર કરવામાં આવ્યું છે. આગામી સમયમાં મહાપાલિકાના મેયર અને બેંક ઓફ બરોડાના સંકલનથી વધુ 100 નવી લારીઓનું લોકાર્પણ કરવામાં આવશે, જેનાથી શહેરની સુંદરતા વધવાની સાથે સ્વચ્છતા અને હાઈજીનમાં પણ મોટો સુધારો જોવા મળશે.

વ્યાજના વિષચક્રમાંથી મુક્તિ અને સ્વમાનભેર રોજગારી : નાના વેપારીઓની અર્થવ્યવસ્થાને મળશે મજબૂત બુસ્ટ

નાના લારી-ગલ્લા ધારકો પોતાના પરિવારનું ગુજરાન ચલાવવા માટે ઘણીવાર પઠાણી કે ઊંચા વ્યાજના વિષચક્રમાં ફસાઈ જતા હોય છે. આ સમસ્યામાંથી મુક્તિ અપાવવા માટે PM સ્વાનિધિ યોજના હેઠળ લારી ધારકોને 15 હજારથી લઈને 50 હજાર સુધીની ખૂબ સરળ બેંક લોન ઉપલબ્ધ કરાવવામાં આવી રહી છે. આ યોજનાકીય લાભો થકી નાના વેપારીઓ આત્મનિર્ભર બનીને પોતાનો વેપાર વધારી શકશે. કેન્દ્રીય મંત્રી સી. આર. પાટીલના આ સઘન પ્રયાસોથી નવસારીના સ્થાનિક અને મધ્યમ વર્ગીય અર્થતંત્રને એક નવી ઊર્જા અને મજબૂત ઇકોનોમિક બુસ્ટ મળવા જઈ રહ્યું છે, જે અન્ય નગરપાલિકાઓ અને મહાનગરપાલિકાઓ માટે પણ એક મોડેલ પૂરવાર થશે.

Continue Reading

શિક્ષણ

નવસારીમાં માસૂમોની સુરક્ષા સામે ખીલવાડ કરનારા સ્કૂલ વાહનચાલકો પર પોલીસ-RTOનું સંયુક્ત ઓપરેશન

Published

on

By

માર્ગ સલામતી સમિતિની બેઠક બાદ કલેક્ટરના આદેશથી દંડાત્મક કાર્યવાહી; 8 વાહનોને દંડ તો 1 સ્કૂલ વાહન ડિટેઈન કરાયું

નવસારી : નવસારી જિલ્લામાં શાળાએ જતા બાળકોની સલામતી સાથે ચેડાં કરતા અને વાહન વ્યવહારના નિયમોનું અનાદર કરતા સ્કૂલ વાહનચાલકો અને બસ સંચાલકો સામે જિલ્લા પોલીસ અને RTO તંત્રએ લાલ આંખ કરી છે. જિલ્લા કલેક્ટરની સીધી સૂચના બાદ હાથ ધરાયેલા આ સરપ્રાઈઝ ચેકિંગ અભિયાનમાં નિયમભંગ કરનારા આઠ વાહનો પાસેથી કુલ 83 હજારનો દંડ વસૂલવામાં આવ્યો હતો, જ્યારે એક વાહનને ઘટનાસ્થળે જ ડિટેઈન કરી કાયદેસરની કાર્યવાહી હાથ ધરવામાં આવી હતી.

કલેક્ટરની કડક સૂચના અને સંયુક્ત ઓપરેશન

બાળ અધિકાર સંરક્ષણ આયોગના ચુકાદા અને બાળકોની સુરક્ષાને પ્રાથમિકતા આપતા નવસારી જિલ્લા કલેક્ટર મનીષ ગુરવાનીના અધ્યક્ષસ્થાને યોજાયેલી જિલ્લા માર્ગ સલામતી સમિતિની બેઠકમાં સ્કૂલ વાહનોના કડક ચેકિંગ અંગે સ્પષ્ટ આદેશો આપવામાં આવ્યા હતા. જેને પગલે ટ્રાફિક પોલીસ અને પ્રાદેશિક વાહન વ્યવહાર (RTO) તંત્રની સંયુક્ત ટીમોએ જિલ્લાની વિવિધ શાળાઓ બહાર તથા મુખ્ય માર્ગો પર તૈનાત થઈ બાળકોની હેરફેર કરતા વાહનોનું સઘન ચેકિંગ હાથ ધર્યું હતું.

દંડાત્મક કાર્યવાહી અને આગામી દિવસોમાં વધુ કડક વલણ

આ આકસ્મિક તપાસ દરમિયાન ફીટનેસ, ક્ષમતા કરતા વધુ બાળકો બેસાડવા તેમજ જરૂરી કાગળોના અભાવ જેવા નિયમભંગ બદલ કુલ 8 વાહનોને ઈ-ચલણ ફટકારી 83,000 નો દંડ વસૂલાયો હતો અને ગંભીર ક્ષતિ ધરાવતા 1 વાહનને ડિટેઈન કરાયું હતું. પ્રાદેશિક વાહન વ્યવહાર અધિકારીએ સ્પષ્ટ ચેતવણી આપી છે કે, માસૂમ બાળકોની સુરક્ષા સાથે કોઈ પણ પ્રકારનું સમાધાન ચલાવી લેવાશે નહીં અને આગામી દિવસોમાં પણ આ પ્રકારની ચેકિંગ ઝુંબેશ વધુ આક્રમક રીતે ચાલુ રહેશે.

Continue Reading
Advertisement

Trending